Jesusip inuunera ajoqersuineralu

Jesusip illoqarfimmi peroriartorfimmini naalagiartarfik pulaarpaa

TAKORLOORSINNAAVARPUT qanoq aalassanneqartigisoq Jesus Nazaretimut angerlamut apuummat. Ukioq ataaseq sinnilaarlugu matuma siorna Johannesimut kuisikkiartorluni aallarami, sanasutut ilisimaneqarpoq. Maannali tupinnartuliortartutut tamanit ilisimaneqarpoq. Maani najugaqartut ilungersorlutik akunnerminni tupinnartuliortoq takorusuppaat.

Jesus pisarnermisut naalagiartarfimmukartoq takugamikku ilimasunnerat annerulerpoq. Ataatsimiinnerup ingerlanerani atuffassissalluni nikuippoq, pruffiitillu Esajasip allagai tunniunneqarput. Allassimaffik Jehovap anersaavanik taninneqartumut tunngasoq nanivaa. Ullumikkut Bibelitsinni tamanna kapitali 61-imiippoq.

Tanitap tigusat iperarneqarnissaannik tappiitsullu tappissinissaannik Jehovallu ukiuanik saammaassivimmik nalunaajaanissaanut tunngasoq atuareeramiuk, allakkat imusat kiffamut tunniuppai ingillunilu. Tamarmik pissangarpaseqalutik isigaat. Taava qularnanngitsumik sivisoqisumik oqaluffigalugit aallartippoq, nassuiaatiitigalugit: „Ullumi allakkat tamakku tusaatillusi eqquupput.“

Najuuttut ’oqaasii alianaatsut’ tupigusuutigaat, imminnullu oqarfigalutik: „Una Josefip ernerinnginnerpaa?“ Jesusilli nalunnginnamiuk tupinnartuliorluni takorusukkaanni, nangippoq: „Massami ussammik matuminnga piumaarpassinga: ’Katsorsaasoq, ilinnut katsorsarit! Kapernaumimi pisimasut tusakkatta angeqataannik tamaanissaaq nunanni naammassisaqarit.’“ Jesusip sanilerisimasai qularnanngitsumik isumaqarput ajorunnaarsitsinini nunamini aallartittariaqarsimagaluaraa taamaalilluni tamaani najugaqartut siulliullutik tamanna iluaqutigisimassagaluarmassuk. Tassa misigisimapput Jesusimit qaangiinnarneqarsimallutik.

Qanoq eqqarsarnerat Jesusip nalunngilaa, taamaattumillu marlussunnik oqaluttuarisaanermit tigulaarilluni assersuusiorfigai. Ilisimatippai Israelimi Eliasip nalaani uillarnerpassuaqartoq, kisiannili Elias taakkua arlaannaannulluunniit aallartinneqanngitsoq. Taarsiulluguli Zidonimi uillarnermut Israelikkuunngitsumukarpoq, tassanilu tupinnartuliornikkut annaassilluni. Aammalu pruffiiti Elisap nalaani pupissorpassuaqarpoq, kisiannili Syriamiu Na’aman kisimi minguiarneqarluni.

Assersuussinerit taakku iluarinanngitsut, namminissarsiornerminnik uppernikissutsiminnillu qulaarisut, kamaatigeqalugit naalagiartarfimmiittut nikuipput Jesusilu illoqarfimmit anisillugu. Qaqqap qaavata sinaanit, illoqarfiup Nazaretip pinngorfigisaanit, nakkartinniarsarigaluarpaat. Jesusili aniguivoq isumannaatsumullu pilluni. Lukas 4:16-30; 1 kúngit 17:8-16; 2 kúngit 5:8-14.

◆ Sooq Nazaretimi aalassanneqarpa?

◆ Jesusip oqaaserisaanut inuit qanoq isumaqaqqaaraluarpat, kingornagulli suna kamaatigilerpaat?

◆ Jesus sunialeraluarpaat?