Malawimit nutaarsiassat nuannersut!!
NUANNAAJALLANNARSIMAQAAQ tusarlugu novembarip 15-iani 1993-imi Napasuliaq Alapernaarsuiffiup Biibilimik Naqiterinermillu Peqatigiiffia nunami Afrikap kujataata-kangianiittumi Malawimi pisortatigoortumik nalunaarsorneqarsimasoq. Tamatuma Jehovap Nalunaajaasui Malawimi inunnut sallusuissummik Biibilimiittumik oqalussissutiginninnissaannut akeruisaalersillugillu kiffaanngissuseqalersissavai.
1948-mi Napasuliaq Alapernaarsuiffiup Peqatigiiffia Malawimi immikkoortortaqarfittaarsimavoq tamaani Jehovap nalunaajaasuisa sulinerat ataqatigiissinniarlugu. 1957-imi januaarip 8-ni Napasuliaq Alapernaarsuiffiup Peqatigiiffia siullerpaamik nalunaarsorneqarpoq. Ukiualunnguit ingerlanerini Jehovap nalunaajaasuisa amerliartupiloornertik nuannaarutigaat. 1964-imili nakuusernertalimmik qinugisaalersimapput. Sooq?
Guutimut naalallutik Jehovap nalunaajaasui politikkimut akuliukkumanngilluinnartuupput. (Juánase 17:16) Aalajangiusimanninneralli Biibilimik tunngaveqartoq tamanna inuit ilaasa paasinerluttarpaat nalunaajaasullu upperisarsiortutut ingasaassiniartutut inatsinillu malinnikkumanngitsutut isigisarlugit. Ilaasali kristumut eqqissinermik nuannarisaqartut taakku peqqarniitsumik pineqarneranni illersortarpaat. Nalunaajaasut ilarpassui suliffimminnit soraarsitaasimapput, tillinniarfigitissimallutik atisaajarneqarsimallutik unatarneqarsimallutik allatigullu nikanarsagaasimallutik. Ilaasa pinngitsaalisaallutik meeqqaminnit avissaartitaanertik naalliullutik atortariaqarsimavaat.
1972-imi nalunaajaasuisa 30.000-init amerlanerusut taakkunanngalu Biibilimik atuaqqissaaqatigineqartartut arlallit nuna tamanna qimattariaqarsimavaat toqutaanissartik siooragalugu. Tuusintilikkuutaat nunami saniliani Moçambiquemi qimaasunut inissianut inissittariaqarsimapput. 1975-imi qimaasut tassaniittut Malawimut utertitaapput, tassanilu qinugineqarneq atortariaqalerlugu. Ilaat tigusanik katersuutstsivinnut inissinneqarput. Tamakku tamarmik pitillugit Napasuliaq Alapernaarsuiffiup Peqatigiiffia Malawimi peqatigiiffinnut inatsisitigut akuerisaasunut ilaajunnaarsinneqarpoq. Taamanimiilli Jehovap Nalunaajaasui peqatigiiffiilu inatsisinut naapertuuttut nunami tassani inerteqqutaalerput.
Naalli tamakkorpassuit pigaluartut nalunaajaasut akiniaanngillat. Peqqarniisaarlutik akerliussutsiminnik naalakkersuisunut takutitsinianngisaannarput. Tamatumunngali taarsiullugu kristumiutut pisussaaffimmittut naalakkersuisunut „oqartussaasunut qulliunerusunut“ ataqqinninnermik piviusumik ersersitsiuartarput. (Rûmamiut 13:1-7; 1 Timûtiuse 2:1, 2) Nalunaajaasut aamma kristumiutut inuunermut najoqqutassat Biibilimiittut maleruartuarpaat, taamaaliuutigalutillu ileqqumikkut maligassiuilluartuullutik.
Qanittukkut kiffaanngissuseqartitaalernertik atorluarlugu Jehovap nalunaajaasuisa aalajangiusimalluinnarpaat Biibilip sallusuissutaanik ilungersorlutik oqaluussiuarnissartik ’iluarisaasukkut’. — 2 Timûtiuse 4:2. (wD 15/5 94)
[Qupp. 7-mi assiliartaq]
1960-ikkunni M. G. Henschel Malawimi Betelimi sulisut ilagalugit