Jobimik allakkat siunnersuiniarninni iluaqutigisin­naavatit

1-2. Jobip ikinngutai pingasut Elihulu qanoq nalaataqarpat?

JUUBIP pisuussutini tamarluinnaasa annaammagit inuit eqqaani najugaqartut tusapal­lassimassavaat. Juubip ikinngutaasa pingasut – Elifazip, Bildadip Sofarillu – Juubip nalaassimasai tusaramikkit tuppallersariar­torniarlugu ornippaat. Apuukkamik takusartik uissuumis­sutigerujus­suarpaat.

² Takorlooriaruk. Juubip pigisarpassuani erligisani tamarluinnaasa annaavai. Savaatai, nersutaatai, qatigat­tuujutai siutituujutaalu tamarluinnarmik toqutaasimal­lutilluunniit tillinneqarsimapput. Kiffai amerlanerit toqutaapput, meeraalu illu angerlarsimaf­figisaat isammat tamarmik ajunaarput. Tamannaan­naanngilarli. Aamma Juubi nappaas­suarmik eqqugaavoq. Timaa tamarmi ajuanik qallerneqarsimammat anniangaarpoq. Angutit taakkua pingasut ungasianiit takusin­naavaat Juubi aliasulluni arsakuni issiasoq. Qanoq qisuariarpat? Takusin­naagaluarlugu anniangaartoq ulluni arfineq-marlunni ataasin­nguamil­luunniit oqaaseqan­ngillat. (Jobi 2:12, 13) Piffissap ingerlanerani angut inuusuttoq Elihumik atilik aggerpoq angutillu taakkua eqqaannut ingilluni. Taava kiisami Juubi oqaaseqarpoq. Ulloq inunngorfini perloqquaa erniusiman­ngisaan­narnissanilu kissaatigigaluarlugu. (Jobi 3:1-3, 11) Ersarippoq Juubi ikinngutiminit ikiortariaqarluinnartoq. Angutit taakkua piffissaq atorluarsimasin­naagaluarpaat ikinngutertik qiimmas­sarlugu ikinngutaal­luarnertillu ersersillugu.

3. Allaaserisami suut sammissavagut?

³ Juubip ikinngutaasa pingasut aamma Elihup oqaasii iliuuserisaalu pillugit Jehovap Moorsisimut allatsippai. Siunnersueriaatsit qanoq assigiin­ngitsigisin­naanerat maluginiarnarpoq. Ersarippoq Elifazip anersaamit ajortumit sunnerneqarluni oqaluttoq, Elihuli Jehovamit sunnerneqarluni oqaaseqartoq. (Jobi 4:12-16; 33:24, 25) Taamaat­tuminguna Jobimik allakkat siunnersuutitsialannik aammali eqqunngitsumik siunnersuutinik imaqartut. Allakkat taakku ikinngutitsinnik siunnersuinis­satsinnut iluaqutigisin­naavagut. Siullermik sammissavarput Juubip ikinngutaasa pingasut siunnersueriaasiat kukkusoq, tulliullugu Elihup maligassiaa ajunngitsoq sammissavarput. Taakku eqqarsaatigalugit Jobimik allakkat Israalikkut qanoq iluaqutigisin­naaneraat aamma uagut ullumikkut qanoq ilinniarfigisin­naanerigut paasinias­savarput.

JUUBIP IKINNGUTAI PINGASUT QANOQ ILIORTUT

4. Sooq Juubip ikinngutai pingasut Juubimut tuppallersaasin­naassuseqan­ngillat? (Aamma asseq takuuk).

⁴ Biibilimi oqaluttuarineqarpoq Juubip ikinngutai pingasut orniguttut “misigeqatigin­ninnertik takutik­kiartorlugu tuppallersariar­torlugulu”. (Job 2:11) Juubilli iluaallaatigisin­naasaanik oqaaseqan­ngillat. Sooq? Minnerpaamik pingasunik peqquteqarpoq. Siullertut, Juubi qanoq nassuiaatis­saqarnersoq tusarniaq­qaarnagu ingerlaannaq kukkusumik isummersulerput. Assersuutigalugu isummerput Juubi ajortuliorsimammat Jehovap pillaraa.a (Job 4:7; 11:14) Aappaattut, angutit taakkua oqaaserisaat isumatusaarpaluk­kaluarlutik iluaqutaanatillu ajuallannarput. (Job 13:12) Aamma Bildadip naakkit­taalluni marloriarluni Juubi oqaluppal­laarnerarpaa. (Job 8:2; 18:2) Sofarillu Juubi ‘sianiin­neraqat­taarpaa’. (Job 11:12) Pingajus­saattut, Juubi nilliaf­figigunan­ngikkaluarlugu oqaaserisaat periaasiallu Juubimut nikanarsaataapput asaneqan­ngitsutullu misigititsillutik. (Job 15:7-11) Aamma angutit taakkua Juubi tuppallersarnagu upperneranil­luunniit nakussatsin­niarnagu uppernarsar­niarsariin­narpaat eqqunngitsuliorsimasoq.

5. Juubip ikinngutaasa tuppallersaaniaraluarnerat qanoq kinguneqarpa?

⁵ Tupinnan­ngitsumik Elifazip, Bildadip Sofarillu oqaasii Juubimut qiimmas­saataan­ngilluinnarput. Akerlianilli ajorneruliinnarpoq. (Job 19:2) Juubi sukataarluni imminut illersor­niarsarisimangaarami iluamik eqqarsarluarsin­naajunnaarpoq oqaasis­sarinngisaminillu oqalulerluni. (Job 6:3, 26) Juubip ikinngutai Jehovap eqqarsaataanut naapertuuttumik oqalunngillat Juubilu misigin­neqatigin­ninnermik ersersitsiviginagu. Naluaat nakkarsaanerminni Saatanip kissaataatut iliorlutik. (Job 2:4, 6) Oqaluttuaq tamanna itsaq Israalikkunnut qanoq iluaqutaasimagunarpa, aamma uagut qanoq iluaqutigisin­naavarput?

6. Juubip ikinngutaasa pingasut maligas­siuinerlunnerat Israalikkut utoqqaanertaasa qanoq ilinniarfigil­luarsimasin­naavaat?

⁶ Israalikkut qanoq iluaqutigisimagunarpaat. Jehova Israalikkut inatsisiminik tunimmagit utoqqaanertanik Israalikkunnik siunnersuisin­naasunik Jehovallu peqqussutaanik maleruaanis­saannik ikiuisin­naasunik toqqaavoq. (Mos 5. 1:15-18; 27:1) Angutit taakkua siunnersuin­nginnerminni eqqartuus­sinngin­nerminnilu tusarnaarluaq­qissaaq­qaartariaqarput. (Nal 2. 19:6) Pisimasumullu eqqoriaagin­naratik qanorpiaq pisoqarnera paasiumallugu apersueq­qissaaq­qaartariaqarput. (Mos 5. 19:18) Aamma ikiorneqarusuttut inussiar­nersumik oqaluffiginissaat eqqumaf­figisariaqarpaat. Sooq? Sukangasumik misigit­taatsumillu nipeqarunik ikiortis­sarsiortup uummammiuni oqaluttuariumajun­naarsin­naammagit. (Mos 2. 22:22-24) Taamaattumik Israalikkut utoqqaanertaasa Juubimik oqaluttuaq ilinniarfigil­luarsimasin­naavaat.

7. Israalikkut utoqqaanertaasa saniatigut aamma kikkut siunnersuisin­naappat, aamma Juubimik oqaluttuaq qanoq ilinniarfigisin­naavaat? (Ussatit 27:9)

⁷ Angutit inersimal­luartut kisimik Israalikkunnut siunnersuisuusariaqan­ngillat. Israalimiu kinaluunniit – inuusuk­kaluaruni utoqqaagaluaruniluunniit, angutaagaluaruni arnaagaluaruniluunniit – ikinngutiminut Jehovamut qaninnerulerusuttumut imaluunniit ajortuliorsimasumut siunnersuisuusinnaavoq. (Uss 6:23) Taamatut ilumoorluni siunnersuisinnaasoq ikinngutaal­luartuuvoq. (Ussatit 27:9 atuaruk). Juubip ikinngutaasa pingasut maligas­siuinerlunnerat Israalikkut eqqarsaatigisimasuugunikku siunnersuinerminni qanoq oqaaseqan­nginnissartik qanorlu iliuuseqan­nginnissartik ilikkagaqarfigisimasin­naavaat.

8. Allanik siunnersuigaangatta qanoq iliortas­sanngilagut? (Aamma assit takukkit).

⁸ Qanoq iluaqutigisin­naagipput. Uppeqatigut ilungersuuteqaraangata ikiorusut­tarpagut. Taamaaliorumalluta Juubip ikinngutai pingasut assiginaveersaar­tariaqarpagut. Siullertut, oqaaseqan­nginnitsinni inerniliipal­lannata qanoq pisoqarsimanersoq paasiniaq­qaartariaqarparput. Aappaattut, Elifazip arlaleriarluni pineratut nammineq isummagut naapertorlugit siunnersuisas­sanngilagut. Siunnersuigaangatta Guutip oqaasianik tutsuiginartunik tunngaveqar­tassaaq. (Job 4:8; 5:3, 27) Pingajuattut, isornar­torsiuinaveersaarlutalu sakkortuunik oqaaseqar­naveersaassaagut. Eqqaamajuk Elifazi ikinngutaalu ilaannikkut ilumoortunik oqaaseqaraluarmata. Allaammi Elifazip oqaasiisa ilaat Paulusimit issuarneqarput. (Takukkit Jobi 5:13 aamma Korintimiunut 1. 3:19). Kisianni amerlanertigut Jehova pillugu eqqunngitsumik oqalupput Juubilu ajuallatsillugu. Taamaattumik Jehovap eqqunngitsulior­nerarpai. (Job 42:7, 8) Allanik siunnersuigaangatta Jehova pillugu eqqunngitsumik isumaqalersitsin­nginnissarput kiffaanil­luunniit asaneqan­ngitsutut misigilersitsin­nginnissarput eqqumaf­figisariaqarparput. Elihup maligassiaa qanoq ilinniarfigisin­naanerlutigu sammeriartigu.

ELIHU QANOQ SIUNNERSUISOQ

9. Sooq Juubi suli ikiorneqar­nissaminik pisariaqar­titsiva, Jehovallu qanoq ikiorpaa?

⁹ Juubi ikinngutaalu pingasut sivisoorujus­suarmik oqaluupput. Ima oqaaseqarsimatigipput allaat Biibilimi kapitalinik 28-nik imaqarsimasin­naallutik. Oqaaserisaallu amerlanersaat assut kamaqarput. Tupinnan­ngitsumik Juubi iluaallanngilaq! Suli tuppallersar­neqarnis­saminik pisariaqar­titsivoq iluamillu eqqarsaler­nissaminut ikiorneqar­tariaqarluni. Juubi Jehovamit qanoq ikiorneqarpa? Elihu siunnersuiar­tortippaa. Sooq Elihu siusinnerusukkut oqaaseqanngila? Nammineq ima oqarpoq: “Uanga inuusut­tuuvunga, ilissilu utoqqaavusi. Taamaattumik sioorallunga tunuarsimaan­narsimavunga ilisimasama ilissinnut oqaatiginis­saannut.” (Job 32:6, 7) Elihup inuusuttuusup nalusimanngilaa imminerminit utoqqaanerusut silatusaar­nerusartut misilit­tagaqar­nerummata. Sivisuumillu Juubi ikinngutaalu pingasut naammagit­tarluni tusarnaareerlugit oqaasissani noqissin­naajunnaarpai. Ima oqarpoq: “Imaanngilaq utoqqan­ngornertik pissutigalugu ilisimasaqartut, imaanngilaq utoqqaagamik tamatigut ilisimasaraat suna eqqortuunersoq.” (Job 32:9) Taama oqareerluni oqaatsini qanoq nangippai, aamma qanoq oqaatigai?

10. Elihu Juubimik siunnersuin­nginnermini sua? (Jobi 33:6, 7)

¹⁰ Elihup Juubi siunnersuin­nginnermini eqqissisaq­qaarpaa. Qanoq? Elihu tusakkaminik assut kamappoq, taamaattumik Juubip oqaluutilin­nginnerani misigis­sutsini aqunniaq­qaarpai. (Job 32:2-5) Taamaalilluni Juubi maniguuttumik inussiar­nersumillu ikinngutin­nersumik oqaluus­sinnaalerpaa. Assersuutigalugu Juubi ima oqarfigaa: “Takuat, marluulluta Guutimut assigiippugut.” (Jobi 33:6, 7 atuakkit). Aamma oqarpoq Juubimut tusarnaaq­qissaarsimalluni. Allaat siunnersuin­nginnermini Juubip oqaaserisimasai pingaarnerit eqqaaqqippai. (Job 32:11; 33:8-11) Kingusin­nerusukkut Juubi siunnersoq­qikkamiuk assingusumik periaaseqarpoq. – Job 34:5, 6, 9; 35:1-4.

11. Elihup Juubi qanoq siunnersorpaa? (Jobi 33:1)

¹¹ Elihup Juubi siunnersoramiuk ataqqin­nittumik pivaa. Assersuutigalugu Juubip ikinngutai assiginagit Elihup Juubip atia atorlugu saaffigaa. (Jobi 33:1 atuaruk). Juubip ikinngutaasalu oqallin­neranni Elihup qanoq oqaaseqarusus­simatiginini eqqarsaatigisimagunarlugu Juubi siunnersoramiuk oqaaseqar­nissaanut periarfissippaa. (Job 32:4; 33:32) Aamma erseqqissarpaa sooq Juubip oqaasii iliuusiilu ilaatigut eqqunngitsuul­lutillu ulorianartut Jehovallu ilisimas­susianik, pissaaneranik, naapertuil­luarneranik asanningaar­neranillu inussiar­nersumik eqqaasillugu. (Job 36:18, 21-26; 37:23, 24) Ilimanarpoq Elihup siunnersuil­luarnera Pinngor­titsisup oqaasiinik tusarnaar­nissaminut Juubip iluaqutigisimagaa. (Job 38:1-3) Elihup maligassiaa itsaq Guutip innuttaasa qanoq iluaqutigisimagunarpaat, uagullu nalitsinni qanoq iluaqutigisin­naavarput?

12. Jehovap innuttani pruffiitit aqqutigalugit qanoq ikiorpai, Israalikkullu Elihup maligas­siuinera qanoq iluaqutigisimagunarpaat?

¹² Israalikkut qanoq iluaqutigisimagunaraat. Jehovap pruffiitit aqqutigalugit Israalikkut ilinniar­tittarlugillu naqqittarpai. Assersuutigalugu eqqartuussisut nalaanni Jehovap pruffiiti arnaq Deboramik atilik innuttaminut siunnersuisuutippaa. Aamma Saamuali meeraagaluarluni Jehova sinnerlugu oqaaseqartarpoq. (Eqq 4:4-7; 5:7; Sam 1. 3:19, 20) Kunngit nalaanni Jehovap pruffiitit arlaleriarluni aallartittarpai innuttani anersaakkut nakussatsin­niarlugit naalakkun­naarpatalu naqqinniarlugit. (Sam 2. 12:1-4; ApS 3:24) Angutit arnallu upperluartut qanoq siunnersuil­luarsin­naanerlutik paasiumallugu Elihup maligassiaa iluaqutigisimagunarpaat.

13. Kristumiut ullumikkut uppeqatiminnik qanoq tuppallersaasin­naappat?

¹³ Qanoq iluaqutigisin­naagipput. Kristumiuugatta Guutip piumasaa Biibilimi allassimasoq tusartik­kusuttarparput. Aamma qatanngutitsinnut tuppaller­nartunik ineriar­tornartunillu oqaaseqarusuppugut. (Kor 1. 14:3) Utoqqaanertat inussiar­nersumik, asannittumik tuppaller­nartumillu oqaaseqar­tarnissartik eqqumaf­figisariaqarpaat, aamma allaat tusaajuman­ngitsoqaraluarpat ‘isumaatsumil­luunniit’ oqaluttoqaraluarpat. – Tes 1. 5:14; Job 6:3.

14-15. Utoqqaanertat siunnersuigaangamik Elihu qanoq ilaarsin­naavaat?

¹⁴ Takorlooriaruk utoqqaanertap arnaq ilagiim­mininngaan­neersoq nikallungasoq maluginiaraa. Tuppallersar­niarlugu utoqqaanertaq alla ilagalugu pulaarpaat. Oqaloqatiginerani qatanngutip arnap misigis­sutsini nuanniitsut eqqartorpai. Oqaluttuarpoq ataatsimiigiar­taraluarluni aamma oqaluus­seqataasaraluarluni suli nikallungasarluni. Utoqqaanertaq qanoq iliussava?

¹⁵ Siullertut, qatanngutip arnap sunarpiaq aliasuutigineraa paasiniassavaa. Taamaaliussaaq apersoruniuk akissutaanillu tusarnaarluaq­qissaarluni. Imaassinnaavoq imminut ajukkuttoq Jehovamillu asaneqarnini qularigaa. ‘Inuunermi isumakuluutit’ nikallungas­sutigai? (Luk 21:34) Aappaattut, utoqqaanertaq qatanngutip arnap ajunngitsunik iliuuseqar­tarneranik nersualaar­nissaanut periarfis­sarsiussaaq. Nikallungagaluarluni suli ataatsimeeqataasarlunilu oqaluus­seqataasar­neranik nersualaassavaa. Pingajuattullu, qanoq inissisimanera misigis­susaalu paasilluareerunigit Biibili atorlugu uppernarsisissavaa Jehovap asagaa. – Gal 2:20.

JOBIMIK ALLAKKAT ILUAQUTIGIUAKKIT

16. Qanoq ililluta Jobimik allakkat iluaqutigiuarsin­naavagut?

¹⁶ Jobimik allakkani allassimasut ilinniutigisin­naasagut amerlaqaat! Allaaserisap siuliani paasivarput sooq Guutip naalliunnerit akuerinerai aamma uagut qanoq pinertusaarsin­naanersugut. Allaaserisamilu matumani eqqartorparput qanoq tamatta Elihu assigalugu siunnersuil­luarsin­naanerluta Juubip ikinngutai pingasut maligas­siuinerlunnerat assiginagit. Immaqa tulliani siunnersuilin­nginninni Jobimik allakkanit paasisimasatit eqqarsaatigeq­qaarsin­naavatit. Aamma qangali Jobimik allakkat nuannersut atuarsimagukkit, immaqa qanittumi atuaqqis­sinnaavatit. Qularnan­ngitsumik iluaqutigisin­naasannik nassaarfigis­savatit.