Jiisusip Kunngeqarfik oqaluus­sissutigigaa

Imermut morsutsitaareernermi kinguninngua Jiisusi ima oqaluus­sisalerpoq: ‘Guutip kunngeqarfia qanillivoq.’ Ilinniar­titaasa Galiliiami Judiiamilu angalaqatigaat. Jiisusi peroriar­torfigisaminut Naazaratsimut pigami synagogiliarpoq, Iisaajallu allagai ammariarlugit ima atuarluni: ‘Nutaarsiassanik nuannersunik oqaluus­sisinnaaniassagama Jehovap anersaaminik illernartumik tunivaanga.’ Tamanna qanoq isumaqarpa? Jiisusi anersaamik illernartumik tunineqarami tupinnar­tuliorsinnaavoq, pingaar­nertulli nutaarsiassat nuannersut oqaluus­sissutigissavai. Taava tusarnaartut oqarfigai: ‘Siulittuut tamanna ullumikkut eqquuppoq.’

Taava Jiisusi Galiliiap Tasersuanukarpoq, tassanilu ilinniartitani sisamat aalisartut naapippai. Petrusi, Andariarsi, Jaaku Johannesilu oqarfigai: ‘Malissinga, taava inunnik aalisar­tunngor­tissavassi.’ Ingerlaannarlu aalisar­tuujunnaarlutik malilerpaat. Jehovap kunngeqarfia oqaluus­sissutigiar­torlugu Galiliia tamaat angalaarfigaat. Synagogini, silami tuniniaasarfinni aqqusinernilu oqaluussipput. Sumunnaraluaraangatalu inuppassuit malittarpaat. Sumi tamani Jiisusi tusaamaneqalerpoq, allaat Syria tikillugu.

Kingusin­nerusukkut Jiisusip malinnitsimi ilaat inunnik ajorunnaarsitsisin­naalersil­lugillu anersaapilunnik anisitsisin­naalersippai. Allat illoqarfimmiit illoqarfimmut nunaqarfimmiillu nunaqarfimmut oqaluus­siartoraangat ilagisarpaat. Ilaapputtaaq arnat upperluartut, soorlu Mariia Mattaliit, Juaanna, Susanna allallu. Taakkualu Jiisusi malinnittaalu isumagaat.

Jiisusip ilinniartitani ilitsersuutereerlugit oqaluus­siartortippai. Galiliiami angalaneranni inuppassuit ilinniar­titanngorput imermullu morsutsitaallutik. Ilinniar­titanngorusuttut amerlangaarmata Jiisusip karrinut katersor­neqariaan­nanngorsimasunut assersuuppai. Oqarpoq: ‘Jehova qinnuigisiuk katersuinermi sulisunik amerlanerusunik aallartitseq­qullugu.’ Taava kingusin­nerusukkut ilinniartitami ilaat 70-it toqqarpai marlukkuutaar­tillugillu Judiiami tamarmi oqaluus­siartor­tillugit. Inuit kikkuugaluartut tamaasa Guutip kunngeqarfia pillugu oqaluus­siffigaat. Ilinniartitat uteramik susoqarsimaneranik Jiisusimut oqaluttuas­sarpassuaqarput. Diaavulup oqaluus­sinermik sulineq unitsik­kusukkaluarpaa, kisianni taamaaliorsin­naanngilaq.

Jiisusip qilaliareernermi kingorna ilinniartitami suliamik taama pingaaruteqar­tigisumik ingerlatitseq­qiinnar­nissaat isumagaa. Oqarfigai: ‘Nunarsuaq tamakkerlugu nutaarsiassat nuannersut oqaluus­sissutigisigit. Inuit Guutip oqaasianik ilinniar­tissigit imermullu morsutsillugit.’