Arnaq puilasuliap eqqaaniittoq

Qaangiiffiup kingorna Jiisusi ilinniar­titanilu Samaariak­koorlutik Galiliiamut uterput. Illoqarfiup Sykarip eqqaani Jiisusi Jaakup puilasuliaanik taaneqartup eqqaanut unippoq. Tassani qasuersaarnerani ilinniartitai illoqarfimmut nerisas­sarsiniarput.

Arnaq puilasumut imertariartorpoq. Jiisusip oqarfigaa: ‘Imermik tuninnga.’ Arnaq akivoq: ‘Sooq oqaluuppinga? Arnaavungami Samaariamioq. Juutit Samaariamiunik oqaloqateqarneq ajorput.’ Jiisusip oqarfigaa: ‘Nalunngik­kaluarukku kinaasunga imermik tuneqqusimas­sagaluarputit. Uangalu imermik inuussutaasumik tunissagaluarpakkit.’ ‘Suna piviuk?’ arnaq aperivoq. ‘Imertaateqan­ngilatil­luunniit.’ Jiisusip akivaa: ‘Kinaluunniit uanga imermik tunniussannik imertoq qilaleq­qinngisaan­nassaaq.’ Arnaq oqarpoq: ‘Naalagaq, imermik tamatuminnga tuninnga.’

Taava Jiisusip oqarfigaa: “Angerlarlutit uiit aajuk.” Akivoq: “Ueqanngilanga.” Jiisusillu akivaa: ‘Ilumoorputit. Tallimariarlutit ueqarsimagaluarputit, massakkullu angut inooqatigisat uiginngilat.’ Arnap akivaa: ‘Pruffiitiusimassaatit. Samaariamioqatima upperaat qaqqami maani guutisiorsin­naasugut, juutilli oqartarput Jerusalemmimi taamaallaat guutisior­toqarsinnaasoq. Upperaara Missiarsi tikiukkuni qanoq guutisior­tarnissatsinnik nassuiaak­kumaaraatigut.’ Taava Jiisusip kimulluunniit oqaatiginikuun­ngisani oqaatigaa: ‘Uanga Missiarsiuvunga.’

Arnaq illoqarfim­mukapallappoq Samaariamiullu oqarfigalugit: ‘Missiarsi naapissimagunarpara. Uannut tunngasut tamaasa nalunngilai. Qaallusi alakkariarsiuk!’ Puilasuliamut malippaat Jiisusillu ilinniar­tilerpai.

Samaariamiut Jiisusi aallaqqun­ngilaat. Ullunilu marlunni taakaniigin­narluni ilinniar­titsivoq, inuppassuillu upperilerpaat. Arnaq Samaariamioq oqarfigaat: ‘Angut una tusarnaareerlugu paasivarput ilumut taanna inunnik aniguisitsiumaartoq.’