Ilaqutariinni Guuti salliutinneqarpa?
’Asassavat Jehova Guutit uummatikkut iluunngarlutit.’ — MÁKORSE 12:29, 30.
1. Jehovamik asanninneq qanoq pingaaruteqartigaa?
’SUNA inatsisit tamarmik siullersaraat?’ allakkanik ilisimasut ilaata Jesus taama aperisimavaa. Nammineq isummani oqaatiginagu Jesusip akilluni Guutip oqaasii Mosesimik allakkat tallimaat 6:4, 5-imi allassimasut innersuussutigai. Ima akivaa: ’Siullersaat tassa imaattoq: „Tusarnaarit, Israeli-aa, Jehova Guuterput, Jehova ataasiuvoq; Asassavallu Jehova Guutit uummatikkut iluunngarlutit tarnikkullu iluunngarlutit isumakkullu iluunngarlutit nukisillu tamakkerlugit.“’ — Mákorse 12:28-30.
2. (a) Jesus kikkunnit akerlilersorneqarsimava? (b) Sooq Jehovap iluarisaanik iliornissaq ilaannikkut artornarsinnaava?
2 Jesusip ’inatsisit siullersaat’-tut taasaa maleruassagutsigu Jehovap iluarisaanik iliortuartariaqarpugut. Jesus taamaaliortarsimavoq, aamma naak ilaanni apustili Peter Jesusip iliuuseriniakkaminut akerliliigaluartoq, ilaannilu Jesusip qanigisai aamma taamaalioraluartut. (Matîuse 16:21-23; Mákorse 3:21; Juánase 8:29) Illimmi taamatut atugaqaruit? Assersuutigalugu ilaquttavit ilaata kissaatigippagu illit Biibilimik atuaqqissaarunnaassasutit Jehovallu nalunaajaasui ilagisarunnaassagitit. Guuti salliutissaviuk taassuma iluarisaanik iliorlutit? Guuti ilinnut pingaarnerpaava, ilaquttavit taassumunnga kiffartorniarnerit assortoraluarpassulluunniit?
Ilaquttat assortuinerat — tammartitsiniutaasoq
3. (a) Jesusip ajoqersuutai ilaqutariinnut qanoq kinguneqarsinnaappat? (b) Ilaqutallit qanoq ilillutik takutissinnaavaat kina asanerunerlugu?
3 Inuup kristumiunngorniartup ilaquttaminit assortorneqarnermini ajornartorsiutigisinnaasai Jesusip soqutaanngitsutut isiginngilai. ’Inuup illoqatini qinngarsortigissavai,’ Jesus taama oqarsimavoq. Taamaattorli Jesusip takutippaa kina salliutinneqartariaqartoq: ’Angumminilluunniit arnaminilluunniit uannit asanninnerusoq qinngaqqunnaqaaq uanni.’ (Matîuse 10:34-37) Jehova salliutissavarput ernerata Jesus Kristusip ajoqersuutai maleruarutsigik, taanna tassaammat Guutip ’qanoq issusiata ersinnera’. — Eprîarit 1:3; Juánase 14:9.
4. (a) Jesusip imminut malinninneq qanoq kinguneqarnerarpaa? (b) ristumiut ilaquttatik uumigissagaat qanoq paasisariaqarpa?
4 Ilaanni Jesusip nassuiaramiuk ilumoorluni imminut malinnittuussagaanni qanoq nassataqassasoq, ima oqarpoq: ’Uannut pisup angunni arnilu nuliilu qitornanilu qatanngutinilu namminerlu inuunini uumiginngikkuniuk uannut ajoqersugaasinnaanngilaq.’ (Lúkarse 14:26) Soorunami Jesus isumaqanngilaq imminut malinnittut eqqortumik oqaatigalugu ilaquttatik uumigissagaat, tassami inuit peqquai qinngarsortitik asaqqullugit. (Matîuse 5:44) Jesus isumaqarpoq ajoqersukkami ilaquttatik Guutimit asanerussanngikkaat. (Naleqqiuguk Matîuse 6:24.) Soorluttaaq Biibilimi allassimasoq Jakobip Rakel qatanngutaanit Leamit asanerugaa. (1 Moses 29:30-32) Jesus oqarpoq allaat inuunerput uumigissagipput, tassa Jehova inuunitsinnit asanerusariaqarparput!
5. Satanip qanoq ililluni peqqusersuulluni ilaqutariinnik aaqqissuussaq atornerluttarpaa?
5 Pinngortitsisuummat inuunermillu Tunisisuulluni kiffaai tamarmik taassumunnga tunniusimasariaqarput. (sarĸúmersitat 4:11) ’Tamanna pissutigalugu Ataataq seeqqumiarfigaara, qilammilu nunamilu ataataasut [ilaqutariit, NV] tamarmik ateqaatigisaat,’ apustili Paulus taama allassimavoq. (Evfisumiut 3:14, 15) Jehovap ilaqutariinnik aaqqissuussaq ima tupinnartigisumik pinngortissimammagu ilaqutariit pissusissamisoortumik asaqatigiittarput. (1 Kunngit 3:25, 26; 1 Tásalûníkamiut 2:7) Satan Diaavululli peqqusersuulluni ilaquttanut asanninneq tamanna, ilaatigut asasanut iluarisaarusussuseq, atornerluttarpaa. Ilaqutariit assortuinerat annertussiartortittarpaa, amerlasuullu tamatumani sallusuissut Biibilimeersoq aalajangiutissallugu unamminiarnartuutittarpaat. — sarĸúmersitat 12:9, 12.
Unamminiarnartoq qanoq ajugaaffigineqarsinnaasoq
6, 7. (a) Qanigisat qanoq ilillutik ikiorneqarsinnaappat Biibilimik atuaqqissaarneq kristumiunillu ilagisaqartarneq pingaarteqqullugit? (b) Qanoq ililluta takutissinnaavarput ilaquttavut ilumut asallugit?
6 Guutip iluarisaanik imaluunniit ilaquttavit iluarisaanik iliornissannik qinersisariaqalissagaluaruit qanoq iliussagaluarpit? Isumaqassagaluarpit ilaqutariinni isumaqatigiinngissuteqarnissamik kinguneqassappat Guutip oqaatsiminik atuaqqissaartarnissarput maleruaanissarpullu piumasarinngikkai? Eqqarsaatigeriaruk. Taamaatikkuit Biibili atuaqqissaarunnaarlugu Jehovallu nalunaajaasui ilagisarunnaarlugit, ilaquttavit asasavit Biibilimik ilisarsineq inuunissamut aalajangiisuusoq qanoq ilillutik paasissavaat? — Juánase 17:3; 2 Tásalûníkamiut 1:6-8.
7 Ima assersuusiorsinnaavugut: Immaqa ilaquttavit ilaat imerajuttuuvoq. Ilaqutaasa allat imerajunnera sumiginnaannarpassuk isiginngitsuusaaginnarpassulluunniit ilumut iluaqutigissanerpaa? Pitsaanerussanerpa eqqissinissaq pillugu allat ilaginnaannarlugu ajornartorsiutaa iliuuseqarfigerusunngippassuk? Naamik, qularnanngitsumik isumaqarputit pitsaanerussasoq qanigisat imerajuttuunerata ajugaaffiginissaanut ikiorniarpassuk, naak taamaaliornerat imerajuttup kamanneranik sioorasaarineranillu kinguneqassagaluartoq. (Ussatit 29:25) Tamatumunnga assingusumik, ilumut qanigisatit asagukkit Biibilimik atuaqqissaarunnaarnissannut kimigiiserfigineqarnerit akueriumassanngilat. (apustilit suliait 5:29) Aatsaat aalajaalluinnaruit paasitissinnaavatit Kristusip ajoqersuutaanik maleruaaneq inuunissamut aalajangiisuusoq.
8. Jesus aalajaalluni Guutip piumasaanik iliorsimammat qanoq iluaqutigisinnaavarput?
8 Guutimik salliutitsineq ilaannikkut artornarsinnaavoq. Eqqaamajulli Satanip aamma Jesus Guutip piumasaanik iliorniartoq ajornartorsiortittarsimagaa. Jesusili nakkaannanngisaannarpoq; uagut pilluta allaat nappagaq naalliutsitaaffik atorsimavaa. ’Jesus Kristus annaassiserput’, Biibilimi taama allaatigineqarpoq. ’Taanna pilluta toquvoq.’ (Títuse 3:6; 1 Tásalûníkamiut 5:10) Jesus nakkaannarsimanngimmat qujamasuutiginnginnerparput? Taanna pilliutitut toqummat uagut aavanik kuisamik upperisaqarluta silarsuassami nutaami naapertuilluarfiusumi naassaanngitsumik inuunissamik periarfissaqarpugut. — Juánase 3:16, 36; sarĸúmersitat 21:3, 4.
Akissarsiassaq angingaartoq pisinnaavarput
9. (a) Kristumiu qanoq ililluni allat annaanneqarnissaannut peqataasinnaava? (b) Ilaquttariinni pissutsit Timoteusip atugaai qanoq ittuuppat?
9 Paasiviuk illit allat, aamma qanigisavit asasavit, annaanneqarnissaannut peqataasinnaasutit? Apustili Paulusip Timoteus ima kajumissaarsimavaa: „Tamakku [ilinniarsimasatit] ilungersuutigiuakkit, taamaaliorlutimmi annatsikkumaarputit tusartitillu annatsikkumaarlugit.“ (1 Timûtiuse 4:16) Timoteus ilaqutariinni upperisarsiornikkut avissaarsimasuni alliartorsimavoq, ataataa griikeriuvoq uppinngitsoq. (apustilit suliait 16:1; 2 Timûtiuse 1:5; 3:14) Naluarput Timoteusip ataataa uppertunngorsimanersoq, periarfissaqarluarsimavorli Timoteusip nuliamilu Eunikep aalajaallutik maligassiaat pissutigalugit.
10. Kristumiut aapparmik uppinngitsut iluaqutissaannut qanoq iliorsinnaappat?
10 Biibilimi takutinneqarpoq uiusut nuliaasullu sallusuissut aalajangiukkunikku aapparmik kristumiuunngitsut annaannissaannut peqataasinnaasut uppertunngornissaannut ikiorlugit. Apustili Paulus ima allassimavoq: ’Qatanngutit ilaat uppinngitsumik nuliaqaruni taassumalu najuinnarumappani qimanngikkiliuk. Aamma arnaq uppinngitsumik ueqaruni taassumalu najuinnarumappani uini qimanngikkiliuk. Sumimmi illit, arnaq, ilisimassavit uiit annaakkumaarnerit? Illilluunniit, angut, sumit ilisimassavit nuliat annaakkumaarnerit?’ (1 Korintumiut 7:12, 13, 16) Apustili Peterip allaatigaa nuliaasut qanoq ilillutik uitik annaassinnaagaat: ’Taamattaaq nuliaasusi uissinnut naalattuugitsi, oqaatsimut naalasseriitsoqarpat taakku oqaaseqanngitsukkut nuliamik saqineratigut ilataarineqaqqullugit.’ — 1 Pîtruse 3:1.
11, 12. (a) Kristumiut tuusintilikkuutaat sumik akissarsiaqarsimappat, qanorlu ilillutik? (b) Uppinngitsunik ilaqutalimmik aalajaattuaannarsimasumik eqqaasaqarit.
11 Ukiuni kingullerni inuit tuusintilikkuutaat qaammatini imaluunniit ukiuni arlalinni aapparmik nalunaajaasut kristumiutut kiffartornerat assortoreersimagaluarlugu namminneq Jehovamut nalunaajaasunngorsimapput. Tamanna tassaavoq kristumiunut aalajaalluinnartumut akissarsiaq nuannersoq, assortuisimagaluartunullu pilluaqussaanerulluni! Kristumiu utoqqaanertaq 74-inik ukiulik killitsisimaarpalulluni ima oqaluttuarpoq: „Nuliara meeqqakkalu akuttunngitsumik qutsavigisarpakka ukiuni assortuiffigisanni sallusuissut aalajangiusimaannarsimammassuk.“ Oqarpoq ukiut pingasut uteriilluni nuliami Biibili pillugu oqaluffiginiaraangani akuerisinnaasimanngivillugu. „Piffissarli eqqorluinnartoq atorlugu isikkannik tagiartuiitigaluni nalunaajaaffigilerpaanga,“ taama oqarpoq. „Qujamasoqaanga assortuininnut nakkaannarsimanngimmat!“
12 Uiusoq alla ilaquttaminut assortuisuusimasoq ima allassimavoq: ’Nuliara sallusuissut ilassimmagu akerarilluinnalersimavara. Sioorasaartarpara, ullut tamaasa oqqaterujussuartarluta; imaappoq uanga oqqannerit tamatigut aallartittarpakka. Pisassaanngilarli, nuliama Biibili aalajangiusimalluinnarpaa. Ukiuni aqqaneq-marlunni sallusuissut, nuliara meerarpullu sualuttumik assortorpakka. Taakkununnga Diaavulutut ippunga.’ Naggataatigut angutip taassuma inuunini eqqarsaatigilerpaa. ’Paasilerpara qanoq ajortigisimallunga,’ taama nassuiaavoq. Biibili misissulerpara, unnersuussutit tassaniittut ikiortigalugit maanna nalunaajaasutut kuisimavunga.’ Nuliaasup taassuma akissarsiaa angingaartoq eqqarsaatigiuk, ukiut 12-it ingerlaneranni assortuinera naammagalugu atorsimallugu ’uini annaassimammagu’!
Jesus ilinniarfigiuk
13. (a) Uiusut nuliaasullu Jesusip inuuneranit ilinniutigisinnaasaat pingaartoq sunaava? (b) Guutimut naalatsigitinneq artornartikkutsigu qanoq ililluta Jesusip maligassiaa iluaqutigisinnaavarput?
13 Uiusut nuliaasullu Jesusip inuuneranit ilinniutigisinnaasaat pingaartoq tassaavoq Guutimut naalanneq. ’Iluarisaanik pisarsinnarpunga,’ Jesus taama oqarsimavoq. ’Peqqusara pinnagu aallartitsisima peqqusaa piniarakku.’ (Juánase 5:30; 8:29) Allaat ilaanni Guutip piumasaata ilaa ornigivallaanngikkaluarlugu naalattuaannarsimavoq. ’Ataataq, piumaguit ermuseq una uannit peeruk,’ taama qinuvoq, imalu nangilluni: ’Uangali peqqusara pinnani illit peqqusat pili.’ (Lúkarse 22:42) Jesusip Guuti qinnuiginngilaa piumasaa allanngoqqullugu; takutippaa ilumut Guuti asallugu Guutip imminut piumasaanut naalatsigitilluinnarluni. (1 Juánase 5:3) Jesusip iliorsimaneratut Guutip piumasaata salliutittuarnissaa pingaartorujussuuvoq, kisimiikkaluaraanni ilaqutaqaraluaraanniluunniit. Misissoriartigu sooq taamaannersoq.
14. Kristumiut ilaat qanoq ilillutik eqqunngitsumik eqqarsartarpat?
14 Siullermik, soorlu eqqaaneqareersoq, uppertut Guuti salliutikkunikku aappartik uppinngitsoq qimassanngilaat, akuttunngitsumillu taassuma annannissaanik ikiorniassavaat. Naak tamarmik uppertuugaluarlutik aappariinnerat immaqa pitsaalluinnartariaqanngilaq. Ajortilittut ilioriartarnitik pissutigalugit uiusut nuliaasullu tamatigut aappartik asannittumik eqqarsaatigiuaannartanngilaat. (Rûmamiut 7:19, 20; 1 Korintumiut 7:28) Ilaasa allaat allamik aappaqalernissaq noqqaassutigilertarpaat naak Biibili tunngavigalugu avinnissamut pissutissaqanngikkaluarlutik. (Matîuse 19:9; Eprîarit 13:4) Isummerput imminnut taamaaliornissaq pitsaanerussasoq, aappariit ataannarnissaat Guutip siunertarisaralua artornarpallaartutut isigalugu. (Malaki 2:16; Matîuse 19:5, 6) Taamaalillutik inuit eqqarsaataannik isumaqarput, Guutillu eqqarsaataanik isumaqaratik.
15. Guuti salliutikkaanni sooq illersuutaava?
15 Guuti salliutikkaanni illersuutaaqaaq! Aappariit taamaaliortut ataannarniartarput unnersuussutillu Guutip oqaasianeersut atorlugit ajornartorsiutitik iluarsarniartarlugit. Taamaalillutik Guutip piumasaata sumiginnarnissaraluanik ajornartorsiutit pinngitsoortissinnaavaat. (Tussiaat 19:7-11) Assersuutigalugu eqqaaneqarsinnaapput aappariit inuusuttut avinnialeraluartut taamaattorli aalajangersimasut Biibilip unnersuussutai maleruassallugit. Ukiut arlallit tamatuma kingorna nuliaasoq aappariinnermik ullumikkut ingerlalluarnera eqqarsaatigilerlugu ima oqarpoq: „Qianngitsoorsinnaaneq ajorpunga eqqarsaatigileraangakku ukiuni taama amerlatigisuni uinnit averiaannaasimagaluarnera. Taava Jehova Guutimut qinusarpunga unnersuussutaanillu pilluarluta inuulissutigisatsinnik qutsavigisarlugu.“
Uiusut nuliaasullu — Kristus malinniarsiuk!
16. Jesus qanoq ililluni uiusunut nuliaasunullu maligassaalluarpa?
16 Jesus Kristus tamatigut Guuti salliutikkamiuk uiusunut nuliaasunullu maligassaalluarpoq, taakkualu maligassiaa soqutigingaartariaqarpaat. Uiusut kajumissaarneqarput Jesusip kristumiut ilagiissaannut siulersueriaasia malinniartaqqullugu. (Evfisumiut 5:23) Nuliaasullu kristumiuusut Jesusip Guutimut naammalluinnartumik naalatsigitinnera ilinniutigisinnaavaat. — 1 Korintumiut 11:3.
17, 18. Jesus qanoq ililluni uiusunut maligassiuilluarpa?
17 Biibilimi ima peqqussuteqarpoq: ’Ilissi angutit, nuliasi asaniarsigik, soorluttaaq Kristusip ilagiit asagai imminillu tunniulluni taakku pissutigalugit.’ (Evfisumiut 5:25) Jesusip ajoqersukkaminut asanninnini takutippaa qanittumik ikinngutigilernerisigut. ’Ikinngutinnik taavassi,’ Jesus oqarpoq, ’Ataatannit tusakkannik tamanik nalunaarfigigassi.’ (Juánase 15:15) Eqqarsaatigiuk Jesusip piffissaq qanoq annertutigisoq atorlugu ajoqersukkani oqaluuttarsimagai — qasseeriaqaluni oqaloqatigisarlugit — tatiginninnermillu ersersitsivigisarlugit! Tassaannginnerpa uiusunut maligassaalluartoq?
18 Jesusip ajoqersukkani ilumut soqutigingaarsimavai asangaarsimallugillu. (Juánase 13:1) Ajoqersuutini paasinngikkaanngatigik kisimiitsillugit piffissaq atortarpaa tamakkuninnga paasitinniarlugit. (Matîuse 13:36-43) Ilissi uiusut, nuliassi kristumiuusup anersaakkut atugarissaarnissaa pingaartittarpisiuk? Piffissaqarfigisarpisiuk, qulakkeerniartarlugulu tamassi ilumoortut Biibilimeersut eqqarsaatigisarnerisi uummammiugalugillu? Jesusip apustilini oqaluussinermi ilagisarpai, immaqalu ataasiakkaarlugit ajoqersortarlugit. Illit nuliat oqaluusseqatigisarpiuk, illumiit illumut angalaarlusi Biibilimillu atuaqqissaaqateqartarlusi?
19. Jesus apustilimi sanngiissutaanik iliuuseqarfiginninnermigut qanoq uiusunut maligassaalluarpa?
19 Ingammik apustilimi naammalluinnanngissutaannik iliuuseqartarfiginnittarnermini Jesus uiusunut maligassaalluarsimavoq. Naggataamik apustilini nereqatigigamigit malugisinnaavaa anneruniuttut. Sualuttumik avoqqaarai? Naamik, maniguullunili tamakkerlugit isigaat asattulerpai. (Mákorse 9:33-37; 10:35-45; Juánase 13:2-17) Illittaaq nuliat naammagittarfigisarpiuk? Sanngiissutit takkuttuartut ajuusaarutiginagit, kamagittarlutit ikiorniartarpiuk maligassaalluarlutit uummataa killinniarlugu? Nuliaasut asannittumik misiginneqataaffigineqarunik ajunngitsumik qisuariartarput, soorluttaaq apustilit taamaalioriartuaarsimasut.
20. Nuliaasut kristumiut suna puigunngisaannartariaqarpaat, kinalu taakkununnga maligassaalluarpa?
20 Nuliaasuttaaq Jesus eqqarsaatigisariaqarpaat, taassuma puigorsimanngisaannarmagu ’Kristusip Guuti niaqorigaa’. Tamatigut Ataataminut qilammiusumut naalatsigitippoq. Tamatumunnga assingusumik nuliaasut puigortariaqanngilaat ’arnap angut niaqorigaa’, aap, uini niaqorigaa. (1 Korintumiut 11:3; Evfisumiut 5:23) Apustili Peterip nuliaasut kristumiut kajumissaarpai ’arnat iluartut’ qangali inuusimasut eqqaamaqqullugit, ingammik Sara, taassuma ’Abraham naalakkamiuk „naalakkamik“ taallugu’. — 1 Pîtruse 3:5, 6.
21. Sooq Abraham Saralu aappariittut iluatsitsippat Lot nuliaalu iluatsinnatik?
21 Sarap illoqarfimmi pisuumi angerlarsimaffik ilorrisimaarnartoq qimattariaqarsimavaa nunaginngisaminilu tupermi najugaqalerluni. Sooq? Inooriaaseq taama ittoq pingaartinnerugamiuk? Naamik. Uiminit peqquneqarami? Qularnanngitsumik taamaassimassaaq, Sarap Abraham asallugu ataqqigamiuk taanna Guutimik mianerinnittuummat. (1 Moses 18:12) Pingaartumilli uini aallaqatigaa Jehova asagamiuk uummatikkullu iluunngarluni Guutimit siulersorneqarusulluni. (1 Moses 12:1) Guutimut naalanneq nuannaarutigaa. Akerlianik, Lotip nulia Guutip piumasaanik iliornissaminut nangaavoq taamaattumillu illoqarfimmi najugarisamini Sodomami pigisat qimatatik maqaasillugit tunummut qiviarpoq. (1 Moses 19:15, 25, 26; Lúkarse 17:32) Aappariinneq tamanna alianartumik naavoq taanna Guutimut naalanngimmat!
22. (a) Ilaqutariit tamarmik imminnut qanoq misissortariaqarpat? (b) Tulliani suut sammissavavut?
22 Taamaattumik uiusut nuliaasullu immissinnut aperisariaqarpusi: ’Ilaqutariittut Guuti salliutipparput? Ilaqutariinni akisussaaffiga Guutimit tunniunneqartoq ilungersortumik naammassiniarpara? Tamaviaarlunga aappara asaniarpara Jehovamullu ajunngitsumik attaveqarsinnaanissaanik ikiortarlugu?’ Ilaqutariit amerlanersaat aamma meeraqarput. Tulliani sammissavavut angajoqqaat akisussaaffiat qanorlu taakkua meeraasalu Guuti salliutittariaqaraat. (wE 1/10 95)
Eqqaamavigit?
□ Jesusip ajoqersuutai ilaqutariinnut amerlasuunut qanoq kinguneqarsinnaappat?
□ Kristumiut aalajaatsut tuusintilikkuutaat sumik akissarsisimappat?
□ Aappariit qanoq ilillutik allasiornissaq avinnissarlu pinngitsoortissinnaavaat?
□ Uiusut Jesusip maligassiaa qanoq ilinniutigisinnaavaat?
□ Nuliaasut qanoq iliorsinnaappat aappariinnermi pilluarnissaq anguniarlugu?
[Qupp. x-mi assiliartaq]
Sara aappariinnerminni iluatsitsiniarluni qanoq iliorpa?