Biibilimik atuarneq — qaqugukkut qanorlu iluaqutigineqarsinnaasoq
Ullaaralaakkut:
Aappariit tamarmik angerlarsimaffimmi avataanni suliffeqartut aalajangersimapput ullaakkut minutsinik qulinik siusinnerusukkut makittalerniarlutik piffissarlu Biibilimik atuaqatigiinnissaminnut atortarniarlugu, angerlarsimaffinninnit anitigatik. Taamaalillutik anigaangamik ineriartornartunik oqaloqatigiissutissaqalertarput.
Nigeriami utoqqaanertap ilaquttamini Biibilimik atuaqqissaarnermi teokratiimik atuarfimmi pisassat atortarpai. Ullormut allassimaffik eqqartoreeraagamikku Biibilimi atuagassat atuartarpaat. Tamanna ullaap tungaani pisarpoq. Meeqqat tulleriillutik atuartarput kingornatigullu kaammattorneqartarlutik versinut atuakkaminnut apeqquteqarnissaannik.
Angerlarsimaffimmi ningiuusoq Japanimiu Biibili naallugu ukiut tamaasa 1985-iminngaanniilli atuartalersimavaa. Ullormut atuartarnissaminut pilersaarutigai minutsit 20-it 30-it, ullaakkut tallimaniit aallartilluni. Qanoq iluaqutigisimanerlugu ima oqaatigaa: „Uppernera aalajaallisinneqarsimavoq. Nappaatima puigornissaanik ikiortarpaanga paratiisissamillu neriuuterput isumaliutigeqqissaarsinnaallugu.“
Qatanngut arnaq ukiuni 30-ni pioneeriusoq uiali Nalunaajaasuunngitsoq ullaakkut makittarpoq tallimanut Biibilimik atuarniarluni. Atuartarninilu aaqqissorsimavai Allakkat Hebriiarisut-ni quppernerit sisamat, Kristumiut Allagaataat Griikerisuut kapitali ataaseq versinillu Ussatit-neersunik. 1959-imili Biibili tamaat naallugu ukiut tamaasa atuartuaannalersimavoq. Ima oqarpoq: „Taamatut atuartarnerma kingunerisimavaa misigisimasarama Jehovamik asaneqarluga. . .Qiimmassarneqartarpunga, tuppallersaatigisarlugulu najoqqutarisarlugulu.“ Imalu nangilluni: „Biibilimik atuartarnera soorlu Jehovap ullut tamaasa inuummarissartaraanga.”
Qatanngutip arnap Jehovap Nalunaajaasuisa nunami inerteqqutaaffigisaanni sallusuissummik ilinniarsimasup, uia upperisaanut akerliuvoq. Arnaq Biibilimik atuarsinnaavoq ataasinngornermit tallimanngornermut ullaakkut arfernup arfineq marlullu akornanni. Qamuuna nukittorsaatigisaqaa. Aperineqarami qanoq atuartarnini iluaqutissarsiffigisimanerlugu oqarpoq: „Jehovap Jesusillu asanissaat ilikkarpara pilluarlungalu inuuvunga naak ajornartorsiuteqartaraluarlunga artornartoqartaraluartorlu, nalunnginnakku Jehovap neriorsuutai kukkunavianngitsut.“
Pioneerit atuarfiannut peqataasimasoq qatanngut arnaq aalajangersimavoq siunnersuutigineqarsimasoq ullut tamaasa ileqquliullugu Biibilimik atuartarnissaq malinniarlugu. Siullermik ullaakkut tallimap arfernullu akornanni atuartarsimavoq. Suliffittaarneratali unitsimmagu, unnukkut qulingiluat qulillu akornannut atuartarnini nuuppaa. Pissutsinik allanik ilimaginngisaminik pisoqaraangat ima oqartarpoq: „Qanorluunnit atugaqaleraluaraangama pilersaarutikka naleqqussartassavakka.“
Ualikkut:
Brasiliami Betelimiittut qatanngutigiit arnat marluk ileqqorisimavaat ullut tamaasa Biibilimik atuartarnissartik ullup qeqqasioreernermik kingorna minutsini 20-ni. Biibili tamaat 25-eriarlugu atuarsimavaat; taamaakkaluartorli allapput: „Biibilimik atuarneq assigiiginnaviunngilaq, tamatigummi nutaamik nassaartuaannavippugut.“
Japanimiup qatanngutip arnap kisimiittup paasilersimavaa Biibilimik ilisimasaqarpallaarani, naak Jehovap Nalunaajaasuatut perorsarneqarsimagaluarluni. Pioneerinngorami aalajangerpoq aalajangersimasumik Biibili atuartalerniarlugu. Maannakkut teokratiimi atuarfimmi pisassavut sapaatip akunneranut ataasiarluni napparsimmavimmut suliaritikkiartornermini atuartalerpai. Angerlaraangami annerusumik misissueqqittarpoq. Sapaatillu akunnerata naajartulernerani Biibilimi atuartarpoq maannakkullu ukiut pisimaffii najoqqutaralugu tulleriisillugit atuartalerpaa.
Nukappiaqqap 13-niinnarnik ukiullip Biibili tamaat pingasoriarlugu atuareersimavaa, sulilu atuarfimmiit atuareeraangami ullut tamaasa kapitalimik atuartarluni. Oqarpoq tamatuma ikiorsimagaani „Jehovamik suli annerusumik asanninnerulersilluni“.
Nalunaajaasup suliffimmini utoqqaanertatullu uiusutut ataataasutullu ulapputeqartuaannartuusup qimuttuitsuni suliartortilluni Biibilimik immiussaq tusarnaartarpaa. Angerlaraangamilu tusarnaareersimasani atuartarlugit.
Frankrig-mi pioneerip arnap Biibilimik atuartarnermi saniatigut nerisassiornermini Biibili immiussaq tusarnaartarpaa, biilertilluniluunnit, piffissaniluunnit ajornartuni, imaluunnit nuannariinnarlugu.
Japanimiup pioneerip 21-nik ukiullip eqqaamavaa anaanami eqqaasittuartarsimagaani ullut tamaasa anersaakkut ittunik atuartarnissaminik, pingasuinnarnilli ukioqarluni ullormut Biibilimik atuartarsimavoq, piffissat allanngorartittarlugit. Ullormut atuagassani alajangersimasani atuareeraangamiuk, aalajangersimasumik ileqqorisimavaa allassimaffiit pingaarnerit misissortarlugit. Minutsialunnilu eqqarsaatit anersaakkut atuarsimasani uteqqittarlugit.
Pioneerip allap Biibili tamaat atuarsimavaa quleriarlugu ukiut aqqaneq-marluk ingerlaneranni. Uia uppinngitsuuvoq, taamaattumik ualikkut atuartarnissani aalajangersimavaa.
Unnukkut:
Utoqqaanertaq Japanimiu naliginnaasumik pioneeri unnuit tamaasa ukiuni arfineq-pingasuni innartinnani Biibili atuartarsimavaa. Ima oqarpoq: „Ingammik allassimaffiit nuannarisarpakka Jehovap qanoq eqqarsarneranik allassimasut, pissutsinut qanoq isummertariaaseqarnera qanorlu ajornartorsiutit aaqqiivigisarnerai. Allassimaffiit isumaliuutigeqqissaarnerisigut Jehovap eqqarsaatai pigiliussimavakka ajunnginnerusumillu qatanngutitsinnut angutinut arnanullu ilaqutaasunullu ikiuisinnaalersissimavaannga.“
Utoqqaanertaq Frankrigimiu 1979-imili innalertinnani unnuit tamaasa akunneq ataaseq Biibilimik atuartarsimavoq. Nutsikkat assigiinngitsut tallimat arfinillillu piareersimatittarsimavai assigiinngissutai naleqqiuttarniassagamigit. Oqarpoq peqqissaartumik atuartarnerata aalajangiisarnissamik ikiorsimagaani „ilisimassut Biibilimeersoq ulluinnarni qanoq atorsinnaallugu“. Aamma ajunnginnerusumik Biibili atorlugu unnersuussisinnaalersimavoq.
Ullut tamaasa Allakkat misissorniakkit-miit Betelimiittup qatanngutip angutip ukiuni 28-ni allassimaffiit ullup tullissaanut piareersartarsimavai. Saniatigullu qulequtaani allassimaffik kapitali tamaat atuartarsimallugu. Tamannalu ingerlatiinnarsimavaa katikkami maannakkulli nulianilu atuarlugillu eqqartortarpaat.
Inuusuttuaqqap Jehovamut nalunaajaasuunngitsunik angajoqqaallip ileqquliussimavaa unnuit tamaasa innartinnani minutsit tallimat qulillu missaani atuartarluni. Minutsit taakkua assut pingaartissimavai, qinusarsimallunilu atuartinnagit atuareeraangamigillu. Anguniagaraa Jehovap tusarliussaasa allanneqarsimasut tamaasa ilikkarnissaat.
Qatanngut angut nulialik Betelimiittoq oqaluttuarpoq ukiuni arfineq-pingasuni ukiumut Biibili tamaat naallugu atuartarsimallugu. Unnukkut innartinnani atuartarsimavoq minutsini 20-ni 30-nilu. Allaat qasulluni innareeraluaraangami paasilertarpaa sinissinnaanani Biibilimik atuaqqaartigani. Makittariaqartarsimavoq anersaakkullu pisariaqartitani isumageqqaartarlugu. (wE 1/5 95)