Inuusuttut aperipput:

Asanninnera akinngippagu qanoq iliussaanga?

„Isumakulullungalu nuannaanngeqaanga. Asannilerfigaara, naluarali taassuma qanoq misigiffigineraanga. Qanoq iliussaanga? Oqarfigissavara asannilerfigisimanerarlugu? Naamerluinnaq, saperpunga! Allat pillunga qanoq oqassappat?“ — Huda.a

HUDA, arnaq inuusuttoq Libanonimiu, angummut inuusuttumut asannilersimavoq, akineqarnanili. Tamanna qaqutigoortuunngilaq. Arnaq inuusuttoq alla, Zeina, aamma taama misigisaqarsimavoq. Taanna ima oqarpoq: „Sanileriilluta najugaqaratta ullut tamaasa takusarpara. Ajuutiginartorujussuullunilu kusanartorujussuuvoq, taamaammat asannilerfigaara.“

Soorunami inummik allamik ajuutiginninneq kukkunerunngilaq — tassaappat kristumiu katissinnaasaq. (Ussatit 5:15; 1 Korintumiut 7:39) Aamma arnaq inuusuttoq katikkusuppat ilaqutaqalerusuppallu ajunngilaq. Taavami sianigisaqanngitsumut asannilernermilluunniit akisinngitsumut asannileraanni?

Asanninnermik maqaasilluni aliasunneq

Immaqa Hudatut illit aamma asannissuataarputit. Sulaarlutillu nuannaarsuataaleraraatit, imaaliallaannarli aliasuttorujussuanngortarlutit. „Ilaannikkut silarsuarmi pilluarnerpaatut misigisarpunga, ilaannikkulli pilluaannerpaatut misigisarlunga,“ Zeina oqarpoq. Asanninneq akineqanngitsoq isumakulunnermik, sinissaaruttalernermik allaallu nikallorujussuarnermik kinguneqarsinnaavoq.

Ussatit 13:12-imi ima allassimavoq: „Utaqqivallaarneq tarnikkut anniaataalersarpoq.“ Ilimagisallu eqquutinngitsooraangata nikallornartorujussuusinnaasarpoq! Immaqa ajuutigisat kisiinnaviat eqqarsaatigaat taassumunngalu tunngasut suulluunniit tamaasa tusarusullugit. Qanoq iliorlutit taassumunnga malugitinnissat imaluunniit peqatigiumallugu patsisissarsiornissat isumaliutigisarpat. Immaqalu eqqanniikkaangat pissusivittut pissusilersornissat ajornakusoortittarpat.

Paatsiveerunnartorujussuusinnaavoq ajuutigisavit soqutigerpaserujussuariarlutit tassanngaannaq soqutigerpasikkunnaartarpatit. Ajuutigisat allamik marsigaqartoq imaluunniit allanut inussiarnisaartoq takugaangakku immaqa ningarnerup, sangiannerulluunniit, tikittarpaatit. Biibilimi ima allassimasoqarpoq: „Uumitsanneq amiilaarnaqaaq, kamannerlu kuuttut supisutut ippoq, sinngatuunerlu kia akiorsinnaavaa?“ — Ussatit 27:4.

Huda nassuerpoq: „Nassuiarneqarsinnaanngitsumik ningartarpunga, allamillu eqqarsariaaseqalersimanngitsuuguma immaqa niaqulaalersimassagaluarpunga.“ Aammattaaq imminut uumigilersoqarsinnaavoq. Huda ima oqarpoq: „Uannik asanninngitsumut asannilersimagama imminut ajorisorujussuuvunga aliasutsittorujussuullungalu.“

Immaqa Kitaani arnat inuusuttut ittooratik angummut inuusuttumut saaffiginnissinnaasarput qanorlu misiginerminnik oqaluttuullugu, tamarmiunngitsorli taamaapput. Kulturillu ilaanni niviarsiaq taamaaliorpat ippinnartutut allaallu kanngunarluinnartutut isigineqartarpoq. Asanninninnik akisinngitsumut asannileruit qanoq iliorsinnaavit?

Misigissutsitit aqukkit

Siullermik eqqissisimasumik piviusorsiortumillu misigissutsitit misissortariaqarpatit. Biibilimi ima mianersoqquteqarpoq: ’Uummamminut isumalluartoq silaqanngitsuuvoq.’ (ússatit 28:26) Soorooq? Uummaterput amerlasuutigut naliliinerliortarmat. (Jeremia 17:9) Paasinarsisinnaasarpoq asanninnerusorisarput taamaanngitsoq. „Soqutigineqarnermik asanninnermillu pisariaqartitsisimavunga,“ Huda nassuerpoq. „Asaneqarnissara isumassorneqarnissaralu kissaatigisimavara. Alliartorninni asaneqarsimanngilanga, tamannalu uannut assut sunniuteqarsimavoq.“ Ilaqutariinnit asanninnermik ersersitsisanngitsuneersuuguit, imaluunniit atornerlunneqarsimaguit, immaqa asaneqarnissat pingaartinneqarnissallu assut maqaasivat. Peeraqalernerli tamatuminnga tamatigut aaqqiisarpa?

Ajoraluartumik inuit pilluaatsutut kiserliortutullu misigisut amerlasuutigut aappaalluarneq ajorput. Aappaqaleraangamik takorluuisarput pisariaqartitarluinnartik maanna pisussanngorlugu. Pilluarnerli piviusoq tunisinikkut, tunisinnikkuunngitsoq, pilersarpoq. (apustilit suliait 20:35) Arnaq aappaqalernissaminut piukkunnarnerujussuusarpoq imminut piviusorsiortumik isumaqarfigiguni ’namminissanilu pinnagu, kisianni allattaaq iluaqutissaat’ soqutigiguniuk. — Filípimiut 2:4.

Katinnissamut tatineqartutut misigiguit arnaaguit angummit angutaaguillu arnamit soqutigineqarnerit qisuariapallaffigisoorsinnaavat. Ilaannikkut arnap inuusuttup ajuutigineqarnissaminik kissaateqarnera ikinngutaanit ilaqutaanillu sakkortusarneqartarpoq. Inuiaqatigiit ilaanni niviarsissap katinnissaminut naammattumik ukioqalerniariarluni katinnissaa assut pingaartinneqartarpoq. Atuakkami Women in the Middle East-imi (Kangiani qiterlermi arnat) ima allassimasoqarpoq: „Arnaq 30-nik ukioqangajaleraangat sulilu katinnani, ilaqutai assut isumakululertarput.“ Ilaqutariit ataqqinassusiat ulorianartorsiortinneqarsinnaammat immaqa ataataasup panini suli inuusuttunnguutillugit katitinniartarpai.

Biibilimili najoqqutassiat kulturimit pingaarnerupput. Inuusuttut Biibilimi siunnersorneqarput inersimallualerunik aatsaat katinnissaannik. (1 Korintumiut 7:36, NV) Taavami misigiguit ikinngutivit angajoqqaavilluunniit pinngitsaalillutit katitinniarsarigaatsit? Biibilimi oqaluttuarineqarpoq niviarsissap Guutimik mianerinnittup Sjulamimiup ikinngutini arnat persuarsiortumik uppernarsaaqqusimagai ’asanninneq pileritsassaaqqunagu nammineq piumallertinnagu’. (Taalliat Asanninnilersaarutit 2:7) Taamatut aalajangersimarpalutsigisumik oqaruit kinguneqarluarsinnaavoq, ingammik angajoqqaatit Guutimik mianerinnittuuppata.

Pissutsit piviusut akuerikkit

Asasorisannut atatillugu pissutsit piviusut akuerisariaqalerfissaat nalliutissaaq. Tamanna oqitsuunngilaq annernarsinnaallunilu. Biibilimili ima oqaaqqissaarneqarpugut: „Pisiariniaruk ilumuussuseq, akiginaguli.“ (Ussatit 23:23) Imminut ima aperigit: ’Asannilernissannut piviusorsiortumik tunngavissaqarpunga? Qanoq ilisarisimatigaara? Eqqarsaatai, misigissusii, isumai, ileqqui, pingaartitai, piginnaaneri inooriaasialu ilisimasaqarfigaakka?’

Eqqarsaatigisariaqarportaaq ilumut ilinnut soqutiginninnersoq. Inussiarnisaarneq paatsoorneqaqqajaasarpoq. „Uffa inussiarnisaarniaannarsimasoq oqaasii iliuusiilu inuttut soqutiginninnertut paasisimavakka, taamaannissaanik kissaateqarnera pissutigalugu. Paasigakku soqutiginngikkaanga nikanarsagaasutut misigeqaanga. Misigaanga inussiarnisaarfigisariaqanngikkaanga, uangalu ajorlunga,“ Huda oqaluttuarpoq.

Immaqa aamma illit taama misigisaqarsimavutit. Ajuutigisavilli isaani eqqortuunnginnavit isumaqanngilaq allap isaani eqqortuussanngitsutit. Aammami taanna silarsuarmi kisimi angutaanngilaq!

Aliasunnerit akioruk

Misigissutsikkut aliasunnerpit qaangerniarnera sivisusinnaavoq. Suna iluaqutigisinnaaviuk? Soorlu ’ikinngummut’ — kristumiumut inersimalluartumut ilinnut tusarnaarumasumut — uummammiutit aniatissinnaavatit. (Ussatit 17:17) Imaassinnaavoq ilagiinni qatannguteqartoq arnamik utoqqasaamik oqaloqatigisinnaasannik. Aamma kristumiunik angajoqqaaqaruit ikiortigisinnaavatit tapersersortigalugillu. Zeina oqaluttuarpoq: „Qatanngutip arnap ilagiinniittup inersimalluartup malugigaminga nuannaanngitsunga ikiorpaanga. Toqqissisimanarigakku sunik tamanik oqaluttuuppara. Siunnersorpaanga angajoqqaakka tamanna pillugu oqaloqatigissagikka. Taamaaliorama paasillungalu ikiorpaannga.“

Qinuneruttaaq kimittussusia puiussanngilat. (Tussiaat 55:23) Huda oqarpoq: „Jehovamut qinusarnera aliasunnerma qaangernissaanut iluaqutigaara. Aamma Napasuliaq Alapernaarsuiffik-mi Iteritsi!-milu allaaserisanik atuarneq iluaqutigisarpara.“ Aammattaaq kisimiinniaannannginnissat pingaaruteqarpoq. (Ussatit 18:1) Allanik peqateqartarit. Zeina oqarpoq: „Iluaqutigisara alla tassaavoq ulapputeqarnera pioneerinngorneralu [piffissaq tamaat oqaluussisartunngornera]. Aamma qatanngutit arnat ilagiinniittut allat ilaginerusalerpakka. Tamanna anersaakkut ineriartornissannut iluaqutigaara.“

Biibilimi piffissaq ’asanniffissaq’ eqqaaneqarpoq, immaqalu illit taamaalluni asanninninnik akisisumik naapitsiumaarputit. (Nalunaajaasup oqaasii 3:8) Jehova Guutip inuit pinngortissimavai aappariinnermi asaqatigiinnermik nuannaarutiginninnissamik kissaateqartillugit, immaqalu aamma illit taamaalluni Pinngortitsisitta angingaartup tunissutaa tamanna nuannaarutigisinnaalissavat. Tamannali pitinnagu ukiut aappaqanngitsuuffitit, ukiut apustilip Paulusip ’isumakuluuteqanngiffiusunik’ taasai, ajunnginnerpaamik atorluarniakkit. (1 Korintumiut 7:32-34) Qanorluunniit pisoqassagaluarpat qularinngissinnaavat Biibilimi neriorsuut manna eqquutissasoq: „[Jehova,] assatit ammartarpatit pinngortitallu tamaasa ajunngitsuutinnik qaarsillartittarlugit.“ — Tussiaat 145:16. (gE 22/6 98)

[Quppernerup ataani ilanngussaq]

[Qupp. 12-mi assiliartaq]

Inussiarnisaarneq ilaannikkut paatsorneqartarpoq