Katissimanani inooqatigiinneq pillugu Biibilimi qanoq allassimasoqarpa?

Akissut Biibilimeersoq

Biibilimi allassimavoq ‘Guutip piumasarigaa atoqatigiinnikkut eqqunngitsuliorneq itigartis­sagipput’. (Tessaluunikamiunut 1. 4:3) “Atoqatigiinnikkut eqqunngitsuliorneq” Biibilimi eqqaaneqaraangat ilaatigut allasiornermut, suiaqatiminik atoqateqar­tarnermut aamma angutip arnallu katinneqaratik atoqatigiin­nerannut tunngatin­neqartarpoq.

• Sooq Guutip pingaartippaa angut arnarlu asaqatigiittut katissasut?

• Taavami katinnginnermi imminnut tulluar­nerlutik paasiniarlugu najugaqatigiikkaanni?

• Qanoq aappariil­luartoqalersinnaava?

Sooq Guutip pingaartippaa angut arnarlu asaqatigiittut katissasut?

• Aappariittut katinneq Guutip aaqqissugaraa. Taamatut pilersitsisuulluni inuit siulliit marluk katitippai. (Mosesimik 1. 2:22-24) Guutip siunertarinngilaa angut arnarlu katissimanatik inooqatigiissasut.

• Guutip inunnut suna pitsaanerusoq nalunngin­nerpaavaa. Angutip arnallu katissimanerat ilaqutariinnut tamanut iluaqutaallunilu illersuutaasussaavoq. Una eqqarsaatigeriaruk: Soorlu pequt pisiaq qanoq eqqortumik katitis­sanerlugu ilitsersuuteqartartoq, taamatuttaaq Guutip ilitsersorpaatigut qanoq aappariil­luarsin­naanersugut. Guutip najoqqutassiai maleruaasunut iluaqutaajuaannarput. – Esaja 48:17, 18.

  

• Katissimanani atoqatigiinneq kingunipiloqarsinnaavoq. Assersuutigalugu kissaatiginagu naartulersoor­toqarsinnaavoq, atoqatigiinnikkut nappaatipalaanik tunillatsit­toqarsinnaavoq misigis­sutsikkullu ajornar­torsiuteqar­toqalersin­naalluni.

• Guutip angut arnarlu meeqqiorsin­naalersippai. Inuuneq illernartutut isigaa, atoqatigiin­nikkullu meeqqiorsinnaaneq tunissutaavoq nalilerujussuaq. Guutip kissaatigaa aappariinnermik pingaar­titsinikkut tunissut taanna ataqqin­nittumik atussagipput. – Hebræerit 13:4.

Taavami katinnginnermi imminnut tulluar­nerlutik paasiniarlugu najugaqatigiikkaanni?

Aappariil­luarnissamik anguniagaqaraanni aapparisap qimariaan­naanissaanut “misiliif­feqarnissaq” pisariaqanngilaq. Aappariilli akisussaaqatigiikkunik ajornar­torsiutaalersullu ikioqatigiillutik qaanger­niarunikkit aappariittut ingerlal­luassapput.a Katissimaneq ataqatigiin­nerulersitsisarpoq. – Matiusi 19:6.

Qanoq aappariil­luartoqalersinnaava?

Aappariinnik naammal­luinnar­toqanngilaq. Biibilimili siunnersuutit maleruaraanni pilluarluni aappariil­luartoqarsinnaavoq. Uku assersuutigineqarsin­naapput:

• Illit pisariaqar­titatit salliunnagit aappavit pisariaqartitai salliuttakkit. – Korintimiunut 1. 7:3-5; Filippimiut 2:3, 4.

• Asaqatigiinnermik ataqqeqatigiin­nermillu ineriar­tortitsigitsi. – Efesossimiut 5:25, 33.

• Oqaatsivit mianersuutiginissai ilinniaruk. – Ussatit 12:18.

• Naammagit­tartuul­lutillu isumakkeerfigin­nipallattarit. – Kolossimiut 3:13, 14.