Ikiuisinnaavit?
1 Apustili Paulusip ilagiit kajumissaarpaat ’assigiissumik isumageqatigeqqullugit’. (1. Kor. 12:25, NV) Taamaattumik immitsinnut soqutigeqatigiittariaqarpugut pisariaqartillugulu asannittumik ikiuinissatsinnut piumassuseqartariaqarluta. Assersuutigalugu arnanik anersaakkut qatannguteqarpugut kisimiillutik meeqqaminnik sallusuissummi perorsaasunik, meeqqamillu anersaakkut pisariaqartunik ajoqersornissaat tamaat akisussaaffigaat. Asannittumik tapersersortariaqarpavut qiimmassartarlugillu, aammali pisariaqartitaat naapertorlugit ’ajorsaataannik isumagalugit’. (Rûmamiut 12:13a) Ikiuisinnaavit?
2 Ikiueriaaserisinnaasavut: Ilaqutariit ataatsimiinnernut ataatsimeersuarnernullu peqataanissaminnut angallassissutinut tamanut atorneqarsinnaasunut ilaasariaqartartut ilaasoriniarlugit neqeroorfigigaanni immaqa aningaasarpassuit sipaarsinnaavaat. Anaanaq kisermaaq meeraanik mikisunik paarsilluta ikiorutsigu immaqa ataatsimiinnerit pissarsiffiginerussavai. Meeqqani ilagalugit oqaluussinerani ikiorumallugu neqeroorfigigutsigu aamma tamanna akisussaaffianut oqilisaataassaaq. Meeqqat ilumoorluta soqutiginninnermik ersersitsivigigutsigik inuusuttavut pitsaasumik ingerlanissaannut sunnissavaat. Kisimiilluni pilersuisumut aamma anersaakkut eqiiallaataassaaq ilaanni ilaqutariittut atuaqqissaaqatigiinnissinnut qaaqqusarussigik.
3 Periaaserissuugit: Ikiorneqarnissamik pisariaqartitsillutik misiginngippata pinngitsaalilluta ikiuinnginnissarput mianersuutigissavarput. Aammattaaq ikiuitilluta ilaqutaarittut namminneq ingerlanerannut akuliuttussaanngilagut. Qatanngut arnaq ikiorneqartariaqarpat qatanngutit arnat aappariilluunniit ikiuigunik soorunami naleqqunnerussaaq.
4 Kristumiut tamarmik ’illussisitsisaqqullugit’ kajumissaarneqarput. (Rûm. 12:13b) Anersaakkut qatanngutivut ikioraangatsigik kristumiutut asanninnermik takutitsinissatta amerlasuut ilagaat. — Juá. 13:35.