Ulloq katiffissi Jehovamut ataqqinaataatissiuk

1-2. Jehovap katinnerit qanoq isigai?

KATILERPIT? Taamaappat pilluarit! Immaqa aappassiallu katinnissarsi piareersalerut­torparsi. Jehovap aappariin­nissarsi soqutigingaarpaa, kissaatigaalu katiffis­siorluassasusi aappariittullu pilluassasusi.a – Uss 5:18; Erin 3:11.

² Ullormi katiffissinni Jehova ataqqinar­tinneqar­tariaqarpoq. Sooq taamaappa? Aamma qanoq taamaaliorsin­naavisi? Naak allaaserisaq una katittussanut tunnganerugaluartoq najoqqutassiat sammineqartut tamatta iluaqutigisin­naavagut Jehovamik ataqqinar­titseqataanis­satsinnut – katittorsiortunut peqataagaluarutta katinnis­samulluunniit pilersaarusioqataagaluarutta.

SOOQ JEHOVAMUT ATAQQINAATAASSAVA?

3. Aappassiariit katinnis­saminnut pilersaarusior­nerminni suna pingaar­tittariaqarpaat, aamma sooq?

³ Aappassiariit katinnis­saminnut pilersaarusior­nerminni Jehovap najoqqutassiai Biibilimeersut maleruassavaat. Sooq? Jehova aappariinnermik pilersitsisuummat. Taassumami Eva Adamimut nuliassan­ngortippaa. (Mos 1. 1:28; 2:24) Taamaattumik aappassiariit katinnis­saminnut pilersaarusior­nerminni Guutip isumaa pingaar­tittariaqarpaat.

4. Aappassiariit katiffis­saminni Jehovap ataqqinar­tinnissaanut sunik pissutis­saqarpat?

⁴ Ullormi katiffissinni Jehovap isumaata ataqqinissaanut pissutis­saqarluarpusi, taannami Ataatagaarsi qilammiusoq ikinngutiginerpaallugulu. (Hebr 12:9) Qularnan­ngitsumik qanimut attaveqarfigiuarusupparsi. Ajuallatsin­nissaalu kissaatigin­ngilarsi – ingammik ullormi katiffis­sassinni. (Tuss 25:14) Jehovap ilissi pillusi iliuuserisimasarpassui iliuuseriumaagaalu eqqarsaatigigaanni pissusis­samisuun­nginnerpa ullormi katiffis­sassinni ataqqinar­tinneqarnissaa? – Tuss 116:12.

JEHOVA QANOQ ATAQQINAR­TISSINNAAVISIUK?

5. Katittussat Biibili qanoq iluaqutigisin­naavaat?

⁵ Biibilimi ullup katiffiup qanorpiaq ingerlanissaa allaatigineqanngilaq. Aappassiariit pissutsit atukkatik, najugaqarfigisaminni ileqqut namminnerlu inuttut nuannarisatik malillugit katinnissartik pilersaarusiorsin­naavaat. Soorunami aamma nunaminni oqartussaasut inatsisaat malittariaqarpaat. (Mat 22:21) Katinnis­saminnut tunngatillugu aalajangiinerminni najoqqutassianik Biibilimeersunik maleruaappata Jehovap nuannaarutigissavaa. Taamaattumik najoqqutassiat suut eqqarsaatigisariaqarpaat?

6. Sooq aappassiariit aappariinnermut inatsisinik malinnin­nissaat pingaaruteqarpa?

⁶ Inatsisit malissigit. (Rom 13:1, 2) Nunani amerlanerusuni katinneq inatsisitigut atortuulersin­neqarniassammat aappassiariit oqartussaasut malittarisas­siaannik eqqortitsisariaqarput. Pingaaruteqarpoq ilissi nunassinni qanoq peqqussuteqar­neranik misissuinissarsi. Tamatumunnga tunngatillugu nalornis­suteqarussi utoqqaanertanut ikioqqusin­naavusi.b

7. Katinnerup Jehovamut ataqqinaataasup suna ilisarnaatigaa?

⁷ Tamanit ataqqinaataatissiuk. (Kor 1. 10:31, 32) Katiffis­siornissinni pingaaruteqarpoq Jehovamut kiffaan­ngitsut ilaarnagit Guutip anersaavata inerititaasa ersersin­neqarnissaat. (Gal 5:19-26) Siulersuinermut najoqqutassiaq eqqarsaatigalugu uissap akisussaaf­figivaa katiffis­siornerup nuannersuunissaa ataqqinaataanissaalu. Tamanna qanoq qulakkeer­neqarsinnaava? Asannilluni ataqqin­nillunilu Biibilimik tunngavilimmik oqalugiar­toqarpat tamanna aappariinnermut Guutip tunissutaanut qujamasun­nerulersitsissaaq. Najuuttut tamarmik oqalugiaammik pissarsil­luarsin­naapput ersersitsimmat katinnerup qanoq pingaaruteqar­tigineranik pimoorus­sassaaneranillu. Taamaattumik ajornan­ngikkaangat aappassiariit amerlanerit naalagaaf­filersaarfimmi katikkusuttarput. Naalagaaf­filersaarfik atorusuk­kussiuk siusinaarlusi allakkatigut utoqqaaner­taqatigiinnut qinnuteqassaasi.

8. Katittorsiornermi festerniarussi qanoq qulakkeersin­naavisiuk Jehovamut ataqqinaataanissaa? (Romamiut 13:13)

⁸ Romamiut 13:13 atuaruk. Katittorsiornermi festerniarussi suut eqqumaf­figissavisigit? Grækerisut oqaatsimi ‘ingasattumik festernermik’ nutserneqartumi pineqarput imigassar­torpallaarneq unnuarlu tamaat nipilersorneq. (Romamiut 13:13-imut studienote “vilde fester” qallunaatuuaniittoq takuuk). Aalakoor­nartortalinnik sassaal­liiniarussi ingasaas­sisoqan­nginnissaa qulakkeer­niarlugu siumut pilersaarusioritsi.c Nipilersor­toqassappat nipitual­laannginnissaa qulakkiis­savarsi qaaqqusat oqaloqatigiin­niassammata. Nipilersuutit taallaallu misissorsigit qaaqqusanut ajuallaataan­nginnias­sammata.

9. Katittorsiornermi aliikkusersuinermut tunngatillugu suut eqqumaf­figineqar­tariaqarpat?

⁹ Katittorsior­nissinni qaaqqusat ilaat oqaaseqalaassappat? Videunik assinil­luunniit takutitsisoqasava allatigul­luunniit aliikkusersuisoqas­salluni? Tamakkua ullorsiornersi immikkuul­larissuutis­sinnaavaat. Pingaaruteqarporlu saqqummiun­neqartut ineriar­tuutaanissaat qulakkiis­sallugu. (Flp 4:8) Uku eqqarsaatigisigit: ‘Allanut ataqqinaataassava? Aappariinnerup aaqqissuus­saaneranut ataqqinaataassava? Pingaar­nerpaatullu, Jehovamut ataqqinaataassava?’ Quiasaarilaarneq tulluarsin­naagaluartoq naleqqutin­ngitsut suulluunniit, soorlu tiingasulersaarnermut tunngasut, eqqartor­neqassan­ngillat. (Ef 5:3) Ilaquttasi ikinngutisilu paasitissigit suut eqqartor­neqassan­ngitsut.

10. Aappassiariit katittorsior­nissaminnik pilersaarusiortut sooq ingasaas­sinaveersaassappat? (Johannesimit 1. 2:15-17)

¹⁰ Ingasaas­sinaveersaaritsi. (Johannesimit 1. 2:15-17 atuakkit). Jehovap nuannarisarpaa kiffami imminut malugeq­qusaarpal­laarnatik Jehovap ataqqinar­tinnissaa pingaar­nerutik­kaangassuk. Taamaattumik aappassiariit katittorsior­nissaminnut aningaasanik atuival­laarnaveersaassapput ‘pigisatillu takoqqusaarutiginaveersaarlugit’. Ingasattumik persuarsiun­ngikkussi qanoq iluaqutigis­savisiuk? Immaqa Mike, qatanngut Norgemeersoq, assigalugu misigisaqarsin­naavusi. Ima oqarpoq: “Akiitsoqalin­ngilagut pioneriuin­narsinnaallutalu. Katittorsiornerput ingasattumik persuarsiunngilaq. Nuannersuuvorli, immikkullu eqqaamavarput.” Tabitha, qatanngut arnaq Indiameersoq, ima oqarpoq: “Uippakajaarujus­suanngilagut. Ingasattumik persuarsiun­nginnatta pilersaarusiat annikin­nerullutillu isumaqatigiin­ngissutaasin­naagaluit pinngitsoor­tippagut.”

11. Katittussat qanoq ittunik atisaqas­sanerlutik aalajangiiniarnermi suut eqqarsaatigissavaat? (Aamma assit takukkit).

¹¹ Qanoq ittunik atisaqas­sanerlusi aalajangereerpisiuk? Soorunami isikkorik­kusuppusi. Itsarli uissap nuliassallu isikkorin­nissartik pingaar­tittarpaat. (Es 61:10) Soorunami atisat katissutisi ulluinnarni atisassinniit allaanerus­sagunarput, sulili isornaatsuusariaqarput. (Tim 1. 2:9) Katinnissinni atisasi pinnagit Jehovap ataqqinarsisinnissaa pingaar­nerpaatissiuk. – Pet 1. 3:3, 4.

12. Sooq katittorsiornermi ileqqut ilaat naleqqutin­ngillat?

¹² Ileqqut Biibilip najoqqutas­siaanut naleqqutin­ngitsut maleruaqinagit. (Saqq 18:4) Katittorsiornermi ileqqorineqartut ilarpassui guutipilus­siornermik, anersaarsiornermik upperisapalaanillu aallaaveqarput. Tamakkuninnga sammisaqaqqunata Jehovap paatsuugas­saanngitsumik mianersoq­quaatigut. (Kor 2. 6:14-17) Taamaattumik ileqqut nalinginnaasut ilaat nalornis­sutigigussigit katittorsior­nissinnut ilaatis­sanerlugit aalajangiin­nginnissinni sumik aallaaveqarnerat najoqqutassiallu Biibilimeersut misissoq­qissaarsigit.

13. Aappariit tunissutisianut Jehovatut isiginnit­taaseqarnertik qanoq ersersis­sinnaavaat?

¹³ Sumiiffip­passuarni qaaqqusat katittunut tunissuteqar­tarnerat nalinginnaavoq. Ilaat akisuunik tunissuteqarsin­naapput allallu akikinnerusunik. Soorunami kristumiut tunisiumatuunis­saminnut kajumis­saarneqarput, tunisisar­nertillu nuannaarutigisaqaat. (Uss 11:25; ApS 20:35) Kissaatigin­ngilarpulli qaaqqusat misigissasut tunissuteqar­tariaqarlutik, misigitik­kusunngilagullu tunissutaat akikitsut qujamasuutigin­ngikkigut. Jehova ilaarlugu tunissutit suulluunniit qujamasuutigivagut, tunisisummi pisussaasutut misiginatik qamannga pisumik tunissuteqarmata. – Kor 2. 9:7.

PILERSAARUSIORNERMUT SIUNNERSUUTITSIALAAT

14. Katittussat pilersaarusior­nerminni sunik ajornar­torsiuteqalersin­naappat?

¹⁴ Jehovamut ataqqinaataasumik katinnissamik pilersaarusiornermi ajornar­torsiuteqalersinnaavoq. Assersuutigalugu ilaat misigisin­naapput akisoorujus­suarmik katittorsior­tariaqarlutik. Charlie Salomonip Qeqertaaneersoq oqarpoq: “Kikkut qaaqqus­sanerlutigit assut nalornis­sutigivarput. Ikinnguterpas­suaqarpugut, kulturitsinnilu kikkut tamarmik qaaqquneqar­nissartik naatsorsuutigisarpaat.” Tabitha, siusinnerusukkut issuarneqartoq, oqarpoq: “Najukkatsinni nalinginnaavoq amerlasoorujus­suarnik qaaqqusaqartarneq. Angajoqqaatta akueriuminaatseq­qaarpaat amerlasoorujus­suarnik qaaqqusaqan­nginnatta.” Sarah, Indiameersoq, oqarpoq: “Ilaasa pingaar­tippallaar­tarpaat allat qanoq eqqarsarnersut pisuujunertillu takutik­kusuttarlugu. Illortaakka qaaqqusarpas­suaqarlutillu akisoorujus­suarmik katittorsiorsimapput. Taamaat­tumillu allat isumaqalersin­niarsarigaluarpaannga taakkunannga suli annerusumik katittorsius­sasunga.” Katinnis­sassinnut pilersaarusior­nissinni ajornar­torsiuteqalerpat suna iluaqutigisin­naavisiuk?

15. Katittorsior­nissamut pilersaarusiornermi sooq Jehovamut qinusarnissaq pingaaruteqarpa?

¹⁵ Pilersaarusior­nissinni Jehovamut qinusaritsi. Ajornar­torsiut sunaluunniit misigis­sutsisilu pillugit Jehova oqaluttuus­sinnaavarsi. (Flp 4:6, 7; aamma studienote “uanset hvad det drejer sig om” qallunaatuuaniittoq takuuk). Ajunngitsumik aalajangiisin­naaqqullusi, isumakuluuteqalerussi eqqissisimasin­naaqqullusi pisariaqaraangallu sapiissuseqar­tarsinnaaq­qullusi Jehova qinnuigisin­naavarsi. (Pet 1. 5:7) Jehovap qanoq ikiorneraasi takulerussiuk tatiginerulis­savarsi. Tabitha oqarpoq: “Uissaralu ernumas­sutigaarput isumaqatigiin­ngissuteqaler­nissarput ilaquttagul­luunniit isumaqatigin­nginnissaat. Taamaattumik katittorsior­nissamut pilersaarusiat eqqartor­nialeraangatsigit qinoqqaar­tarpugut. Jehovap ikiuinera malugaarput pilersaarusiornerlu nuannersumik ingerlalluni.”

16-17. Katinnissamut pilersaarusiornermi oqaloqatigiil­luarneq qanoq iluaqutaasinnaava?

¹⁶ Inussiar­nersumik ersaris­sumillu oqaloqatigiigitsi. (Uss 15:22) Katinnis­sassinnut tunngatillugu aalajangigas­sarpassuaqarpusi – assersuutigalugu qaquguus­sanersoq, qanoq akeqassanersoq kikkullu qaaqqus­sanerlugit aalajangis­savarsi. Aalajanger­tinnasi suut periarfis­sarinerlusigit najoqqutassiallu Biibilimeersut suut iluaqutaasin­naanersut eqqarsaatigeq­qaarsigit. Aamma qatanngutinut anersaakkut inersimal­luartunut siunnersoq­qusinnaavusi. Kissaatigisasi eqqartoraangassigit ilaquttasilu oqaluuk­kaangassigit inussiar­nersuusaritsi, naleqqus­sarsinnaagitsi uteriitsuunasilu. Angajoqqaasi ingasat­tajaanngitsunik kissaateqarpata ajornan­ngippat kissaataat ilaatissigit. Katinnis­sarsimi aamma taakkununnga immikkut ittuuvoq. Siunnersuutaat malissin­naanngik­kussigit sooq taamaannersoq inussiar­nersumik nassuiaassigit. (Kol 4:6) Paasitissigit katinnissassi Jehovamut ataqqinaataanissaa nuannersuunissaalu pingaar­nerpaatillugit.

¹⁷ Angajoqqaasi Nalunaajaasuun­ngippata kissaatisi taakkununnga immaqa paasiuminaas­sinnaapput. Eqqissisimasumilli kissaatisi nassuiarussigit akueriuminar­nerutissavaat. Santhosh, qatanngut angut Indiameersoq, oqarpoq: “Ilaquttagut hindusiortut ileqqulersuutaannik katinnitsinnut ilaatitserusuk­kaluarput. Aalajangikkagut pillugit arlaleriarluta nassuiaan­niarsarivagut. Jehovap piumasaqaataanut akerliun­ngikkaangata kissaataat ilanngut­tarpagut. Assersuutigalugu katittorsiornermi nerisassat pillugit taakku aalajangiisippagut. Aalajangerpugullu erinarsor­toqassan­ngitsoq qitittoqas­sananilu, tamakkumi sungiusiman­ngimmatigit.”

18. Ullup katiffissassi ingerlal­luarnissaanut suna iluaqutaasinnaava? (Korintimiunut 1. 14:40) (Aamma asseq takuuk).

¹⁸ Pilersaarusiorluaritsi. Taamaaliorsimagussi ullormi katiffissinni uippakajaan­nginnerussaasi. (Korintimiunut 1. 14:40 atuaruk). Wayne, Taiwanimeersoq, oqarpoq: “Katinnissarput ullualuit sioqqullugu ikiortis­sagullu ataatsimoorpugut. Susoqas­sanersoq eqqartorparput ilaatigullu assigiin­ngitsunik sungiusarluta ingerlal­luarnissaa siunertaralugu.” Qaaqqusat ataqqillugit takutin­niarlugu suut tamarmik piffissaq eqqorlugu ingerlanissaat sapinngisassinnik isumagisiuk.

19. Katittorsiornersi ingerlal­luarniassammat qanoq siumut piareersarsin­naavisi?

¹⁹ Ajornar­torsiutit ilaat pinngitsoor­neqarsin­naapput siumut piareersimagaanni. (Uss 22:3) Assersuutigalugu katittorsiornermi festernermut qaaqquneqan­ngitsunik takkuttoqar­tarnera nalingin­naappat eqqarsaatigisiuk tamanna qanoq pinngitsoor­tinneqarsin­naanersoq. Nalunaajaasuun­ngitsunik ilaqutaqarussi paasitissigit susoqas­sanersoq katittorsior­nermilu ileqqut assigiin­ngitsut qanoq isumaqarfiginerisi.d Festernerup ingerlal­luarnissaa qulakkeerumallugu qatanngut angut anersaakkut inersimal­luartoq ‘katittorsiornermik aqutsisussatut’ toqqarsin­naavarsi. (Joh 2:8) Pilersaarutissinnik nassuiaateq­qissaarussiuk maleruar­neqarnissaat isumagisinnaavaa ataqqinaataasumillu pinissaanut ikiussallusi.

20. Katittussat suna eqqaamassavaat?

²⁰ Immaqa misigisimavusi katinnis­sassinnik pilersaarusiornermi ulapputerpas­suaqarlusi. Eqqaamas­savarsili aappariittut Jehovamut kiffartoqatigiillusi inuunermut nuannerluin­nartumut ulloq katiffissi aallarniutaaginnartoq. Sapinngisassinnik ingasat­tajaanngitsumik ataqqinaataasumillu katittorsioritsi. Jehova tatigisiuk. Pilersaarusior­nissinni taassumunnga ikiortikkussi katittorsiornersi kingumut qiviarsin­naassavarsi nuannaarlusi peqqissimis­sutissaqarasilu. – Tuss 37:3, 4.