Biibili tuppallersaatigisinnaavara?
Akissut Biibilimeersoq
Aap. (Romamiut 15:4) Inuit erloqinartorsiortut misigissutsikkulluunniit artornartorsiortut allassimaffiit Biibilimeersut tuppallersaatigisimasaat ilaat uani atuarsinnaavatit.
Allaaserisami matumani
Ajornartorsiorneq
Tussiaat 23:4: “Ingerlagaluarumaluunniit qooqqukkut toqup taartitaatigut siooragisaqanngilanga najoramma.”
Isumaa: Guutimut qinusaruit Biibililu siunnersortissarsiorfigisarlugu ajornartorsioraluarlutit isumalluarsinnaavutit.
Filippimiut 4:13: “Guutip pissatsittarmanga suulluunniit nukissaqarfigaakka.”
Isumaa: Sumilluunniit ajornartorsiuteqaraluarlutit naammagalugu atornissaanut Guutip pissatsissinnaavaatit.
Asasamik toqusoorneq
Oqaluussisartup oqaasii 9:10: ‘Toqusut inaanni suliassaqanngilaq ataqatigiinneqaraniluunniit ilisimasassanik ilisimassusermilluunniit peqarnani.’
Isumaa: Toqusimasut ilisimannginnamik naalliunneq ajorput, aamma ajoqusersinnaanngilaatigut.
Apustilit Suliaat 24:15: ‘Guuti toqusunik makititsinissaminik neriorsuivoq.’
Isumaa: Guutip asasagut toqusimasut uummarteqqissinnaavai.
Ingasattumik ilerasunneq
Tussiaat 86:5: “Naalagaq, illimmi ajunngitsuuvutit isumakkeerfiginnikkumasarlutillu, ilumoorsutsit angeqaaq ilinnik torlorfiginnittunut tamanut.”
Isumaa: Kukkussutigisimasaminnik ilumoorlutik peqqissimisut assinganillu kukkoqqinnginnissaminnik aalajangiusimannittut Guutip isumakkeerfigisarpai.
Tussiaat 103:12: “Soorlu kangia kitaanit ungasissoq, taamatut unioqqutitsinivut ungasillisippai uatsinnit.”
Isumaa: Guutip isumakkeerfigigaangamitigut ajortuliagut uagutsinnit ungasinneroqqissinnaajunnaartillugit peertarpai. Pillarniarluta eqqaaqqeqattaarneq ajorpai.
Nikallunganeq
Tussiaat 31:8: “Annikilliornera takoreerpat, annikilliuutinni ikiorparma.”
Isumaa: Guutip annikilliuutit aqqusaakkatit tamaasa nalunngilai. Inuit allat paasisinnaanngikkaluaraatsit Guutip misigissutsitit ilunniittut paasisinnaalluarpai.
Tussiaat 34:19: “Naalakkap qanippai sequmissimasumik uummatillit, annaattarpai aserortersimasumik anersaallit.”
Isumaa: Guuti neriorsuivoq nikallungagaangavit ikiortarniarlutit. Qamuuna anniartillutit tunniutiinnannginnissannut nakussatsissinnaavaatit.
Napparsimaneq
Tussiaat 41:4: “Napparsimalluni nallaviani Naalakkap ikiussavaa.”
Isumaa: Katsorsarneqarsinnaanngitsumik nappaateqaruit Guutip ikiorsinnaavaatit qamuuna eqqissisillutit aamma nukissannik, pinertusaarnissamik aalajangiilluarsinnaaniassagavillu ilisimassusermik tunillutit.
Esaja 33:24: “Innuttaasoq kinaluunniit oqassanngilaq: ‘Napparsimavunga!’”
Isumaa: Guuti neriorsuivoq siunissami inuit tamarmik peqqilluinnassasut.
Uippakajaarneq annilaanganerlu
Tussiaat 94:19: “Eqqarsaatima eqqissiviilliortileraangannga tuppallersaanerpit nuannaalersittarpaanga.”
Isumaa: Uippakajaartilluta Guutimut ikioqqugutta eqqissisimaannarnissatsinnut ikiorsinnaavaatigut.
Petrusimit 1. 5:7: “Isumassormasi isumakuluutisi tamaasa taassumunnga miloriussigit.”
Isumaa: Guutip soqutigaatigut. Kissaatigaa isumakuluutigut pillugit qinusassasugut.
Sorsunneq
Tussiaat 46:10: “Nunarsuarmi tamarmi sorsunnerit soraarsikkumaarpai.”
Isumaa: Guutip kunngeqarfiata qanittukkut sorsunnerit tamaasa unitsissavai.
Tussiaat 37:11, 29: “Qanilaartut nuna kingornutissavaat pilluangaarnertillu nuannaarutigissallugu. … Iluartut nuna kingornutissavaat najugaqassallutillu tassani naassaanngitsumik.”
Isumaa: Inuit ajunngitsut naassaanngitsumik inuussapput nunarsuarmi tamarmi eqqissineq nuannaarutigalugu.
Siunissaq pillugu ernumaneq
Jeremia 29:11: “Uangami nalunngilakka ilissi pillusi pilersaarutigisakka, oqarpoq Naalagaq, pilluarnissamik pilersaaruteqarama ajunaarnissamik pinnanga. Siunissaqartissavassi neriuutissaqartillusilu.”
Isumaa: Guutip innuttani neriorsorpai siunissaq isumalluarfigisinnaagaat.
Saqqummersitat 21:4: “[Qulliit] tamaasa isaannit allartissavai. Aamma toqu, aliasunneq, nillianeq anniarnerlu atuukkunnaassapput. Pissutsit ajortut peerupput.”
Isumaa: Guuti neriorsuivoq pissutsit ajortut ullumikkut atuuttut peerniarlugit.