Apriili 2000 manna tikillugu qaammatinit pitsaanerpaartarisinnaavarput?
1 Ukiup matuma kiffartuussiffiusup pingaarnerpaaffissaa tassaassaaq unnuk pingasunngorneq 19. aprili. Ulloq unnuarlu taanna silarsuaq tamakkerlugu Jehovap Nalunaajaasuisa ilagiivini seqineq tarrikkiartuaartillugu Kristusip toqunerata eqqaaniarneqarnera nalliuttorsiutiginiarneqassaaq. Nunarsuarmi sumiluunniit najugaqaraluarutta Jesusip Kristusip pilliutitut toqunerata nalliuttorsiutigineqarnissaa ukiup matuma pingaarnerpaartarissavaa. Ulloq nalliuttorsiorfigineqartussaq Jehovap Nalunaajaasuisa qaammatisiutaani 2000-imi apriilip qaammataani ersersinneqarpoq.
2 Apriili naallugu periarfissaqarluarpugut Jehovap ernerminik pilliuteqarnermigut ajunngingaassusianut pisassarinngisaraluatsinnut uummammik tamakkiisumik pingaartitsinerput ersersissallugu. Qanoq ililluta? Apustili Paulus allappoq: ’Kristusip asanninnerata pinngitsaalivaatigut, isumaqaratta ataatsip tamaasa toqussutigimmagit tamaasa taava toqusimasoralugit; massalu tamaasa toqussutigai inuusut kingorna imminnut inooqqunagit, uumunngali inooqqullugit pillutik toqusumut makittumullu.’ (2 Kor. 5:14, 15) Apriilimi imminut pilluta inuunata takutissinnaavarput, uumunngali inooqqulluta pilluta toqusumut, Guutip naalagaaffianut oqaluussisartutut qaammat taanna uagutsinnut pitsaanerpaanngortillugu.
3 Apriilimi ikiorti-pioneeritut nalunaarit: Apustili Paulus eqqarsaallannartumik maligassippaatigut oqarami: ’Inuunera erlinnartinngilara arpannera naajumallugu kiffartuullu Naalakkamit Jesusimit pisara, iivangkiliu Guutip saammaanneranik nalunaajaassutigissallugu.’ (ap. sul. 20:24) Aamma Jehova pillugu peqqissaartumi nalunaajaasinnaatitaalluta immikkut pisinnaatitaaffeqarpugut. Tamanna ikiorti-pioneeritut kiffartornissaq eqqarsaatigalugu apriilip qaammatini tamani pitsaanerpaanngornissaanut kinguneqartussaasariaqarpoq.
4 Apriilip tallimanik weekendeqarnera pioneeritut kiffartornissamut amerlanernut pitsaasorujussuussaaq. Nalunaaquttap akunneranut piumasaqaatit aamma appartinneqarmata amerlanerusut kiffartornissamut tamatumunnga periarfissaqarluarnerulerput. Oqaluussisartut kuisimasut tamavimmik ukioq manna apriilimi ikiorti-pioneeriunissaminnut periarfissarsiorlutik qinunikkut isumaliutigisariaqarpaat.
5 Qaammammi tulliuttumi kiffartornissannut qaammatisiuterput atorlugu apriili 2000-mi pilersaarusiorit. Aalajangikkit ullut sorliit kiffartornissamut atorumaneritit, naatsorsukkillu nalunaaquttap-akunneri qassit qaammammi oqaluussinissamut immikkoortissinnaaneritit. Aammattaaq torrutiinnarlugu oqaluussinerit pilersaarutinnut ilanngussinnaavatit. Nalunaaquttap-akunneri angusinnaasatit ikiorti-pioneerinut piumasaqaataasut 50-it missaanniilerpat? Piumasaqaammut inorsaruit pilersaarutitit allanngortillugit ikiorti-pioneeritut kiffartornissamut piffissamik ’pisiaqarlutit’ piffissarsiorsinnaavit? Taamaallaat ullormut nalunaaquttap-akunnera ataaseq minutsillu 40-t atortariaqarpatit qaammammut akunnerit 50-it anguniarlugit.
6 Tamakkiisumik kiffartulernissat isumaliutigisimaviuk nalinginnaasumik pioneerinut akunnerit piumasaqaataasut ikilisinneqarnerata kingorna? Sooq aatsaat aasaru aallartinniassavit? Ukiuunera naalerpoq, apriililu qaammat aallartiffigissallugu pitsaassaaq. Akunnerit 70-it pioneerinut piumasaqaataasut angusinnaanissaat qularigukku, soormi apriilimi ikiorti-pioneeritut kiffartornissannut nalunaarnianngilatit akunnerillu 70-it anguniagassatut siuniullugu? Angusinnaallugit paasigukku ilimanarluinnarpoq pioneeritut kiffartortut akornanniilernissat kissaatiginerulissagit. — Takuuk Organiseret til at fuldføre vor tjeneste, quppernerit 109-11.
7 Nutaarsiassamik nuannersumik oqaluussisutut tamakkiisumik peqataagit: Guutimut tullitsinnullu piviusumik asanninnitta tamatta, oqaluussisartutut pioneeritulluunniit, Jehovamut kiffartornitsinni uummammik tamakkiisumik iliuuseqartippaatigut. (Luk. 10:27) Taamaalilluta takutipparput ilungersorluta assoruuttugut ’Guuti uummasoq neriuffigigatsigu; taanna inuit tamarmik annaassisigaat, uppertulli pingaarlutik’. (1 Tim. 4:10) Tamanna eqqarsaatigalugu ilimagissavarput tamarmik apriilimi Guutip naalagaaffia oqaluussissutigineqarnerani tamakkiisumik peqataanissaat, tassa peqataanissaq 100 procentiusinnaaqqullugu.
8 Jesusip kajumissaarinera puigornaveertigu: ’Katersugassat amerlaqaat, sulisusalli ikeqaat. Taamaattumik katersugassat inuat qinnuigisiuk sulisussanik katersuiffimminut aallartitseqqullugu.’ Taamatut oqariitsiarluni apustilini aqqaneq-marluk imminut qaaqquai oqaluussiartoqqullugillu aallartillugit. (Mat. 9:37, 38; 10:1, 5, 7) Ukiup ataatsip missaa qaangiummat taakku aqqaneq-marluk oqaluussinissamut ilinniartilluareeramigit ’aamma allat 70-it Naalakkap qinerpai, marlukkuutaarlugillu siunermigut . . . aallartillugillu’ taamatuttaaq ilinniartillugit: ’Katersugassat amerlaqaat; . . . taamaattumik katersugassat inuat qinnuvigisiuk sulisussanik katersuiffimminut aallatitseqqullugu.’ (Luk. 10:1, 2) apustilit suliáinik agdlagkat atuaraangatsigit takusinnaavarput Jehovap qinnutit taamaattut qanoq akisarai. Ukiumi 33-mi piinsip ulluani ajoqersukkat 120-t missaaniissimapput. Kingornali ajoqersukkat amerlassusii 3000-nngorput amerlanerpaaffiinilu 5000-iullutik. (ap. sul. 1:15; 2:41; 4:4) Tamatumali kingorna ’Jerusalemimi ajoqersukkat amerlingaarput’. (ap. sul. 6:7) Ullutsinnittaaq katersugassat inuat qinnuigisinnaavarput Naalagaaffimmik oqaluussisartut suli amerlaneruleqqullugit. Oqaluussisartut tamarmik immikkut qinnut tamanna malillugu qaammatit tamaasa kiffartoqataanissamut iliuuseqartariaqarput.
9 2000-imut qaammatisiutitsinni apriili qimerlooqqissaaruk. Qaammammi ullut siulliit marluk arfininngorneruvoq sapaataallunilu, immaqa weekendi taanna kiffartoqataanissannut pilersaarusiorsinnaavutit taamaalillutillu aallartiaarlutit. Qaammammi ’ullut atuagassianik siaruarteriffiusut’ tamaasa atuakkanik atuaqqissaaqatigisartakkatit ilagalugit tapersersorsinnaavigit? Sapaatit tamaasa akunneq ataaseq amerlanerusulluunniit kiffartornermut atorsinnaavigit? Unnukkut oqaluussinissamut pilersaarusiorsinnaavit aasariartornerani sila qaamanerujartortillugu? Puigorniaqinaguttaaq suliffinni, atuarfimmi sumiikkaluaraangavilluunniillu torrutiinnarlugu oqaluussinissannut periarfissavit atorluarnissaat. Ullut kiffartorfigisinnaasatit nalunaaqqutikkit, nalunaaquttallu akunneri angusimasatit allallugit.
10 Oqaluussisartunut kuisimanngitsunut piukkunnaatilinnut utoqqaanertanillu akuerisaasimasunut kiffartornissamut april aallartiffigissallugu pitsaassaaq. Biibilimik atuaqqissaaqateqarpit ima siumukarluarsimatigisumik kuisimanngitsutut nutaarsiassamik nuannersumik oqaluussisartunngornissaminut nakkutilliisumut siulittaasumut saaffiginnikkumasumik? Kuisimanngitsunik meeraqaruit anersaakkut siumukarnerannik utoqqaanertat oqaloqatigisimavigit? Oqaluussisartunngornissaannut piffissanngunngila? — Takuuk Orgarniseret til at fuldføre vor tjenesten, quppernerit 94-97.
11 Apriili 2000 qaammatinit tamanit pitsaanerpaanngortissagutsigu tamatta kiffartuussinermut peqataanissarput pisariaqarpoq, qaammallu naappat nalunaarluta. (Naleqqiuguk Mák. 6:30) Oqaluussisartut kuisimanngitsut nutaat siullerpaamik oqaluusseqataasimasut kajumissaarneqartariaqarput nalunaarusioqqullugit piffissaalluartukkullu tunniuteqqullugit. Suliassatta suliarinerisigut apriilimut nalunaarusiamut taperseeqataavugut, aammalu oqaluussinitsigut Jehovamut unnersiutiginnissummik annertungaartumut taperseeqataalluta.
12 Eqqaaniaalluni nalliuttorsioqataanissamut ilaqarit: Nuannaarutaassannginnerpa 2000-imi Kristusip toquneranik eqqaaniaalluni nalliuttorsiornermi najuuttut amerlanerpaarfiat sinneraluarpagu? Nalunaajaataalluassaaq inuit aatsaat taama amerlatigisut Jehova Guutip Jesus Kristusillu asanninnerat pillugu pingaartitsinertik takutikkumallugu takkuttoqaraluarpat. (Juá. 3:16; 15:13) Suut tamaasa iluarsaakkit illit ilaquttatillu eqqaaniaalluni nalliuttorsiornermut peqataajumallusi akornuserneqaqqunasi.
13 Maanna aamma piffissanngorpoq eqqaaniaalluni nalliuttorsiornissamut inuit qaaqquneqarnissaannut. Qaaqqujumasatit tamaasa allattukkit. Siornatigut Biibilimik atuaqqissaartarsimasut, maannalu atuaqqissaaqatigisartakkatit pulaaqqiiffigisartakkatillu tamarmik eqqaamakkit. Suleqatitit, atuaqatitit sanilitillu aamma niueqatigisartakkatit allakkit. Ilaquttatit ilisarisimasatillu puigoqinagit. Allattoreerukkit tamaasa qaaqqujumallugit nammineerlutit ilumoortumik soqutiginnillutit qaaqqusissummik pajukkit. Paasitikkit eqqaaniaalluni nalliuttorsiorneq sumi qaqugulu pissasoq. Apriilip 19-ia qanillippat qaaqqusatit allattorsimasatit eqqaasinniarlugit attavigisinnaavatit, toqqaannartumik saaffigalugit imaluunniit sianerfigalugit. Eqqaaniaalluni nalliuttorsioriarnissamut ingiaqatigiumallugit neqeroorfigikkit.
14 Peqatigiiffiup siusissukkut ilitsersuutaa naapertorlugu utoqqaanertaqatigiit najukkami oqaluussisartut unittooqqasut eqqaaniaalluni nalliuttorsiornissamut najuunnissaannut kajumissaarumassavaat. (Mat. 18:12-14) Utoqqaanertat Peqatigiiffiup allagai 26. februaari 1999-meersut tassunga atatillugu atuaqqissinnaavaat. Ilagiit allattuata oqaluussisut unittooqqasut kikkuunersut allattussavai, kiffartornermillu nakkutilliisup utoqqaanertanik taakkununnga eqqaaniaalluni nalliuttorsiornissamut qaaqqusiniarluni pulaartussanik qinersissaaq. Savarpannik paarsisutut pulaarnerat pissutigalugu immaqa oqaluussisartut unittooqqasut kiffartoqqinnissamut ikiorneqarsinnaassapput, immaqa allaat apriilimi pisinnaassaaq. Oqaluussisartumik misilittagaqarluarsimasumik oqaluussinissamut ingiaqatissarsigunik taakkununnga ineriartuutaalluassaaq.
15 Apriilimi tamarmik suliniuteqarluarnissaannut kajumissaakkit: Apriili 2000 manna tikillugu pitsaanerpaartanngussappat utoqqaanertanit, ilagiinni kiffartuuteqartunit ilaqutariinnilu ittuusunit tamanit iliuuseqartoqartariaqarpoq. Utoqqaanertat suut tamaasa aaqqissuuteqqissaarumavaat siulersuilluarumallutillu. (Epr. 13:7) Oqaluussiartulernermi katersuunnissanut ulluinnarni sapaatillu-akunnerisa naaneranni piffissanik naleqquttunik aaqqissuussisoqartariaqarpoq. Aammattaaq ualikkut kingusissukkut imaluunniit unnulersukkut oqaluussinissamut katersuuttoqartarsinnaavoq. Apriili tamaat pisussanut pilersaarutit nivinngaavimmut nivinngarneqassapput. Oqaluussilernermi katersuunnissanut isumaginnittussanik qinersisoqartariaqarpoq. Angalaarfissanik pissarsiortoqartariaqarpoq suleqatigiikkuutaat tamarmik immikkut naammattunik suliassaqaqqullugit.
16 Apriilimi Napasuliaq Alapernaarsuiffik aamma Iteritsi! oqaluussilluta atorniarpavut. Atuagassiaaraq Guutip sumik piumaffigaatigut? neqeroorutigineqarnerani soqutiginnittut tamaasa Biibilimik atuaqqissaaqatiginiartariaqarpavut. Taamaattumik atuagassianik atuagassiaaqqanillu naammattunik piffissaalluartukkut inniminniisoqartariaqarpoq.
17 Qaammat naalerpat atuakkamik atuaqqissaarnermi siulersuisut taakkulu ikiortaat atuakkanik atuaqqissaaqatigiittarfinni ilaasut tamavimmik qaammat naatsiaannartoq nalunaarusiaminnik tunniussinissaannik kajumissaassavaat. Immaqa apriilip 30-ani katersorneqarsinnaassagaluarput. Allattup katersukkani kisereerlugit paasiguniuk ilaat nalunaarusiaminnik suli tunniussaqarsimanngitsut maajip 6-ia tikitsinnagu taamaalioqqullugit inussiarnersumik eqqaasittariaqarpai, taamaalinerani Peqatigiiffimmut nalunaarsuut nassiuttussaammagu. Allatsip atuaqqissaaqatigiinnermi siulersuisut oqaluussisartut ataasiakkaat attavigeqqullugit qinnuigisinnaavai.
18 Guutip innuttaanut eqqaaniaalluni nalliuttorsiornerup nalaa ukiup pingaarnerpaartaraat. Taamanna piffissaasariaqarpoq Jehovamut kiffartorlutik tamarmik ulapputeqarnissaannut. Taamaassinnaavoq tamatta immikkut nutaarsiassamik nuannersumik oqaluusseqataalluarutta, amerlasuullu ikiorti-pioneeriusinnaappata, Kristusillu toqunera eqqaaniarlugu nalliuttorsiornissamut allat qaaqqussallugit eqiasuikkutta. Ilungersorluta Jehova qinnuigisigu pilluaqqusingaarnissaanik, apriili 2000 manna tikillugu qaammatinit tamanik pitsaanerpaanngortinnissaanut, Guutitsinnut unnersiutaasumik ataqqinaataasumillu. — Epr. 13:15.
[Qupp. 3-mi ungalusaq]
Ikiorti-pioneerit
Manna tikillugu amerlanerpaartaat: 3414
(Apriili 1989)
[Qupp. 4-mi ungalusaq]
Oqaluussisartut katillugit
Ilanngussimasut: 15.339
(Septembari 1999)
[Qupp. 5-mi ungalusaq]
Eqqaaniaalluni nalliuttorsiornermut najuuttut: 22.898
(1999)