Ilaqutariinni eqqissineq Guutimeersoq anguniarsigik
„Ilissi inuiaat naggueqatigiissortaat, [Jehova] ataqqinartillugulu naalannartissiuk.“ — TUSSIAAT 96:7.
1. Jehovap ilaqutariittut inuuneq qanoq aallarnersimavaa?
JEHOVAP Adam Evalu aappariittut katitimmagit pissutsit eqqissinarlutillu pilluarnarput. Adam ima nuannaartigaaq allaat taalliortorpalaartumik oqaaseqarluni. Oqaasii tassaapput taalliat pisoqaanerpaartaat: „Aatsaat tassa saaneq saanerma ilaa uinillu uinimma ilaa. Una arnamik taaneqassaaq angummit tigusaagami.“ — 1 Moses 2:23.
2. Qitornami nunamiusut pilluarnissaata saniatigut Guutip aappariinneq sumik siunertaqarfigaa?
2 Pinngortitsisup aappariinneq ilaqutariinnerlu pilersikkamiuk nunami qitornami nuannaarnissaat kisiat pinnagu siunertaraa. Aamma kissaatigaa Guutip piumasaanik iliussasut. Aappariit siulliit ima oqarfigai: „Kinguaassiorlusi amerliartoritsi nuna tamakkerlugu ilissinnullu naalatsigitillugu; naalagaagitsilu aalisakkanut immamiittunut timmissanullu qilaap ataaniittunut nersutinullu nunami aalasunut tamanut.“ (1 Moses 1:28) Suliassaq siunertaqarluartoq pineqarpoq. Aappariit siulliit naalallutik Jehovap piumasaanik iliorsimagaluarunik meeqqatillu pilluangaarsimassagaluarput.
3. Ilaqutariit Guutimut tunniusimasuussagunik suna pisariaqartippaat?
3 Ullumikkuttaaq ilaqutariit pilluarnerusarput Guutip piumasaanik iliorniarlutik suleqatigiikkaangamik. Ilaqutariit naalattut taamaattut nuanningaartumik siunissaqarput! Apustili Paulus ima allassimavoq: ’Guutimik mianerinninneq sunut tamanut iluaqutaavoq inuunermut matumunnga piumaartussamullu atasumik unnersuummik ilaqarami.’ (1 Timûtiuse 4:8) Ilaqutariit Guutimut tunniusimasut Jehovap oqaasiani najoqqutassiarineqartut maleruarpaat taassumalu piumasaanik iliorlutik. Eqqissineq Guutimeersoq anguniarpaat taamaalillutillu ’inuunermi matumani’ pilluarlutik.
Ilaqutariittut inuuneq navianartorsiulerpoq
4, 5. Sooq oqarsinnaavugut ullumikkut ilaqutariittut inuuneq nunarsuaq tamakkerlugu navianartorsiortoq?
4 Nalunngilarput ilaqutariit tamarmiunngitsut eqqissinermik pilluarnermillu ilisarnaateqartut. Aviisimi The New York Times-imi inuiaqatigiinnik misissuineq allaatigineqarsimavoq. Ima allassimasoqarpoq: „Nunani pigissaarfiusuni pigissaarfiunngitsunilu ilaqutariittut inuuneq allanngoriartoqaaq.“ Misissuinermik allaaserinnittut ilaat oqarsimavoq:“Ilaqutariit tassaajunnaarsimapput ataasiussusillit aalajaatsut, ataataasoq pilersuisoq anaanaasorlu misigissutsikkut tapersersuisoq. Nunarsuaq tamakkerlugu anaanaasut katissimanngitsut avinnerillu amerliartuinnarput.“ Allanngornerit tamakku pissutigalugit ilaqutariit millionilippassuit tutsuiginassuseq, eqqissineq pilluarnerlu amigaatigaat. 1990-ikkut aallartinneranni Spaniami aappariit arfineq-pingajussaat tamarmik avissimapput, ukiut 25-iinnaat siornatigornit amerlanerujussuullutik, taamanikkummi aappariit 100-uugaangata aappariit ataatsit avittarsimapput. Tuluit Nunaanni, Europami avinnerit amerlanerpaaffigisaanni (missiliuunneqarpoq aappariit quliugaangata sisamat avittartut), pilersuisut kisimiittut amerleriarujussuarsimapput.
5 Inuit ilaat avinnissaminnut utaqqisinnaanngingajapput. Japanimi Tokyop eqqaani inuppassuit ‘Avinnissamut Illernartuut‘ ornigartarpaat. Shintosiortut naalaffianni tamatumani avinnissaq attaveqarnerillu kissaatigineqanngitsut allat atorunnaarnissaat qinnutigineqarsinnaasarpoq. Illernartuutiliartut qinnutitik allattarfinni qisuusuni allattarpaat illernartuutillu eqqaanut nivinngarlugit, taavalu akineqarnissartik qinnutigalugu. Tokyomi aviisit ilaanni allassimavoq illernartuut tamanna ukiut hundredet matuma siorna pilersinneqarmat ‘niuertut pigissaartut nuliaat uimik arnaatiminnut attaveqarunnaarnissaat ilaquttaminnullu uternissaat qinnutigisaraat‘. Ullumikkulli avinnissaq, uternissaq pinnagu, qinnutigineqarnerusarpoq. Qularutissaanngitsumik nunarsuaq tamakkerlugu ilaqutariittut inuuneq navianartorsiorpoq. Uagut kristumiuusugut tamanna tupigusuutigisariaqarparput? Naamik. Biibilimi oqaluttuarineqarpoq ilaqutariit ajornarsiutaannut sunarpiaq pissutaanersoq.
Sooq ilaqutariit ajornartorsiorpat?
6. 1 Juánase 5:19-imi allassimasoq ullutsinni ilaqutariit ajornartorsiutaannut qanoq attuumassuteqarpa?
6 Ilaqutariit iluanni ajornartorsiutinut pissutaasut ilaagaat ’silarsuup tamarmi ajortumit pissaaneqarfigineqarnera’. (1 Juánase 5:19, NV). Ajortoq taanna, Satan Diaavulu, sumik ilimasuffigisinnaavarput? Ajortuusoq sallutuujullunilu. (Juánase 8:44) Tupinnanngilaq taassuma silarsuaa ilumuunnginnermik kanngunartuliornermillu, ilaqutariinnut ajoqutaasunik, ulikkaarmat. Guutip peqatigiissortaasa avataanni Satanip sunniinera Jehovap aappariinnermik aaqqissuussaanut ilaqutariittullu eqqissinartumik inuunermik navianartorsiortitsivoq.
7. Ulluni kingullerni makkunani inuit amerlasuut pissuserisartagaat qanoq ilaqutariinnut sunniuteqarsinnaappat?
7 Ilaqutariit iluanni ajornartorsiutinut pissutaasoq alla 2 Timûtiuse 3:1-5-imi nassuiarneqarpoq. Tassani takutinneqarpoq maannakkut ’ullut kingulliit’ inuuffigigivut. Ilaqutariittut eqqissinartumik pilluarnartumillu inuusoqarsinnaanngilaq ilaqutariit imaappata: ’Imminnik asasut, aningaaserituut, usorsitsaapiluttut, anneruniartut, mitallersut, angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut, mamarliisut, nunujuitsut, qiningasut, ajunngitsunik uumissuisut, killuussisut, isumaatsut, ilisimatuuniartut, Guuti kajumiginagu nuannaarutinut kajumittut, Guutimik mianerinninneq ileqqorisuusaarlugu, pissaaneqarfigiumanaguli, taamaattullu alisimaniakkit.’ Ilaqutariit pilluarsinnaanngillat ilaat ataaserluunniit asanninngippat ilumuunngippalluunniit. Ilaqutariillu eqqissineq pigisinnaanerpaat nunujuitsoqarpat? Eqqissineq pilluarnerlu misigisinnaanerpaat ilaqutariit ilaat ‘Guuti kajumiginagu nuannaarutinut kajumippat‘? Silarsuarmi Satanip pissaaneqarfigisaani inuit taamaapput. Tupinnanngilaq ulluni kingullerni makkunani ilaqutariittut eqqissineq nuannaarnerlu taama angujuminaatsigimmata!
8, 9. Meeqqat pissuserisaat qanoq ilaqutariit pilluarnerannut sunniuteqarsinnaappat?
8 Ilaqutariit amerlasuut nuannaarneq eqqissinerlu amigaatigaat meeqqat ajortumik ileqqoqarnerat pissutigalugu. Paulusip ulluni kingullerni pisussat allaatigigamigit ilaatigut eqqaavai meeqqat ‘angajoqqaaminnut naalanngitsut‘. Illit inuusuttuuguit pissuseqarpit ilaquttavit nuannaarnissaannik eqqissinissaannillu kinguneqartumik?
9 Meeqqat ilaat pissutsimikkut maligassaalluanngillat. Assersuutigalugu nukappiaraq ataatani nuanniitsumik ima allaffigisimavaa: „Ilagalutit Alexandrialiartikkumanngikkumma allaffigissanngilakkit, oqaluffigissanatit inuulluaqqussanatillu, Alexandrialiaruillu assannik eqissanngilakkit ilasseqqinngisaannarlutillu. Aallartikkumanngikkumma taama pisoqassaaq . . . Qinnuigaakkillu kukkilattarissamik nasseqqullunga. Taamaaliunngikkuit neriumanangalu imerumajunnaassaanga. Nammineq pisuussutigissavat!“ Ullutsinni allagaava? Naamik, ukiut 2000-t sinnerlugit matuma siorna Egyptenitoqqami nukappiaqqap ataatani taama allaffigisimavaa.
10. Inuusuttut qanoq ilillutik ilaqutariit eqqissinermik Guutimeersumik anguniagaqarneranni ikiuussinnaappat?
10 Egyptenimiup nukappiaqqap taassuma isumaqarfiginninnera ilaqutariit eqqisseqatigiinnissaannut siuarsaataanngilaq. Soorunami ulluni kingullerni makkunani ilaqutariit iluanni ajornerungaartunik pisoqartarpoq. Taamaattorli ilissi inuusuttuususi ilaquttasi eqqissinermik Guutimeersumik anguniagaqarneranni ikiorsinnaavasi. Qanoq ilillusi? Siunnersuut manna Biibilimeersoq naalakkussiuk: ’Meeqqat ukorsii, angajoqqaasi tamatigut naalassigik, tamanna Naalakkap iluarimmagu.’ — Kulorsamiut 3:20.
11. Angajoqqaat qanoq ilillutik meeqqatik Jehovamut aalajaallutik kiffartulernissaannik ikiorsinnaavaat?
11 Ilissi angajoqqaat meeqqasi Jehovamut aalajaallutik kiffartornissaannik ikiortariaqarpasi. „Inuusuttoq ingerlavissaanik ajoqersuuguk, taava utoqqaliguni tamanna nigussanngilaa,“ Ussatit 22:6-imi taama allassimasoqarpoq. Angajoqqaat namminneq maligassaalluarunik meeqqatik Biibili tunngavigalugu ajoqersorluartarlugit inuusuttorpassuit alliartortillutik eqqortumik ingerlavissaminnit nigornavianngillat. Soorunami Biibilimik ajoqersuinerup pitsaassusia meeqqallu uummatikkut pissuseqarnera tamatumunnga aalajangiisuussapput.
12. Sooq kristumiut angerlarsimaffiat eqqissineqarfiusariaqarpa?
12 Ilaqutariit tamarmik Jehovap piumasaatut iliorniarsarigunik eqqissineq Guutip pia pigisinnaassavaat. Ilaqutariit kristumiut angerlarsimaffii tamarmik ’eqqissinerup ikinngutaanik’ ulikkaartariaqarput. Lúkarse 10:1-6 atuarutsigu takusinnaavarput inuit taama ittut Jesusip eqqarsaatigigai ajoqersukkani 70-it oqaluussiartoqqullugit aallartikkamigit. Ima oqarfigai: ‘Illumut sumulluunniit iseraangassi ima oqaqqaartaritsi:“Illu manna eqqissinarsili.“ Tassanilu eqqissinermik pissuseqartoqarpat eqqisseqqussutissi taanna uninngavigissavaa.‘ Jehovap kiffaasa eqqissillutik illumiit illumut angalaaraangamik ‘inuit eqqissinermik pissuseqartut‘ ujartarpaat. (apustilit suliait 10:34-36; Evfisumiut 2:13-18) Ilaqutariit kristumiut ’eqqissinerup ikinngutai’ eqqissinermik ilisarnaateqartariaqarput.
13, 14. (a) No’omip Rut Orpalu qanoq kissaassimavai? (b) Kristumiut angerlarsimaffiat qanoq ililluni toqqissisimanartuusinnaava?
13 Angerlarsimaffik tassaasariaqarpoq eqqissisimaffik qasuersaarfillu. Uillarnerup utoqqalisup No’omip neriuutigisimavaa Guutip ukussani uillarnerusut, Rut Orpalu, uinik angerlarsimaffinnillu pitsaasunik tunissagai eqqissinermik toqqissinermillu kinguneqartumik. No’omi oqarpoq: „Qanortoq [Jehovap] uissarsisikkilisi nuliaasutullu angerlarsimaffeqalersillusi!“ (Rut 1:9) No’omip kissaataa eqqarsaatigalugu ilisimatooq allassimavoq angerlarsimaffinni taamaattuni Rut Orpalu ’eqqissisimannginnermit isumakulunnernillu isumakulutsitaassanngitsut. Annertoqqutissartik nanisinnaassavaat. Pissutsinut tamakkununnga naalatsigitissinnaassapput, misigissutsiminnik kissaatigisaminnillu naammaginnilersinneqarsinnaassapput qasuersaarsinnaallutillu. Oqaatsit hebriiarisuut kimittuumik isumaqarnerat ersarissumik takuneqarsinnaavoq oqaatsini tamakkununnga assingusuni [Jesaja 32:17, 18-imi] atorneqartuni.“
14 Malugeriaruk Jesaja 32:17, 18 maani innersuussutigineqarmat. Tassani ima allassimasoqarpoq: „Iluarnerup inerititarissavaa eqqissineq, innarluissutsillu pissarsiaritissavai isumakuluuteqannginneq tatiginninnerlu soraarfeqanngitsut. Taava inuiaqatikka najugaqalissapput najukkami eqqissinartumi, inigisani isumannaatsuni ineqarfinnilu alianaatsuni isumakuluuteqarfiunngitsuni.“ Kristumiut angerlarsimaffianni naapertuilluarneq, eqqissineq, toqqissinassuseq eqqissinerlu Guutimeersoq atuuttariaqarput. Taavami misilinneqarnerit, isumaqatigiinngissutit ajornartorsiutilluunniit allat takkuppata? Taamaappat ilaqutariittut pilluarnerup isertugaataa ilisimasariaqarparput.
Najoqqutassiat tunngaviunerusut sisamat
15. Illit ilaqutariittut pilluarnerup isertugaataa qanoq nassuiassaviuk?
15 Jehova Guuti, ilaqutariinnik Pilersitsisoq tassaavoq nunarsuarmi ilaqutariit tamarmik ateqaatigisaat. (Evfisumiut 3:14, 15) Taamaattumik ilaqutariittut pilluarusukkutta taassumannga siulersorneqartariaqarpugut taannalu unnersiutigisariaqarlugu, soorlu tussiaasiortoq taamaaliorsimasoq: „Ilissi inuiaat naggueqatigiissortaat, [Jehova] ataqqinartillugulu naalannartissiuk.“ (Tussiaat 96:7) Ilaqutariittut pilluarnerup isertugaataa tassaavoq najoqqutassiat Biibilimiittut maleruarnissaat. Najoqqutassiat tamakku tassaammata ilumoortut kimittuut ilaqutariit tamarmik iluaqutigisinnaasaat. Ilaqutariit najoqqutassiat tamakku maleruaraangamikkik pilluarlutillu eqqissineq Guutip pia nuannaarutigisinnaasarpaat. Najoqqutassiat ilaat sisamat pingaartut misissoriartigik.
16. Imminut naalakkersinnaaneq ilaqutariittut inuunermi qanoq pingaartigaa?
16 Najoqqutassiaq siulleq imaappoq: Ilaqutariit eqqissineq Guutip pia ilisarnaatigissappassuk imminut naalakkersinnaaneq pisariaqavippoq. Kunngi Salomon ima oqarpoq: „Illoqarfittut aserukkatut qarmaajakkatut ippoq angut imminut naalakkersinnaassuseqanngitsoq.“ (Ussatit 25:28) Aap, ilaqutariittut eqqissinartumik pilluarnartumillu inuussagutta imminut naalakkersinnaassuseqartariaqarpugut. Naammalluinnanngikkaluarluta imminut naalakkersinnaassuseq, Guutip anersaavata inerititaasa ilaat, pigisariaqarparput. (Rûmamiut 7:21, 22; Galâsiamiut 5:22, 23) Anersaaq ikiortigalugu pissuseq tamanna ineriartortissinnaavarput qinnutigisarutsigu, Biibilimi unnersuussutit maleruartarlugit aamma allat imminut naalakkersinnaasut ilagisarlugit. Taamaaliorutta ‘kangunartuliorneq qimarratigisinnaavarput‘ usserniarneqarutta. (1 Korintumiut 6:18) Imminut naalakkersinnaassuseqarutta nakuuserneq, imerajunneq kamajanerlu pinngitsoortissinnaavavut imaluunniit taamaaliorajunneq ajugaaffigisinnaallugu. Taamaattumik tamatta imminut naalakkersinnaassuseq ineriartortittariaqarparput.
17, 18. (a) 1 Korintumiut 11:3-mi allassimasoq qanoq kristumiut ilaqutariittut inuunerannut attuumassuteqarpa? (b) Siulersuinermik akuerinninneq qanoq ililluni ilaqutariinni eqqissinermik Guutimeersumik pilersitsisarpa?
17 Najoqqutassiaq alla pingaartoq imaappoq: Ilaqutariittut eqqissineq Guutip pia piniarsinnaavarput oqartussaassuseq pillugu najoqqutassiaq akuerigutsigu. Paulus ima allassimavoq: ’Imaattumilli ilisimaqquassi, angutip kialuunniit Kristus niaqorigaa, arnallu angut niaqorigaa, Kristusillu Guuti niaqorigaa.’ (1 Korintumiut 11:3) Tamanna isumaqarpoq ilaqutariinni uiusoq siulersuissasoq, nuliaasup ilumoorluni tapersersussagaa meeqqallu angajoqqaatik naalassagaat. (Evfisumiut 5:22-25, 28-33; 6:1-4) Najoqqutassiaq tamanna akuerigutsigu ilaqutariittut eqqissineq Guutip pia misigissavarput.
18 Uiusut kristumiut nalunngilaat Biibili naapertorlugu siulersuineq tassaanngitsoq kisermaassilluni naalagaaniarneq. Jesus, niaqorisartik, malinniartarpaat. Naak taanna ‘tamanit annerutinneqaraluartoq‘ ‘kiffartorfigeqqulluni tikiussimanngilaq, kiffartussallunili‘. (Evfisumiut 1:22; Matîuse 20:28) Taamaattumik uiusup kristumiup asannittumik siulersuilluni ilaquttami soqutigisai ajunngitsumik isumagissavai. Nuliaasup kristumiup uini suleqatigissallugu nuannaarutigisarpaa. Oqaatigineqartutut uiminut ‘tulluartumik ikiortaassaaq‘. Angutip pissuserinngisai pissuserisinnaavai taamaalillunilu pisariaqartumik tapersersorsinnaallugu. (1 Moses 2:20; Ussatit 31:10-31) Ilaqutariit eqqortumik siulersorneqarpata angutip arnallu ataqqeqatigiillutik meeqqat naalannissaannut kajumissaarsinnaavaat. Oqartussaassuseq pillugu najoqqutassiat akuerineqarpata ilaqutariit eqqissineq Guutip pia pigisinnaassavaat.
19. Sooq attaveqatigiilluarneq ilaqutariinni eqqissinermut pilluarnermullu pingaaruteqarluinnarpa?
19 Najoqqutassiat pingaartut pingajussaat ima oqaatigineqarsinnaavoq: Ilaqutariit eqqissillutik pilluassappata attaveqatigiilluarneq pingaaruteqarluinnarpoq. Jâko 1:19-imi ima allassimavoq: ‘Inuk kinaluunniit tusarasuarluni pili oqalukkumaarnertullunilu kamakkumaarnertullunilu.‘ Sooq ilaqutariit attaveqatigiilluarnerat pingaaruteqarpa? Oqaloqatigiinneq tusarnaarnerlu ingerlalluarnermik kinguneqartarpoq. Aap, oqaloqatigiittaritsi tusarnaaqqissaartaritsilu. (Kulorsamiut 4:6) Ilaqutariit attaveqatigiinnerat aqqusinermut sammivinnut marlunnut tamanut angallattoqarfiusumut assersuunneqarsinnaavoq.
20. Sooq isumaqarpit ilaqutariit eqqisseqatigiissappata asanninneq pisariaqartoq?
20 Najoqqutassiat sisamassaat: Ilaqutariit eqqissillutik pilluassappata asanninneq pisariaqarpoq. Soorunami angutip arnallu imminnut asaqatigiinnerat ilaqutariinni pingaaruteqarluinnarpoq. Aamma ilaqutariit imminnut ungagiilluinnalersinnaasarput. Asanninnerli pingaaruteqarnerusoq tassa asanninneq griikerit oqaasiannik agaʹpē-mik taaneqartoq. Asanninneq taama ittoq Jehovamut, Jesusimut tullitsinnullu ineriartortittarparput. (Matîuse 22:37-39) Jehovap asanninneq tamanna atorlugu ‘ernitui tunniussimavaa kinaluunniit taassumunnga uppertoq tammaqqunagu, naassaanngitsumilli inuussuteqaqqullugu‘. (Juánase 3:16) Ilaqutariittut immitsinnut aamma taama ittumik asaqatigiissinnaavugut. Asanninneq pitsaalluinnartoq tamanna ’iluarluinnassutsip nimia‘-nik taaneqarpoq. (Kulorsamiut 3:14) Nimip tamatuma aappariit kattutsippai, aapparminnut meeqqaminnullu iluaqutissamik iliortittarlugit. Ajornartorsiuteqaleraangat asanninneq ikiortigalugu ataasiussuseqarlutik aaqqinniartarpaat. Tamanna ima erseqqissarneqarpoq: ‘Asannittoq . . . namminissaminik piniartarinngilaq, . . . tamatigut kamaginnittaraaq, tamatigut upperaraaq, tamatigut neriuttaraaq, tamatigut ilalaararaaq. Asanninneq soraarnavianngilaq.‘ (1 Korintumiut 13:4-8) Ilaqutariit asaqatigiinnerat Jehovamut asanninnermik tunngaveqarpat ilumut pilluarsinnaassapput.
Eqqissineq Guutimeersoq anguniartuarsiuk
21. Suup qularnanngitsumik ilaquttassinni eqqissineq pilluarnerlu allisissinnaavai?
21 Najoqqutassiat tamakku tamarmik ilaqutariittut eqqissinermik Guutip pianik anguniagaqarnitsinni iluaqutigisinnaasavut allaatigineqarput atuakkami nutaami Jehovap ‘inussiaq aalajaallunilu silatooq‘ aqqutigalugu pilersitaani. (Matîuse 24:45) Assersuutigalugu, atuakkami 192-inik quppernilimmi Ilaqutariittut pilluarneq isertugaateqarpoq-mi, Jehovap Nalunaajaasuisa 1996/97-imi silarsuaq tamakkerlugu ataatsimeersuarneranni saqqummersinneqartumi paasissutissat taamaattut nanineqarsinnaapput. Atuagaq tamanna ikiortigalugu nammineq ilaqutariittullu Biibilimik atuaqqissaarneq iluaqutaasorujussuuvoq. (Jesaja 48:17, 18) Unnersuussutit Biibilimeersut ilungersorluta maleruarniarutsigik ilaqutariittut eqqissinerput pilluarnerpullu ilumut allisinneqassapput.
22. Ilaqutariittut suna pingaarnerpaatillugu sammisariaqarparput?
22 Jehova ilaqutariinnut piumasamisut iliortunut nuannerluinnartumik siunertaqarpoq. Uummatikkut iluunngarluta unnersiutigisariaqarlugulu kiffartorfigisariaqarparput. (sarĸúmersitat 21:1-4) Taamaattumik Jehova Guutimut kiffartorneq tassaasariaqarpoq ilaqutariittut sammisarsi pingaarnerpaaq. Ilaqutariittut eqqissineq Guutip pia anguniartillugu ilungersornisi Ataatatta asannittup Jehovap pilluaqqungaassavai! (wE 15/6 97)
Qanoq akissavigit?
□ Ilaqutariit Guutimut tunniusimassagunik suna pisariaqartippaat?
□ Sooq ullumikkut ilaqutariit ajornartorsiorpat?
□ Ilaqutariittut pilluarneq sumik isertugaateqarpa?
□ Najoqqutassiat suut ikiortigalugit ilaqutariittut eqqissineq pilluarnerlu anguniarsinnaavavut?
[Qupp. 23-mi assiliartaq]
Attaveqatigiilluarnerup ilaqutariittut eqqissinermik Guutimeersumik anguniagaqarnitsinnik ikiussavaatigut