Ima nassaarsinnaavutit ikinngutinik ilumoortunik

„IKINNGUTITAARUMAGAANNI ikinngutaasariaqarpoq,“ taalliortoq Amerikamiu Ralph Waldo Emerson taama allappoq. Ikinngutigiinnermi pisariaqarpoq illuatungeriit immikkut tamarmik qanoq iliuuseqarnissaat. Inuit nipaarluit namminissarsiortullu ikinngutinik ilumoortunik nassaarniarneq ajornakusoortittarpaat, kisianni soorlu kingorna takussagipput tamanna neriuutissaqanngilluinnanngilaq.

Ikinngutigiinnerit ilumoortut asanninneq tunaartaraat, tassami asanninneq kajungilersitsisarmat. Inuit ikinngutinik ilumoortunik nassaarniarnissaminnik ajornakusoortitsisut ajornartorsiut tamanna qanoq ilillutik qaangerniarsinnaavaat?

„Tusarnaarluartarit. Allat imminut oqaluttuaritittakkit,“ Dale Carnegie taama siunnersuisimavoq. Inuit imminnut ilisarisimanngitsut katerisimaarnerni naapikkaangata, taava ikinngutitaartut kikkuuppat? Ikinngutitaartut tassaanngillat oqaluttorujussuit, tassaallutilli allanut uummaarissumik soqutiginninnerminnik ersersitsisut, allanik oqaluttuartitsisut oqaluttuaannillu tusarnaaqqissaartut. Aammattaaq ilisarisimalikkat aqqinik paasissutissanillu soqutiginartunik taakkununnga tunngasunik aalajangiussineq ikinngutitaarnissamut ikiuutaasinnaasarpoq.

Atuakkami Fundamentals of Interpersonal Communication-imi Kim Giffin aamma Bobby R. Patton ammanissamik unneqqarissuunissamillu siunnersuipput. „Inuk ilinnut pingaaruteqalissappat,“ oqarput, „taassumunnga tunngasunik illit pingaaruteqarsorisannik ilisimannittariaqarputit . . . tamatigut ammallutillu unneqqarittariaqarputit . . . Inummut allamut pissusilersorfiginninninni kinaassusiviit saqqummersittariaqarpat.“

Ikinngutigiit ilumoortut peqqusersuitsuuginnanngillat, aammattaarli inoqatiminnik pingaartitsisuupput. Imminnut pigisutut pissusilersorfigineq ajorput, aammalu ittuujuisaartuunatik. Imminnut paaseqatigiittuupput, aappamik pissutsinut isiginnittaasia ilisimavaat taamaattumillu misiginneqataanermik ersersitsisinnaasarlutik. Ikinngutigiinnertik nukittoriartortillugu imminnut ammaffigeqatigiinnerujartortarput, isertuaratillu oqaloqatigiittarlutik. Taamaalillutik tassaaliinnanngillat ikinngutigiit ilumoortut, aammattaarli ikinngutigiit qanittut. Ikinngutigiit ilumoortut tamakkeratik qanittumik ikinngutigiipput. Jesus Kristus, inuit nunami inuusimasut inussiarnernerpaartaat, ikinnguterpassuaqarsimavoq, ikittuinnannguilli qanittumik ikinngutigisimavai. — Mákorse 9:1-10; Lúkarse 8:51.

Atuagaq ikinngutigiinnermut ilumoortumut tunngasoq

Bibeli, ikinngutigiinneq pillugu atuakkanit tamanit pitsaanerpaamik allaaserinnittoq, oqarpoq: „Ikinngut ilumoortoq asannittuaannarpoq, qatanngutaallunilu annikilliornartussaq pillugu erniarititaasoq.“ (ússatit 17:17, NV) Ikinngutit ilumoortut misiginneqataasuupput ajornartorsiutinillu takkuttoqaraangat ikiuinissaminnut piareersimasarlutik. Tamatumannga maligassaal- luartoq maanna eqqartussavarput — itsaq Israelimiut pillugit oqaluttuaq.

Kaannersuaqarnera pissutigalugu angut Judameersoq nulii, No’omi, ilagalugu Moabimut nuuppoq. Kingorna angut toquvoq, kingornalu erneri marluk niviarsissanut Moabimiunut, Rutimik Orpamillu atilinnut, katipput. Taava aamma erneri toqupput, arnallu taakku pingasut kiserngorupput. No’omi, taakkunannga utoqqaanersaasoq, aalajangerpoq Judamut uterniarluni, taassumalu ukuaasa marluullutik aallaqatigaat. Aqqutaani No’omip arnat inuusuttut taakku marluk kajumissaarpai nunaminnut uteqqullugit taavanilu aappaneqqeqqullugit. Orpa taamaaliorpoq, Rutilli No’omip ilaginissaa aalajangiusimajuarpaa. Soormitaava? Ukuaannaannginnami; aammattaarli ilumoortumik ikinngutaagami. No’omi misiginneqatigaa, eqqarsaatigisinnaanngilluinnarpaalu arnap taassuma utoqqanngulersup, uiminik ernerminillu annaasaqarsimasup, kisimiitillugu aallartinnissaa. — Rúte 1:1-17.

Rutip misiginneqataaneq, inussiarnerneq, ilumoorneq asanninnerlu ilumoortut ersersippai. Pissutsit tamakku ikinngutigiinnerup ilumoortup tunngavigerpiarpai. Rutilli No’omimik ikinngutiginninnera immikkut ittumik allaassuteqarpoq.

Qutsinnerusumik ikinngutigiinneq

No’omip nunaminut uteqqulluni kajumissaarmani Rut ima akivoq: ’Inanniaqinanga qimaqqullutit, sumut aallaruit aallassaanga; innuttatit innuttaraakka, Guutillu Guutigaara.’ (Rúte 1:16) Rut, siornatigut Guutimik nalusuusimasoq, No’omip Guutimik ilumoortumik, Jehovamik, ilinniartissimavaa taassumunngalu asanninneqalersillugu. Arnat taakku marluk uppeqatigiinnerat nukittuumik anersaakkullu ittumik qilerutinngorsimavoq ilumoortumik ikinngutigiilersitsisoq. Jehovallu nutaanik ilaqutaqalersillugit pilluaqquai. Rut Boazimut, Judami nunaatilimmut pigissaartumut, katippoq, ernertaarlunilu Obedimik atsikkaminik, taannalu kingorna kunngi Davidimut aatanngorpoq. — Rúte 4:13-22; Matîuse 1:5, 6.

Tamatuma, anersaakkut ittup, pingaartup ikinngutigiinneq qutsinnerusumut pisissavaa. Qanoq ililluni? Rut aamma No’omi eqqarsaatigigaanni, taakkua marluullutik Jehova, ’Guuti nallittuisoq saammaasoq, kamajuitsoq isumassuingaartoq ilumuungaartorlu’, pallorfigisaraat. (2 Môrsase 34:6) ’Guuti asassutaavoq,’ unneqqarillutalu anersaakkut ilumoortumillu pallorfigigutsigu, taava taassumunnga tullitsinnullu asanninnerput pinngitsoorani annerulissaaq. (1 Juánase 4:8; Juánase 4:24) Aap, taava allanngussaagut. Inunnut allanut, ingammik maniguuttunut naalliuttunullu, inussiarnersumik soqutiginninnerulissaagut — apeqqutaatinnagu naggueqatigiinnut kikkunnut ilaanerat. Inuit inunnguuseralugu nipaarluusut taamaalillutik imminnut eqqarsaatigivallaarunnaassapput. Inuit imminnuinnaq eqqarsaatigisimagaluartut inoqatiminnut isumassuisunngussapput. Guutip anersaavata inerititaanik ersersitsilissapput — „asanninneq, tipaatsunneq, eqqissineq, kamaginninneq, avaaginninneq, ajunngissuseq, upperneq, saamaneq, imminut naalakkersorsinnaaneq“. — Galâsiamiut 5:22, 23, NV.

Pissutsit tamakkua ikiussavaatigut piginnaanermik pinngitsuugassaanngitsumik, tassa inuit allat sanngiissutaannik kukkunerannillu, Jesusip oqarneratut ’arfineq-marlunnik pinnani, arfineq-marlunnilli qulillit arfineq-marloriarlugit allaat’ isumakkeerfiginnissinnaanermik, ineriartortitsinissatsinnut. (Matîuse 18:21, 22) Ikinngutigiinnerpassuit ’ikkarluk’ tamanna ’umiiussutigisarpaat’. Jesus Kristusilli tamanna oqaluussissutigalugulu atortarpaa. Eqqarsaatigeriaruk qanoq akulikitsigisumik ajoqersukkani naammalluartuunngitsut ajortiliusullu isumakkeerfigisarai, aap, allaat Peterip miserratigimmani isumakkeerfigaa! — Matîuse 26:69-75.

Taamatut anersaakkut ineriartornitta kingunerisaanik amerlanerusunik ikinnguteqalissaagut. Silarsuaq tamakkerlugu ilaqutariissuarnut ikinngutigiiusunut ilaalersinnaavugut! Aammattaaq paasilissavarput ikinngutitaavut siornatigut ikinngutigisimasatsinnit pitsaaneroqisut. Brian, Jehovamut kiffanngoqqammersoq, ilaatigut oqaluttuarpoq siornatigut ikinngutigisimasami imertittaraanni, tamatumalu kingunerisaanik nulii meeqqatillu sumiginnartarsimallugit. Maannakkulli ilaquttani isumagilluartorujussuanngorsimavai. Ikinngutitaarpassuani, aammattaaq Jehovamut kiffartortut, pillugit ima oqarpoq: „Nalunngilara ajornartorsiuleruma oqarasuartaat tiguinnarsinnaallugu ikinngutitaamalu arlaannul- luunniit sianersinnaallunga, aammalu nuannaarlutik ikiussagaannga.“

Alan ikinnguteqarsimagaluarpoq allanik oqaluuserisaqarneq ajortunik taamaallaat biilinut niviarsissanullu tunngasunik. Jehovamulli pallorfiginnittut akornanni ikinnguterpassuaqalerami tamakkununnga tunngasut imaqanngitsutut isumaqanngitsutullu isigilerpai. Ikinngutitaami imminut asanningaarlutik ilumoorlutillu soqutiginninnerat nuannaarutigisorujussuuaa.

Ikinngutiginerpaasavut

Inuit tamakku ataasiakkaat allallu arlalinnik millionillit tamarmik silarsuaq tamakkerlugu ilaqutariissuarnut ikinngutigiiusunut, naalakkersuinermut attuumassuteqanngitsunut, naak inuiaassutsikkut, ammip qalipaataatigut inuuniarnikkullu assigiinngissuteqaraluarlutik qatanngutigiinnermik ilumoortumik, kristumiut siulliit attassimasaannik, ingerlatsisunut, ilaapput. (3 Juánase 14) Qilerut Rutimik No’omimillu qanillisitsisoq, tassa Jehova Guutimik pallorfiginninneq minguitsoq, aammattaaq ilaqutariinnik taakkuninnga ataqatigiissitsivoq. Ilaqutariinni taakkunani ilaasortaasut tamarmik maniguullutik qujaniarlutillu Jehova Guuti Jesus Kristusilu ikinngutiginerpaasamissut isigaat.

’Ilumorluinnaq inuup Guuti ajugaqanngitsoq erneralu ikinngutigilersinnaavai?’ immaqa eqqarsarputit. ’Pingaakujunnerunngila taamaassinnaanera upperissallugu?’ Bibeli qanoq oqartoq malugeriaruk: ’Abrahamip Guuti upperigamiuk, . . . „Jehovap ikinngutaanik“ taaneqarpoq.’ Tamanna Jehovap ajunngingaassusianut ersiutaalluinnarpoq. Kisiannili soorlu Jehovap oqaasiani allassimasoq: ’Anneruniartut Guutip akerartorpai, nikanartittulli saammaattarpai.’ — Jâko 2:23; 4:6.

Immaqa inuit ilaat eqqarsassapput pisinnaatitaaffimmik taamaattumik tigusinissaminnut ajorpallaarlutik. Jakobili nangilluni oqarpoq: ’Guutimut palligunniaritsi, taava ilissinnut palligutissaaq. Ajortuliortusiaa, assasi ipiiarsigik, ataasiunngitsumik isumaqartusiaa, uummatisi minguiarsigik. Jehovap saani nikanartinniaritsi, taava akitsisissavaasi.’ — Jâko 4:8, 10.

Jesus oqarsimavoq: ’Inassutikka malikkussigik ikinngutigissavassi.’ Aammattaaq tikkuarpaa inatsisit annerpaat uagutsinnut tunniunneqarsimasut tassaasut ’Jehova Guuterput asassagipput uummatitsigut iluunngarluta tarnitsigullu iluunngarluta isumatsigullu iluunngarluta, aammalu tullerput uatsitulli asassagipput’. (Juánase 15:14; Matîuse 22:37-40) Taamaaliorutta taava ilumoortunik ikinnguterpassuaqalissaagut. Aammattaaq takutissavarput pisussaatitaaffimmik aamma allamik annertuumik pinissatsinnut naleqqulluta — tassa nunami minguiarsimasumi Guutip naalagaaffiata ataani inuuneq naassaanngitsoq. (Matîuse 6:9, 10) Soorlu Jesus oqarsimasoq: ’Jehovap inassutaa naassaanngitsumik inuussutaavoq.’ — Juánase 12:50.

Jehovap Nalunaajaasuinit ikiorneqarusuppit? Inussiarnersuupput, aammalu pulaarusuppaatsit pingaaruteqartumik tamatuminnga oqaloqatigerusullutit. Akeqanngilaq, ilumoortunillu ikinnguterpassuaqalernissannut ikiorsinnaavaatsit. (wD 15/9 87)

[Qupp. 6-mi ungalusaq]

Ilumoortumik ikinngutigiinnermi pisariaqartut

Peqqissaartumik ilagisartagassannik qinersisarit.

Inunnut allanut uummaarissumik soqutiginnittuugit tusarnaarluartarillu.

Ataatsimoorlusi suliaqartaritsi — tamatuma ikinngutigiinnersi nukittuunngortissavaa.

Tamatigut ilumoortuugit, ammasuullutit peqqusersuitsuullutillu.

Inuit allat nalorninartorsioraangata misiginneqatigisakkit.

Ikinngutivit kukkuffigippatsit ajuallatsippatsilluunniit isumakkeerfiginissaannut piareersimasarit — ’arfineq-marlunnik qulillit arfineq-marloriarlugit allaat’. — Matîuse 18:22.

Ikinngutitit mamarlerneqartut isornartorsiorneqartulluunniit tusaraangakku ilumoorlutit illersortakkit.

Ikinnguteqarninni Jehovamut pallorfiginninneq pingaarnerutitariuk.

[Qupp. 7-mi assiliartaq]

Rutip No’omi qimakkumanngilaa, tassami taakkua ikinngutigiinnerat anersaakkut ittumik qajannaatsumik tunngaveqarmat. Taamatut ilumoortunik ikinnguteqarpit?