Jehovap maniguunnera ilaaruk

1. Sooq Jehovap maniguunnera maluginiarnarpa?

INUIT nalitsinni naalakkersuisuusut eqqarsaatigalugit isumaqarpit taakku maniguuttuusut? Ilimananngilaq. Jehovali Qutsinnerpaasoq maniguuttuuvoq. (Tuss 113:5-8) Jehovatulli maniguutsigisoqanngilaq; minnerpaamil­luunniit makitaneq ajorpoq. Allaaserisami matumani Jehovap pissusii nuannersut sisamat misissus­savagut paasiniarlugulu taakku maniguun­neranik qanoq ersersitsinersut. Aamma sammissavarput Jiisusip Ataatami maniguunnera qanoq ilaarneraa. Taakkua misissor­nissaat Jehovamut qaninneruler­nissatsinnut maniguun­neranillu ilaarsineruler­nissatsinnut iluaqutigis­savarput.

JEHOVA SAAFFIGIUMINARTUUVOQ

2. Tussiaat 62:9-mi allassimasoq Jehova pillugu qanoq ilinniarfigaarput? (Aamma asseq takuuk).

² Inuit makitasuut oqaloqatigiuminaat­tuupput. Qaffassimaar­tuullutillu inussiar­niitsuugamik allanit saaffigiumaneqarneq ajorput. Jehova allaanerul­luinnarpoq! Ataatatta qilammiusup maniguuttup kajumis­saarpaatigut saaffigeq­qulluni isumakuluutigullu tamaasa oqaluttuareq­qullugit. (Tussiaat 62:9 atuaruk). Ataatatut isumassuisutut meeqqami qanoq inneranik isumakuluutaannillu tusarusun­neratulli Jehovap qinnutigut tusarnaaq­qissaarusuppai. Qinnutit amerlasuut aamma Biibilimi allanneqarsimapput. Tamatumani erserpoq Jehovap ilumut qinnutigut tusaarusukkai. (Jos 10:12-14; Sam 1. 1:10-18) Taavami ilaannikkut Jehovamut qinunissamut ajukkuttutut misigisarutta?

3. Qanoq nalunngilarput Jehovap qinusar­nissarput kissaatigigaa?

³ Jehovap asannin­neranut ajukkuttutut misigigaluarluta suli Jehovamut qinusin­naavugut. Sooq? Jiisusip ernermik tammartumik assersuusiamini Jehova ataataasumut asannittumut assersuuppaa. Assersuusiami erneq ajortuliaminik amerlasuunik peqqissimisoq ataataminit isumakkeerfigineqarsin­naanngitsutut misigivoq. Uteramili ataataminit qanoq pineqarpa? Jiisusi oqarpoq ataatap ernini suli ungasiartoq takugamiuk ‘arpalluni ornikkaa pakkuteriarlugulu kunillugu’. (Luk 15:17-20) Jehova aamma taama ippoq. Ajortuliaminnik peqqissimisut isumakkeerfigineqarsin­naanerlutik isumakuluttut qinnutaat Jehovap tusarnaaq­qissaarusuppai. (Upp 3:19, 20) Tuppallersar­niarlugit nallittor­niarlugillu Jehovap ‘arpalluni ornippaalusooq’. (Es 57:15) Nalitsinni Jehova qanoq taamaaliortarpa? Amerlanertigut utoqqaanertat, ilaquttat uppeqatillu allat aqqutigalugit. (Jaak 5:14, 15) Jehovap imminut qanillisik­kusukkamisigut taamatut ikiuisarpoq.

4. Jiisusip qanoq ersersippaa saaffigiuminar­tuulluni?

⁴ Jiisusip Ataatani ilaarpaa. Jiisusi Ataatamisut maniguuppoq. Taamaattumik inuit ilakkuminar­tillugulu aperinissaanut nangaaneq ajorput. (Mak 4:10, 11) Jiisusilu taakkununnga aperigaangat isummatik ammasumik oqaluttuarisarpaat. (Mat 16:13-16) Aamma kukkusimagaangamik Jiisusip qanoq qisuariarnissaa annilaangagineq ajorpaat. Nalunngilaat Jiisusi inussiar­nersuullunilu naammagit­tartuusoq. (Mat 17:24-27) Jiisusi angusisarluinnarmat malinnittaasa Jehova ilisarisimal­lualerpaat. (Joh 14:9) Paasivaat Jehova upperisarsiornikkut siuttunit allaanerul­luinnarluni maniguullunilu inunnik soqutigin­nittuusoq.

5. Sooq maniguuk­kaangatta inuit saaffigiuminar­tinnerusarpaatigut?

⁵ Jehova qanoq ilaarsin­naavarput? Maniguunnermik ineriar­tortitsigutta oqaloqatigiuminar­nerulissaagut. Maniguun­ngikkutta allanut sinngasalissaagut, allanit pitsaanerusorilerluta isumakkeerfigin­nittarun­naarlutalu – allanit orniginar­tinneqarun­naarluta. Maniguuk­kuttali inussiar­nisaarnissamut, naammagit­tarnissamut isumakkeerfigin­ninnissamullu iluaqutigis­savarput orniginar­nerulerlutalu. (Kol 3:12-14) Pingaartumik utoqqaanertat oqaloqatiguminar­tuusariaqarput. Soorunami saaffigeriaan­naassagunik uppeqatiminnut akuusariaqarput. Taamaattumik ajornan­ngikkaangat ataatsimiinnerni internetikkut peqataanatik ornigullutik najuuttassapput. Aamma ajornan­ngikkaangat qatanngutitik illumiit illumut oqaluus­seqatigisassavaat. Ilagiin­niittut utoqqaanertat ilisarisimal­lualerunikkit pisariaqar­titsigaangamik saaffigiuminar­tinnerulissavaat.

JEHOVA UTERIITSUUNANILU NALEQQUS­SARSINNAAVOQ

6-7. Jehovap kiffami qinnutaannut naleqqus­sarsimaneranik assersuuteqarit.

⁶ Makitasuut amerlanerit allanit ilisimasaqar­nerusorigamik isummatik allanngor­tikkumaneq ajorpaat. Jehovali sunik tamanik ilisimasaqaraluarluni allaanerul­luinnarpoq. Maniguukkami uteriitsuunanilu naleqqus­sarsinnaavoq. Moorsisip aleqaa, Mirjami, qanoq pisimaneraa eqqarsaatigeriaruk. Aaronni ilagalugu Mirjamip Moorsisi naammagit­taalliorfigaa. Taamaaliorami eqqunngitsuliorujus­suarpoq Moorsisi Jehova sinnerlugu oqaaseqar­tartuummat. Taamaattumik Jehova ataqqin­ninngitsuliorfigaa. Jehovap Mirjami kamaatingaaramiuk pupissulersippaa. Taava Aaronnip Mirjami ikioqqullugu Moorsisi kimigiiserfigaa, Moorsisillu Jehova qinnuigaa ajorunnaarseq­qullugu. Jehova qanoq qisuariarpa? Uteriilluni aalajangeriikkani allanngor­tikkumanngilaa? Naamik. Jehova maniguukkami naleqqussarpoq Mirjamilu ajorunnaarsillugu. – Mos 4. 12:1-15.

⁷ Jehovap aamma maniguulluni kunngi Hizkia tusarnaarpaa. Pruffiitini aqqutigalugu Jehovap Hizkia paasitippaa napparsimalluni toqusus­sanngortoq. Hizkiali Jehovamut ajorunnaarseq­qulluni qialluni kimigiiserpoq. Jehovap nallittorpaa, oqarfigaalu suli ukiuni 15-ini inuujumaartoq. (Kng 2. 20:1, 5, 6) Aap, Jehova maniguukkami misigin­neqatiginnippoq naleqqus­sarlunilu.

8. Qanoq erserpa Jiisusi naleqqus­sarsinnaasoq? (Makkorsi 3:1-6)

⁸ Jiisusip Ataatani ilaarpaa. Jiisusi nunarsuarmiik­kallarami periarfis­saqaraangami allanut ajunngitsuliortarpoq. Assersuutigalugu ullormi qasuersaarfimmi inunnik ajorunnaarsitsisarpoq naak upperisarsiornikkut siuttut uteriitsut akerleriis­sutigigaluaraat. (Makkorsi 3:1-6 atuakkit). Jiisusi aamma ullumikkut ilagiinnut niaquusutut aqutsinermini naleqqus­sartarpoq. Assersuutigalugu ilagiinni ingasattumik ajortulior­toqaraangat allannguinissaanut periarfis­sittarpaa. – Saqq 2:2-5.

9. Naleqqus­sarsinnaanerput qanoq ersersis­sinnaavarput? (Aamma assit takukkit).

⁹ Jehova qanoq ilaarsin­naavarput? Jehovap eqqarsaatimigut iliuutsimigullu naleqqus­sarsinnaanera maniguulluta ilinniarfigisariaqarparput. (Jaak 3:17, q.a.i.) Assersuutigalugu angajoqqaat Jehovamik ilaarsisut meeqqatik piumaffigival­laarnavian­ngilaat. Tamatumunnga tunngatillugu Jaaku maligas­saalluarpoq. (Mos 1. 33:12-14) Angajoqqaat maniguuttut aamma meeqqatik meeqqanut allanut sanilliut­tarnavian­ngilaat. Aamma utoqqaanertat naleqqus­sarsinnaas­suseqar­tariaqarput. Assersuutigalugu utoqqaanertap isummaminik uteriin­niinnarnani utoqqaaner­taqatigiinni amerlanerit isumaat Biibilimik unioqqutitsin­ngippata tapersersor­tassavai. (Tim 1. 3:2, 3) Aamma uagut tamatta inuit allat isumaat misigis­susiilu isumaqatigin­ngikkaluarlugil­luunniit sapinngisamik paasiniar­tariaqarpagut. (Rom 14:1) Aap, ilagiin­niittut tamarmik ‘naleqqus­sarsinnaanertik tamanit ilisimaneqar­niassammat’ tamatuma ineriar­tortinnissaa sulissutigissavaat. – Flp 4:5, q.a.i.

JEHOVA NAAMMAGIT­TARTUUVOQ

10. Jehovap naammagit­tartuunini ilaatigut qanoq ersersis­simavaa?

¹⁰ Immaqa maluginiar­nikuuat inuit makitasuut allanut utaqqisin­naassuseqarneq ajortut. Makitasuut naammagit­taatsuupput. Jehova utaqqisin­naassuseqangaartoq allaanerul­luinnarpoq! Assersuutigalugu Nooap nalaani Jehova oqarpoq aatsaat ukiut 120-t qaangiuppata inuit ajortut suujunnaarsik­kumaarlugit. (Mos 1. 6:3) Ukiut taakkua ingerlanerini Nooa meeraqalerpoq ilaquttanilu umiarsualioqatigalugit. Kingusin­nerusukkut Jehova inngilini aqqutigalugu Aaperaap Soodoma Gomooralu pillugit aperimmani tusarnaaq­qissaarpoq. Makitasooq immaqa ima akisimas­sagaluarpoq: ‘Sooq taamatut aperivinga!’ Jehovalli maniguulluni Aaperaat naammagit­tarfigaa. – Mos 1. 18:20-33.

11. Petrusimit allakkat aappaat 3:9 naapertorlugu sooq Jehovap nalitsinni inuit naammagit­tarfigai?

¹¹ Jehovap aamma nalitsinni inuit maniguulluni naammagit­tarfigai. Naggatissap nalliun­nissaanut piffissarititaminut utaqqivoq. Sooq? Inuit “suujunnaarsitaanatik peqqissiminissamut periarfis­sikkusuk­kamigit”. (Petrusimit 2. 3:9 atuaruk). Jehovap naammagit­tarnera kinguneqarluarpa? Ilaana! Inuimmi millionilik­kuutaat Jehovamut qanillisimapput. Neriuppugullu suli millionillit amerlanerusut Jehova qanilliumaaraat. Kisianni Jehova naassaan­ngitsussamut utaqqinavianngilaq. Inuit asavai, iliuusiili ajortut akueriuaan­narnavianngilai. Ajussuseq suujunnarsik­kumaarpaa. – Hab 2:3.

12. Jehovap naammagit­tartuunera Jiisusip qanoq ilaarpaa?

¹² Jiisusip Ataatani ilaarpaa. Ukiuni tuusintilik­kuutaani Jiisusi Jehova ilaarlugu naammagit­tartuuvoq. Saatanip Jehova inuillu upperluartut pillugit salluliuutai Jiisusip tusartarsimavai. (Mos 1. 3:4, 5; Job 1:11; Saqq 12:10) Jiisusip aamma inuit naalliuuterpassui takusimavai. ‘Diaavulup iliuusiisa unitsin­nissaat’ erinigisorujus­suusimassavaa! (Joh 1. 3:8) Jehovap ajussutsimik suujunnaarseq­qusinissaa Jiisusip qanoq naammagit­tarluni utaqqisinnaavaa? Jiisusi maniguuppoq. Nalunngilaa tamatuma nalliunnissaa Jehovap kisimi aalajangigas­sarigaa. – ApS 1:7.

13. Sooq aamma qanoq Jiisusip apustilini naammagit­tarfigai?

¹³ Jiisusip nunamiik­kallarami aamma ilinniartitani naammagit­tarfigai. Assersuutigalugu kina arlartik annerunersoq assortuus­sutigeq­qilermassuk qatsutium­minngilai. Akerlianilli naammagit­tarfigiuarpai. (Luk 9:46; 22:24-27) Upperaa piffissap ingerlanerani allanngorumaartut. Illit aamma kukkusaqat­taartarpit? Taamaappat maniguuttumik naammagit­tartumillu Kunngeqarnerit qujamasuutigis­sajunnarsivat.

14. Qanoq ililluta naammagit­tarnerulersin­naavugut?

¹⁴ Jehova qanoq ilaarsin­naavarput? ‘Kristusitut eqqarsartaaseq’ ineriar­tortikkutsigu Jehovap eqqarsartaasia iliuusiilu assiginerulis­savagut. (Kor 1. 2:16) Qanoq ililluta Kristusitut eqqarsar­taaseqar­nerulersin­naavugut? Imaalial­laannaq tamanna anguneqarsin­naanngilaq. Biibilimi Jiisusip inuunera pillugu atuartariaqarpugut Jiisusillu iliuusii eqqarsaatigeq­qissaarlugit. Aamma Jehovamut qinusariaqarpugut maniguun­neruler­nissatsinnut naammagit­tarneruler­nissatsinnullu ikioqqulluta. Kristusitut eqqarsar­taaseqar­neruleriar­tortilluta Jehova assiginerulis­savarput, aamma immitsinnut naammagit­tarfiginerulerlutalu uppeqatitsinnut naammagit­tarnerulissaagut. – Mat 18:26-30, 35.

JEHOVAP MANIGUUTTUT MALUGINIARTARPAI

15. Tussiaat 138:6-imi qanoq erserpa Jehovap nikanartutut isigineqartut asagai?

¹⁵ Tussiaat 138:6 atuaruk. Tupinnaqaaq Jehovap, Kisimi Oqartussaasup sunillu tamanit Qutsinnerpaap maniguuttut maluginiar­tarmagit. Ukiorpassuarni inuit nikagineqartut Jehovap maluginiarsimavai. Immaqa taakkua ilaat eqqaamaq­qissaan­ngilagut, Biibilimili allaatigineqarput. Moorsisip Jehovamit isumassarsisin­neqarluni Debora ataataanerpaat nalaanni inuusoq allaatigaa. Taanna Iisaakkut Jaakukkullu inoqutaanni ukiuni 125-ni aalajaalluni kiffaavoq! Ilisimaneqarpal­laanngik­kaluarluni Jehovap Moorsisimit qanoq nuannarineqarsimatiginera pillugu allanneqartippaa. (Mos 1. 24:59; 35:8) Ukiut hundredilip­passuit qaangiummata Jehovap nukappiaraq savanik paarsisoq Daavimik atilik Israalimi kunngin­ngortussatut qinerpaa. (Sam 2. 22:1, 36) Taava Jiisusi inunngormat Guutip savanik paarsisut maniguuttut inngilit taakkununnga aallartippai siulliutil­lugillu paasitillugit Betlehemimi Missiarsi neriorsuutigisaq inunngorsimasoq. (Luk 2:8-11) Aamma Juuserfip Mariiallu Jiisusi guutisiorfim­mukaammassuk Jehovap Simmiuut Annalu utoqqasaan­ngorsimasut ataqqinarsisin­niarlugit ernerminik takutippai. (Luk 2:25-30, 36-38) Aap, Jehovap ‘qutsinnermiik­kaluarluni nikanartut isigai’!

16. Jiisusip ataatani ilaarlugu allat qanoq pisarpai?

¹⁶ Jiisusip ataatani ilaarpaa. Jiisusip ataatani assigalugu inuit nikagineqartut takutittarpai nuannaralugit ‘inuinnaat ilinniarsimasuun­ngitsullu’ Guutip kunngeqarfianik tunngasunik ilumoortunik ilinniar­tinnerisigut. (ApS 4:13; Mat 11:25) Aamma napparsimasut ajorunnaarsittarpai asaneqar­tutullu ataqqineqar­tutullu misigitillugit. (Luk 5:13) Toqunngitsiarluni Jiisusip ilinniartitami isigaat asattorpai, naak kiffat kisimik taamaalior­taraluartut. (Joh 13:5) Qilalian­ngitsiar­nerminilu malinnitsini maniguuttut tamaasa ataqqinarsisippai pingaarutilimmik suliassik­kamigit – inuit inuunermik naassaan­ngitsumik neriuuteqaler­nissaannik ikiuisus­sanngor­tillugit. Ullutsinnilu uagut suliassaq tamanna ataqqinaatigaarput. – Mat 28:19, 20.

17. Qanoq ililluta allat asanninnermik ataqqin­ninnermillu ersersitsivigisin­naavagut? (Aamma asseq takuuk).

¹⁷ Jehova qanoq ilaarsin­naavarput? Inuit ataqqin­nittumik asannit­tumillu pisarpagut kikkut tamaasa tusagassamik nuannersumik tusarusuttut oqaluus­siffigigaangatsigit, tunuliaqutaat, suminngaan­neernerat qanorlu ilinniagaqarnerat apeqqutaatinnagit. Aamma qatanngutigut ataqqin­nittuliorfigalugillu asannit­tuliorfigisarpagut qanorluunniit ilagiinni akisussaaf­filerneqarsimanerput apeqqutaatinnagu. (Flp 2:3) Jehovap nuannaarutigisarpaa maniguulluta ‘siulliulluta’ allanut asannit­tulioraangatta ataqqin­nittuliorlutalu. – Rom 12:10; Sef 3:12.

18. Sooq Jehovap maniguunnera ilaarusuppiuk?

¹⁸ Sapinngisatsinnik Ataatarput qilammiusoq ilaarniarsarigutsigu saaffigiuminar­nerulissaagut, naleqqus­sarsinnaanerulissaagut naammagit­tarnerulerlutalu. Aamma Jehova assigalugu allat asannit­tuliorfigis­savagut ataqqin­nittuliorfigalugillu. Sapinngisatsinnik Guuterput maniguuttoq ilaarniarsariuarutsigu ‘isaani erlinnarlutalu ataqqisaangaassaagut’! – Es 43:4.