„Pinngortippai tassaatillugit angut arnarlu“

„Guutip inuk pinngortippaa imminik assililluni; imminik assililluni pinngortippaa. Pinngortippai tassaatillugit angut arnarlu.“ — 1 MOSES 1:27.

1. Sallusuissut qanoq ililluni angutinut arnanullu kristumiunut pilluaqqussutaava?

NUANNINGAARAMI Jehovap innuttaanut ilaalluni, ilagisarlugit angutit arnallu, nukappiaqqat niviarsiaqqallu, tamarmik inuunerminni pingaarnerutitaqartut Guutimik asanninnermik taassumunngalu naalannissamik. Sallusuissutip Guutip oqaasianiittup inussiaajunnaarsissimavaatigut ajoqersuutinit Biibilimeersuunngitsunit tamanit, ilinniartillutalu kristumiut qanoq inuusariaqarnerattut inuunissatsinnik. (Juánase 8:32; Kulorsamiut 3:8-10) Assersuutigalugu, nunani tamani inuit takorluugaqartarput „angutivik“ qanoq ittuussanersoq aammalu „arnavik“ qanoq ittuussanersoq. Imaaginnarnerpa angutit anguterpaluttussiaallutik arnallu arnarpaluttussiaallutik inunngortartut? Imaluunniit pissutsit allat aalajangiissuussappat?

2. (a) Suna angutaaneq arnaanerlu pillugit isiginninnitsinnut aalajangiisuusariaqarpa? (b) Inuit angutit arnallu inissimaffiinik isiginnittaaseqarnerat qanoq allanngorsimava?

² Kristumiut Guutip oqaasia naalagassatut akueraat, namminneq inuttut isummatik imaluunniit kulturimik ileqqutoqqanilluunniit tunngaveqartumik isumalioriartaaserilersimasatik uniffiginagit. (Matîuse 15:1-9) Soorunami Biibilimi erseqqissuliorluni allaaserineqanngikkaluarpoq angutaaneq arnaanerluunniit qanorpiaq ittuussanersoq. Kulturini assigiinngitsuni assigiinngisitaartunik pissuseqarsinnaaneq Biibilip inissaqartippaa. Angutit arnallu Guutimit pinngortinneqarnermittut issagunik angutit angutitut inuullutillu pissusilersortariaqarput aammalu arnat arnatut inuullutillu pissusilersortariaqarlutik. Sooq? Tassa angutit arnallu timip piisigut tapersersoqatigiittussiaallutik pinngortitaaginnaratik aammattaaq pinngortitaagamik siunertaralugu tunngaviusutigut anguterpaluutiminnik arnarpaluutiminnillu takutitseqatigiiffiginermikkut tapersersoqatigiinnissaat. (1 Moses 2:18, 23, 24; Matîuse 19:4, 5) Taamaattorli inuit angutit arnallu inissisimaffiinik equngasumik isiginnittaaseqalertarput. Amerlasuut kukkusarput angutaassuseq paarlaakkaangamikku naqisimanninnermik, makitasaarnermik angutaassutsimillu pingaartitsivallaarnermik. Inuiaqatigiit ilaanni ippigineqartarpoq angut allanit isigineqarluni qiagaangat, allaammi aamma qanigisaannarminik najorteqarluni qiagaangat. Kisianni Jesus inuit akornanniilluni Lazarusip ilerrata saani ’qullilisimavoq’. (Juánase 11:35) Jesus isumaqarsimanavianngilaq qianissaq naleqqutinngitsuusoq, aammalu inuugami naammalluinnartoq aatsaat iluamik angutiviusimassaaq. Ullumikkut aamma arnaviuneq kukkusumik isumaqarfigineqartarpoq, timikkut kinguaassiuutitigullu kajungernartuugaanni aatsaat kisianniuna tassa arnaviulluni.

Anguterpalussuseq arnarpalussuserlu

3. Angutit arnallu sutigut assigiinngillat?

³ Kisianni anguterpalussuseq arnarpalussuserlu qanoq paasisariaqarpat? Qinerlerfissiami The World Book Encyclopedia-mi ima allassimasoqarpoq: „Angutit arnallu amerlanersaat timimik pisataasiguinnaanngitsoq assigiinngitsuupput, aammali ileqqumikkut soqutigisamikkullu assigiinngitsuullutik. Assigiinngissutit tamakku ilaat biologiimik tunngaveqarput. . . . Kisianni assigiinngissutit timip pisataanut tunngasuunngitsut ilarpassui tunngaveqannguatsiarput angutit arnallu sunik isumagisaqarnissaat pillugit ilikkariartorsimasanik. Inuit inunngortarput nukappiaraallutik niviarsiaraallutilluunniit, kisianni angutitut arnatullu pissutsit ilinniagaasarput.“ Tassa assigiinngissutit ilarpassui timitta sananeqaataanik tunngaveqartinneqarsinnaapput, kisianni angutitut arnatulluunniit pissutsinik eqqortunik ineriartortitsinissatsinnut apeqqutaavoq Guutip uatsinnut piumasaanik ilinniarnersugut, aammalu apeqqutaalluni inooriaaseq suna qinerneripput.

4. Angutit arnallu inissisimaffii Biibilimi qanoq oqaatigineqarpat?

⁴ Biibilip takutippaa Adam nuliaminut qitornaminullu qullersatut siuttuunissamik akissusaaffeqassasoq. Aamma Guutip piumasaa naapertorlugu kinguaassiortussaasimavoq nunalu pinngortitallu tassaniittut imminnut naalatsigitittussaallugit. (1 Moses 1:28) Evap arnatut isumagisassani naammassiniartussaasimavaa Adamimut ’ikiortaalluni tulluartoq’, taassumunnga siulersortissaalluni Guutillu imminnut siunertaata naammassiniarnera suleqatigiissutigissallugu. — 1 Moses 2:18; 1 Korintumiut 11:3.

5. Angutip arnallu imminnut attaveqarnerat qanoq ililluni ajoquserneqarsimava?

⁵ Adamilli akissusaaffini naammassisimanngilaa, Evallu arnarpalussutsi Pinngortitsisup ataqqinaatissaanut uimilu suleqatiginissaanut atornagu Adam kimigiiserfigaa Guutimut naalanngitsulioqqullugu. (1 Moses 3:6) Adamilu anguterpalussutsiminik takutitsinani iliuuseqarpoq eqqunngitsuusoq nalunagu. Sangiitsumik iliorpoq, nulii peqqusersusaarfigineqarsimasoq naalallugu, Ataatani Pinngortitsisinilu naalannagu. (1 Moses 2:16, 17) Sivitsunngitsoq inuit aappariit siulliit taakku naalannginnerup kinguneri, Jehovap siulittuutigereersimasai, misigilerpaat. Adamip siornatigut asannippaloqaluni taalliortorpalaartumillu nuliani eqqartortarsimagaluarlugu misigittaatsumik oqaatigisalerpaa „arnaq uannut tunniussat“. Naammalluinnanngissusiata angutaassusia takussunarsisippaa eqqunngitsumut sangutillugu, tamatumalu kingunerisaanik nuliani „naalagaaffigisussanngorlugu“. Evallu uini „pilerissuseqarfigissavaa“, qularnanngitsumik ingasaassilluni. — 1 Moses 3:12, 16.

6, 7. (a) Ulersuup siornatigut anguterpalussuseq qanoq equngasumik isigineqartalersimava? (b) Ulersuup siornatigut pissutsit qanoq ilinniarfigisinnaavavut?

⁶ Ulersuup siornatigut angutit arnallu immikkut pissusii piginnaasaallu sualuttumik atornerlunneqartarsimapput. Inngilit ilaat qilammi inissisimaffissavitsik qimallugu inuttut timeqalerlutik inuit paniinik nulissiussisalersimapput. (1 Moses 6:1, 2) Allassimavoq nukappiaraannarnik qitornartaartortoqarsimasoq pissusissamisuunngitsumik kinguaassiornerup tamatuma kingunerisaanik. Isumaqartoqarpoq qitornartaarineqarsimasut taakku kinguaassiorsinnaasimanngitsut. Biibilimi taaneqarput „pissarsuit“ imaluunniit „inorujussuit“, allanik ajortumeerisarmata. (1 Moses 6:4) Taakku nakuusertartuusimagunarput, kamaassiumatuullutik soqutigittaatsuullutillu.

⁷ Erseqqippoq timikkut pinnissuseq, iluserissuseq, angissuseq imaluunniit nukittussuseq imminni anguterpalussutsimut arnarpalussutsimulluunniit eqqortumik takussutissaasinnaanngitsut. Inngilit inunngorsimasut immaqa takujuminartuusimapput. Inorujussuit, nefilimit, angisoorsuullutillu nukilissuusimapput, kisianni isumaliortaatsimikkut ileqqumikkullu inorsartuullutik. Inngilit naalasseriitsut kinguaavisalu nunarsuaq kinguaassiuutitigut ileqqorlunnermik nakuusernermillu ulikkaarpaat. Taamaattumik silarsuaq taamanikkut atuuttoq Jehovap atorunnaarsippaa Noap nalaani ulersuaq ikiortigalugu. (1 Moses 6:5-7) Kisianni anersaapiluit sunniuteqarnerat ulersuup unitsinngilaa, aammalu inuit naammalluinnanngissusiat Adamillu ajortuliornerata kinguneri iluarsinagit. Ulersuup kingornatigut angutaassutsimut arnaassutsimullu isiginnittaatsit equngasut atorneqaqqilerput, Biibilimilu nassaarisinnaavavut assersuutissat ajunngitsut ajortullu ilinniarfigisinnaasavut.

8. Josef qanoq ililluni maligassaalluarsimava?

⁸ Josefimik Potifarillu nulianik oqaluttuaq takussutissaalluarpoq angutaassutsip piviusup arnaassutsillu atornerlutap immikkoorutaannik. Potifarip nulia Josefimut pinnersumut asannilersoorpoq innaanniaraluarlugulu. Taamanikkut Guutip inatsisaanik allassimasoqanngilaq tiinganikkut kanngunartuliornermut allasiornermullu inerteqqutaasunik. Taamaattorli Josefip arnaq inuunerluttoq qimarratigaa taamalu imminut ’angutivittut’, Guutip kiffaviatut, takutilluni. — 1 Moses 39:7-9, 12.

9, 10. (a) Dronningi Vasjtip qanoq ililluni arnarpalussutsi atornerlussimavaa? (b) Ester qanoq maligassaalluarsimava?

⁹ Biibilimi oqaluttuarineqartut inuit marluk Ester kunngillu nulia Vasjti arnaasimapput assigiinngilluinnartut. Vasjti isumaqarsimagunarpoq pinneqigami uimi kunngip Ahasverusip piumasaminik akueriuaannassagaani, taamaattumillu aamma oqartussaaneranut akerliliisinnaassalluni. Kisianni pinnissusia qallikkut ittuinnaavoq. Amigaatigilluinnarsimavaa arnarpalussuseq anneruniajuinnerlu, tassami uini kunnginilu naalatsigitiffiginnginnamiuk. Kunngimut nuliaajunnaarsitaavoq, kunngillu nuliassamisut toqqarpaa arnaq arnaassutsimik piviusumik pigisalik, anneruniajuitsoq Guutimillu mianerinnittoq, Ester. — Ester 1:10-12; 2:15-17.

¹⁰ Ester ullumikkut arnanut kristumiunut maligassaalluarpoq. Allassimavoq ’taanna timigiffaarillunilu pinnersuusoq’ taamaattorli ’inummik isertukkamik uummatip pianik, anersaap piuaatsup sallaatsup pianik aserujuitsumik’ pingaartitsilluni. (Ester 2:7; 1 Pîtruse 3:4) Pinnersaatit alutornartut pingaartutut isiginngilai. Periaaserillunilu imminut naalakkersinnaavoq. Uiminut Ahasverusimut naalatsigitippoq, allaat inuiaqatini toqunneqarnissaminnik ulorianartorsiulermata. Silatusaarnerugaangat nipangertarpoq, pisariaqaraangalli piffissanngoraangallu qunusuilluni nakimaallunilu isummani oqaatigisarpaa. (Ester 2:10; 7:3-6) Illortaami inersimalluartup Mordakajip siunnersuutaa ilassivaa. (Ester 4:12-16) Aamma takutippaa inuiaqatini asallugit ilumoorfigalugillu.

Qallikkut isikkoq

11. Isikkoq eqqarsaatigalugu suna eqqaamasariaqarparput?

¹¹ Arnat qanoq ilillutik arnarpalussuseq eqqortoq ineriartortissinnaavaat? Anaanaasoq ima oqarsimavoq: „Takujuminassuseq ataannartussaanngilaq, pinnissuserlu nunguttarpoq; arnarli [Jehovamik] mianerinnittoq tassaavoq nersortarialik.“ (Ussatit 31:30) Aap, Guutimik mianerinninneq pisariaqarpoq. Arnap oqaasii iliuusiilu asanninnermik, inussiarnernermik, anneruniajuinnermik, qanilaarnermillu sunnersimaneqaraangata arnarpalussutsimut allisaataasarput timikkut pinnissutsimit annerusumik. — Ussatit 31:26.

12, 13. (a) Inuppassuit ajoraluartumik qanoq oqaluttarpat? (b) Ussatit 11:22-mi allassimasoq qanoq paasisariaqarpa?

¹² Ajoraluartumik silarsuarmi arnat angutillu ikittuinnaapput ’qanerminnik ammaasartut silatuumik oqalullutik’ imaluunniit inussiarnersumik ajoqersuussuteqarlutik. Oqaaserigajuttarpaat oqaasipiluutit, mitalliutit, kanngunartuliat oqaatsillu isumaliutigeqqaagaanngitsut. Angutit ilaat inersimarpalunngitsumik eqqarsartarput oqaasipilunneq kanngunartunillu oqalunneq anguterpalunnerusoq. Aammalu arnat ilaat ima sianiitsigisarput tamakkua tungaatigut angutinik ilaarsisarlutik, angutit naliginiartutullusooq illugit. Arnaq pinneruni, kisianni isumatuujunani, akerleriissutissarsiorajulluni, mitallerajulluni pingaakujuttuullunilu — taava ilumut pinnerpa? „Arnap pinnersup sianiitsup assigaa nigalik kuultiusoq puulukip sorluinut ivertitaq.“ — Ussatit 11:22.

¹³ Inissarinngilluinnakkaminiissaaq arnaq pinnersoq oqaasipiluppat kanngunartunilluunniit oqalulluni, mitallerluni isumatorpalunngitsumillu iliorluni. Tamanna arnaassutsimut takutikkusutaanut naapertuunnavianngilaq. Tassami guutiitsumik pissusilersornerup taamaattup inuk takujuminaraluartorluunniit kusanaatsunngortissinnaavaa. Erseqqippoq angutip imaluunniit arnap isikkua akiliutaasinnaanngitsoq imaluunniit iluartuutitsissutaasinnaanngitsoq kamannermut, suanngassuinermut mitallernermulluunniit. Kristumiut tamarmik oqalunnermikkut pissusilersornermikkullu Guutip inuillu isaanni kusanartuusinnaapput taamaanniartariaqarlutillu. — Evfisumiut 4:31.

14. Pinnersaatit qanoq ittut 1 Pîtruse 3:3-5-imi ajunngitsumik oqaatigineqarpat, illillu ilitsersuutit tamakku qanoq isumaqarfigaagit?

¹⁴ Arnaassuseq angutaassuserluunniit ilumoortoq anersaakkut ittumik pissutsinik piginnaanernillu tunngaveqarpoq, aammali pingaaruteqarpoq paasissallugu pissusilersornerput isikkorissaarnerpullu uagut qanoq ittuunitsinnik takutitseqataasinnaasartut, soorlu atisat toqqarsimasavut atisalersoriaaserpullu. Apustili Peterip qularnanngitsumik eqqarsaatigisimassavai ukiuni hundredelinni siullerni atisalersornikkut isikkorissaarnikkullu mutit, taamani kristumiut arnat unnersuukkamigit: ’Pinnersaaseritsi qallermik pinnasi, nutsanik perlaajanik kuultilersornermillu atisaqarnermilluunniit pinnasi, inummilli isertukkamik uummatip pianik, anersaap piuaatsup sallaatsup pianik aserujuitsumik, taannami Guutimut erlinnaqimmat. Taamami itsaq arnat iluartut Guutimut neriuttut pinnersartarput uiminnut naalattuullutik.’ — 1 Pîtruse 3:3-5.

15. Arnat kristumiut atisalersornermikkut suna takutittariaqarpaat?

¹⁵ 1 Timûtiuse 2:9, 10-mi Paulusip eqqartorpaa arnat atisaqartarnerat: ’Aammattaaq arnat assuassasut annorassanik ippinnaatsunik ittoorajullutik piitaajuillutillu, . . . ajunngitsuliornerillu assuutigeqqullugit, soorlumi arnat Guutimik mianerinnilluartut ileqqussaqartut.’ Anneruniajuitsuunissap pisariaqassusia erseqqissaqqinneqarpoq, ilanngullugulu oqaatigineqarpoq atisat kusanarlutillu torersuunissaat aammalu peqqissumik isumaqarnermut takussutissaanissaat.

16, 17. (a) Ullumikkut angutit arnallu amerlasuut qanoq ilillutik atisalersoriaaseq atornerluttarpaat? (b) 5 Moses 22:5-imi allassimasut tunngavigalugit qanoq isummersinnaavugut?

¹⁶ Angut, arnaq, nukappiaraq imaluunniit niviarsiaraq pissusilersoruni imaluunniit atisalersoruni kinguaassiuutitigut ussassaarerpaluttumik, tamanna anguterpalunnerulissutaanavianngilaq arnarpalunnerulissutaanaviarnaniluunniit, aammalu Guutimut ataqqinaataanavianngivippoq. Illua’tungaatigut angutit arnallu ilarpassuisa atisalersornerminni anguterpaloqqissaarnissaq arnarpaloqqissaarnissarluunniit pingaartikkaat — kinguaassiuutitigut eqeersaanissaq eqqarsaatiginerullugu — illua’tungaatigut tamatuma akerlerluinnaanik arnat angutillu assigiinnginnerat malunnartinnaveersaarniarneqartarluni atisat tungaasigut. Kristumiutut qujamasuutigisinnaavarput Guutip tamakkuninnga eqqarsaataanik Biibilimi paasitinneqaratta! Jehovap itsaq Israelikkut ima oqarfigisimavai: „Arnaq angutitut atukkersussanngilaq angullu arnatut atukkersorsimassanani, [Jehovap] Guutivit taama iliortut tamaasa maajugimmagit.“ — 5 Moses 22:5.

¹⁷ Tamatumunnga tunngatillugu uteqqiiffigilaariartigik Vagttårnet 15. aggusti 1988-imoortumi qupperneq 17-imi allassimasut: „Apeqqutaanngilaq iluseq aalajangersimasoq mutiunersoq, apeqqutaallunili Guutip kiffaanik imminut taagortumut tulluarnersoq. (Rûmamiut 12:2; 2 Korintumiut 6:3) Atisat ’qasungarpasippallaartut’ imaluunniit attuumavallaartut oqariartuutip pitsaanngitsumik isigineqaatigilersinnaavai. Tulluanngivippoq ingasattajaartut atisarissallugit, soorlu atisat angutinik arnarpaluttunngortitsisut imaluunniit arnanik anguterpaluttunngortitsisut. (Naleqqiuguk 5 Moses 22:5.) Soorunami eqqarsaatigineqassapput nunagisami ileqqut, silap qanoq innera, suna suliarinerlugu, ilaallu ilanngullugit. Ilagiit kristumiut qatanngutigiinnut nunarsuarmiittunut tamanut unioqqutitassaanngitsunik malittarisassiorusunngillat.“

18. Qanoq ililluta qulakkeersinnaavarput Biibilimi atisalersorneq isikkorissaarnerlu pillugit unnersuussutit maleruarnerlugit?

¹⁸ Unnersuussineq oqimaaqatigiissaarisoq pitsaasorlu, ilaa? Ajoraluartumik kristumiut angutit arnallu ilaasa silamiut atisalersornikkut isikkorissaarnikkullu mutiliaat maleruuffigiinnartarpaat Jehovap ilagiillu kristumiut qanoq isigineqalernissaat eqqarsaatiginngivillugu. Tamatta ataasiakkaarluta immitsinnut misissorniarta silamiut eqqarsartaasiannit sunnerneqarsimanersugut takuniarlugu. Aamma qatanngutitta ilaannut ataqqisaasumut misilittagalimmullu saaffiginnissinnaavugut isumasiorlugu atisalersortarnerput allanngortittariaqarnerlugu, taavalu siunnersuutigisinnaasai isumaliutigilluarlugit.

Angutit arnallu kristumiut — ’angutiviit’ ’arnaviillu’

19. Ajortumik sunnerneqarneq suna ingalassimasariaqarparput?

¹⁹ Satan Diaavulu silarsuup matuma guutigaa, taassumalu sunniutaa takuneqarsinnaavoq angutaassutsip arnaassutsillu paatsiveerusimaarutaanerani taassuma pilersissimasaani. Atisatigut mutit kisimik pineqanngillat. (2 Korintumiut 4:4) Arnarpassuit angutinut unammillertarput ilaqutariinni naalaganngorniarlutik, taamaalillutillu Biibilimi najoqqutassiat tunngavissiaa sumiginnartarlugit. Aammali anguterpassuaqarpoq Adamitut qullersatut akisussaaffimminnik isumaginnikkunnaarluinnarsimasunik. Allaat ilaasa kinguaassiuutitigut inissisimaffitik taarserniartarpaat. (Rûmamiut 1:26, 27) Biibili kinguaassiuutitigut inooriaatsimik allamik inissaqartitsinngilaq. Inuit kristumiunngunngikkallaramik kinaassuserminnik kinguaassiuutitigullu sammivimminnik nalornisooruteqartarsimasut maanna qularutigissanngivippaat Guutip angutinut arnanullu maleruagassiai naapertorlugit inuuneq naassaanngitsumik imminnut iluaqutaassasoq, maleruagassiat tamakku malitassaammata inuttut naammalluinnartunngorusuttunut.

20. Galâsiamiut 5:22, 23-mi allassimasut qanoq anguterpalussutsimik arnarpalussutsimillu isiginnittaatsinnut sunniuteqartariaqarpat?

²⁰ Biibilimi erseqqissarneqarpoq kristumiut angutit arnallu Guutip anersaavata inerititaanik ineriartortitsisariaqartut. Inerititat taakku tassaapput: „Asanninneq, tipaatsunneq, eqqissineq, kamaginninneq, avaaginninneq, ajunngissuseq, upperneq, saamaneq, imminullu naalakkersinnaaneq.“ (Galâsiamiut 5:22, 23) Guuti silatoqisumik aaqqissuussisimammat angutit anguterpalunnerulersinnaapput arnallu arnarpalunnerulersinnaallutik anersaap inerititaanik aallussinermikkut. Angut anersaap inerititaanik takutitsisoq ataqqiuminarnerusarpoq, arnarlu aamma taama pisoq asajuminarnerusarluni.

21, 22. (a) Jesus inuunermini qanoq maligassiuiva? (b) Jesusip anguterpalussusia sukkut takuneqarsinnaasimava?

²¹ Inuit inuusimasut pingaarnerpaartaraat Jesus, taassumalu inooriaasia kristumiut tamarmik issuarniartariaqarpaat. (1 Pîtruse 2:21-23) Jesusitut arnat angutillu Guutimut ilumoortuusariaqarput oqaasiilu naalallugit. Jesus nuanneqisunik pissuseqarsimavoq, soorlu asanninnermik, misiginneqataanermik saamanermillu. Pissutsit taamaattut uagut takutissinnaavavut. Tassami naatsorsuutigineqarpoq kristumiut ilumoortut taamaattunik pissuseqarnissaat, taamaalillutillu Jesusimut ajoqersugaanertik takutillugu. — Juánase 13:35.

²² Jesus Kristus angutiviusimavoq anguterpaluttumillu pissusii ilisimanerulersinnaavavut Biibilimi inuunera pillugu oqaluttuarineqartut atuarlugit. Katissimanngikkaluarpoq, Biibililli takutippaa arnat oqimaaqatigiissumik isigisimagai. (Lúkarse 10:38, 39) Angutit arnallu tamatigut ileqqorissumik assuarnaatsumillu attaveqarfigisarpai. Taanna angutinut maligassaavoq naammalluinnartoq. Kialuunniit — angutit, arnat inngililluunniit naalanngitsut — anguterpalunneranik Guutimeersumik Jehovamullu aalajaanneranik Jesus arsaarsinnaanngilaa. Akisussaaffini nangaanani akuerisimavai naammagittaalliornanilu taamaaliorluni. — Matîuse 26:39.

23. Angutit arnallu immikkut inissisimaffii eqqarsaatigalugit kristumiut ilumoortut suna nuannaarutigisinnaavaat?

²³ Nuanneqaaq Jehovap innuttaanut ilaalluni, peqatigalugit angutit, arnat, nukappiaqqat niviarsiaqqallu Jehova Guutimut asanninnerminnik taassumunngalu naalannerminnik inuunerminni qitiutitsisut. Guutip oqaasianut naalannissaq sumulluunniit ajoqutaanngilaq. Naalannerulli inussiaajunnaarsippaatigut silarsuarmit matumannga tamatumalu eqqarsariartaasiinit kusanassusermik aammalu arnat angutillu isumagisassaannik uungaannaq isiginnittunit. Angutaagutta arnaaguttaluunniit pilluarnermik piviusumik angusisinnaavugut Guutip uatsinnut inissareqqusaanut inissinnitsigut. Pinngortitsisoq, Guuti Jehova, qutsavigingaarparput asanninnermigut uagutsinnut iluaqutissatut pilersissimasaanut tamanut, qutsavigingaarparpullu pinngortissimammatigut angutitut arnatullu. (wE 15/6 97)

Uteqqiinissamut apeqqutit

□ Biibili naapertorlugu angutit arnallu sumik immikkut inissimaffeqarpat?

□ Ulersuup siornatigut anguterpalussuseq qanoq equngasumik isigineqalersimava, ullumikkullu anguterpalussuseq arnarpalussuserlu qanoq equngasumik isigineqartarpat?

□ Atisalersoriaaseq pillugu unnersuussutit suut Biibilimeersut maleruarniartariaqarpavut?

□ Angutit arnallu kristumiut qanoq takutissinnaavaat anguterpalussuseq arnarpalussuserlu eqqortut pigalugit?

[Qupp. 16-imi assiliartaq]

Ester pinneqaaq, pingaartumilli anneruniajuinnini anersaanilu piuaatsoq sallaatsorlu pissutigalugit eqqaamaneqarpoq

[Qupp. 17-imi assiliartaq]

Isikkut eqqumaffigiuk, kisianni ilukkut pinnissuseq pingaartinnerujuk