Apriili — ajunngitsuliornermut aallussiffissaq
1 Inulimmi anorersuassamaaleraangat inuit aarlerisaarnissaat pingaaruteqarnerpaavoq. Anorersuarujussuaq qanilliartortillugu mianersoqqussut erseqqinnerusariaqarpoq. Sooq? Inuunermik naleqarsinnaammat. Imaasinnaavoq ilaasa mianersoqqussut tusarsimanngikkaat. Allallu tusaraluarlutik iliuuseqarneq ajorput. Taamatut ippoq Guutimeersumik mianersoqqussummik, Jehovap naapertuilluartumik kamannerata ’anorersuartut’ ittup silarsuarmik guutiitsumik nungutitsinnginnerani tusarliussisinnaatitaanerput. (Uss. 10:25) Milliardilikkuuttaat naassaanngitsumik inuunissaraluannik naleqarsinnaavoq. Mianersoqqusisariaqarpugut ’ajunngitsuliornemullu ilungersuussilluta’. — Tít. 2:11-14.
2 Jehovap Nalunaajaasui ukiorpassuarni kajumissaarneqarsimapput piffissaq eqqaaniaalluni nalliuttorsiornerup nalaa oqaluussinerunissamut atortaqqullugu. Guutip Naalagaaffianut Kiffartorneq-rup siulia Budbringer-imik taaguutilik upernaakkut 1939-mi ima kajumissaaruteqarpoq: ’Upernaraangat, taamatullu silagissigaangat, ilimagisarparput [ilagiinni] oqaluussisartut oqaluussinerminni akunnerit atortakkatik marloriaatinngortissagaat, pioneerillu akunnerit atortakkatik amerlisissagaat. Apriilimi sapaatit arfininngornerillu tallimaassapput. Taamaattumik apriilimi weekendit tamaasa . . . immikkut oqaluussiffigisigit.’ Tamanna ukiut 60-it matuma siorna qatanngutinut anguniagaasimavoq annertooq. Ukioq manna aamma apriilimi 1939-mitulli weekendit tallimaassapput. Apriilimi sumik pilersaaruteqarpit? Ullorsiutinni apriilimi suut allattorpigit? Jehovap kiffaasa qaammammi tassani immikkut ittumi anersaakkut suliniuteqarlutik suliaannut pitsaasumut siunertaqarluartumik peqataanissat pilersaarutigiuk.
3 Suna naammassiumallugu neriuutigigipput: Ukiumi 2000-mi ulloq pingaarnerpaaq qaammammi tassani pissaaq. Tassaavoq 19. apriili, Jesusip toquffia. Immikkut iliuuseqarta eqqaaniaalluni nalliuttorsiornissamut amerlanerpaanik qaaqqusilluta. Siunnersuutigineqartutut qaaqqurusutatsinnik allattuisinnaavugut, isumagalugulu minitaqarnaveersaarluta. Eqqaamaqquneqarportaaq oqaluussisartut unittooqqasut, Biibilimik atuaqqissaaqatigineqartut, pulaaqqittakkat, siornatigut soqutiginnittut, suleqatit, atuaqatit, sanilit, ilaquttat ilisarisimasallu qaaqqunissaat. Aggerumasut biiliunneqarnissaannik neqeroorfigineqarpat? Taamaanngippat ikiuisinnaavit? Tamatta immikkut pisinnaatitaaffigaarput eqqaaniaalluni nalliuttorsiornermut najuuttut tikilluaqqusaasutut misiginissaat. Tamatuma kingorna soqutiginnittut anersaakkut ittunik ikiornerujumallugit neqeroorfigisinnaavavut.
4 Ulluni eqqaaniaalluni nalliuttorsiornerup siornagut kingornagullu ’ajunngitsuliornermut ilungersuussinitigut’ Jehovap iliuuserisimasaanut pingaartitsingaarnerput takutissavarput. Qaamanertunerunerata silaginnerunerata amerlanersatta oqaluussinerunissaat ajornannginnerulersissavaat. Ikiorti-pioneeriusinnaassavit akunnerillu 50-t amerlanerusulluunniit kiffartornermut atorlugit? (Mat. 5:37) Taamaappat qaammat aallartiinnartoq pilersaarusiat peqqissaartumik maliguk. (Nal. oq. 3:1; 1 Kor. 14:40) Oqaluussisartut sinnerisa sapinngisartik tamaat pioneerit ikiortariaqarpaat, qiimmassarlugit kiffartornerannilu suleqatigalugit. (Naleqqiuguk 2 Kunngit 10:15, 16.) Apriilimi siaruarterilluarutta Jehovamit nuannaarutissarpassuit pilluaqqussutissarpassuillu ilimasiginnaavavut. (Mal. 3:10) Immaqa tamanna aallarniutaasinnaavoq aalajangersimasumik ikiorti-pioneeriunissamut imaluunniit nalinginnaasumik pioneeriunissamut! Neriuutigaarput apriilimi anersaakkut nakussatsinneqarnerput qaammatini tulliuttuni Guutip naalagaaffia pillugu aalajangersimasumik oqaluussisartuuginnarnissatsinnut iluaqutigissagipput.
5 Qularnanngilaq qaammammi matumani Jehovap kiffai tusindilikkuutaat Biibilimik atuaqqissaaqatitaarumaartut. Biibilimik atuaqqissaaqatitaarusuppit? Atuaqqissaaqatitaarnissat immikkut qinnutigiuk, qinnutitillu naapertorlugit iliuuseqarit. Ilimagilluinnarsinnaavat Jehovap pingaartissagaa imminik ilumoorlutik ilisarserusuttunik ujarlerninni maniguullutit qinugaangavit. — 1 Juá. 3:22.
6 Pulaakkat qanoq aallarniiiffigisinnaanerlugu misilerarneqarluarsimasumik siunnersorneqarumaguit, Guutip Naalagaaffianut Kiffartorneq-mi ungaluusalimmiittoq „Oqaluuserisassaq“ innersuussutigsinnaavarput. Tassani saqqummiussinissamut pingaarnerinnaat allasimagaluarput, siunnersuulli tamakkiisoq Guutip Naalagaaffianut Kiffartorneq-mi marsimi 2000-moortumi „Oqaluussinermut tunngasumik ataatsimiinnernut pilersaarut“-ip ataani sapaatip-akunnerani 13. marsimit takuneqarsinnaavoq. Saqqummiusseriaaseq ataatsimiinnerni arlaleriarlugu takutinneqareersimavoq. Misilereerpiuk? Atoraangakku sunniuteqartarpa? Taamaanngippat immaqa sungiusarnerusinnaavat imaluunniit oqaluusseriaatsinnut tulluarsarsinnaallugu?
7 Apriilimittaaq ’ajunngitsuliornermut ilungersuussisinnaavugut’ kiffartoriaatsini assigiinngitsuni peqataanikkut. Illoqannginnersani, biilinik inissiisarfinni imaluunniit bussit unittarfiini oqaluussinissat isumaliutigisimaviuk? Oqarasuaatikkulluunniit, aqqusinermi imaluunniit pisiniarfinni oqaluussineq misilerusussinnaaviuk? Soormi qaammami matumani misilikkukku? Nakimaannermik ineriartortitsinissannut Jehovap ikiussavaatit. (ap. sul. 4:31; 1 Tás. 2:2b) Immaqa pioneerimik imaluunniit oqaluussisartumik taamatut oqaluusseriaatsimik misilittagalik suleqatiginissaa isumaqatigiissuteqarfigisinnaavat.
8 Kialuunniit oqaluussiumanerulluni kissaateqartup torrutiinnarlugu oqaluussineq misilikkumasarpaa. Amerlanertigut iliuusissaq tassatuaavoq oqaloqatigiinnerup inussiarnersumik aallarnernissaa. Oqaluuserisamik amerlanerit soqutigisaannik nassaarit, immaqa oqaluuserisassap immikkoortumi 6-mi siunnersuutigineqartup atorneratigut. Minutsialunnik asuliinnartussaagaluanik atorluaagit. 25-ørit 50-ørillu 1-kroniunngimmata iginneq ajorpavut. Soormi 5, 10 imaluunniit 15 minutsi atorlugit torrutiinnarlugu oqaluussinianngilatit?
9 Isumatusaarfissaq: Siorna ataatsimeersuarnermi „Guutip oqaasia siulittuutaasoq“-mi isiginnaagassiaq pissatsinnartoq eqqaamaniariassagit. Isiginnaagassiami Kingornussatit anersakkut ittut pingaartikkit-imi Esauip Jakobillu assigiinngissutaannik eqqaasippaatigut. Esau oqarpoq Jakob assigalugu anersaamut tunngasunik soqutiginnittuulluni, suliamigulli takutinngilaa. (1 Mos. 25:29-34) Tamanna uagutsinnut ilinniutissaalluarpoq. Akiuunnissatsinnut piareersimasa, aap Jakob assigalugu, taanna Jehovamit pilluaqquneqarumalluni allaat paannittoq. (1 Mos. 32:24-29) Kingornussavut anersaakkut ittut pisassaannartut isumaqarfiginagit aalajangiussimasarput nakussatsikkumallugu apriili qaammatillu tulliuttut atorluartigik!
10 „Qanillivoq [Jehovap] ullussarsua; qanilliartulertoqaaq.“ (Sef. 1:14) Guutip naalagaaffia pillugu nutaarsiassaq nuannersoq suli oqaluussissutigineqarallassaaq. Inuuneq navianartorsiortinneqarpoq. Qinnutigaarput Jehovap kiffai tamarmik apriilimi pilluaqqussutaanik misigisaqarumaartut tamatta ’ajunngitsuliornermik ilungersuusseqatigiitilluta’.
[Qupp. 4-mi ungalusaq]
Eqqaaniaalluni nalliuttorsiunnginnermi eqqaamasassat
Pingasunngorneq 19. apriili eqqaaniaalluni nalliuttorsiunnginnermi tulliuttut eqqaamakkit:
◼ Nunatsinni illoqarfinni ilageeqarfitsinni seqernup tarriffissaa: Qaqortoq: 20.36, Narsaq: 20.37, Paamiut: 20.56, Nuuk: 21.15, Maniitsoq: 21.26, Sisimiut: 21.39, Ilulissat: 21.46. Ilagiit oqalugiaat seqineq tarritsinnagu aallartikkunikku qulakkeertariaqarpaat seqineq tarrereerpat aatsaat timiusap viinnillu ingerlaartinnissaat.
◼ Tamaasa nalunaarfigikkit, ilaatigut oqalugiartussaq, sumi qaqugukkullu eqqaaniaaneq ingerlanneqassasoq.
◼ Timiusaq viinnilu eqqortut pissarsiarikkit. — Takuuk Napasuliaq Alapernaarsuiffik 1. marsi 1986-imoortoq, qupperneq 13.
◼ Nerrivik, nerriviup qalia, puuguttat immiartorfiillu siusinaarluni aaqqissorneqarnissaat isumagiuk.
◼ Naalagaaffilersaarfik ataatsimiiffissarluunniit siusinaarlusi eqqiarluarsiuk.
◼ Sissuertussanik assersuutinillu ingerlatitsisussanik toqqaagit, periaatsinillu atorneqartussanik ilitsersuullugit. — Takuuk kmD 3/89, qupperneq 4-mi allaaserisaq „Mindehøjtiden 1989“.
◼ Tanitat napparsimasut najuussinnaanngitsut qanoq isumagineqassanersut isumaqatigiissuteqarit.
◼ Ilagiit arlallit naalagaaffilersaarfik ataaseq eqqaaniaanermi atussappassuk suleqatigiittariaqarput, torsuusarsuarmi, aqqusinermi biilinillu inissiisarfimmi inissakilliorneq pisariaqanngitsoq pinngitsoortinniarlugu.