Biibili — atuagaq atuarneqartussaq
BIIBILI eqqartortillugu oqaatsinik pikkunarnerpaanik eqqaasassaarunnartarpoq. Biibili tassaavoq inuiaat oqaluttuarisaaneranni atuakkat siaruarsimanerpaartaat. Atuakkanit allanit tamanit pisoqaanerpaavoq, nutserneqarnerpaalluni, issuagaanerpaalluni, sunniuteqarnerpaalluni ataqqineqarnerpaallunilu. Qularnanngitsumillu tassaavoq atuakkat isumaqatigiinngissutigineqarnerpaartaat. Aamma atuakkanit allanit tamanit taanna inerteqqutaanerpaasimavoq, ikuallagaanerpaasimalluni assortorneqarnerpaasimallunilu. Ajoraluartumilli oqaaseq aalajangersimasoq ataaseq Biibili pillugu atorneqarsinnaajunnaarsimavoq. Tassa tassaajunnaarsimammat silarsuarmi atuagaq atuarneqarnerpaaq.
Naak Biibili pigigaluarlugu inuppassuit isumaqarput atuarnissaanut piffissaqaratik. Atuarneq qanga sukisaarsaataasimavoq nuannersoq. Ullumikkulli amerlanerit sunngiffimmi tv-mik isiginnaarneq allalluunniit sammisarpaat. Atuarnermik nuannarisaqartut amerlanertigut paasiuminarnerusut atuarumasarpaat. Biibili atuassagaanni eqqarsaqqissaartariaqarpoq, inuillu amerlanersaasa atuakkatik itisuumik eqqarsaatigisarunnaarsimavaat.
Kisianni Biibili ulloq manna tikillugu atatinneqarsimanngilaq atuagaasivinni toqqorneqaannagassatut. Atuarneqartussaavoq. Biibili pillugu paasissutissat ilaat eqqarsaatigeriakkit.
Tupinnanngilaq atatinneqarmat!
Griikerit oqaasiat bi·bliʹa, isumaqarpoq „atuagaaqqat“. Tamatuma eqqaasippaatigut Biibili atuakkanit amerlasuunit katitigaasoq, ilaat atuagaaqqatut isigineqartariaqanngikkaluartut! Ukiut 1600-it ingerlaneranni allanneqarsimapput. Allattut inuinnaapput, qutsissumilli isumassarsisitaallutik. Biibilimik allattut ilaat ima allassimavoq: ’Inuup piumasaagut pruffiitip oqaaserisaa pinngisaannnarpoq, anersaaalli illernartup pisimmatik inuit Guutimit oqalupput.’ (2 Pîtruse 1:21) Allakkani siulittuutit taamaapput, Biibililli imarisaasa sinneri aamma taamaapput. ’Atuagaaqqat’ Guutimit isumassarsiarititaasut Jehova Guutip eqqarsaataanik qutsissunik ulikkaarluinnarput. (Jesaja 55:9) Tupinnanngilaq Biibili taama sivisutigisumik atatinneqarsimammat!
Guutip kiffaasa Biibili atuakkat pingaarnerpaartaattut isigiuarsimavaat. Apustili Paulus, Biibilimik allattut ilaat, isumaqatigaat. Taanna ima allassimavoq: „Allakkat illernartut tamarmik Guutip sunniineratigut isumassarsiarititaapput iluaqutaallutik ajoqersuutaallutillu.“ (2 Timûtiuse 3:16, NV) Taamaattumik Jehovap nalunaajaasuisa ullumikkut upperisartik Biibilimik tunngaveqartippaat. Biibili ajoqersuutigisaannut iliuusissaannullu aalajangiisuuvoq. Uummatikkut iluunngarlutik kikkulluunniit kajumissaartarpaat ullut tamaasa Biibilimi atuartaqqullugit imarisaalu pingaartillugit eqqarsaatigeqqullugu. — Tussiaat 1:1-3.
Biibilimik atuarnermik ileqqoq
Allakkanik Illernartunik atuartarneq qangarsuarli iluaqutaasarsimaqaaq. Israelimi kunngit peqqunneqarsimapput Inatsisinik — ullumikkut Biibilip ilaanik pingaartunik — allattaqqullugit ullullu tamaasa atuartaqqullugit Guutip imminnut piumasaa eqqaamajumallugu. (5 Moses 17:18-20) Kunngit arlallit taamaaliunngitsooramik uppissimapput.
Allakkanik atuaqqissaarnerup iluaqutaassusia takuneqarsinnaavoq pruffiiti Daniel utoqqalisoq eqqarsaatigigutsigu. Babylonimut aallarussaalluni Danielip „allakkat atuartillugit“, tassa Biibilip ilai nalimini allanneqareersimasut nammineq atuaqqissaartillugit, paasilersimavaa Jeremiasip siulittuutaa pingaarutilik eqquukkiartulersoq. — Daniel 9:2.
Jesus inunngormat angutip Simeonip ’iluartuusup Guutimillu mianerinnittup’ tatiginnilluni ilimagisimavaa Kristusinngortussaq, tassa Messiasinngortussaq, takussallugu. Simeon neriorsorneqarsimavoq Messias takutinnagu toqussanani. Naalungiarsuk Jesus tigullugu Esajasip siulittuutaa issuarmagu paasinarsivoq Simeonip Biibilip ilaa taamanikkut allanneqareersimasoq atuaqqissaartarsimagaa. — Lúkarse 2:25-32; Jesaja 42:6.
Johannes Kuisisoq oqaluussimmat Messias pillugu ’inuit ilimasulersimapput’. Tamatuma suna takutippaa? Takutippaa juutit amerlasuut Allakkani Messias pillugu siulittuutit nalunngikkaat. (Lúkarse 3:15) Tamanna soqutiginarpoq taamanikkut atuakkat nalinginnaavallaanngimmata. Biibilimik assiliilluni allakkat peqqissaartumik assaannarmik allanneqartariaqartarsimapput, taamaattumillu ikittuinnaallutillu akisusimaqaat. Inuit taava qanoq ilillutik imarisaat nalunngissinnaasimavaat?
Amerlanertigut tamanut atuffassisarnikkut. Assersuutigalugu, Mosesip peqqussutigisimavaa piffissani aalajangersimasuni Inatsisit tamaasa Guutip tunniussimasai Israelikkunnut katersuussimasunut atuffassissutigineqartassasut. (5 Moses 31:10-13) Ukiuni hundredelinni siullerni u.n.k. Biibilimik tamanut ammasumik atuffassisarneq nalinginnaasorujussuusimavoq. Ajoqersugaq Jakob ima allassimavoq: ’Moses itsarsuarli nunaqarfinni tamani oqaluussissutigineqartarpoq, allagaalu sapaatit tamaasa naalagiartarfinni atuarneqartarlutik.’ (apustilit suliait 15:21)
Ullumikkut Biibilimik pissarsinissaq ajornanngeqaaq. ’Atuagaaqqat’ taakkua ilaat nunarsuarmiut oqaasiisa 98 procentiinut nutserneqarsimapput. Taamaattumik ajoraluaqaaq inuppassuit Biibilip imminnut qanoq oqaasissaqarnersoq soqutiginngimmassuk. Nalerput ilisimatuussutsikkut siuariartorsimaqaaq, Guutilli oqaasia, Biibili, suli ’ajoqersuutaallunillu iluaqutaavoq’. Ileqqussanut tunngasut, inuit imminnut attaveqarnerat allarpassuillu pillugit pitsaasunik unnersuussuteqarpoq. Saniatigullu Biibilimi siunissaq eqqissinartoq pillugu neriuutissatuaq allaatigineqarpoq.
Akuttunngitsumik atuartaruk
Taamaattumik Jehovap nalunaajaasui Biibilimik atuartarnissamut pingaartitsillutik kajumissaarisarput. Brooklynimi, New Yorkimiittumi, taakku qullersaqarfianni illorsuup suliffissuakuusup qaliata qaavani kajumissaarut manna naqinnernik angisuunik allanneqarsimavoq: „ULLUT TAMAASA GUUTIP OQAASIA BIIBILI ILLERNARTOQ ATUARTARUK“. Saneqquttut millionilikkuutaat oqaatsit tamakku takusimavaat, neriuppugullu amerlasuut maleruassagaat.
Jehovap nalunaajaasuisa ilagiissaanni 73.000-init amerlanerusuni sapaatit-akunneri tamaasa Teokratiimik Ilinniarfik ingerlanneqartarpoq. Allassimaffiit Biibilimeersut toqqakkat atuffassissutigineqartarnerat ilinniarnermut tamatumunnga ilaavoq. Najuuttut tamarmik kajumissaarneqartarput sapaatit-akunneri tamaasa angerlarsimaffimminni piareersartaqqullugit Biibilimi kapitalit atugassat atuarlugit. Taamaaliortarunik Biibili naallugu atuarsinnaassavaat.
Aaqqissuussaq tamanna ilinniarfimmi tamatumani atuakkat ilinniutit ilaannut naapertuulluinnarpoq. Atuakkami Håndbog for den teokratiske skole-mi (Mappersagaq Teokratiimik Ilinniarfimmut atortoq) allassimavoq: „Pilersaarutinni Biibilimik atuarnissamut piffissaqartariaqarputit. Aallaqqaataaniit naallugu atuaraanni iluaqutaassorujussuuvoq. . . . Atuaannarnissarli siunertarissanngilat, paasinninnissarli eqqaamanninnissarlu siunertarissavatit. Atuarsimasavit eqqarsaatigeqqissaarnissaannut piffissaqartarit.“
Jehovap Nalunaajaasuisa atuagassiaataat allat aamma Biibilimik atuarnissamut kaammattuutaasarput. Assersuutigalugu atuagassiap matuma aappaani, Iteritsi!-mi, inuusuttut ima kajumissaarneqarsimapput: „Biibili naallugu . . . atuarsimaviuk? Ilumut, Biibili atuagaavoq angisooq, kisianni atuassagaanni immikkoortunut minnerusunut agguarneqarsinnaavoq. . . . Berøamiut ’isumagissut’ ’ullut tamaasa allakkat misissortarsimavaat’. (apustilit suliait 17:11) Ullut tamaasa 15 minuttiinnaat atuartaruit ukioq ataaseq qaangiutsinnagu Biibili naallugu atuarsimassavat. Aap, Jehovap nalunaajaasui isumaqarput kristumiut ullumikkut inuusut Allakkat ilisimalluartariaqaraat, soorluttaaq Guutip kiffaasa itsaq inuusimasut ilisimalluaraat.
Taamaattumik Nalunaajaasut Biibilimik atuaanermik periaaseq nutaanerusoq siuarsarsimavaat. Oqaatsini arlalinni Biibili tamarmi kassettemut immiussimavaat. Inuppassuit tamakku atorlugit Biibilimik atuarnissamut akornutigisinnaasat ajugaaffigisimavaat. Ilaasa immiussat tamakku tusarnaartarpaat angerlasimaffimminni sulitillutik, biilertillutik allanilluunniit sammisaqartillutik. Issialluni Biibilimik atuffassineq tusarnaajutigalugu nammineq biibiliutimi malinnaaneq nuanneqaaq.
Maannakkut ullut tamaasa Biibilimi atuartanngikkuit taamaaliortalerniarit. Taamaaliorneq sivisuujusariaqanngilaq, iluaqutaasorujussuussaarli, Allakkammi ikiortigalugit silatuumik iliuuseqarsinnaassaatit anersaakkullu pissarsinartumik inuuneqassallutit. Taamaalioruit Israelikkut siuttuata Josuap itsaq peqqussutigisimasaa maleruassavat. „Inatsisit allassimaffiat Israelikkunnut atuffassissutigiuartarniaruk. Ullukkut unnuakkullu eqqarsaatigiuaannaruk tassanilu allassimasut tamaasa maleruaqqissaarlugit; taava iluatsitsilluassaatit.“ — Josva 1:8.
Biibilimi Jehovap inuit naalattut pillugit asannittumik siunertaa allaatigineqarpoq. Oqaasiinik isumassarsiarititaasunik eqqortumik paasisaqarnerup pilluarneq piviusoq aamma silarsuassami nutaami pilluaqqussutissarpassualimmi Paratiisimi inuunissamik naassaanngitsumik neriuut kingunerissavai. (Lúkarse 23:43; 2 Pîtruse 3:13) Biibili atuaqqissaartarniaruk taamaalillutillu inuunissaq nuanningaartoq tamanna angullugu. (wD 15/5 94)