Ilaqutariinni Guuti salliutissiuk

BOB Jeanilu — aappariit ilanngutassiami siuliani taaneqartut — avinngillat. Aap, pissutsit taama ajortigilersinnagit ajornartorsiutitik pillugit nakkutilliisoq kristumiu ammasumik oqaloqatigaat. Taassuma erniinnaq paasivaa aaqqiagiinnginnerat assigiinngeqisunik tunuliaqutaqarnerannik pissuteqartoq.

Bob sulisartukkormiuneersuugami nukersornartumillu sulisarami, ullut tamaasa pikkunartunik ullaakkorsiornissani naatsorsuutigisarpaa. Jean, ilaqutariinni allaffimmi sulisartuni alliartorsimasoq, ullaat tamaasa kaffi iffiaqaqortullu sikatsitat kisiisa sassartarpai. Ullaakkorsiornerni oqqannerit tamatuminnga pissuteqarlutik aallartittartut akersuunnersuannguukkiartuaarsimapput!

Bob Jeanillu oqaloqatigiilluarsinnaanerunissartik ilinniartariaqarsimavaat. Ajornartorsiutaalli itinerusumik pissuteqarput. „Korintumiunut allakkat siulliit 13:4 tunuliaqutaralugu immissinnut qimerloortarpisi?“ nakkutilliisoq aperivoq. Allassimaffik taanna imaappoq: ’Asannittoq kamajuillunilu inussiarneraraaq; asannittoq sinngasarinngilaq; asannittoq usorsitsaartuunanilu annerujumatuusarinngilaq.’ Versip tulliani allassimavoq asanninneq ’ippinnartumik iliortarinngitsoq, namminissaminik piniartarinngitsoq, narrutsattarinngitsoq ajortumillu isumaqartarinngitsoq’. Jean Bobilu asanninnermik taamaattumik aappariinnermik sunnertinnissaanut piumassuseqarsimapput.

Aappariit taakku ajornartorsiutaat anersaakkut aaqqinneqaqqaartariaqarput. Bobip Jeanillu Guutimut attaveqarnertik attatiinnarusukkamikku, pingaarnerpaamik Bibelip ileqqoreqqusai malittariaqarsimavaat akueralugulu ’Jehovap illu qarmanngippagu illuliortut sulilussinnassasut’. (Tussiaat 127:1) Qanoq ililluni ilaqutariit ineriartortinneqarsinnaasut versini 3-miit 5-imut eqqartorneqarpoq. Inuunermi Guuti salliutikkaanni, ilaqutariittut pilluarluni inuuneq angujuminarnerussaaq. — Evfisumiut 3:14, 15.

Guutimik salliutitsinerup suna nassatarigaa

Ilaqutariinni Guutimik salliutitsineq ussammit matumannga imaqarneroqaaq: „Ilaqutariit qinoqatigiittartut, ataqatigiiginnartarput.“ Atuagassiaq Family Relations naapertorlugu amerlasuut isumaqarput ’upperisarsiornerup ilaqutariit peqqinnartumik ajunngitsumillu sunnertarai inoqutaasullu qiimanerulersillugit.’ Upperisarsiornerulli aalajangersimasup malittarisassai maleruaannarlugit Guuti salliutinneqarsinnaanngilaq. Amerlasuut upperisarsiornernut aalajangersimasunut ilaasortaapput nalinginnaasumik ileqquunera, ilaqutariinni ileqqutoqaanera atugarissaartinneqarnertilluunniit pissutigiinnarlugu. Ulluinnarnili Guuti amerlanertigut eqqarsaatigineq ajorpaat. Soqutiginartumik Bibeli oqarpoq upperisarsiornerit tamakkeratik ’guutisiornermut Guutip Ataatap minguitsuutitaanut assuarinngisaanullu’ ilaasut. — Jâko 1:27.

Guuti salliutissinnaajumallugu ilaquttavullu Jehova, ’qutsinnerussaartoq nunarsuarmi tamarmi’, piumasarisai naapertorlugit pallorfigisariaqarparput. (Tussiaat 83:18) Guutip ernera, Jesus Kristus, oqarsimavoq: ’Ullut nalliukkumaarput, maannakkummi nalliussimapput, taava pallorfiginnittut ilumoortut Ataataq pallorfigissavaat anersaakkut ittumik ilumoortumillu; pallorfigisinimi taamaattut Ataatap piumavai. Guuti anersaavoq, taassuminngalu pallorfiginnittut anersaakkut ittumik ilumoortumillu pallorfigissavaat.’ (Juánase 4:23, 24) Jehova Guuti ’anersaakkut ittumik’ pallorfigissagutsigu kiffartornerput illernartoq uummammit uppernermik asanninnermillu ulikkaartumit aallaaveqartariaqarpoq. (Mákorse 12:28-31; Galâsiamiut 2:16) Jehova ’ilumoortumik’ pallorfigissagutsigu upperisarsiornerni salloqittaatit tunuartittariaqarpavut peqqusaalu Bibelimi saqqummersinneqartoq maleruaqqissaartariaqarlugu. Jehova inuunitsinni salliutissinnaanngilarput guutisiornerput najoqqutassiaanut naapertuutinngippat.a Najoqqutassiai suut eqqarsaatigaavut? Qanorlu ilillusi ilaquttatillu maleruarnerisigut iluaqutigisinnaavisigit?

Qanoq ililluni uiusup Guuti salliutissinnaagaa

Korintumiunut agdlagkat sujugdlît 11:3-mi Bibelimi allassimavoq: ’Angutip kialuunniit Kristus niaqorigaa, arnallu angut nioqorigaa, Kristusillu Guuti nioqorigaa.’ Uiusutut ilaqutariinni inaarutaasumik aalajangiisinnaaneq Guutip ilinnut akisussaaffigitippaa. Uiusorli kinaluunniit naakkittaatsuliornissaminut kisermaassilluniluunnit oqartussaanissaminut pisinnaassusiligaanngilaq.

Bibelimi angut nuliaminut attuumassuteqartunik aalajangiinnginnermini misigissusii eqqarsaatigeqqaaqqullugit kajumissaarneqarpoq. (Naleqqiuguk 1 Moses 21:9-14.) Aap, Bibelip tamatta allat soqutigisaat, uagut soqutigisaannavut pinnagit, eqqumaffigeqqullugit kajumissaarpaatigut. (Filípimiut 2:2-4) Bibelimi najoqqutassianut akerliunngippat, uiusoq kristumiu nuliami kissaatigisaanut akuersiumasassaaq. Inuttut soqutigigamiuk artukkersinneqannginnissaa sianigissavaattaaq. Assersuutigalugu immaqa illumi suliassanik ikiuukkumasassaaq, ingammik nuliaasoq angerlarsimaffiup avataani suliffeqarpat.

Apustili Paulus allappoq: ’Angutit nuliatik asasariaqarpaat soorlu timitik. Nuliaminik asannittoq imminik asasaraaq. Inummi uinimminik qinngarsuinngisaannarpoq, nerisittarluguli paaqqisarpaa, soorluttaaq Kristusip ilagiit taamaaliortarai.’ (Evfisumiut 5:28, 29) Jesus Kristusip ilagiinnut ilaasortat asannittumik iliorfigisarpai.

Apustilillu Peterip unnersuussutaa malugissallugu soqutiginarpoq: ’Taamattaaq angutaasusi nuliasi silalimmik inooqatigisigik, pisattatut qajannarnerusutut iliorlugit, ataqqisigillu saammaannermik inuunerup pianik kingornusseqataasutut itillugit, qinusarnisi akornuseqqunagit.’ (1 Pîtruse 3:7) Eqqarsariaallannanngila angutip nuliani asanningitsumik iliorfigiguniuk qinnutai akornuserneqarsinnaasut? Tassa angutip nuliani asannitumik iliorfigisariaqarpaa qinnutini Guutip tusarlugillu akissappagit.

Ataataasup Guuti ilaqutariinni salliutippagu, meeqqanut attaveqarneranuttaaq sunniuteqassaaq. Ataataasup meeqqat anersaakkut peqqissusiat soqutigilluinnartariaqarpaa. USA-mi apersuinermi annerusumi angutit aperineqartut affaat akipput „Bibelimik atuaqqissaartunut oqaloqatigiittunulluunniit ilaasarneq“ ’ilaqutariit anersaakkut ineriartorneranni pingaartut ilagigaat’. Misissuinermi ilaasut sinnerisa „tv-mi radiomiluunniit naalagiarnerit tusarnaarnissaat isiginnaarnissaallu“ aamma ’inuunerup siunertaqarneranik eqqarsaatiginninneq’ pingaarutilittut taasaasa ilagaat.

Bibelili ataataasunut oqarpoq: ’Qitornasi narrutsatseqinasigik, paariniarsigilli perorsarlugit inertertarlugillu Jehovamit.’ (Evfisumiut 6:4) Jehovamut nalunaajaasut akornanni ataataasut Guutimik pallorfiginninnermi siulersuinissaat naatsorsuutigineqartarpoq. Angutit taakku akuttoqatigiissumik ilaqutariinnik Bibelimik atuaqqissaaqatigiissitsisarnermikkut, kristumiut ataatsimiinnerinut ilaasarnermikkut Bibelimilu piumasarisat allat maleruarnerisigut ilaqutariinni Guuti salliutippaat.

Qanoq ililluni nuliaasup Guuti salliutissinnaagaa

Nuliaasutut uivit ilaqutariinni qullersaanera tapersersorlugu Guuti salliutissinnaavat. Bibeli oqarpoq: ’Arnat ukorsii, uisi naalassigik, soorlu Naalakkami ileqqussaasoq.’ (Kulorsamiut 3:18) Angut tusarliiniarpallaartuunngippat ilaqutariilluunniit Guutimik pallorfiginninnerat soqutiginngippagu tamatuma maleruarnissaa sapernartorujussuusinnaavoq. Nuliaasulli uimi kukkuneri uparuartuaannarpagit, ajornerusumilluunniit, akerlilersortuaannarpagu ilaqutariit ajornartorsiornerulernerannik kinguneqaannassaaq.

Ussatit 14:1-imi allassimavoq: „Arnat ilisimassuseqartut angerlarsimaffik sanasarpaat, kisianni arnap sianiitsup assamminik ingutsertarpaa.“ Arnap ilisimassuseqartup Guuti salliutissinnaavaa ’angerlarsimaffinilu sanasinnaallugu’ uiminut naalannermiguttaaq. (1 Korintumiut 11:3) ’Inussiarnersumik ajoqersuussutinik oqaaseqarnermigut’, nuliaasup uiminut pisariaqanngitsumik isorinnippallaartumik pissuseqarneq pinngitsoorsinnaavaa. (Ussatit 31:26) Uiusullu aalajangigaanik timitaliiniarluni iliuuseqarluarsinnaavoq.

Nuliaasup aamma eqiasuinnermigut Guuti salliutissinnaavaa. Suliffeqarunili angerlarsimaffiup kissaatigisamisut ipiitsuutinnissaanut immaqa piffissaqanngilaq nukissaqarnaniluunniit. Taamaakkaluartoq ’nuliaalluartutut’ Bibelimi imatut allaatigineqartutut innissani ilungersuutigisinnaavaa: „Illumini pisartut alaatsinaattarpai, nerisartagaalu eqiasunnikkut pissarsiaanngillat.“ — Ussatit 31:10, 27.

Pingaarnerpaasorli tassaavoq nuliaasup Guutimik pallorfiginninnermik inuunermini salliutitsinissaa. Jehovap nalunaajaasuisa ataatsimiittarfiannut siullerpaamik isertut amerlasuut meeqqat ataatsimeeqataasut torersusiat maluginiartarpaat. Tamatumani nuliaasut naleqaqisumik pisuupput. Nuliaasulli aamma anersaakkut pingaartitsilluartunngornissani sulissutigisariaqarpaa qinusarnermigut, atuaqqissaartarnermigut Guutimullu kiffartuussinermigut.

Qanoq ilillutik inuusuttut Guuti salliutissinnaagaat

Atuagassiami Adolescent Counselor-imi ilanngutassiami allassimavoq: „Meeqqat angajoqqaaminnut naalagaaniartunngoqqajaasarput. . . . Inuiaqatigiinnit massakkorpiaq nuannaarniutinik nunallu piinik pingaartitsisunik sunnerneqarlutik, inuusuttut ’massakkorluinnaq-piumavara’-mik pissuseqarneq ineriartortittarpaat.” Illit tamatumannga sunnertissimavit?

Kulorsamiunut agdlagkat 3:20 ima allassimavoq: ’Meeqqat ukorsii, angajoqqaasi tamatigut naalassigik, tamanna Naalakkap iluarimmagu.’ Inuusuttut oqaatsinik taakkunannga peqqussutitut Guutimeersutut isiginnittut angajoqqaatik suleqatigiumassavaat. Assersuutigalugu, angajoqqaamik atuaqatimik ilaannik ilaqaqqusinnginnerat asissorumassanngilaat piumasatillu piniarlugit angajoqqaatik akerleriitsinniassanagit. (Ussatit 3:32) Aap, inuusuttut inuunerminni Guutimik salliutitsisut angajoqqaamik asannittumik unnersuutaat maleruarumassavaat.

Guuti salliutittuaannaruk!

Ilaqutariinni sumiluunniit inissisimagaluarutta, Guuti salliutittariaqarparput qanittumillu attaveqarfiginera ineriartortillugu. Illit ilaquttatillu taamaaliorpisi?

’Ulluni kingullerni’ makkunani ’ajornartunik nalliuttoqarnera’ tamatta atorparput. (2 Timûtiuse 3:1-5) Anersaakkulli ingerlalluarnissaq pissutsillu aaqqissuussaanerata maannakkut atuuttup naggatissaani annannissaq ajornanngilaq. (Matîuse 24:3-14) Ilaqutariit ilussinni Guuti salliutikkukku eqqorluartumillu ilisimassuseq Bibelimeersoq naapertorlugu iliuuseqaruit, paratiisimi nunami ilaquttatillu inuusinnaassaasi. — Lúkarse 23:43; Juánase 17:3; sarĸúmersitat 21:3, 4. (wD 15/5 91)

[Quppernerup ataani ilanngussaq]

[Qupp. 22-mi assiliartaq]

Nuliaasoq pikkorissoq pingaartinneqartaqaaq

[Qupp. 24-mi assiliartaq]

Bibelimi uiusut kajumissaarneqarput Guutimik pallorfiginninnermi siulersueqqullugit