Rutsi No’omilu

Israalimi kaannersuaqarnerani Israalikkuusoq No’omimik atilik uinilu erninilu marluk Moabimut nuupput. Kingusin­nerusukkut No’omip uia toquvoq. Erneri Rutsimut Orpamullu Moabikkuusunut katipput. Ajoraluar­tumilli kingusin­nerusukkut No’omip erneri aamma toqupput.

No’omip Israalimi kaannersuaqarun­naartoq tusaramiuk aalajangerpoq angerlamut uterniarluni. Rutsip Orpallu aallaqatigaat, aqqutaanili No’omip ukussani oqarfigai: ‘Erninnut nuliaal­luarsimavusi uannullu ukuaalluarsimallusi. Kissaatigaara marluullusi kateqqin­nissarsi. Moabimut angerlar­niaritsi.’ Arnalli akivaat: ‘Asavatsigit! Qimakkusun­ngilatsigit.’ No’omilli nunaminnut uteqqullugit uteriiserfigai. Taava Orpa angerlarluni aallarpoq, Rutsili aallanngilaq. No’omip oqarfigaa: ‘Orpa innuttaminut guutiminullu uterpoq. Ingerlaqatiginiaruk anaanavit illuanukarlutit.’ Rutsilli akivaa: ‘Qimannavian­ngilakkit. Inuiaqatitit inuiaqatigilis­savakka, illillu Guutit Guutigissavara.’ Rutsi taama oqarmat No’omi qanoq misigisimas­sasoraajuk?

Karrinik suaasiassanik katersuilerut­torfiup nalaani Rutsi No’omilu Israalimut apuupput. Ullut ilaanni Rutsi karrinik narsaammut qimatanik katersuiartorpoq. Angutip Buuarsimik atillip narsaat taanna pigivaa. Raahabbi anaanagivaa. Rutsip Moabikkuusup No’omi ilumoorfigalugu najuinnarsimagaa tusarpaa. Taamaattumik sulisuminut oqarpoq Rutsi katersuil­luarsin­naaniassammat karrinik sinnilinnik qimataqassasut.

Unnukkut No’omi aperivoq: ‘Rutsi, ullumi sumi karrinik katersivit?’ ‘Angutip Buuarsimik atillip narsaataani,’ Rutsip akivaa. No’omi oqarpoq: ‘Uigigaluama Buuarsi ilaqutarivaa. Narsaataani suliinnarit arnat inuusuttut allat ilagalugit. Taakani navianar­torsior­navianngilatit.’

Rutsi Buuarsip narsaataani suliinnarpoq katersuinerup naammas­sinissaata tungaanut. Rutsip sulilluarnera Buuarsip maluginiarpaa immikkullu ittuunera nuannaralugu. Taamanikkut angut erneqarani toqugaangat angutip ilaqutaasa ilaata uillarnerusoq katittarpaa. Taamaattumik Buuarsip Rutsi katippaa. Ernertaarput Obedimik atilimmik, Obedillu kunngi Daavi ernutaraa. No’omip ikinngutai nuannaaqaat. Oqarput: ‘Jehovap Rutsi ilinnut ajunngisaangaartoq tunniuteriarlugu maanna ernutaqalersippaatit. Jehova unnersiutigineqarli.’