Siunissami silap qanoq issusissaa
NUNARSUUP silaannartaanik mingutsitsineq avatangiisini ajornartorsiutit inuit pisuussutigisaasa ilaannaraat. Orpippassuarnik nungusaaneq, uumasut pissuseqatigiit piuneerussaanerat kiisalu kuuit, tatsit immallu mingutsitaanerat ajornartorsiutit allat ilagaat. Ajornartorsiutit tamakku tamarmik misissoqqissaarneqarsimapput qanorlu aaqqinneqarsinnaanersut siunnersuuteqartoqarsimalluni. Nunarsuaq tamakkerlugu ajornartorsiutaammata nunarsuarmi tamarmi aaqqiisoqartariaqarpoq. Ajornartorsiutit suunersut qanorlu iluarsineqarsinnaanersut isumaqatigiittoqarpoq. Iliuuseqartoqartariaqarnera ukiut tamaasa eqqartorneqartarpoq. Ukiulli tamaasa iliuuseqartoqanngingajattoq takusarparput. Tusakulaqaavut naalakkersuisut ajornartorsiutit maalaarutigigaat iliuuseqartoqartariaqarneranullu isumaqataanerarlutik, aappaatigulli oqartarlutik „uaguunngitsorli, maannakkuunngitsorlu“.
1970-imi, Nunarsuup Ulluani siullermi, New Yorkimi isummaminnik nittarsaaniarlutik ingerlaaqatigiit nunarsuaasaliarujussuaq „Ikiortissannik!“-mik nilliasoq angallappaat. Ikiortissarsiorneq qisuariarfigineqassanerluni? Guutip oqaasiata akivaatigut: „Tunaareqinasigit naalagaanertat, inuit annaassisinnaanngitsut. Anerningerunik kingumut issunngussapput, pilersaarutaallu ulloq taanna maangaannassapput.“ (Tussiaat 146:3, 4) Taava tussiaasiortup Pinngortitsisoq tikkuarpaa, Taannami kisimi inuiaat ajornartorsiutaannik aaqqikkuminaatsunik tamanik aaqqiinissaminut piginnaaneqarpoq, ilisimassuseqarluni piumassuseqarlunilu. Ima allassimavoq: „Pilluarpoq . . . [Jehovamut] Guutiminut neriulluartoq, qilammik nunamillu immamillu tamanillu tassaniittunik pinngortitsisumut.“ — Tussiaat 146:5, 6.
Pinngortitsisup asannittumik neriorsuutaa
Nunarsuaq Guutimit tunissutaavoq. Nunarsuaq ingerlaatsillu pisariusut tupinnartullu silap qanoq issusianik uagutsinnut najoruminartunngortitsisut ilanngullugit taassuma piareersarsimavai pinngortillugillu. (Tussiaat 115:15, 16) Biibilimi allassimavoq: „[Jehovap] nunarsuaq pinngortippaa pissaassutsimigut inuillu najugaat tunngavilerlugu ilisimassutsimigut, siuneqassutsimigullu qilak isivitippaa. Nipini anikkaangagu erngit qilammiittut ittulersarput, nuissallu majortittarpai nunarsuup isuinit. Innaallatsitsisarpoq siallersitsisarlunilu, anorersuarlu pitorartittarpaa pequusivimminit.“ — Jeremia 10:12, 13.
Paulusip Pinngortitsisup inuiannut asanninnera itsaq Lystrap inuinut ima allaatigaa: ’[Guuti] imminik nalunaajaatiginngitsuunngikkaluarpoq, ajunngitsumik pisarami qilammit tunisarlusi sialunnik ukiunillu naggoriffiusunik uummatisilu qaarsillartittarlugit tipaatsutsittarlugillu.’ — apustilit suliait 14:17.
Nunarsuup siunissaa inuit isumaqatigiissutaannik ilungersuutaannillu tunngaveqanngilaq. Silap qanoq issusianik aqutsisinnaasup itsaq innuttani ima neriorsorsimavai: „Piffissat eqqorlugit nunassinni siallersitsisassaanga. Nuna naatitaqartassaaq orpiillu narsaatiniittut inerititaqarlutik.“ (3 Moses 26:4) Qanittukkut pissutsit taamaattut Nunarsuaq tamakkerlugu iluarusuutigineqalissapput. Inuiaat naalattut anorersuarnit aseruisunit, qarsutsinersuarnit, panernersuarnit pinngortitamiluunniit ajunaarnersuarnit allanit eqqugaanissartik aarleqqutigisariaarutissavaat.
Sila nuannaarutaaginnalissaaq. Inuit immaqa sila suli eqqartortassavaat, kialuunniilli iliuuseqarfigisariaqassanngilaa. Silarsuarmimi Guutip pilersitassaani inuuneq ima nuannertigissaaq silamik allannguisoqartariaqassanani. (gE 22/5 98)