Guutip kamagittarnera qanoq sivisutigisumik ataannassava?
UKIUT 3000-it matuma siorna ilisimasoq ima allassimavoq: ’Inuit ilaat inoqatiminnut ajoqutaasumik pissaaneqarpallaarput.’ (Nalunaajaasup oqaasii 8:9) Oqaatsit tamakkua allanneqarsimaneranniilli manna tikillugu pissutsit pitsaanerulersimanngillat. Inuit oqaluttuarisaanerata ingerlanerani inuit eqimattallu assigiinngitsut imminnut taarseraallutik pissaanermik tigusisarsimapput, inuit allat qunusiarisarlugit atornerluttarlugillu. Jehovap kamagittarluni tamanna isiginnaarsimavaa.
Naalakkersuisut sorsunnikkut inunnik millionilikkuutaanik toqutaatitsisittartillugit aningaasatigullu annertuumik naapertuilluanngissutsimik akuerinniinnartillugit Jehova kamagittartuarsimavoq. Allaat ullumikkut kamagittarluni isigai inuit ozonip qaleriissitaarnerinik aseroriarterisut silaannaq imarsuillu mingutsillugit. Ila, nunap naggorissup aseroriartornera orpippassuillu uumasorpassuillu nunguttarnerat isigalugit aliasuutigissaqaa!
Sooq Guuti taama kamagittartigaa?
Assersuut paasiuminartoq manna ikiortigalugu apeqqut tamanna akisinnaavarput: Sulisoq ullut tamaasa inortuiuaannarpat susoqassava? Sulisitsisoq qanoq iliortariaqarpa? Ilaat isumaqassagunarput sulisoq taanna tassuuguinnaq soraarsitaasariaqartoq. Immaqali sulisut ittuata ussat Bibelimeersoq manna eqqaamavaa: ’Kamajuitsoq sianisuuvoq, arrajasulli sianiissutsi malunnartittaraa.’ (ússatit 14:29, nutsigaq pisoqaq.) Iliuuseqalersinnani naatsorsueqqaarallarnissaa silatusaarnerusinnaavoq. Immaqa kingoraartaasussamik ilinniartitseqqaarniassaaq.
Aamma misiginneqataanini pissutigalugu iliuuseqanngikkallarsinnaavoq. Immaqa sulinerminik paarsinerluttoq mianersoqqoqqaassavaa ilungersornerulerseqqullugu. Immaqaluunniit paasiniassavaa inortuisarneri ajornartorsiutinik aaqqinneqarsinnaasunik pissuteqarnersut iluarsivissaqanngitsumilluunniit isiginneriaaseq pissutaanersoq. Naak immaqa suliffiutilik utaqqigallarniarluni aalajangeraluarluni, killeqanngitsumik kamagittassuseqarnavianngilaq. Sulisoq iluarsisinnaassaaq imaluunniit naggataatigut soraarsitaajumaarluni. Suliffiup ingerlanera aamma sulisut inortuisanngitsut eqqarsaatigalugit taamaaliornissaq naapertuilluarnerussaaq.
Tamatumunnga assingusumik Jehova Guutip inuit iluanngitsuliortarneri kamagittarfigai. Taamaaliorpoq ajornartorsiutit naapertuilluartumik aaqqinneqarnissaannut piffissaqartitsiniarluni. Kamagittarneratigut unioqqutitsisartut allanngornissaminnut naassaanngitsumillu pilluaqqussutissanik angusisinnaanissaminnut periarfissaqarput. Taamaattumik Bibelimi kajumissaarneqarpugut Guutip kamagittarnera ajorusuutigeqqunagu. Ima allassimavoq: ’Naalakkatta kamajuissusia annassutissaatissiuk.’ — 2 Pîtruse 3:15.
Guutip kamagittarneranik assersuut
Jehova Guuti Noap nalaani ulersuaq sioqqullugu kamagittarsimavoq. Silarsuaq taamani ittoq nakuusernermik ajussutsimillu ulikkaarsimaqaaq. Ima allassimavoq: „[Jehovap] paasigamiuk nunami inuit ajussusiat annertusiartuinnartoq. . . . Oqarporlu: ’Inuit pinngortitakka nunarsuup qaavanit piiassavakka.’“ (1 Moses 6:5, 7) Aap, Jehovap ajortut piiarnerisigut ajussutsimik ajornartorsiut aaqqinniarsimavaa. Tassuuguinnarli iliuuseqanngilaq. Sooq?
Inuit tamakkeratik ajortuummata. Noa ilaqutaalu Guutip isaani naapertuilluartuupput. Taakku pillugit Jehova kamagittarluni utaqqisimavoq inuit naapertuilluartut ikittut annannissartik piareersarniassammassuk. Utaqqiffimmi sivisuumi Noa aamma ’iluarnermik oqaluussisutut’ kiffartorsinnaasimavoq, inuit ajortut isumataarsinnaaqqullugit. Bibelimi ima allassimavoq: ’Guuti kamajuerluni utaqqivoq Noa inuugallartillugu, umiarsuaq sananeqartillugu, tamannami inuit qassinnguit (tamassa tarnit arfineq-pingasut) annaffigaat imikkut.’ — 2 Pîtruse 2:15; 1 Pîtruse 3:20.
Sooq Guuti ullumikkut suli kamagittartoq
Ullumikkut pissutsit suli taamaapput. Silarsuaq maannattaaq nakuusernermik ulikkaarpoq. Soorlu Noap nalaani issimasoq Guutip silarsuaq manna, Bibeli naapertorlugu ’ikuallattussaalluni toqqorsimasutut ulloq inuit iluaatsut eqqartuutiffissaat aserorfissaallu nalliutserlugu’, eqqartuutereersimavaa. (2 Pîtruse 3:7) Tamanna nalliuppat pinngortitat aseroriartornerat, qunutitaaneq pissaanermillu atornerluineq soraarsitaassapput.
Soormi taava Guutip qangasuarli guutiitsut piiarsimanngilai? Apeqqutit akerleriissutaasut aalajangerneqaqqaartariaqarmata pingaartunillu aaqqissuussineqaqqaartariaqarluni. Aap, Jehovap ajussutsimik ajornartorsiutip ataavartumik aaqqinneqarnissaa kissaatigaa inuillu eqqortuliorusuttut nappaatit toqullu ataanni inussiaanermit aniguisitaanissaat aalajaallissikkumallugu.
Aniguinissaq tamanna eqqarsaatigalugu Jehovap Annaassisoq ajortivut pillugit utertitsissummik akiliisinnaasoq aallartissimavaa. Taanna pillugu Bibelimi ima allassimasoqarpoq: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Jesusip inuiaat pillugit inuunerminik pilliutiginninniarluni tikiunnissaa ukiut tuusintillit arlallit ingerlaneranni piareersarneqarsimavoq. Ukiuni tamakkunani tamani Guuti asanningaarluni kamagittarluni utaqqisimavoq. Utaqqinerlu tamanna utaqqilussinnarnerusimanerpa?
Ukiut 2000-it matuma siorna Jesusip inuit pillugit utertitsissut akilersimavaa. Sooq taava Guuti manna tikivillugu kamagittarpa? Siullermik Jesusip toqunerata kingorna ilinniartitsinermik suliaq annertooq aallarnerneqarsimammat. Inuit asannittumik periarfissaq tamanna ilinniartariaqarsimavaat tamatuminnga ilassinninnissaminnut tunuartitsinissaminnulluunniit periarfissaqarsinnaaqqullutik. Tamatumani piffissaq pisariaqarpoq, piffissarli tamanna atorluarneqarsimavoq. Bibelimi ima allassimavoq: ’Jehovap unnersuutigisani mullutinngilaa, soorlu qassiit mullussisorigaat, kamajuillunili pivaasi tammarsimasoqaqqusinnginnami, tamaasali allamik isumataaqqllugit.’ — 2 Pîtruse 3:9.
Naalagaaffik pillugu apeqqut
Aamma apeqqutip akerleriissutaasup allap aalajangerneqarnissaanut piffissaqartariaqarsimavoq, tassa inuit naalagaaffimmit sumit qulangersimaneqassanersut. Edenip naatsiiviani siuaasavut siulliit Guutip aqutsineranit qulangersimaneqarsimapput, pikitsitsillutilli. Guutimut attaveqarumanngissuseq qinerlugu nammineerusupput. (1 Moses 3:1-5) Inuilli imminnut aquttussatut pinngortitaanngillat. Pruffiiti Jeremia ima allassimavoq: „[Jehova], nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ — Jeremia 10:23; Ussatit 20:24.
Inunnut aqutsineq apeqqutaalersinneqarmat Jehova kamagittarluni tamatuma aalajangerneqarsinnaanissaanut piffissaliivoq. Tukkorluni inuit ukiuni tuusintilinni naalakkersueriaatsinik sunik tamanik misiligaanissaannut periarfississimavai. Suna kinguneralugu? Ullumikkut ersarippoq inuit naalakkersuinerata suulluunniit qunutitaaneq, naapertuilluannginneq imaluunniit pilluaannermut pissutaasut allat peersissinnaanngikkai.
Inuiaat oqaluttuarisaanerat eqqarsaatigalugu oqartoqarsinnaava Guuti naapertuilluanngitsuliortoq nalunaarutigisimagamiuk naalagaaffiit nunamiusut tamaasa piiassallugit namminerlu naalagaaffimminik taarserlugit? Naamerluinnaq! Qilanaraarput siulittuutip Bibelimeersup matuma eqquunnissaa: „Naalagaaffinnguit taakkua kunngii inuutillugit Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ — Daniel 2:44.
Naalagaaffimmi tamatumani kunngi qilammiusoq tassaavoq Jesus makititaasimasoq. Kunnginngornissaanut piginnaanngorsagaasimanera inuillu naalakkersueqatissaasa toqqartorneqarsimanerat sivisuumik ingerlasimapput. Piffissaq tamanna tamaat Guuti kamagittartuarsimavoq.
Guutip kamagittarnerata kinguneri iluaqutaasut
Ullumikkut nunani 212-ini inuit millionilikkuutaat Guutip kamagittarnera iluaqutigaat. Ataasiussuseqarlutik Guutimut naalannissartik taassumalu naalagaaffianut qilammiusumut kiffartornissartik kissaatigaat. Ataatsimiittarfimminni naapikkaangamik najoqqutassiat Bibelimeersut inuunerminni atorneqarnissaat ilinniartarpaat. Silarsuup matuma naalakkersuinikkut avissaartuunneri peqataaffigineq ajorpaat, naak naalakkersuisut qullersarisatik Guutip kamagittarluni atuutitikkallagai naalattaraluarlugit. — Matîuse 22:21; Rûmamiut 13:1-5.
Inuit taama amerlatigisut suleqatigiissinnaanerata erseqqissarpaa Jehovap kisimi inuit, namminneq aalajangiisinnaatitaasut, inuit asanninnissamik imminullu kiffartuussinissamik ilinniartut, ataqatigiilluartissinnaagai. Qularnanngitsumik inuit taakku naapissimavatit suliassamik Jesusip aallartissimasaanik suliaqartillugit, tassa Guutip naalagaaffia pillugu tusagassamik nuannersumik oqaluussitillugit. Suliassap tamatuma aallunneqaleruttornissaa Jesusip ima siulittuutigisimavaa: ’Naalagaaffimmillu iivangkiiliu tamanna oqaluussissutigineqassaaq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussaaq.’ — Matîuse 24:14.
Erniinnaq!
Guutip naalagaaffiata naapertuilluartup nunarsuarmut naalakkersuinermik tigusinissaanut piareersarnerit erniinnaq naammassineqarnissaannut takussutissaqarpoq. Ukiuni hundredelinni makkunani naalagaaffiit nunamiusut naalakkersuinerata kinguneri alianartut allaatigereeramigit Jesus ima nangissimavoq: ’Taamattaaq ilissi tamakku pilersut takulerussigik ilisimassavarsi Guutip naalagaaffia qanillisoq.’ — Lúkarse 21:10, 11, 31.
Guutip qanittukkut inuit ajortut nunarsuarmit piiassavai. Tussiaasiortup oqaasii timitalimmik piviusunngussapput: „Ajortummi piiagaasussaapput. . . . Guutiitsoq erniinnaq peeruttussaavoq, inaani takuniaraluarukku peerutereersimassaaq.“ (Tussiaat 37:9, 10) Silarsuaq ajussuseqanngilluinnarfiusoq takorloorsinnaaviuk? Kikkut taamanikkussaq naalakkersuissappat? Bibelimi ima allassimavoq: „Kunngiusoq [kunnginngortitaq qilammiusoq Kristus Jesus] naalagaajumaarpoq iluartuulluni naalagaasullu [taassuma kiffai ilumoortut toqqakkat nunameersut] naalakkersuiumaarput innarluitsumik. Iluarnerup inerititarissavaa eqqissineq, innarluissutsillu pissarsiaritissavai isumakuluuteqannginneq tatiginninnerlu soraarfeqanngitsut. Taava inuiaqatikka najugaqalissapput najukkami eqqissinartumi, inigisani isumannaatsuni ineqarfinnilu alianaatsuni isumakuluuteqarfiunngitsuni.“ — Jesaja 32:1, 17, 18.
Guutip naalagaaffiata qilammiusup taamaalilluni inuit ajussusiata kingunipilui tamaasa iluarsassavai inuillu Guutimik tunaartarinnittut inuiaqatigiittut ataqatigiilluartutut katersussallugit. Bibelimi ataqatigiilluarnissaq tamanna ima allaatigineqarpoq: „Amaqqup najussavaa savaaraq, milakulaallu savaasaaraq aqupeqatigissavaa. Ussiup piaraa løvellu piaraa mangiaqatigiissapput, nukappiarannguullu paariumaarpai. . . . Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ Jesaja 11:6-9.
Ila, Guutip kamagittarsimanerata kinguneqarluassusissaa! Guutip taama sivisutigisumik utaqqisimanera maalaarutiginagu kamagittarnera iluaqutiginerusariaqarparput taassumalu naalakkersuineranut naalattariaqarluta. Siullermilli Bibeli tunngavigalugu taassuma najoqqutassiai suunersut ilikkartariaqarparput tamakkulu malerualerlugit, taavalu taassumunnga ataasiussuseqarlutik naalattut ilagilertariaqarpavut. Taava Guutip kamagittarnera uatsinnut pilluaqqussutissanik naassaanngitsunik kinguneqassaaq. (wD 1/10 91)