Atuartartut apeqqutaat
Pinerluttuliortunik toqumik pillaaneq Biibilimi qanoq oqaatigineqarpa?
Paasinarpoq atorsimasavut, imaluunnit pissutsit maannakkut atukkavut, tunngavigalugit tamatta immikkut inuttut apeqqummut tamatumunnga isumaqassagutta. Jehovalli nalunaajaasuisut Guutip toqumik pillaasarnermut isumaa pigiliunniartariaqarparput, apeqqutinilu politikkikkut isumaqatigiinngissutaasuni taamaattuni tamani akuliunnaveersaartuulluta.
Erseqqissarneqarsinnaavoq Guutip oqaasiani allassimasoqanngimmat toqumik pillaaneq eqqunngitsoq.
Soqutiginarporli Jehovap inuiaat oqaluttuarisaaneranni siusissukkut tamatumunnga isummani ersersereersimammagu Mosesimik allakkat siulliit, kapitali 9-mi, atuarneqarsinnaasumik. Tassani eqqartorneqarput Noa ilaqutaalu, inuiannut tamanut siuaasanngortut. Umiarsuarmit nioreermata uumasut neqaannik nerisarnissaannik, tassa uumasumik toqutseriarlutik, aaveriarlugu nerisarnissaannik, Guutip akuerai. Taava Mosesimik allakkat siulliit 9:5, 6-imi atuarsinnaasatsitut ima oqarpoq: „Ilissi aassi kuineqarpat tamanna akiniarneqassaaq. Uumasut kiisortut ilissi aassinnik kuisisut tamarmik akiniarneqarnissaat piumasaraara; inuillu inoqamminnik toqutsisut tamarmik akiniarneqarnissaat aammattaaq piumasaraara. Inuup aavanik kuisisup aava aamma inunnit kuineqassaaq, Guutip inuk pinngortimmagu imminik assililluni.“ Tassa toqutsisut pillarlugit toqunneqartarnissaannik Jehova pisinnaatitsisimavoq.
Israelikkut Guutip immikkut innuttarigallarmagit aamma Guutip inatsisaanik allatut unioqqutitsinerit ingasattut toqumik pillaatissinneqartarsimapput. 4 Moses 15:30-mi ima allassimavoq: „Piaaralunili ajortuliortup Israelikkuiuguni nunasisuugaluaruniluunniit taamaaliornermigut Jehova mitaatigaa, nunaqqatimilu akornannit piiagaassaaq.“
Ilagiilli kristumiut pilersinneqareerneranni tamanna allannguuteqarpa? Nalunngilarput nunarsuarmi oqartussaasut atanissaat Jehovap akuerisimagaa, oqartussaasunillu qulliunerusunik taasimagai. Kristumiut oqartussaasunut taama ittunut naalattuunissaannik kajumissaarneqareermata ima allassimavoq: ’Guutimmi kiffarai ilinnut iluaqutigeqqullugit. Ajortulioruilli ersigit asuliinnaq panalisanngimmata; kisianni Guutip kiffarai akiniaasigalugit ajortuliortunut kamanneq naammasseqqullugu.’ — Rûmamiut 13:1-4.
Tassa imaappa oqartussaasut ingasattumik pinerluttuliorsimasunik toqumik pillaasinnaatitaasut? Aap. Taamatut isummertariaqarpugut Pîtrusip agdlagai sujugdlît 4:15-imi allassimasut aallaavigalugit, tassani apustilip taassuma qatanngutini ima oqaammagit: ’Ilarsimi kinaluunniit inuarsimasutut tillissimasutulluunniit pinerlussimasutulluunniit suginngisaminulluunniit naalagaaniarsimasutut anniartinneqanngikkili.’ Oqartussaasut inuartumik pillaasinnaatitaanerat Peterip assortunngilaa. Akerlianilli paasinarsisippaa inuartoq naleqquttumik pillassallugu eqqortuliornerusoq. Tamanna toqumik pillarneqarnermik ilaqarsinnaava?
Aap. Taamaannera apustilit suliáinik agdlagkat, kapitali 25-mi, ersersinneqarpoq. Juutit ilaasa inatsisiminnik Paulus unioqqutitsinerarlugu pasillersimavaat. apustilit suliait 23:29 naapertussagaanni sakkutuut naalagaanerata Paulus tigusatut Romamiut nunamut naalagaatitaannukaassimavaa oqarlunilu: ’Malugaara inatsisitik pillugit saqitsaatigisat taassumunnga pasilliutigigaat, sumilli toqumulluunniit qilersugaanermulluunniit pissutaasumik pasillerneqanngitsoq.’ Ukiut marluk qaangiuttut Paulus nunap naalagaanut Festusimut sassartinneqarpoq. apustilit suliáinik agdlagkat 25:8-mi ima allassimavoq: ’Paulus imminik illersorpoq oqarluni: „Juutit inatsisaalluunniit naalaffilluunniit kaasariluunniit sumik ajortuliorfiginngilakka.“’ Malugiulli versi 10-mi 11-milu qanoq oqartoq, pillarneqarneq, aap, allaat toqumik pillarneqarneq, pillugu:
’Paulusilli akivaa: „Kaasarip eqqartuussiviata saani qeqartussaavunga; tassani eqqartuunneqassaanga. Juutit sukkulluunniit iluaatsuliorfiginngilakka, soorlumi ilisimalluartutit. Iluaatsuliorsimagumami toqussutissannillu iliorsimaguma toqujumanngissanngilanga; uannulli pasilliutigisaat suunngippata kialuunniit taakkununnga tunniutiinnarsinnaanngilaanga. Kaasarimut eqqartuuteqqeqquvunga!“’
Paulusip eqqortumik oqartussaassusilimmut sinniisaasup saani qeqartilluni kaasarip pinerluttunik pillaasinnaatitaanera allaallu pillakkatut toqutsisinnaatitaanera miserratiginngilaa.
Romamiut eqqartuussisoqarfiat soorunami naammalluinnartuunngilaq, aammami ullumikkut eqqartuussisoqarfiit arlaannaalluunniit naammalluinnartuunngilaq. Taamanikkut ullumikkullu pisuunngitsut eqqartuunneqarlutillu pillarneqarsinnaasarput. Allaat Jesus pinngitsuugaluarluni eqqunngitsumik pillagaalluni toqutaasimavoq. — Lúkarse 23:22-25.
Naapertuilluanngitsuliornerli tamanna naapertuilluanngitsuliornerilluunniit allat pissutigalugit Paulus Peterilu oqanngillat toqumik pillaaneq tunngaviatigut isigalugu ileqqorluttuliornerusoq. Guutip tamatumunnga isumaa tassaavoq oqartussaasut qulliunerusut atuuttuartillutik ’panalisassasut ajortuliortunullu kamanneq naammassisassallugu’. ’Panalisassapput’, ilaatigut toqumik pillaasinnaallutik. Taamaattumik silarsuarmi oqartussaasut inuartunik toqumik pillaasinnaatitaanerminnik atuisinnaanerat pillugu akerleriissuteqarnermi kristumiut ilumoortut akuliunnaveersaaqqissaartarput. Kristumiuuneraqatigiit palasii assiginagit, tamanna pillugu oqallinnermut akuliukkusunngillat. (wE 15/6 97)