Ullut tamaasa Biibilimik atuarneq iluaqutigiuk

„Pilluarpoq . . . [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu.“ — TUSSIAAT 1:1, 2.

1. (a) Napasuliaq Alapernaarsuiffiup Peqatigiiffiata qullersaqarfiata naqiterivissuata silataani qanoq allassimasoqarpa? (b) Kajumissaarut tamanna maleruarutsigu qanoq iluaqutigissavarput?

„ULLUT TAMAASA GUUTIP OQAASIA, BIIBILI, ATUARTARUK.“ New Yorkimi Brooklynimi Vagttårnip Peqatigiiffiata Biibilimik biibililersaarutinillu naqiterisarfissuata silataani naqinnernik angisuunik taama allassimasoqarpoq. Nalunaajaasuunngitsuinnaat taama kajumissaarneqanngillat. Jehovap nalunaajaasuisa paasivaat namminnertaaq taamaaliortariaqarlutik. Biibili aalajangersimasumik atuartarunikku maleruarunikkulu tassani ajoqersuutigineqartut, inerteqqutit iluarnermullu perorsaatit iluaqutigissavaat. — 2 Timûtiuse 3:16, 17.

2. Qatanngutip Russellip qanoq ililluni Biibilimik atuarnerup pingaaruteqassusia erseqqissarsimavaa?

² Jehovap nalunaajaasuisa Biibilimik atuaqqissaarnermut ikiuutissatik, soorlu Napasuliaq Alapernaarsuiffik, pingaartingaartarpaat atortarlugillu. Nalunngilaalli Biibili tamakkunannga pingaarnerusoq. 1909-mi Charles Taze Russell, Vagttårnip Peqatigiiffiata præsidentia siulleq, Napasuliaq Alapernaaruiffik-mi ima allappoq: „Eqqaamajuaruk najoqqutassavipput tassaasoq Biibili, ikiuutissavullu naak Guutimeersuugaraluartut ’ikiuutaannaasut’ Biibilimut taartaanatik.“

3. (a) ’Guutip oqaasia’ tamatuminnga atuartunut qanoq sunniuteqartarpa? (b) Berøamiut ilaasa qanoq akulikitsigisumik Allakkat atuaqqissaartarsimavaat?

³ Allakkat isumassarsiarititaasut atuakkanit allanit tamanit imaqarnerullutillu sunniisinnaaneroqaat. ’Guutip oqaasia uumavoq killinnartorsuullunilu pananillu illuttut kiinalinnit tamanit ipinnerulluni pulallunilu tarnerlu anersaarlu, naggussallu paqqillu avissaartissinnaallugit, uummatillu eqqarsaatai isumaalu killisiorsinnaallugit.’ (Eprîarit 4:12) Ajoqersukkap Lukasip Berøamiut nersorsimavai ’isumaginnerusut’-nik taallugit. Paulusip taassumalu ilagisaata Silasip tusarliussaat kajumillutik ilassivaat, aammalu ’ullut tamaasa Allakkat misissortarpaat’ paasiniarlugu ilinniarsimasatik Allakkanik tunngaveqarnersut. — apustilit suliait 17:11.

Ullut tamaasa atuartaruk

4. Allakkat qanoq takutippaat Biibili qanoq akulikitsigisumik atuartariaqaripput?

⁴ Biibilimi allassimanngilaq qanoq akulikitsigisumik atuartassagipput. Kisianni allassimavoq Jehovap Josua peqqusimagaa ’inatsisit allassimaffiat ullukkut unnuakkullu eqqarsaatigiuaannaqqullugu’ silatuumik iliuuseqarsinnaaqqullugu suliassanilu Guutimeersoq iluatsilluaqqullugu. (Josva 1:8) Allassimavoq Israelitoqqami kunngit tamarmik ’inuunertik tamaat’ Allakkat atuartassagaat. (5 Moses 17:19) Imalu allassimavoq: „Pilluarpoq guutiitsut siunnersuutaat malillugit ingerlanngitsoq . . . kisianni [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu.“ (Tussiaat 1:1, 2) Mattæusip iivangkiiliuani oqaluttuarineqarpoq Satanip ussiiniarneri Jesusip itigartikkamigit Allakkat hebriiarisuut issuarsimagai ima oqarluni: ’Allassimavoq: „Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.“’ (Matîuse 4:4) Timikkut inuussutissat qanoq akulikitsigisumik pisariaqartippavut? Ullut tamaasa! Anersaakkut inuussutissat tamakkunannga pingaarneroqaat naassaanngitsumik inuunissatsinnut aalajangiisuugamik. — 5 Moses 8:3; Juánase 17:3.

5. Uppernikkut misilinneqaraangatta ullut tamaasa Biibilimik atuartarneq iluaqutigalugu qanoq ililluta ’Jehovami ileqqorisariaqartoq naapertorlugu saqilluarsinnaavugut’?

⁵ Tamatta ullut tamaasa Guutip oqaasianit nakussatsinneqartariaqarpugut. Ullut tamaasa — angerlarsimaffitsinni, atuarfimmi, aqqusinermi, pisiniariartortilluta, oqaluussiartortilluta — uppernitsinnut unamminiarnartut naammattoortarpavut. Tamakku qanoq qisuariarfigissavavut? Peqqussutit najoqqutassiallu Biibilimeersut eqqaagasuartarpavut? Biibilimi immitsinnut tatigivallaarnissamut kajumissaarneqanngilagut, akerlianilli ima mianersoqquneqarluta: ’Kinaluunniit qeqartuusorisoq mianersorli orloqqunani.’ (1 Korintumiut 10:12) Ullut tamaasa Biibilimi atuartarutta ’Jehovami ileqqorisariaqartoq naapertorlugu tamatigut iluarisassaanik saqilluarnissatsinnut’ ikiorneqassaagut, silarsuup matuma inui ileqqoqatigeqqunagit. — Kulorsamiut 1:9, 10; Rûmamiut 12:2.

Arlaleriarluta Biibili atuartariaqarparput

6. Sooq iluaqutaava Biibili arlaleriarluni atuartassallugu?

⁶ Biibili atuakkanit oqaluttualianit allaanerulluinnarpoq. Oqaluttualiat amerlanersaat ataasiaannarlutik atuarneqartussiaapput; oqaluttuaq inerneralu nalunngikkaanni naammappoq. Akerlianik, Biibili naak arlaleriaqaluta atuareersimagaluarlugu atuaqqinnera iluaqutigingaartarparput. (Ussatit 9:9) Inuk paasiniaasoq Allakkat atuaqqikkaangamigit nutaanik paasisaqartuartarpoq. Qaammatini kingullerni tusarsimasani, takusimasani misigisimasanilu eqqarsaatigalugit ullut kingulliit pillugit siulittuutit misissoqqikkaangamigit paasisaqarnerusarpoq. (Daniel 12:1) Nammineq inuunermini misilittagaqarnerujartortilluni ajornartorsiutinillu assigiinngitsunik qaangiiniartilluni Biibilimik misissuisartup unnersuussutit siornatigut atuaannarsimasani paasinerulissavai. (Ussatit 4:18) Sualuttumik nappaateqaleruni anniaatit piiarneqarnissaannik peqqilluinnarnissamillu neriorsuutit Biibilimiittut taassumunnga aatsaat taama pingaaruteqartigilissapput. Ikinngutiminik ilaquttaminilluunniit toqusoqarpat makinnissamik neriorsuutit nuannaarutiginerujartuinnassavai.

7. Inuunitsinni nutaamik akisussaaffeqaleraangatta suup ikiussavaatigut, aamma sooq?

⁷ Immaqa illit ukiuni arlalinni Biibili atuartarlugulu unnersuussutai atortarsimavatit. Immaqali maanna inuuninni akisussaaffiit nutaat atulissavatit. Katingajalerpit? Qitornartaangajalerpit? Ilagiinni kiffartortutut utoqqaanertatulluunniit akisussaaffeqartinneqalerpit? Piffissaq tamaat oqaluussisartunngorpit oqaluussinissamut ajoqersuinissamullu periarfissaqarnerulerlutit? Biibili naallugu atuaqqilerukku akisussaaffiit nutaat tamakku eqqarsaatigalugit iluaqutigingaassavat! — Evfisumiut 5:24, 25; 6:4; 2 Timûtiuse 4:1, 2.

8. Atukkavut allanngoraangata sooq ilikkareersimasorisavut pillugit ilinniarnerusariaqarsinnaavugut?

⁸ Imaassinnaavoq maannamut anersaap inerititaanik ineriartortitsilluareersimasutit. (Galâsiamiut 5:22, 23) Atukkatilli allanngoriartortillugit immaqa inuttut pissutsit tamakku Guutimeersut pillugit ilinniarnerusariaqarputit. (Naleqqiuguk Eprîarit 5:8.) Nakkutilliisup angalasartup immikkut kiffartuussinini taamaatittariaqarsimavaa angajoqqaani utoqqalilersut isumaginiarlugit. Ima oqarsimavoq: „Isumaqarsimagaluarpunga anersaap inerititai ineriartortilluareersimallugit. Maannali misigivunga soorlu tassa aallaqqaataanit ineriartorteqqinniartariaqarlugit.“ Taamatuttaaq uiusut nuliaasullu aapparmik isumakkut timikkulluunniit sualuttumik nappaateqalersup isumaginiarnerani qasusoorneq pakatsinerlu misigisinnaavaat. Akuttunngitsumik Biibilimik atuartarneq tuppallersaataallunilu ikiuutaalluarsinnaavoq.

Qaqugukkut Biibili atuarneqarsinnaasoq

9. (a) Inuup ulapittup qanoq ililluni ullut tamaasa Biibilimik atuarneq piffissaqarfigisinnaavaa? (b) Sooq utoqqaanertat ingammik Guutip oqaasia atuartariaqarpaat?

⁹ Soorunami inunnut ulapereersunut nutaamik aalajangersimasumik qanoq iliortalernissaq unamminiarnartuusinnaavoq. Jehovalli maligassiaa iluaqutigisinnaavarput. Biibilimi takutinneqarpoq taanna piffissakkut aalajangersagaasukkut iliuuseqartartoq. (1 Moses 21:2; 2 Moses 9:5; Lúkarse 21:24; Galâsiamiut 4:4) Guutip oqaasiata aalajangersimasumik atuartarnissaata pingaaruteqarnera pingaartikkutsigu aalajangersinnaavugut ullut tamaasa piffissakkut aalajangersimasukkut taamaaliortassalluta. (Evfisumiut 5:15-17) Ingammik utoqqaanertat akuttunngitsumik Biibilimik atuarnermut piffissaqartariaqarput najoqqutassiat Biibilimeersut tunngavigalugit unnersuussisinnaaqqullutik ’ilisimassummullu pavannga pisumut’ assingusumik anersaaqarsinnaaqqullutik. — Jâko 3:17; Títuse 1:9.

10. Ullut tamaasa Biibilimik atuartartut qanoq ilillutik piffissaqarfigisarpaat?

¹⁰ Biibilimik aalajangersimasumik atuartartut ilarpassui ullaakkut ullormut suliassat aallartinnginneranni atuartarput. Allat paasisimavaat piffissami allami atuartarneq iluarnerusoq. Biibilimik atuffassinermik immiussat ikiortigalugit angalanermi piffissaq atorneqarluarsinnaavoq, nalunaajaasullu ilaasa tusarnaartarpaat illumi suliassat isumagitillugit. Europami, Afrikami, Amerikami Avannarlermi Kujallermilu Kangianilu nalunaajaasut assigiinngitsut qanoq ilillutik iluatsitsisimasut eqqartorneqarpoq ilanngutassiami „Biibilimik atuarneq — qaqugukkut qanorlu iluaqutigineqarsinnaasoq“-imik qulequtalimmi qupperneq 22, 23-miittumi.

11. Piffissaqarpallaanngikkaanni qanoq ililluni ullut tamaasa Biibilimik atuartoqarsinnaava?

¹¹ Piffissap Biibilimik atuarnermut atorneqartup sivisussusia pingaarnerpaanngilaq, atuartarnerulli aalajangersimassusia pingaarneruvoq. Qularnanngitsumik ilaat nalunaaqqutap-akunnera ataaseq sivisunerusumillunniit atuaqqissaartarput misissueqqissaarlutik tiguartilluinnarlutik. Kisianni ullut tamaasa taamaaliussallutit piffissaqarpit? Ullut arlallit Biibilimik atuanngitsoortarnermut taarsiullugu ullut tamaasa 15 minutsit, imaluunniit 5 minutsiinnat, atortarukkit pitsaanerussannginnerpa? Aalajangerniarit ullut tamaasa Biibilimik atuartassallutit. Taava periarfissaqaraangavit sukumiinerusumik atuaqqissaartarsinnaavutit.

Biibilimik atuariaatsit assigiinngitsut

12. Betelimi kiffartulerlaat Gileadimilu ilinniartut Biibilimik atuarnermut sumik pilersaaruteqartarpat?

¹² Periaatsit assigiinngitsut atorlugit Biibili atuarneqarsinnaavoq. Iluaqutaavoq naallugu atuaraanni, Mosesimik allakkat siulliit-nit sarĸúmersitat ilanngullugit. Peqatigiiffiup qullersaqarfiani imaluunniit immikkoortortaqarfiisa ilaanni Betelini kiffartortut tamarmik peqquneqartarput Betelimi kiffartornerminni ukiup siulliup ingerlanerani Biibili naallugu atuaqqullugu. (Tassa ullut tamaasa kapitalit pingasunit tallimanut imaluunniit quppernerit sisamat tallimalluunniit.) Napasuliaq Alapernaarsuiffiup Peqatigiiffiata Biibilimik Atuarfiani Gileadimi ilinniartut aamma soraarummeertinnatik Biibili naallugu atuartariaqarpaat. Neriuutigineqarpoq taamaaliorlutik ullut tamaasa Biibilimik atuartarneq ileqqorilissagaat.

13. Nalunaajaasut kuiserlaat sumik anguniagaqartariaqarpat?

¹³ Nalunaajaasut kuiserlaat aamma iluaqutigissavaat Biibilip naallugu atuarnissaanik anguniagaqarunik. 1975-imi Frankrigimi angut inuusuttoq kuisinnissaminut piareersarnermini utoqqaanertamit aperineqarpoq Biibilimik atuarneq eqqarsaatigalugu aalajangersimasumik pilersaaruteqarnersoq. Taamanimiilli ukiut tamaaasa Biibili naallugu atuartarsimavaa, amerlanertigut ullaakkut suliartortinnani taamaaliortarluni. Kingunera ima oqaatigaa: „Jehova ilisarinerujussuanngorsimavara. Paasivara iliuuserisai tamarmik siunertaanut attuumassuteqartut akornuteqaraangallu qanoq qisuariartartoq. Paasivara Jehova iliuutsimini tamani naapertuilluarlunilu ajunngitsuusoq.“

14. (a) Nammineq Biibilimik atuartarnermi iluatsitsissagaanni qanoq iliortariaqarpa? (b) Qanoq ililluta Biibilip atuagartaani atuakkatsinni pingaarnersiukkat eqqaamalluarsinnaavavut?

¹⁴ Illit Biibili naallugu atuarnikuuiuk? Taamaaliornikuunngikkuit maanna aallartinniarit. Aalajangersimasumik pilersaarusiorit tamannalu maleruarlugu. Aalajangerit ullut tamaasa quppernerit imaluunniit kapitalit qassit atuartassallugit imaluunniit piffissaq qanoq annertutigisoq atuarnermut atortassallugu. Ilaannavut ukiup ataatsip ingerlanerani Biibili naallugu atuarnissaminnut periarfissaqarput, pingaarnerpaasorli tassa aalajangersimasumik Guutip oqaasiata atuartarnissaa, ajornanngippat ullut tamaasa. Biibili naallugu atuartillugu ujarliutit qinerlerfissiallu iluaqutigisinnaavatit atuarsimasavit eqqaamanissaannut. Biibilip atuagartaasa ilaat aalajangersimasoq atualertinnagu tamanna pillugu qinerlerfissiami Insight on the Scriptures-imia imaluunniit Hjælp til forståelse af Bibelen-imi pingaarnersiukkat misissoqqaartakkit, ingammik qulequttat naqinnernik silittunik allassimasut malugalugit. Imaluunniit atuakkami „Hele skriften er inspireret af Gud og gavnlig“-mib sukumiisumik allaatigisat atuarneqarsinnaapput.

15. (a) Qupperneq 18-19-mi siunnersuutit suut atorlugit Biibilimik atuartarnerit pissarsiffiginerusinnaaviuk? (b) Quppernerit aalajangersimasut atuarnissaannaat pinnagu suna pingaartinnerussavarput?

¹⁵ Biibilimik aallaqqaataanit atuarneq iluaqutaavoq, kisianni atuartarneq qarsupiinnassanngilaq. Ullut tamaasa quppernerit aalajangersimasut atuartassanngilatit oqarniaannarlutit ukiut tamaasa Biibili naallugu atuartarlugu. Soorlu qupperneq 18-19-imi ungalusami „Biibilimik atuartarnermut siunnersuutit pissarsiffiginartut“-mik qulequtalimmi takutinneqartoq Biibili assigiinngitsutigut atuarneqarsinnaavoq nuannaarutigineqarsinnaallunilu. Periaaseq sunaluunniit atoraluarukku isumat uummatillu tamaasa nerisittariaqarpatit.

Atuarsimasavit isumaa paasiniaruk

16. Sooq atuarsimasatta eqqarsaatigeqqissaarnissaannut piffissaqartariaqarpugut?

¹⁶ Ajoqersukkani ajoqersoraangamigit paasisaqarnissaat Jesusip pingaartittarpaa. Isumakkut paasinninnissaq naammaanngilaq, ’uummatikkut paasisaqarnissaq’ maleruaanerlu pingaaruteqarnerupput. (Matîuse 13:14, 15, 19, 23) Inuup iluaniittoq, tassa inuup uummammiugisaa, Guutip pingaartillugu soqutigineruaa. (1 Samuel 16:7; Ussatit 4:23) Taamaattumik Biibilimi allassimasut isumaat paasiinnarnagu aamma eqqarsaatigeqqissaartariaqarpavut paasiniarlugu tamakku inuunitsinni qanoq sunniuteqartariaqartut. — Tussiaat 48:10; 1 Timûtiuse 4:15.

17. Allakkani atuarsimasatsinni suut eqqarsaatigeqqissaarsinnaavavut?

¹⁷ Biibilimi oqaluttuarineqartuni najoqqutassiat nassaariniartakkit tamakku nammineq inuuninni atorsinnaajumallugit. (Naleqqiuguk Matîuse 9:13; 19:3-6.) Jehovap pissusii tupinnartut pillugit atuaraangavit eqqarsaatigalugillu, periarfissaq tamanna atorluartaruk nammineq taassumunnga attaveqarnerit nakussatsinniarlugu aamma Guutimut-tunniusimaneq ineriartortinniarlugu. Jehovap siunertaanik nalunaarutit atuaraangakkit eqqarsaatigisaruk qanoq ilillutit tamakku naapertorlugit iliuuseqarsinnaallutit. Unnersuussutit toqqaannartut atuaraangakkit oqaannassanngilatit: ’Nalunngilara’, imminulli aperigit: ’Taamaaliorpunga? Taamaappallu siumukarnerusinnaavunga?’ (1 Tásalûníkamiut 4:1) Guutip piumasarisai ilikkariartortillugit malugissavatittaaq Biibilimi maligassiat, inuit inuusimasut Guutip piumasarisaanik maleruaasimasut maleruaanngitsoorsimasullu. Eqqarsaatigeriaruk sooq taamaaliorsimanersut qanorlu kinguneqarsimasoq. (Rûmamiut 15:4; 1 Korintumiut 10:11) Jesus Kristusip inuunera pillugu atuaraangavit eqqaamasaruk Jesus tassaasoq Jehovap nunarsuarmut tamarmut kunnginngortitaa; Guutip silarsuassaanut nutaamut erinineq ineriartortinniaruk. Aammalu eqqarsaatigisaruk qanoq ilillutit Guutip ernera malinniarnerusinnaallugu. — 1 Pîtruse 2:21.

18. Biibilimik atuartarneq aammalu atuaqqissaarnermut ikiuutissat ’kiffap aalajaallunilu silatuup’ pilersitaasa atornissaat qanoq ililluta oqimaaqatigiissumik isigisinnaavarput?

¹⁸ Soorunami Biibilimik atuarnerup Biibililersaarutinik pitsaasunik ’kiffap aalajaallunilu silatuup’ pilersitaanik atuisarnissat inangissanngilaa. Tamakkumi aamma tassaapput Jehovap tunissutaasa erlinnartut ilaat — pitsaasuullutillu. (Matîuse 24:45-47) Inuuninni Guutip oqaasianik aalajangersimasumik atuartarneq pingaartumik inissisimaffeqartiguk. Sapinngikkuit „ULLUT TAMAASA GUUTIP OQAASIA, BIIBILI, ATUARTARUK“. (wE 1/5 95)

[Quppernerup ataani ilanngussaq]

Qanoq akissavigit?

□ Sooq ullut tamaasa Biibilimik atuarneq iluaqutaava?

□ Sooq arlaleriarluta Biibili atuartariaqarparput?

□ Ullut tamaasa Biibilimik atuartarnermut piffissaq suna ilinnut naleqquppa?

□ Biibili atuartartillugu qanoq assigiinngitsunik periaaseqartarsinnaavit?

□ Sooq atuarsimasatta eqqarsaatigeqqissaartarnissaat pingaartorujussuua?

[Qupp. 18, 19-mi ungalusaq]

Biibilimik atuartarnermut siunnersuutit pissarsiffiginartut

(1) Inuppassuit Biibilip atuagartaasa tulleriinnerat maliinnarlugu atuartarpaat, Mosesimik allakkat siulliit-niit sarĸúmersitat tikillugu. Aammali allanneqarsimanerata tulleriinnerat malillugu atuarsinnaavatit. Eqqaamajuk Biibili tassaasoq atuakkanik 66-inik isumassarsiarititaasunik katitigaq, atuagaasivik Guutimeersoq. Aallarniiumallutit allakkat oqaluttuarisaanermut tunngasut ilaat atuarsinnaavatit, taavalu allakkat siulittuutaasut ilaat, kingornalu allakkat unnersuussutillit, naqiterneqarnermi tulleriinnerat maliinnarnagu. Eqqaamajuk suut atuareersimallugit qulakkeerlugu Biibili naallugu atuarlugu.

(2) Allakkat ilaat atuareerlugit imminut aperiarit tassani Jehova, taassuma siunertaa ilioriaasialu pillugit suut saqqummersinneqartut; tamakku qanoq inuuninnut sunniuteqartariaqartut; qanoq allat ikiorniarlugit atorneqarsinnaasut.

(3) Atuakkami „Hele Skriften er inspireret af Gud og gavnlig“-mi (qupperneq 287-90-imi) nalunaarsugaq „„Hovedbegivenheder i Jesu jordiske tilværelse“-mik qulequtalik atorlugu iivangkiiliuni tamani oqaluttuat assingusut tulleriiaarlugit atuartakkit. Naleqqiutikkit atuakkami Inuk inuit inuusimasut pingaarnerpaartaat-mi immikkoortut assingusut.

(4) apustilit suliáinik agdlagkat-ni Paulusip kiffartornera pillugu atuartillutit allakkattaaq isumassarsiarititaasut tamatumunnga attuumassutillit atuakkit. Illoqarfiit nunallu Paulusip oqaluussiffigisimasai eqqartorneqaraangata, taava allakkat Paulusip kristumioqatiminut tassaniittunut allassimasai atuakkit. Nunallu assinga, soorlu Ny Verden-oversættelsen af De Hellige Skrifter-ip ungaluaniittoq, atorlugu angalaneri malinnaaffigisinnaavatit.

(5) Mosesimik allakkat aappaanniit tallimaannut atuartillutit aamma Eprîarinut agdlagkat atuariaruk siumut assersuutaasut ilarpassui qanoq isumaqarnersut paasiniarlugu. Aamma Hjælp til forståelse af Bibelen, qupperneq 805-15-imi nalunaarsugaq „Nogle af Lovpagtens grundtræk“ takujuk.

(6) Allakkat siulittuutinik imallit atuartillugit Biibilimi oqaluttuat oqaluttuarisaanermut tunngasut naleqqiuttakkit. Assersuutigalugu Jesajap allagai atuartillugit misissoriakkit allakkani allani kunngit Uzzija, Jotam, Akaz Ezekiasilu Jesaja 1:1-imi eqqaaneqartut pillugit qanoq allassimasoqartoq. (2 Kunngit kapitalit 15-20; 2 Israelikkut kapitalit 26-32) Imaluunniit Haggajip Sakarjallu allagaat atuartillugit saniatigut Esrap allagai misissorsinnaavatit.

(7) Biibilip atuagartaasa ilaat qineruk, ilaa atuarlugu (immaqa kapitali ataaseq), taavalu paasissutissat amerlanerusut nanikkit, soorlu Vagttårnip naqitigaani allassimaffinnik ujarliut 1955-1988 imaluunniit Register til Vagttårnets publikationer atorlugu. Paasissutissat nammineq inuuninni atortakkit. Oqalugiaatinni oqaluussinermilu atortakkit. Taavalu atuarnerit ingerlateqqiguk.

(8) Biibilip atuagartaasa ilaat Napasuliaq Alapernaarsuiffiup naqitertitaasa ilaanni sammineqarpat, taava tamanna atorsinnaavat atuartillugu. (Assersuutigalugu Taalliat Asanninnilersaarutit Vagttårnet 1. maaji 1958-imoortumi quppernerni 201-14-imi sammineqarput; Hesekielip allagai atuakkami „Nationerne skal kende at jeg er Jehova“ — Hvordan?-imi; Danielimik allakkat atuakkami „Ske din vilje på jorden“-imi; Haggajip Sakarjallu allagaat atuakkami Paradiset genoprettes til menneskeheden — ved Teokratiet-imi; sarĸúmersitat atuakkami Åbenbaringen — Det store klimaks er nær!-imi aamma Napasuliaq Alapernaarsuiffik-mi oktobari, novembari decembarilu 1989-imoortumi.)

(9) Atuartillutit innersuussinerit ilaat misissortakkit. Malugikkit Allakkani Hebriiarisuunit toqqaannartumik issuakkat 320-it Kristumiut Allagaataat Griikerisuut-ni eqqartorneqartut allassimaffippassuillu allat innersuunneqartut. Malugeriakkittaaq unnersuussutit atoriaannaasut. Innersuussinerit Biibilimi siulittuutit eqquunnerannut, inuit nunallu pillugit paasissutissanut eqqarsaatinullu assingusunut immaqalu paasiuminarnerusunut tikkuaapput.

(10) Ny Verden-Oversættelsen qinerlerfissialik qallunaatooq atorutsigu quppernerup ataani nassuiaanerit ilanngussallu atuarsimasannut attuumassuteqartut misissorsinnaavatit. Tassani takutinneqarpoq oqaatsit aalajangersimasut nutserneqarnerat aammalu oqaatsit pingaaruteqartut qanoq allatut nutserneqarsinnaagaluartut. Immaqalu Biibilimik nutsikkani allani versit ilaat nutserneqarsimanerat misissorusussavat.

(11) Kapitali aalajangersimasoq atuareerukku imarisaanik naatsumik allattuisinnaavutit. Kingusinnerusukkut allattukkatit eqqaamasassatut eqqarsaatiginninnermullu atortakkit.

(12) Biibili atuartartillugu nalunaaqutsikkit allassimasut eqqaamarusutatit, imaluunniit pappiaramut allattukkit taavalu tamakku ullut tamaasa takusartakkannut ilikkit. Alanngaarniakkit, eqqarsaatigikkit atortakkillu. Ataatsikkut amerlavallaanngitsut alanngaarniassavatit, immaqa sapaatip akunneranut allassimaffik ataasiinnaq marlulluunniit; tullianik Biibili atuarukku allat qinersinnaavatit.

[Qupp. 17-mi assiliartat]

Ullut tamaasa Biibili atuartarpiuk imaluunniit Biibilimik atuffassinermik immiussat tusarnaartarpigit?