Sapinngisannik piffissaq atorluaruk
1 Tamavitta sapaatip-akunneri tamaasa akunnernik assigiinnik piffissaqarpugut. Nutaarsiassamik nuannersumik oqaluussinermi piffissaq atugarput immikkut naleqarpoq inuunermik annaassiniarluni sulinermut atorneqarami. (Rûm. 1:16) Suliassap tamatuma pingaaruteqassusianut paasinninnerput takutittarparput oqaluussinissap aallartinnginnerani piareersarluartarnitsigut, oqaluussitinnani katersuunnernut inortuinaveersaarnitsigut oqaluussiffissamullu ingerlalertornitsigut. Piffissaq utaqqinissamit oqaluussinissamut atorluarusunneruarput. ’Suut tamarmik piffissaligaasut’ Jehovap ilinniartimmatigut oqaluussinissamut piffissaq immikkoortitarput sapinngisarput tamaat atorluarniartariaqarparput. — Nal. oq. 3:1.
2 Piffissaq silatuumik atoruk: Pilersaarut akuttoqatigiimmik kiffartornermi peqataanissatsinnut periarfissiisoq aalajangiussimagaangatsigu pilluaqqussuterpassuarnik nassataqartarpoq. Soorunami angusavut ajunngitsut piffissamut oqaluussinitsinni atorsimasatsinnut naapertuutissapput. Ulluinnarni inuunitsinni annikikkaluanik allannguinitsigut oqaluusseqataanissamut piffissaqarnerulersinnaavugut? Assersuutigalugu arfininngornikkut atuagassianik agguaasseqataareerluta ikittunik pulaaqqiinermut piffissaq atorsinnaavarput? Sapaammi illumit illumut angalaarsimagutta arlaannik pulaaqqiinermik imaluunniit Biibilimik atuaqqissaaqateqarnermik naggasiisinnaavugut? Illumit illumut oqaluussitilluta aqqusinermi oqaluussineq akunniliussinnaavarput? Kiffartornerput pitsaanerulersissinnaavarput siunnersuutit piuminartut tamakku malikkutsigik.
3 Oqaluussitilluta eqqarsarluanngikkutta piffissaq naleqarluartoq asiutissavarput. Ima paasisariaqanngilaq sila ajorsippat imaluunniit nalunaaqutap-akunneri arlallit oqaluussereerluta sivikitsumik uninngallatsiarsinnaanngitsugut. Kisianni naliliilluartariaqarpugut, uninngallatsiarnerimmi tamatigut pisariaqartuunngimmata.
4 Ukiuni kingullerni inuit angerlarsimaffiini naammattoornissaat ajornakusoornerulersimavoq. Taamaattumik oqaluussisartut amerlasuut illumit illumut oqaluussinermut piffissaq atugartik allanngortissimavaat. Soormi ualikkut kingusissukkut imaluunniit unnulernerani oqaluussillutit misilikkukku?
5 Oqaluussisartut piffissaq asiutissavaat aqqusinermi oqaluussinermut peqataatillutik imminnut oqaluuttarunik. Pitsaaneruvoq imminnut ungasilaarlutik inunnik oqaloqatiginninniarlutik saaffigisarunikkik. Taamatut piffissaq pitsaanerusumik atorluassavavut, suleqataanerpullu nuannaarutiginerullugu.
6 Oqaluussinissamut periarfissat tamaasa atortakkit: Arnaq soqutiginninnginnerarluni oqarmat oqaluussisartup aperaa oqaluussinnaasaminik allamik angerlarsimasoqarnersoq. Tamatuma kinguneraa illumi ittuusumik ukiorpassuit napparsimanini pillugu innangaannangajassimasumik oqaloqateqarnera. Neriuutip Guutip oqaasianiittup inuunermi nutaamik neriuuteqalersippaa. Sivitsunngitsoq siniffini qimallugu naalagaaffilersaarfimmi ataatsimiinnernut najuuttalerpoq neriuutigilikkanilu pillugu allat oqaluttuuttalerlugit.
7 Niviarsiap inuusuttuaqqap atuakkamik atuaqqissaarnissaq nalunaaquttap akunnera ataaseq sioqqullugu oqaluussinissamik kajumissaarneqarnini naalappaa. Matumi siullermi niviarsiaraq 13-inik ukiulik soqutiginnilluni tusarnaartoq atuagassianilliu pisoq naapippaa. Aqaguani atuarfimmi oqaluussisartup inuusuttup niviarsiaraq taanna naapeqqippaa. Sivitsunngitsoq Biibilimik atuaqqissaaqatiginissaanik neqeroorfigaa, tamatumunngalu akuersivoq.
8 Piffissaq pitsaasumik atoruk: Nutaarsiassap nuannersup oqaluussissutiginerani akuttoqatigiimmik peqataagaangatta pikkorinnerulertarpugut. Matumi oqaloqatigiinnermik aallarniinissamut pikkorinnerulersinnaavit aallarniummik kinguneqarluartumik atuinikkut? Atuaqqissaaqatigiinneq siulersortillugu ilinniartitsinissannut pikkorinnerulersinnaavit? Tamakku sulissutigigukkit oqaluussinermi piffissaq pitsaanerpaamik atorsinnnaavat naammassisaqarnerullutillu. — 1 Tim. 4:16.
9 ’Ullussat sivikimmata’ inuunitsinnut kristumiutut kiffartornerput qitiutittariaqarparput. (1 Kor. 7:29) Oqaluussinissamut piffissamik immikkoortitsinissaq pingaarnerpaatut salliutittariaqarparput. Kiffartornitsinni ajunngitsumik ilungersortumillu iliuuseqarta. Piffissamik nuanningaartumik ulappuserfissamik Jehovap tunivaatigut. Tamatigut sapinngisatsinnik piffissaq atorluartigu.
[Qupp. 4-mi ungalusaq]
Qanoq ililluni piffissaq silatuumik atorneqarsinnaasoq:
◼ Oqaluussitinnani katersuunnermut inortueqinak.
◼ Oqaluusseqatigiikkuutaat amerlavallaannginnissaat isumagiuk.
◼ Oqaluussiffigisassannukarasuarit.
◼ Oqaluussiffissat amerlanerit angerlarsimanerisa nalaanni oqaluussiffigisakkit.
◼ Isumannaappat ilaannikkut kisimmiillutit oqaluussisarit.
◼ Illumit illumut oqaluussiffippit eqqaaniittunik pulaaqqiisarit.
◼ Oqaluussinermi ingiaqatigisatit oqaloqatigilluakkaminnik naammattuisimappata utaqqinerit atorluaruk oqaluussineq ingerlatiinnarlugu.
◼ Sapinngisamik sivisunerusumik oqaluussigit.