Jiisusi amerlasuunik tupinnar­tuliortoq

Jiisusi nunarsuarmukarpoq Guutip kunngeqarfianik nutaarsiassat nuannersut oqaluus­sissutigiar­torlugit. Jiisusi kunngin­ngoruni qanoq iliorumaar­nerluni takutin­niassammagu Jehovap anersaaminik illernartumik tunivaa tupinnar­tuliorsin­naalersillugu. Jiisusip sunilluunniit nappaatillit ajorunnaarsis­sinnaavai. Sumiikkaluaraangal­luunniit napparsimasut ornittarpaat ikiorneqarumallutik, tamaasalu ajorunnaarsittarpai. Tappiitsut takusaqarsin­naanngor­tittarpai, tusilartut tusaasaqarsin­naalersillugit nukillaarsimasullu pisussin­naalersillugit. Aamma anersaapilullit anersaapiloqarun­naarsittarpai. Atisaatigullu attulaagin­naraangamikku ajorunnaarsin­neqartarput. Jiisusi sumunngaraluaraangal­luunniit malittarpaat. Kisimiik­kusukkaluaraangamiluunniillu inuit peeqquneq ajorpai.

Ullut ilaanni inuit angut nukillaarsimasoq Jiisusimukaappaat. Illulli ilua inoqangaarmat iserfigisin­naanngilaat. Taamaattumik illup qaava putoriarlugu nukillaarsimasoq ningillugu Jiisusimukar­tippaat. Taava Jiisusip angut oqarfigaa: ‘Nikuigit pisullutillu.’ Taamaaliormallu inuit tupigusulerput.

Aamma ullut ilaanni Jiisusi nunaqarfimmut apuummat angutit qulit pupissut ungasianiit suaarput: ‘Jiisusi, ikiortigut!’ Taamanimi pupissut inunnut allanut qanilleq­qusaanngillat. Jiisusip angutit guutisiorfim­mukaqquai, Jehovap inatsisai naapertorlugit pupissut ajorunnaarsin­neqarsimasut taamaalior­tussaammata. Aqqutaanilu ajorunnaarput. Pupissut ilaata ajorunnaarsin­neqarsimanini paasigamiuk Jiisusimut uterpoq qujaffigiar­torlugu Guutilu unnersiutigiar­torlugu. Angutini qulini taakkunani taanna kisimi qujajartorpoq.

Arnap ukiuni aqqaneq-marlunni napparsimasimasup ajorunnaar­nissani kissaatigisorujussuuaa. Jiisusi inuit akornan­niitillugu tunuaniit ornippaa qallersaataatalu nivingataa attorlugu. Ingerlaannarlu ajorunnaarpoq. Taamaalisorlu Jiisusi aperivoq: “Kiaana attoraanga?” Arnap annilaangagaluarluni orneriarlugu susoqarsimaneranik oqaluttuuppaa. Jiisusip tuppallersarpaa oqarfigalugu: ‘Paninnguara, ajunngikkina.’

Angutip Jairusimik atillip Jiisusi qinnuigaa: ‘Uagutsin­nukarit! Paninnguara napparsimasorujus­suummat.’ Jiisusili illuanut suli apuutin­ngitsoq niviarsiaraq toquvoq. Jiisusi apuukkami takuaa inuppassuit misigin­neqatigin­nikkiar­torsimasut. Jiisusip oqarfigai: ‘Qiaqinasi, niviarsiaran­nguaruna siniinnartoq.’ Taava niviarsiarannguaq assaatigut tigullugu oqarfigaa: ‘Makigit!’ Ingerlaannarlu massippoq. Angajoq­qaavilu oqarfigai nerisassaanik tuneqqullugu. Angajoqqaavi qanoq nuannaar­tigisimanersut takorlooriaruk!