Atuartartut apeqqutaat

◼ Aningaasat eqquiniaasitsinermi isertitat iluaqutissamut atorneqartussaappata kristumiu nuannariinnarlugu allagartanik eqquiniaassutissanik pisiguni ajunngila?

Aliikkusersuutit ippinnanngitsut ajornerarneqarnerannik Bibelimi nassaassaqanngilaq, Jehovami tassaammat ’Guuti pilluartoq’. (1 Timûtiuse 1:11) Taassuma innuttaasa nipilersukkat, ileqqorissumik qitinneq, ingasaassinngitsumik nerineq imernerlu aammalu pinnguaatinut, timersornermut sukisaarsaatinullu allanut oqimaaqatigiissumik isiginninneq nuannaarutissiffigisaqaat. (Tussiaat 150:4; akugdlîssup oĸausê 2:24) Aningaasanoorlunili eqquiniutit Guutip unnersuussutaanut akerliunerat ersarilluinnarpoq, aammattaaq eqquiniutit (lotterispil) taamaapput.

Eqquiniutit suuppat? Eqquiniaanermi allagartat eqquinissamut periarfissiisut pisiarineqartarput. Eqquisussat makitsinikkut qanoq ittukkulluunniit toqqarneqartarput.a Eqqugassat tassaagajuttarput aningaasarpassuit, immaqa koruunit, markit imaluunniit pundit millionilippassuit. Aningaasarpassuarnik eqquinissamut periarfissaq taama ittoq inunnut ima kajungernartigilersimavoq eqquiniaaneq (lotterispil) tassaalersimalluni „aningaasanoorluni eqquiniutit ilaat atugaanerpaaq“. (The World Book Encyclopedia) Inuit millionilippassuit eqquiniaanermut peqataallutik aningaasanoortarput.

Inuit ilaat oqartarput eqquiniaanermut peqataaneq kukkusuunngitsoq, peqataaneq pinngitsaaliissutaananilu allagartat eqquiniutissat akikitsuummata kiisalu sinneqartoorutaasut iluaqutissanut atorneqartarmata. Taamaanneraanerli qanoq pitsaatigaa?

Naak oqartoqartaraluartoq allagartanik eqquiniutissanik pisineq tassaasoq aliikkutaq ajornanngitsunnguullunilu akikitsoq, taamaattoq miserratigineqarsinnaanngilaq eqquiniaanermi piumatussuseq ilaanngitsuunngimmat. Aningaasarpassuarnik eqquinissartik kissaatigalugu inuit allagartanik eqquiniutinik pisisarput. Guutip piumatuujunnginnissamik inassutaanut tamanna akerliuvoq, tassa piumatuuneq ima assuarnartigisinnaammat inuk ’Guutip naalagaaffianik kingornussinissaraluanik’ akornusersinnaallugu. Kristumiu taamatut eqquiniaanermut peqataanermigut piumatuuneq taama ittoq ersersittuaannaruniuk ilagiinnit peersitaanissaanik kinguneqarsinnaavoq. (1 Korintumiut 5:11; 6:10) Bibelimi ima allassimasoqarpoq: ’Kingornussaq peqqaarnerani pileritsaatigivallaagaq kingullissakkut pilluaqqusaassanngilaq.’ (ússatit 20:21) Kristumiu misigisimaguni eqquiniaanermik ’misiliinissaminut’ ussernartorsiorluni taava eqqarsaatigisariaqarpaa eqquiniaanerup inuit piumatuunngortittarmagit. Evfisumiut 5:3-mi allassimammat ’piumatuuneq akunnitsinni taaneqassanngitsorluunniit’, taava kristumiu tamatumunnga nakkaannarfiginninnginnissani ilungersuutiginerusariaqarpaa.

Nunarpassuarni eqquiniaanermut peqataasartut amerlanersaat tassaasarput piitsut. Taamaattumik naak eqquiniutissanut aningaasartuutit annikikkaluarlutik tassaasarput aningaasat ilaqutariit pisariaqartitaannut — nerisassanut atisanullu amerlanerusunut aammalu nakorsamit pitsaanerusumik ikiorneqarnissamut — atugassaagaluit. Kristumiuunerartoq ilaquttaminilli pilersuinissaminik tunulliussisoq ’uppinngitsumit ajorneruvoq’. — 1 Timûtiuse 5:8.

Naak eqquiniutissanik pisineq ilaqutariit aningaasaqarnerannut imaluunniit pisariaqartitaannut tunngaviunerusunut sunniuteqanngikkaluartoq oqartoqarsinnaanngilaq taamaaliorneq inunnut allanut ajoqutaanngitsoq. Allagartanik eqquiniutissanik pisisut tamangajammik soorunami eqquinissartik kissaatigisarpaat. Eqqugassarli suminngaanneerpa? Assersuutigalugu, allagartaq eqquiniutissaq 10 pesonik akeqarpat eqqugassallu 1.000.000 peso-llutik taava aningaasat eqqugassat tassaassapput aningaasat inuit 100.000-it allagartanut eqquiniutissaminnut akiliutaat. Allat pigisaannik pileritsaassinnginnissamik Guutip inassutaanut tamanna naapertuuppa? (5 Môrsase 5:21) Eqqortumik oqaatigissagaanni aningaasat eqqugassat tassaasarput inuit suli amerlanerit akiliutaat, tassami allagartat eqquiniutissat 100.000-init amerlanerungaartut tuniniarneqartarmata. Aningaasammi ilarpassui aaqqissuinermut aammalu eqquiniaasitsinerup iluaqutissatut siunertarineragaanut atorneqartussaapput. Taamaattumik eqquiniartoq immaqa allagartamik eqquiniutissaminut pesonik qulinik akissaqaraluartoq ilimananngilaq allat tamarmik akissaqassasut. Aammalu qularnanngitsumik eqquisup aqqa tamanut nalunaarutigineqassaaq, taamaalillunilu inuppassuit immaqa akissaqarfiginngikkaluarlugu eqquiniaanermut peqataanissaminnut imaluunniit eqquiniutissanik amerlanerusunik pisinissaminnut kajumississutigissallugu.

Aammattaaq isertuunneqarsinnaanngilaq eqquiniaaneq aningaasanik nammineq sulissutigisimanngisanik eqquinissamik kissaateqarnermut attuumassuteqarmat, taamaalillunilu eqquiniaaneq eqiasuttuunissamik kajumissaarisuuvoq. Tamatumali akerlianik Bibelimi Guutip kiffai kajumissaarneqarput ileqqaartooqqullugit, eqiasuitsooqqullugit suliumatooqqullugillu. Nammineq qanoq iliuuseqarnani pissarsinissamik eqqarsaatip siuarsarnissaraluanut taarsiullugu Bibelimi ima allassimasoqarpoq: ’Kinaluunniit suliumanngikkuni nerissanngilaq.’ — 2 Tásalûníkamiut 3:10; ússatit 13:4; 20:4; 21:25; 1 Tásalûníkamiut 4:9-12.

Eqquiniaanermut peqataasartut namminneq piumassusertik naapertorlugu taamaaliortarmata aammalu taamaaliorneq inatsisinik unioqqutitsinerunngimmat imaanngilaq kristumiut peqataasinnaassasut. Naalakkersuisoqatigiit ilaasa aningaasanoorluni eqquiniutit ilaat, akilersilluni atortittartuuneq aammalu ataatsikkut arlalinnik nuliaqartarneq inerteqqutaajunnaarsissimavaat. Iliuutsit tamakku inatsisinik unioqqutitsinerunngimmata inunnillu amerlasuunit iliuuserineqartarlutik, imaanngilaq Guutimit iluarisaasut. Isumali Davidip oqaatsinik ukuninnga oqaatigisaa kristumiunit malikkumaneqarneruvoq: „Ingerlavigisannik ilinniartinnga, [Jehova], aqqutigisannik ajoqersuunnga! Sallusuissutsikkut tasissersunnga ajoqersunngalu, illit tassaagavit guutiga annatsitsisigalu.“ — Tussiaat 25:4, 5.

Piitsunik, innarluutilinnik utoqqarnillu ikiuinissamik kristumiutut kissaateqaraanni toqqaannartumik imaluunniit eqquiniaanermut attuumassuteqanngitsumik taamaaliortoqarsinnaavoq. (wD 15/7 89)

[Quppernerup ataani ilanngussaq]