Aappariinneq pilluarnermut aqqutissatuaava?
’Piumasaminik uinissinnaavoq, kisianni Naalakkami piguni. Pilluarnerussaarli taamaaginnaruni.’ — 1 KORINTUMIUT 7:39, 40.
1. Jehova Biibilimi qanoq allaatigineqarpa, pinngortitanilu qanoq iliorfigisimavai?
JEHOVA ’Guutiuvoq pilluartoq’. (1 Timûtiuse 1:11) ’Tunissutinik tamanik ajunngitsunik tunniussanillu tamanik naammalluartunik’ tunisisutut pinngortitani sianissuseqartut tamaasa, inuit inngilillu, imminut kiffartornerminni pilluarsinnaanissaminnut pisariaqartitarpiaannik tunisarpai. (Jâk. 1:17) Taamatuttaaq timmissat qarlorsinnaanerat, qimmit aarluarsuillu pinnguarumatunerat takussutissaapput uumasut avatangiisiminni assigiinngitsuni uumanerminnik nuannaarutiginnittussanngorlugit Jehovamit pinngortinneqarsimanerannut. Tussiaasiortoq taalliortorpalaartumik allaat oqarsimavoq ’imerusuersartut Jehovap orpiutai, taakku cederit Libanonimi ikkussugai’. — Tussiaat 104:16.
2. (a) Suup takutippaa Jesus Ataatami piumasaanik iliornermini pilluarsimasoq? (b) Jesusip ajoqersugai pilluarnissaminnut sunik pissutissaqarpat?
2 Jesus tassaavoq ’Jehovap naalannassusiata akisunnera qanoq-issusiatalu ersinnera’. (Epr. 1:3) Taamaattumik tupinnanngilaq Jesus taaneqarmat ’pilluartoq kisimi pissaasoq’. (1 Tim. 6:15) Taassuma takutilluarsimavaa qanoq Jehovap piumasaanik iliorneq nerinermit nalerisimaarnarnerusinnaatigisoq, nuannaarnivimmik kinguneqartarami. Jesusip takutissimavaatiguttaaq Guutimik-mianerinnilluni iliorneq, tassa taassuminnga qamuuna ataqqinnilluni iluarinngisaanillu iliortoornissamik peqqinnartumik annilaangaginninneq nuannaarnermik nassataqartartoq. (Tussiaat 40:9; Jesaja 11:3; Juánase 4:34) Ajoqersukkat 70-it oqaluussiartoreersimallutik ’tipaatsullutik’ utermata Jesus ’anersaakkut illernartukkut nuannaartorujussuusimavoq’. Nuannaarnini Ataataminut qinunikkut oqaatigereeramiuk ajoqersukkani saaffigai oqarlunilu: ’Pilluarput isit takusassinnik takunnittut. Oqarfigaassimi: Pruffiitit kunngillu amerlasuut takusarsi takujumagaluarpaat takunaguli, tusagarsilu tusarumagaluarpaat tusarnaguli.’ — Lúkarse 10:17-24.
Pilluarnissamut pissutissat
3. Pilluarnissamut ilaatigut sunik pissutissaqarpa?
3 Jehovap oqaasiisa siunertaasalu ullumikkut naggatissami eqquunnerannik takusavut uagut isitta nuannaarutigissannginnerpaat? Siulittuutinik itsaq pruffiitit kunngillu aalajaatsut, soorlu Esajasikkut, Danielikkut Davidikkullu, paasisinnaasimanngisaannik uagut paasisaqarnerput assut nuannaarutigissannginnerparput? Pissaasumit pilluartumit, kunngitsinnit Jesus Kristusimit, siulersorneqarluta Guutimut pilluartumut, Jehovamut, kiffartornerput pilluaatiginnginnerparput? Soorunami pilluaatigaarput!
4, 5. (a) Jehovamut kiffartornitsinni pilluartuaannarumagutta suna pinngitsoortariaqarparput? (b) Aamma suut pilluaataasinnaappat, tamatumunngalu atatillugu suna apeqqutaalerpa?
4 Jehovamulli kiffartornitsinni pilluartuaannarumagutta silamiutut pilluarnissamut najoqqutassiornaveersaartariaqarpugut. Silamiut pilluarnartutut isigisaat uaguttaaq pilluarnartutut isigilersooqqajaasinnaavavut — assersuutigalugu, atortorissaarutit, piisaartutut inooriaaseq assigisaallu. Tamakkuninnga ’pilluaatiginninneq’ sivikitsuussaaq, silarsuaq manna nungujartormat. — 1 Juánase 2:15-17.
5 Jehovap kiffaasa tunniulluinnarsimasut amerlanersaasa nalunngilaat silarsuup pilluarnarsorisaanik anguniagaqarneq pilluarnermik piviusumik pigisaqalersitsisanngitsoq. Ataatatta qilammiusup kisimi kiffani piviusumik pilluarnissaannut anersaakkut timikkullu ittunik pilersortarpai. ’Inussiaq aalajaallunilu silatooq’ aqqutigalugu anersaakkut inuusssutissalersuinera qujamasuutigingaarparput! (Matîuse 24:45-47) Aamma nerisassat pisariaqartitallu allat timikkut ittut Guutip asannilluni tunissutai qujamasuutigaavut. Aammalu aappariinnermik tunissut nuanningaartoq tamatumunngalu atatillugu ilaqutariittut inuunermi nuannaarutigisinnaasat eqqaaneqarsinnaapput. Tupinnanngilaq No’omi ukussani uillarnerit pillugit ima ilungersorluni kissaateqarsimammat: „Qanortoq [Jehovap] uissarsisikkilisi nuliaasutullu angerlarsimaffeqalersillusi!“ (Rut 1:9) Tassa aappariinneq tassaasinnaavoq pillualernissamut aqqutissaq. Aappariinnerli pillualernissamut aqqutissatuaava? Ingammik inuusuttut taamaannersoq misissoqqissaartariaqarpaat.
6. Mosesimik allakkat siulliit naapertorlugit ingammik suna pillugu aappariinneq pilersinneqarsimava?
6 Aappariit siulliit pillugit Biibilimi ima allassimavoq: „Guutip inuk pinngortippaa imminik assililluni; imminik assililluni pinngortippaa. Pinngortippai tassaatillugit angut arnarlu. Guutillu pilluaqquai oqarfigalugit: ’Kinguaassiorlusi amerliartoritsi nuna tamakkerlugu ilissinnullu naalatsigitillugu.’“ (1 Moses 1:27, 28) Jehovap aappariinneq pilersimmagu, Adam aqqutigalugu inuit amerliartorsinnaalersimapput. Aappariinnerli tamatumannga nassataqarneroqaaq.
’Kisianni Naalakkami piguni’
7. Aappariinnermut tunngatillugu piumasaqaat suna ataataanerpaat ilaasa ilungersorluni maleruarniarsimavaa?
7 Jehova aappariinnermik aaqqissuussisuugami kiffami aappariinnermut tunngatillugu pilluarnermik kingunilimmik piumasaqaateqarfiginissaannut pisussaalluinnarpoq. Itsaq ataataanerpaat nalaanni Jehovamik pallorfiginninngitsumut katinnissaq iluarisaanngilluinnarsimavoq. Abrahamip kiffani Eliezer Jehovamut uppernarsaasissimavaa ernermi Isakip Kana’animiumik nuliarsarsiuutinnginnissaanik. Eliezer sivisuumik angalasariaqarsimavoq Abrahamip ilitsersuutai peqqissaartumik maleruarlugit ’arnaq Jehovap naalakkami ernerata nuliassaatut qinigaa’ naniniarlugu. (1 Moses 24:3, 44) Taava Isakip Rebekka aappartaaraa. Ernerata Esauip Hetikkut Guutimik-nalusut paniisa ilaat nuliartaarimmagit, arnat taakku ’Isakimut Rebekkamullu aliasuutaangaarput’. — 1 Moses 26:34, 35; 27:46; 28:1, 8.
8. Inatsisit tunngavigalugit angerutsip aappariinneq sukkut killiliiffigisimavaa, sooq?
8 Inatsisit tunngavigalugit angerutsip atuunnerata nalaani angummut arnamulluunniit Kana’animiumut katinnissaq inerteqqutaasimavoq. Jehovap innuttani ima inappai: „Aappaninnikkut atassuteqarfigissanngilasi, panisi ernerinut nuliartaaritissanngilasi taakkualuunniit panii ernissinnut nuliartaaritissanagit, ernisi uannik tunussitinneqaqqunagit guutit allat guusiorfigilerlugit. Naalanngikkussi [Jehova] ilissinnut kamangaarumaarpoq tassuuguinnarlu nungutikkumaarlusi.“ — 5 Moses 7:3, 4.
9. Aappariinneq pillugu Biibilimi kristumiunut sumik unnersuussuteqarpa?
9 Taamaattumik tupinnanngilaq aamma ilagiinnut kristumiunut ilaasortaasut Jehovamik pallorfiginninngitsumut katinnissamut inerteqquteqarfigineqarmata. Apustili Paulusip uppeqatini ima oqaaqqissaarsimavai: ’Uppinngitsut uniaammik allanertamik uniaqatiginiaqinasigik. Iluarnerummi iluaanneq sukkut peqatiginerpaa? Qaamasorlu taartorlu sukkut ilagiissuteqarpat? Beliar Kristusip sukkut isumaqatiginerpaa? Uppertulluunniit uppinngitsoq sukkut agguaqatiginerpaa? (2 Korintumiut 6:14, 15) Unnersuussut tamanna arlalitsigut, aappariinnermittaaq, atorneqarsinnaavoq. Jehovap kiffaanut tunniulluinnarsimasunut tamanut Paulusip unnersuussutaa ersarillunilu paatsuugassaanngilaq: Taamaallaat ’Naalakkamik ataasioqatiginnittumik’ katinniartariaqarput. — 1 Kor. 7:39, NV.
’Naalakkami’ aappanissinnaanngikkallaraanni
10. Kristumiut aappaqanngitsut amerlasuut qanoq iliortarpat, sunalu apeqqutaalerpa?
10 Kristumiut aappaqanngitsut amerlasuut Jesusip maligassiaa malillugu aappaqannginnissaq qinersimavaat. Aamma kristumiut ilumoortut allat, maannakkut ’Naalakkami’ Guutimik-mianerinnittumik aappaqalersinnaanngikkallartut Jehova tunaartaralugu aappaqannginnertik naammagalugu atorpaat uppinngitsumillu aappartaarnatik. Taakkunani Guutip anersaavata ineriartortittarpai tipaatsunneq, eqqissineq, upperneq imminullu naalakkersinnaaneq, ileqqorillutik aappaqannginnerminnik atuisinnaaqqullutik. (Galâsiamiut 5:22, 23, NV) Taamatut Guutimut-tunniusimanermikkut misilinneqarnerminni aalajaattuartut amerlanersaat tassaapput qatanngutivut arnat kristumiut pingaartingaakkavut. Nunat ilarpassuini qatanngutit arnat qatanngutinit angutinit amerlanerupput, oqaluussinermullu annertoorujussuarmik suleqataapput. Aap, „[Jehova] peqqusivoq, arnallu amerlaqaat ajugaanermik nalunaariartortut.“ (Tussiaat 68:12) Aap, Guutip kiffai aappaqanngitsut angutit arnallu amerlasuut assuarnaattuarput ’Jehova uummatikkut iluunngarlutik tunaarigamikku, Taassumalu ingerlavissaat nalimmatsertarpai’. (Ussatit 3:5, 6) Imaappali qatanngutit angutit arnallu Naalakkami katinnissaminnut periarfissaqanngitsut pilluaallutik inuusut?
11. Kristumiut Biibilip inassutaanik ataqqinnillutik aappaqanngitsut suna qularisariaqanngilaat?
11 Puiussanngilarput Guutimut pilluartumut, Jehovamut, kiffaagatta, pissaasorlu pilluartoq, Kristus Jesus, siulersortigalugu kiffartorluta. Takorloorneqarsinnaava kristumiup angutip arnalluunniit ’Naalakkami’ katissinnaasaminik peqanngimmat Biibilip inassutaanik ersarissumik ataqqinnilluni aappaqanngitsuuginnarnini pissutigalugu pilluaalluni inuunissaa Jehovap Kristusillu ilaginnaannassagaat? Naamerluinnaq. Taamaattumik pinngitsoorata isummertariaqarpugut katissimanngikkaluarluni pilluarluni inuusoqarsinnaasoq. Katissimanngikkaluaruttaluunniit Jehovap piviusumik pilluartissinnaavaatigut.
Pilluarnivimmut aqqut
12. Inngilit naalanngitsunngorsimasut eqqarsaatigalugit aappariinneq pillugu suna paasinarsiva?
12 Aappariinneq tassaanngilaq Guutip kiffaanut tamanut pilluarnissamut aqqutissatuaq. Inngilit assersuutigeriartigik. Ulersuaq sioqqullugu inngilit ilaat imminnut pissusissamisuunngitsunik pilerigisaqalersimapput, aappaqarsinnaatitaannginnertik naammagiunnaarlugu, inuttullu timilerlutik arnat aappartaariniarlugit. Inngilit taakkua taamaalillutik ’inigisartik qimammassuk’ Guutip ’tarrup ataani qilersorsimattuinnartillugit ullussarsuaq eqqartuutiffissaq nalliutserlugu toqqorpai’. (Jûtarse 6; 1 Moses 6:1, 2) Ersarissumik Guutip inngilit aappaqarnissaat siunertarinngilaa. Taamaattumik aappariinneq taakkua pilluarnissaannut aqqutissaanngilaq.
13. Inngilit illernartut sooq pilluarpat, taamaattumillu Guutip kiffai tamaasa pillugit qanoq isummersinnaavugut?
13 Taamaattumik inngilit aalajaatsut pilluarput. ’Ullaap ulloriai tamarmik tussiaqatigiissimapput Guutillu erneri tamarmik nipertik illugalugu qiimmattarlutik’ taamanikkut Guutip nunarsuaq tunngavilermagu. (Job 38:7) Sooq inngilit illernartut pilluarpat? Jehovamik kiffartuussinissaminnut piareersimajuaannaramik ’oqaasii tusaannaraangamikkik’ inassutai maleruartarlugit ’piumasaanik naammassinninnertik’ nuannaarutigalugu. (Tussiaat 103:20, 21) Aap, inngilit illernartut pilluarsinnaapput aalajaallutik Jehova kiffartorfigigamikku. Tamannattaaq inuit pilluarnissaannut aqqutissaavoq. Taamaattumik kristumiut tanitaasut aappallit maannakkut pilluarlutik Guutimut kiffartortut qilammi inuunissamut makitinneqarunik katissanngillat, kisianni pinngortitatut anersaajusutut pilluarlutik Guutip piumasaanik iliussallutik. Aappaqarunik aappaqanngikkunillu tamarmik Jehovap kiffai ilumoortut pilluarsinnaapput, pilluarnissamut aqqutissaq piviusoq tassaammat Pinngortitsisumut aalajaalluni kiffartorneq.
’Ernernit paninnillu pitsaanerusoq’
14. Israelimi angutaassutaajakkat siulittuutaasumik sumik neriorsorneqarsimappat, sooq tamanna eqqumiippaluppa?
14 Allaat kristumiup aalajaatsup aappaqanngisaannartup pilluarnissaa Guutip qularnaartarpaa. Oqaatsit siulittuutaasut makku Israelimi angutaassutaajakkanut tunngasut qiimmaallannartut tamatumunnga naleqqulluarput: „Ima oqarpoq [Jehova]: ’Angutaassutaajakkat sabbatinik pigisannik atorluaasut, iluarinartitannik qinersisut angerutsinnillu aalajangiussisut, taakku illunni qarmarsuaatima iluanni tuniumaarpakka eqqaassutissianik aqqisa allassimaffissaannik ernernit paninnillu eqqaassutaalluarnerusunik. Atertaartissavakka piiarneqanngisaannartussamik.’“ (Jesaja 56:4, 5) Immaqa ilimagineqarsinnaagaluarpoq nuliartaarnissaminnik aterminnillu ingerlatitseqqissinnaasunik qitornartaarnissaminnik neriorsorneqassasut. Kisianni neriorsorneqarput ernernit paninnillu eqqaassutaalluarnerusumik, imaluunniit pitsaanerusumik, tassa Jehovap illuani atermik naassaanngitsumik.
15. Jesaja 56:4, 5-ip eqquunnera qanoq oqaatigineqarsinnaava?
15 Angutaassutaajakkat taakku ’Israelimut Guutip pigisaanut’ assersuutaasimassagunik taava tassaasimassapput Jehovap tanitai anersaakkut illuani imaluunniit naalaffiani naassaanngitsumik inissamik Jehovamit tunisittussat. (Galâsiamiut 6:16) Siulittuut tamanna qularnanngitsumik aamma timikkut eqquutissaaq, angutaassutaajakkat Guutimik mianerinnittut Israelitoqqameersut makititaappata. Kristusip utertitsissutitut pilliutaa ilassigunikku tamatigullu ’Jehovap iluarinartitaa qinertarunikku’, Jehovap silarsuassaani nutaami ’naassaanngitsumik atertaassaapput’. Siulittuut aammattaaq atorneqarsinnaavoq ’savat allat’ ilaannut ullumikkut naggatissap nalaani Jehovamut kiffartornerminni suliniuteqarnerujumallutik aappaqarnerup qitornaqarnerullu nuannersortaannik imminnut pinngitsoortittunut. (Juánase 10:16) Taakkua ilaat immaqa suli katinnatik qitornaqaratillu toqussapput. Aalajaakkunilli ’ernernit paninnillu eqqaassutaalluarnerusumik’ pissarsissapput — tassa pissutsit aaqqissuussaaneranni nutaami ’atermik piiarneqanngisaannartussamik’.
Aappariinneq tassaanngilaq pillualernissamut aqqutissatuaq
16. Sooq aappariinneq tamatiguunngitsoq pilluarnartuusarpa?
16 Inuit ilaasa aappariinneq pilluarnartuaannartutut isigaat. Nassuerutigisariaqarporli tamatiguunngitsoq pilluarnartuusarmat, allaat Jehovap ullumikkut kiffaasa akornanni. Ajornartorsiutit ilaat aappariinnikkut aaqqiinneqartarput, ajornartorsiutilli aamma allat aappaqanngitsup akiugassaanit artornarnerusut aappariinnermi akiugassaasarput. Aappariinneq ’uinngup piisigut naalliuuteqarnarsinnaavoq’. (1 Korintumiut 7:28) Aappaqartut ilaannikkut ’isumakuluuteqartarput’ ’immikkullu inuuseqartarlutik’. Amerlanertigut aappariit ’ippinnaatsuuneq nakimaatsumillu Naalakkamiittuinnarneq’ artornartissinnaasarpaat. — 1 Korintumiut 7:33-35.
17, 18. (a) Angalallutik nakkutilliisut ilaasa suna oqaluttuaraat? (b) Paulus qanoq siunnersuiva, tamatumalu maleruarnissaa sooq iluaqutaassava?
17 Aappariinneq aappaqannginnerlu tamarmik Guutimit tunissutaapput. (Rut 1:9; Matîuse 19:10-12) Pillualerumagaannili qanorluunniit aalajangissagaluaraanni inissisimaneq qinunikkut eqqarsaatigilluaqqissaartariaqarpoq. Angalallutik nakkutilliisut oqaluttuarput Jehovap Nalunaajaasuisa ilarpassui inuusuppallaarlutik katittartut, ilarpassuilu meerartaartartut akisussaaffimmik tigumminissartik suli saperlugu. Aappariinnerit tamakku ilaat aserortarput. Ilaat aappariiginnartarput, aappariinneralli pilluarnissaannut aqqutaasimanngilaq. Isiginnaagassiortartoq tuluk William Congreve ima allassimavoq: Nukingiinnaq katittut, „piffissaqarlualerunik immaqa peqqissimilissapput“.
18 Nakkutilliisut ilaat oqaluttuarsimapput qatanngutit angutit inuusuttut ilaat Betelimi kiffartornissamut imaluunniit Kiffartortut Toqqakkat Ilinniarfiannut qinnuteqanngitsoortartut ukiualunnguani aappaqanngitsuunissap piumasarineqarnera pissutigiinnarlugu. Apustilili Paulus siunnersuivoq ’inuusuttuunerup aallaqqaataa qaangiuppat’ aatsaat katinnissamik. Tassa kinguaassiuutitigut perusussutsit siulliit sakkortuut qaangiunnissaannut utaqqisariaqarpoq. (1 Korintumiut 7:36-38, NV) Aappaqarani inersimasutut ukiualunni inuuneq misilittagaqalerluarfiusarpoq ilisimasaqarlualerfiusarlunilu, tamatumalu kingunerisaanik aappassamik qinersinissamut imaluunniit aappaqanngitsuuinnarumalluni aalajangernissamut tunngavissaqarluarnarnerulluni.
19. Aappaqarnissatsinnik pisariaqartitsivinngikkutta qanoq isumaqartariaqarpugut?
19 Ilatta ’inuusuttuunerup aallaqqaataa’ tamatumanilu kinguaassiuutitigut sakkortuumik perusussuseqarneq qaangersimavaat. Ilaannikkut aappariinnerup pilluaqqussutissartai eqqarsaatigisaraluarpaat, taamaattorli aappaqannginnertik iluaqutigalugu. Jehovap malugisinnaavaa aappaqaratik kinguneqarluartumik kiffartorfigigaanni aappaqarnissartillu pisariaqartivinnagu, aappaqaraluarunimmi immaqa kiffartuussinermi immikkut pisinnaatitaaffiit aalajangersimasut taamaatittariaqassagaluarpaat. Aappaqarnissarput pisariaqartinngikkutsigu aappaqanngikkuttalu, Guutip immaqa uatsinnut immikkut pisinnaatitaaffik alla piareersimatissavaa. Tatigisariaqarparput pisariaqartitatsinnik tunissagaatigut. Maniguulluni Guutip uatsinnut piumasaanik akuerinninneq pilluarnissamut annerpaamut aqqutissaavoq, soorluttaaq juutit kristumiut ’Guuti unnersiutigisimagaat’ paasigamikku Guutimik nalusuttaaq allamik isumataartikkai inuuginnaqqullugit. — apustilit suliait 11:1-18.
20. (a) Kristumiut inuusuttut aappaqannginneq pillugu sumik siunnersorneqarpat? (b) Ilumoortoq suna pilluarnissamut tunngaviujuaannarpa?
20 Aappariinneq pilluarnermut aqqutissaava? Taamaassinnaavoq. Aammattaarli ajornartorsiuterpassuarnik nassataqarsinnaavoq. Ataaseq qularnaappoq: Aappariinneq pilluarnermut aqqutissatuaanngilaq. Taamaattumik suut tamaasa eqqarsaatigalugit kristumiunut inuusuttunut silatusaarnerussaaq ukiuni arlalialunni aappaqanngikkallarnissaq, ukiunilu taakkunani Jehovamut kiffartorlunilu anersaakkut ineriartornissaq. Utoqqaassuseq anersaakkullu angusaqarsimassuseq apeqqutaatinnagit Guutimut-tunniulluinnarsimasunut tamanut ilumoortoq manna tunngaviujuarpoq: Pilluarnissamut aqqutissaq piviusoq tassaavoq Jehovamut aalajaalluni kiffartorneq. (wD 15/5 92)
Qanoq akissavit?
□ Sooq Jehovap kiffai pilluarpat?
□ Sooq aappariinneq tassaanngila pilluarnermut annerpaamut aqqutissaq?
□ Aappariinnermut tunngatillugu Jehovap innuttai tamatigut sumik piumasaqaateqarfigineqartarsimappat?
□ Sooq tunngavissaqarluartumik isumaqarsinnaavugut kristumiut aappaqanngitsut pilluarsinnaasut?
□ Aappariinneq pilluarnerlu eqqarsaatigalugit suna miserratigineqarsinnaanngila?