Kinguaariit 1914-imeersut sooq malugisariaqarpat?

„Atuartartutta nalunngilaat ukiuni arlalinni piffissap maanna atuuttup annikilliornartumik siooranartumik naggaserneqaranissaa ilimagigipput, 1914-imilu oktoberip kinguninnguagut tassanngaannartumik sualuttumillu naanissaa ilimagaarput.“ — The Watch Tower and Herald of Christ’s Presence, 15. maji, 1911.

UKIUMIT 1879-imiit atuagassiami taamani The Watch Tower and Herald of Christ’s Presence-tut ilisimaneqartumi (Maannakkut Napasuliaq Alapernaarsuiffik Jehovap naalagaaffianik tusarliisoq) ukioq 1914 Biibilip siulittuutaani ukiortut malunnaateqartutut akuttunngitsumik tikkuarneqartarsimavoq. Ukioq tamanna qanilliartortillugu atuartartut „annikilliorfissap siooranartup“ ilimagineqarsinnaaneranik eqqaasinneqartarput.

Kristumiut paasissutissaq tamanna sumi tamani nalunaarutigisimavaat, mianersoqqussut tamanna ’ukiunik arfineq-marlunik’ aamma ’Guutimik nalusut ullussaannik’ Biibilimi eqqartorneqartunik paasisaqarnerminnut tunngaveqartissimallugu.a Paasivaat ullussat tamakku tassaasut ukiut 2520-t — Davidip kinguaavisa kunngeqarfiata Jerusalemimiittup ajugaaffigineqarsimaneraniit 1914-imi oktoberi tikillugu.b — Daniel 4:16, 17; Lúkarse 21:24.

1914-imi oktoberip ulluisa aappaanni Charles Taze Russell, taamani Watch Tower Bible and Tract Society-p præsidentia, isumalluarluni ima nalunaarpoq: „Guutimik nalusut ullui naasimapput; kunngii piffissaarutilerput.“ Paasinarsivoq oqaasii ilumoortut! 1914-imi oktoberimi inunnut takussaanngitsumik qilammi silarsuarmut tamarmut pingaarutilimmik pisoqarsimavoq. Jesus Kristus, ’Davidip issiavissaarsuanik’ naassaanngitsumik kingornussisoq, inuiannut tamanut kunnginngorpoq. — Lúkarse 1:32, 33; sarĸúmersitat 11:15.

Immaqali ima aperiumassaatit: ’Kristus 1914-imi kunnginngorsimappat taava sooq nunarsuarmi pissutsit ajorsiartuinnarpat?’ Tassa inuiaat akeraat takussaanngitsoq Satan suli piummat. 1914 tikillugu Satan qilammut isersinnaasarsimavoq. Tamannali Guutip naalagaaffiata 1914-imi pilersinneqarneragut allanngorsimavoq. ’Qilammi sorsuuttoqalerpoq.’ (sarĸúmersitat 12:7) Satan inngilipiluilu ajugaaffigineqarsimallutik nunamut igitaapput, inuiannut ajunaarutaasumik kingunilimmik. Biibilimi ima siulittuuteqarpoq: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ — sarĸúmersitat 12:12.

Ukiuni hundredelinni siullerni Jesusip eqqartorpaa nunarsuarmut kunngitut nutaatut takussaanani najuunnissaminut takussaasumik nalunaaqquteqarumaartoq. Ima aperineqarsimavoq: ’Suna [najuunnissannut pissutsillu aaqqissuussaanerata naggatissaannut, NV] nalunaaqqutaassava?’ Ima akisimavoq: ’Inuiaat pikitsitsiumaarput inuiaqatiminnut, naalagaaffillu naalagaaffeqatiminut; kaannersuarlu nalliuttarumaarpoq nunalu tamatigut tamaana sajuttarluni. Tamakkuli tamaasa eqqanaarnartup aatsaat aallaqqaatigai.’ — Matîuse 24:3, 7, 8.

Taamaattumik sorsunnersuaq 1914-imi aallartittoq kaannersuarmik amiilaarnartumik kinguneqarsimavoq, ukiuni sisamani nerisassanik tunisassiorneq nalinginnaasoq kipititaasimammat. Taavami ’nunap tamatigut tamaana sajuttarnera’? 1914-ip kingorna ukiut qulit ingerlanerini nunap sajunneri aseruisut qulit pisimapput, inuit 350.000-init amerlanerusut toqunerannik kinguneqartut. (Takuuk ungalusaq.) Ilumut, kinguaariit 1914-imeersut ’eqqanaarnartut aallaqqaataat’ misigisimavaat. Tamatumalu kingorna eqqanaarnartut, soorlu ajunaarnersuit pinngortitamit pissuteqartut, kaannersuit aamma sorsunnerit amerlasuut, akuttunngitsumik pisarsimapput.

Taamaakkaluartoq Guutip naalagaaffiata 1914-imi pilersinneqarsimaneranik tusarliusaq tassaavoq tusarliusaq nuannersoq Naalagaaffiup tamatuma nunarsuup aserornissaa pitsaalissammagu. Qanoq ililluni? Upperisarsiornerit eqqunngitsut ilumoortuusaartut naalakkersuisullu ajortunngorsimasut tamaasa aammalu Satanip ajortumik sunniuteqarnerata peernerisigut. (Daniel 2:44; Rûmamiut 16:20; sarĸúmersitat 11:18; 18:4-8, 24) Aammalu silarsuaq nutaaq ’iluarsuseqarfissaq’ atuutilersissavaa. — 2 Pîtruse 3:13.

Sorsunnersuup Siulliup kinguninnguagut Biibilimik atuaqqissaartartut, taamanikkut Jehovap nalunaajaasuisa imminnut taama taasaramik, paasilerpaat Jesusip kunngitut najuunneranut atatillugu allamik immikkut pisinnaatitaaffeqarlutik. Jesus Kristus ima siulittuisimavoq: ’Naalagaaffimmillu iivangkiiliu tamanna oqaluussissutigineqassaaq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussaaq.’ — Matîuse 24:14.

1919-imiit annikitsumik aallartillutik Jehovap nalunaajaasuisa kipisuitsumik ’iivangkiiliu tamanna’ oqaluussissutigiuarpaat. Tamatuma kinguneranik inuit millionilikkuutaat nunanit 200-nit amerlanerusuneersut maannakkut Guutip naalagaaffiani innuttaasussatut katersorneqarput. Innuttaasussanullu taakkununnga pilluaqqussutissat angissusissaat! Naalagaaffiup sorsunnerit, kaannersuit, pinerluttuliornerit qunutitaanerillu soraarsissavai. Allaat nappaatit toqulu ajugaaffigineqarumaarput! — Tussiaat 46:10; 72:7, 12-14, 16; Ussatit 2:21, 22; sarĸúmersitat 21:3, 4.

Kinguaariit 1914-imeersut nungutsinnagit Naalagaaffimmik oqaluussineq naammassineqassaaq. ’Taamaanneranimi,’ Jesus oqarpoq, ’naalliunnartoqangaassaaq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik. Ullullu taakku ikilisinneqanngippata inummik ataatsimilluunniit annattoqanngeqqajaqaaq; qinikkalli pillugit ullut taakku ikilisinneqassapput.’ — Matîuse 24:21, 22.

1914-ip nalaani inuusimasut kukkussutigisimasaattut kukkussuteqarnaveerit. Pissutsit maannakkut atuuttut ingerlaannassanngillat. Allanngornerit tupinnaqisut piumaarput. Silatuumilli iliortut nuannersunik periarfissaqarumaarput.

Taamaattumik pruffiitip qangali inuusimasup oqaasii tusarnaarniakkit: „[Jehova] ujarsiuk nunap inuini makitajuitsortaasusi . . . Iluarsuseq noqqaassutigisiuk, makitajuissuseq noqqaassutigisiuk. Immaqa taava qimarnguissarsiumaarpusi ullormi [Jehovap] kamaffissaani.“ — Sefanja 2:3. (wD 1/5 92)

[Quppernerup ataani ilanngussat]

[Qupp. 8-mi ungalusaq]

Nunap sajunneri 1914-ip kingorna ukiuni qulini

Ulloq: Sumiiffik: Toqusimasut:

13. Januari, 1915 Avezzano, Italia 32,600

21. Januari, 1917 Bali, Indonesia 15,000

13. Februari, 1918 Kwangtung, Kina 10,000

11. Oktoberi, 1918 Puerto Rico (kitaa) 116

3. Januari, 1920 Veracruz, Mexico 648

7. Septemberi, 1920 Reggio di Calabria, Italia 1,400

16. Decemberi, 1920 Ningsia, Kina 200,000

24. Martsi, 1923 Szechwan, Kina 5,000

26. Maji, 1923 Iran (avannaata kangiata) 2,200

1. Septemberi, 1923 Tokyo-Yokohama, Japan 99,300

Nalunaarsuiffik „Significant Earthquakes of the World“ atuakkamit Terra Non Firma-mit James M. Gere-mit aamma Haresh C. Shah-mit.