Naammagittarneq sooq taama qaqutigoortigaa?

EMILIO 60-it sinnilaarlugit ukioqarpoq.a Oahumut Hawaiimiittumut pisimanera alianartumik pissuteqarpoq — ernini inersimasoq ilisaassammat. Emilio aqqusinermi ingerlaarfigineqarpallaanngitsumi ikinngutini ilagalugit pisutsilluni biilimit sukkaqisumik kingumoortumit tupatsinneqarpoq. Biilip apungajappaa, Emiliollu kamalluni naammagittaallunilu biilertoq oqalorujuffigaa biililu tillullugu. Oqalorujuutilerput. Biilertup Emilio ajappaa orlutillugu niaqqumigullu aqqusinermut aportillugu. Ullualuit tamatuma kingorna Emilio niaqqumigut aqqunarnerminit toquvoq. Alianassusia!

Silarsuarmi naammagittaatsoqarfiusumi inuuvugut. Biilertut amerlasuut sukkanerpaaffissat qaangertarpaat. Allat biilinut siuminniittunut killissarititaasoq qaangernagu ingerlasunut qanippallaartumik ingerlasarput. Ilaasa biilertut allat tamaasa qaangerniaannartarpaat, allap tunuaniikkusunnatik. Angerlarsimaffinni ilaat immaqa kamallutik nakuusertarput. Allaat kristumiut kamannertik nunussallugu sapersinnaavaat, immaqa anersaakkut qatanngutimik naammalluinnanngissusii pissutigalugit.

Sooq naammagittarneq taama qaqutigoortigaa? Taamaattuarsimava? Imaluunniit ingammik ullutsinni naammagittarneq aatsaat taama ajornartigilersimava?

Naammagittaassutsimut assersuutit

Biibilimi eqqaaneqarpoq arnaq uiminik siunersiueqqaarnani pingaartumik aalajangiisoq. Tassaavoq Eva. Immaqa ilaatigut naammagittaassuseq pissutigalugu Adam utaqqiumanngilaa, paarnarlu nereqqusaanngitsoq nerivaa. (1 Moses 3:1-6) Uiami? Aamma taanna utaqqisinnaanngilaq. Evatut ajortuliorami, Ataatani qilammiusoq Jehova ikioqqulluni unnersuuteqqullunilu qinnuigeqqaarnagu. Piumatussusiat, ilaatigut naammagittaassutsimut ajortuliornermik kinguneqartumut attuumassuteqarunartoq, tamatsinnut kingunipiloqarsimavoq. Inunnit marlunnit taakkunannga siullernit ajortulioriartarneq, ilaatigut pingaarniarneq naammagittaassuserlu, kingornussimavavut. — Rûmamiut 5:12.

Ukiut 2500-t missaat siuaasatta siulliit ajortuliornerata kingorna inuiaat Guutip toqqagaasa, Israelikkut, uppernermik naammagittarnermillu amigaateqarneq takutippaat. Naak Jehovamit tupinnartuliornikkut Egyptenimi inussiaanermit aniguisinneqaqqammeraluarlutik ’naammassisai erniinnaq puiorpaat ilitsersuutaalu utaqqinagu’. (Tussiaat 106:7-14) Arlaleriarlutik sualuttumik ajortuliortarput naammagittaannermik. Nersuteeraasaliorput kuultiusumik pallorfigalugulu; Jehovap mannanik nerisassanik isumaginnissimanera maalaarutigaat; taakkualu ilarpassuisa allaat Jehovap imminut sinniisuusutut toqqarsimasaa, Moses, pikitsitsiffigaat. Ilumut, naammagittaassusiat aliasunnermik ajunaarnermillu kinguneqarpoq.

Israelimi kunngip siulliup, Saulip ernermi kunnginngorsinnaanissaannik periarfissaq annaasimavaa. Qanoq ililluni? Pruffiiti Samuel, Jehovap peqqussutaa malillugu pilliisussaasoq, utaqqiumannginnamiuk. Inunnik mianerinninneq pissutigalugu Saul Samuel utaqqinagu pilliisimavoq. Takorlooriaruk qanoq misigisimanersoq pilliinini naammassigaalu Samuel takkummat! Suli minuttialuit utaqqisinnaasimagunitoq! — 1 Samuel 13:6-14.

Evap paarnaq tigupallannagu Adam utaqqisimaguniuttoq! Israelikkut Jehovap ilitsersuutaa utaqqisimagunikkutoq! Aap, naammagittarnerup taakku uagullu aliasunnermik naalliuutinillu pinngitsoortissinnaasimagaluarpaatigut.

Naammagittaassutsimut pissutaasut

Biibilimi nassuiarneqarpoq suna ullumikkut naammagittaassutsimut pissutaasoq pingaarnerpaasoq. Timûtiusimut agdlagkat áipait kapitali 3-mi ullut inuuffigisavut pillugit ima allassimavoq: ’Ajornartunik nalliuttoqassaaq’. Eqqaaneqarpoq inuit tassaajumaartut ’imminnik asasut, aningaaserituut, usorsitsaapiluttut, anneruniartut . . . nunujuitsut, qiningasut, ajunngitsunik uumissuisut’. (Versit 2 3-lu) Piumatussutsip namminissarsiornerullu inuit uummataat isumaallu sunnertarpaat, taamaattumillu tamarmik, aamma kristumiut ilumoortut, naammagittarneq ajornakusoortittarpaat. Inuit silamiuusut biilerlutik sukkavallaartumik ingerlagaangata, qerlertoruukkaangata imaluunniit ajuallannartunik suaartarfigigaangatigut naammagittarnerput misilinneqartarpoq. Taakkua assigalugit iliuuseqalernissamut akeqqinnissamulluunniit ussernartorsiorsinnaavugut taamaalilluta taakkutut namminissarsiorluta pingaarnialerluta.

Ilaannikkut nammineq eqqunngitsumik isummersimagaangatta naammagittarunnaartarpugut. Malugeriaruk kunngip Salomonip silatuup isumaatsumik eqqarsariaatsip naammagittaatsumillu kamalluni iliuuseqarnermik kinguneqarsinnaanera qanoq allaatigigaa: „Suulluunniit naggataa aallartinnerminit pitsaanerusarpoq; kamajuissuseq anneruniarnermit pitsaaneruvoq. Kamaammernaveersaartarniarit sianiitsut kisimik kamaammiasuusarmata.“ (Nalunaajaasup oqaasii 7:8, 9) Pissutsit misissoqqissaartarutsigik iliuuseqarfigitinnagit, taava allat paasinnittumik, misiginneqataasumik naammagittartumillu iliorfigisinnaavavut. Akerlianillu, anneruniarluta namminissarsiorlutalu isumaqarfiginnikkutta paasisakilluta naammagittaallutalu narrutsassimassaagut, soorlu Israelikkut naalasseriitsut Mosesimut naammagittaalliorsimasut. — 4 Moses 20:2-5, 10.

Inuit amerliartortut aamma naammagittarunnaarsimapput silarsuarmi neriutaarulluinnarneq, inuit Jehovamit tunussisimanerata kingunerisaa, pissutigalugu. Davidip oqaatigisimavaa inuit Jehova tunaartarisariaqaraat: „Taamaallaat Guutimi qasuerfissaqarpunga, neriuutissara taassumannga pissaaq.“ (Tussiaat 62:6) Inuppassuit Jehovamik nalusut siunissaq nikallornartumik killeqartumillu isigisarpaat, taamaattumillu suli inuutillutik inuuneq sapinngisamik nuannaarniarfigalugu iluanaarutiginiartarpaat. Ataatartik Satan Diaavulu assigalugu soqutiginngilaat iliuutsitik qanoq allanut sunniuteqarsinnaasut. — Juánase 8:44; 1 Juánase 5:19.

Tupinnanngilaq naammagittarneq ullumikkut taama qaqutigoortigimmat. Silarsuaq manna ajortoq namminissarsiortorlu, tamatuma guutia Satan uinippullu ajortiliusoq tamarmik, aamma ilungersortaraluartunut, naammagittarnissamut akornutaasarput. Taamaattoq Biibilimi ’erinitsannaveernissatsinnut’ kajumissaarneqarpugut, ingammik Guutip siunertaasa piviusunngortinneqarnissaat eqqarsaatigalugu. (Jâko 5:8) Sooq naammagittarneq taama pingaaruteqartigaa? Qanoq ililluta iluaqutigisinnaavarput?

Sooq naammagittarneq taama iluaqutaatigisoq

„Allaat utaqqisut kiffartuuteqarput.“ Ukiut 300-t matuma siorna taalliortoq tuluk John Milton taalliamini „On His Blindness“-mik qulequtalimmi taama allappoq. Taalliamini ersersippai 40-t sinnerlugit ukioqarluni tappiitsunngorami Guutilu tamakkiisumik kiffartorfigisinnaajunnaaramiuk pakatsineq isumakulunnerlu misigisani. Soorluli taallap naanerani qulaani issuarneqartumi ersersinneqartoq, paasilersimavaa Guuti pallorfigineqarsinnaasoq atugarliorneq naammagalugu atoraanni isumakkullu eqqissilluni periarfissat naapertorlugit kiffartoraanni. Miltonip Guutimut naammagittarluni tunaartarinninnerup iluaqutaassusia paasivaa.

Amerlanersavut tappissuupput, tamattali pisinnaasavut killeqartarput kamannermik isumakulunnermillu kinguneqarsinnaasumik. Qanoq ililluta naammagittarneq ineriartortissinnaavarput?

Maligassat kajumissinartut

Biibilimi naammagittarnikkut maligassaalluartut ilarpassui eqqartorneqarput. Jehovap kamajuinnera pissutigalugu inuit millionilikkuutaat naassaanngitsumik inuunissamik periarfissaqarput. (2 Pîtruse 3:9, 15) Jesusip naammalluinnartuulluni Ataatami kamajuinnera malinniarpaa asannilluni kajumissaaramisigut nammaataa atoqqullugu taamaalillutalu ’tarnitsinnut qasuerfissarsilluta’. (Matîuse 11:28-30) Jehovap Jesusillu maligassiaat eqqarsaatigeqqissaarutsigu nammineq naammagittarnissatsinnut ikiuutaasinnaavoq.

Jakobip ernera Josef kamannermut akiniaanissamullu pissutissaqarsorinarsimagaluarpoq. Qatanngutaasa naapertuilluanngivissumik iliorfigisimavaat, toqutaanissaa pilersaarutigalugu naggataatigullu inussiatut tunillugu. Egyptenimi naak Potifar ilumoorluni akisussaassutsimillu ilisimannilluarluni kiffartuukkaluaraa Josef eqqunngitsumik unnerluutigineqarluni parnaarussaavoq. Annikilliuutit tamakku tamaasa naammagittarluni atorsimavai, qularnanngitsumik paasillugu misilinneqarnerit taamaattut Jehovap siunertaanut attuumassuteqarsinnaasut. (1 Moses 45:5) Jehova upperalugu neriuutigalugulu, maniguunneq paasinninnerlu ineriartortillugit Josef allaat misilinneqangaarnermini naammagittarsinnaasimavoq.

Ikiuutissaq alla pingaartoq tassa Jehovap anersaava. Assersuutigalugu, kamaammiasuugutta assuarlerajuttuullutalu anersaamik illernartumik tunineqarnissarput qinnutigisinnaavarput pissutsit anersaap inerititai ineriartortissinnaajumallugit. Inerititat tamakku tamaasa eqqarsaatigeqqissaarlugit, soorlu ilaatigut kamaginninneq imminullu naalakkersinnaaneq, paasissavarput qanoq pissutsit tamakku naammagittarnermut attuumassuteqartut. — Galâsiamiut 5:22, 23.

Naammagittarnerup iluaqutissartai

Naammagittarneq iluaqutigingaassavarput. Inuttut pissutsitigut nakussatsinneqassaagut, tuaviorpallaartumillu isumaatsoortumillu iliornissatsinnut illersorneqassalluta. Kina arlarput pissutsini ajornakusoortuni tuaviorpallaamik qisuariarsimanini pissutigalugu annernartumik kukkuluttorsimannginnerpa? Immaqa inussiarniitsumik oqaaseqarsimavugut imaluunniit soqqusaatsumik iliorsimalluta. Immaqa isumaqatigiinngissut pingaaruteqanngikkaluartoq pissutigalugu ikinngutittalu ilaat oqqaterujussuarsimavugut. Kamarujussuareerluta, pakatsilluta aliasullutalu immaqa ima eqqarsarpugut: ’Utaqqiinnarsinnaasimagaluarumatoq eqqissillunga.’ Naammagittarsinnaagutta ajornartorsiuterpassuit pinngitsoortissavavut. Taamaaliorsinnaagutta eqqissinarnerusumik, aalajaannerusumik nalerisimaarnarnerusumillu inuussaagut. — Filípimiut 4:5-7.

Naammagittarnerup aamma uummatikkut eqqissinissatsinnut tatiginninnissatsinnullu ikiussavaatigut. Tamannalu timikkut, misigissutsikkut anersaakkullu peqqinnissatsinnik kinguneqassaaq. (Ussatit 14:30) Kamanneq nununeqanngitsoq misigissutsikkut timikkullu napparsimalernermik, allaallu toqumik, kinguneqarsinnaavoq. Naammagittaruttali allat, ingammik ilaquttavut anersaakkullu qatanngutivut, ajunnginnerusumik attaveqarfigilissavavut. Isumassuinerussaagut ikiuiumanerussallutalu, arrajasuussanata isornartorsiuissanatalu. Taamaattumillu allat ilagissalluta iluarinerussavaat.

Kristumiut ilagiissaanni ingammik utoqqaanertat naammagittartuusariaqarput. Ilaannikkut kristumioqataasa ornissavaat sualuttumik ajornartorsiuteqarlutik. Immaqa paatsiveerusimapput, kamallutik isumatsassimallutilluunniit. Immaqalu utoqqaanertaq nammineq qasuvoq namminerlu ajornartorsiutini ilaquttamiluunniit ajornartorsiutaat isumakuluutigalugit. Kisianni utoqqaanertap atukkani artornartuni tamakkunani naammagittartuarsinnaanera pingaartorujussuuvoq. Taamaalilluni ’tamanut inussiarnersuulluni’ ajoqersuisinnaavoq ’savarpannillu qajassuussisinnaalluni’. (2 Timûtiuse 2:24, 25; apustilit suliait 20:28, 29) Inuit inuuneri erlinnartut pineqarput. Utoqqaanertat inussiarnersuullutik asannittuullutillu naammagittartuuppata ilagiit tamarmik iluaqutigingaassavaat.

Ilaqutariinni ittuusut ilaquttatik naammagittarnermik, paasinninnermik asanninnermillu iliorfigisariaqarpaat. Ilaqutariit tamaasa pissutsinik tamakkuninnga ineriartortitsinissaannik kajumissaartariaqarpaat. (Matîuse 7:12) Taamaaliorpata angerlarsimaffimmi asanninneq eqqissinerlu atuutissapput.

Oqaluussinermi naammagittarunik kristumiut kiffartorneq tamanna nuannaarutiginerussavaat. Taava soqutigisaqanngitsut assortuisullu naammattooraangamikkik tamakku naammagalugit atorsinnaassavaat. Inuit kamattut akiornagit oqaluussisartut naammagittartut inussiarnersumik akisinnaapput eqqissillutillu ingerlaqqissinnaallutik, taamaalillutik eqqissinertik nuannaarnertillu atatillugit. (Matîuse 10:12, 13) Kristumiut allat tamaasa naammagittartuliorfigalugit asannittuliorfigigunikkik inuit eqqortuliorusuttut Naalagaaffik pillugu tusarliussaq kajungerissavaat. Jehovap silarsuaq tamakkerlugu naammagittartuliorusuttut ilungersorneri pilluaqqusimavai, taamaattumillu ukiut tamaasa inuit qanilaartut sallusuisummillu paasisaqarusuttut hundredetuusintikkuutaat Jehovap ilagiissaanut asannittunut orniguttarput.

Aap, naammagittarneq iluaqutigingaassavarput. Ajortumeernerit ajornartorsiutillu amerlasuut tuaviorpallaarnermik assuarlerajunnermilluunniit pissuteqartut pinngitsoortissinnaassavavut. Pilluarnerussaagut, eqqissisimanerussalluta qularnanngitsumillu peqqinnerussalluta. Kiffartornitsinni, ilagiinni angerlarsimaffitsinnilu annerusumik nuannaarneq eqqissinerlu misigissavavut. Pingaarnerpaamilli Guutimut qaninnerusumik attaveqassaagut. Taamaattumik Jehova utaqqiuk. Naammagittarniarit! (wE 15/6 95)

[Quppernerup ataani ilanngussaq]

[Qupp. 28-mi assiliartat]

Ulluinnarni qanoq naammagittartigisarpit?