Esajap allagai tuppallersaatigisin­naavatit

1-2. Nikallor­nartumik nalaataqaraangatta Jehovap qanoq ikiortarpaatigut?

MEERAQ aliasungaarluni qiasoq takorlooriaruk. Immaqa ilaqutariittut illoqarfimmut allamut nuukkamik ikinngutini qimattariaqarpai. Imaluunniit kukkussutini aliasuutigingaarpaa. Taama pisoqar­tillugu anaanaasoq asannittoq qanoq iliortarpa? Qitornani pakkullugu tusarnaassavaa eqqaasillugulu asallugu.

² Biibilimi Jehova anaanatut asannittutut qitornaminik tuppallersaasutut imminut assersuuppoq ima oqarluni: “Soorlu anaanaasup qitornani tuppallersartaraa, taamatut uanga tuppallersas­savassi.” (Es 66:13) Jehovap asanninnera angajoqqaat asannin­nerannit anneruvoq. (Es 49:15) Nikallunganitsinni Jehovap Oqaatsini aqqutigalugu tuppallersarsin­naallutalu nakussatsis­sinnaavaatigut. – Rom 15:4.

3. Allaaserisami matumani suut sammissavagut?

³ Esajap allagai tuppallersaatigisin­naasatsinnik Jehovameersunik ulikkaarput. (Es 40:1) Ataatatta asannittup inuit Judami inuusut ajornar­torsior­neranni tuppallersar­niarlugit Esajap allagai allatsippai. Aamma uagut ‘pissutsini anigoruminaal­lutillu erloqinartuni’ inuugatta tuppallersar­neqartariaqarpugut. (Tim 2. 3:1) Sammeriatigu Esajap allagai qanoq tuppallersaatigisin­naagigut (1) atukkagut allanngoriasaaraangata, (2) ilerasup­pallaaraangatta aamma (3) asasamik toqusooraangatta.

ATUKKAGUT ALLANNGORIASAARAANGATA

4. Atukkagut allanngoriasaaraangata qanoq sunnerneqaatigisin­naavarput?

⁴ Inuunitsinni atukkagut allanngoriasaarsin­naapput. (Oqal 9:11; Kor 1. 7:31) Peqqiil­liulersin­naavugut, aningaasatigut artukker­neqarsin­naavugut, politikkikkut allanngorujus­suartoqarsinnaavoq, imaluunniit Jehovamut kiffartor­nitsinni allamik suliassin­neqarsin­naavugut. Allannguinerit tamakku kingunerisin­naasaat ernumas­sutigilersin­naavagut. Pissusis­samisuuinnarpoq ima eqqarsarutta: ‘Qanoq iliussaanga?’ Qatanngut Josephimik atilik ukiut 17-it missaat Betelimi kiffartoreerluni pioneritut suliassin­neqartoq ima oqarpoq: “Nalornisorujus­suuvunga. Sivisuumik Betelimi kiffartoreerlunga allannguinissaq annertoqaaq. Qanoq ingerlariaq­qissanerlunga nalorneqaanga.” Atukkatta allanngoriasaar­neranni Esajap allagai aqqutigalugit Jehovap qanoq tuppallersarpaatigut?

5. Esaja 42:16 naapertorlugu Jehovap qanoq neriorsorpaatigut? (Aamma asseq takuuk).

⁵ Esaja 42:16 atuaruk. Jehova neriorsuivoq tappiitsutullusooq ittut ‘aqqutikkut nalusatigoortut’ siulersorumaarlugit taarnerlu qaamasun­ngortis­sallugu. Oqaatsit ‘tappiitsut’, ‘aqqutit nalusat’, “taarneq” aamma “nuna qattunerasaartoq” atukkagut allanngoriasaaraangata siunissamut isiginnit­taatsitsinnut assersuutaasin­naalluarput. Orpippas­suartigut eqimasutigut aqquteqan­ngitsukkut ingerlaarlutalusooq misigisin­naavugut. Taamaattorli qanorluunniit atugaqaleraluarutta Jehovap siulersus­salluta qimanngisaan­nassallutalu neriorsorpaatigut. Taartukkut ingerlanitsinni qaammarsaallunilu tasiussavaatigut aqqullu maniitsoq nalimmatsis­sallugu. Qanoq taamaaliussava? Oqaatsini peqatigiis­sortanilu aqqutigalugit silatusaartumik siunnersorluta. (Tuss 119:105; Es 30:21) Kristumioqatigut allallu aqqutigalugit aamma ikiortarpaatigut. Qanoq aqqusaagaqar­nissarput nalugaluarlutigu upperil­luinnarsin­naavarput Jehovap asagamisigut qanorlu misiginersugut paasigamiuk ikiortuarumaaraatigut. – Es 41:10; Pet 1. 5:6, 7.

6. Atukkagut allanngoriasaarpata suna qularutigin­ngissin­naavarput?

⁶ Joseph, eqqaaneqareersoq, Beteli qimareerlugu nulianilu Jehovamit asannittumik annertoq­qusersor­neqarnertik pillugu ima oqaluttuarpoq: “Atukkatta allanngornerini Jehovap ikiuinera misigaarput. Qatanngutit aqqutigalugit ikiorpaatigut. Piffissaq eqqorlugu pigisatigut misigis­sutsitsigullu isumassorpaatigut, ullorlu manna tikillugu taamaalior­tuarpoq.” Illit atukkatit allanngoriasaarpata – qanorluunniit ajornakusoor­tigigaluarpat – qularutigis­sanngilat Jehovap nakussatsil­lutillu siulersus­sagaatit. (Es 54:10; 58:11) Josephip erinarsuut immikkut ittoq tuppallersaatigaa, tassanimi eqqaasin­neqarpoq qanorluunniit pisoqaraluarpat Jehovap najortuarumaaraatigut.a Ima nangippoq: “Pilersaarutigut malillugit pisoqan­ngikkaluartoq una qularutis­saanngilaq: Jehovap ikiortuas­savaatigut.”

ILERASUP­PALLAARAANGATTA

7. Sooq ilaasa kukkussutigisimasatik artorsaatigisarpaat?

⁷ Ingasattumik ajortuliorsimanerput nassuerutigereerlugu utoqqaanertanit asannittunit ikiorneqarpugut, kukkussutittalu iliuusereq­qinnginnissaa ilungersuutigalugu sulissutigivarput. (Uss 28:13; Jaak 5:14-16; Joh 1. 1:9) Taamaattorli nallittor­neqareeraluarluta ilerasuuteqar­tuarneq akiugariuarsin­naavarput. Immaqa eqqarsarpugut: ‘Ajortuliakka pillugit Jehovap isumakkeerfigisin­naavaanga?’ (Kor 2. 2:7) Taamatut misigineq paasinarpoq, kukkussutigummi puioruminaatsis­sinnaavagut sivisuumillu ilerasuutigisin­naallugit. Kunngi Daavi ima allappoq: “Saanikka aserorsiman­ngitsor­taqanngillat ajortuliorsimanera pissutaalluni. … Sequmisitaavunga nukeerul­lungalu.” (Tuss 38:4, 9) Kukkussutigisimasatit pissutigalugit illit taamatut misigiguit Esajap allagai tuppallersaatigisin­naavatit.

8-9. Esaja 1:18 naapertorlugu Jehovap isumakkeerfigin­nittarnera qanoq annertutigaa?

⁸ Esaja 1:18 atuaruk. Jehovap qanoq isumakkeerfigin­nitsigisarluni assersuusiorluni nassuiarpaa. Oqarpoq ajortuliagut ‘aappallaris­sakkatut aappalutsigigaluarpataluunniit aputitut qaqortigilersis­sallugit’. Qalipaat aappallarissoq errorlugu qaqortik­kuminaal­luinnartuuvoq. Taamaattorli Jehovap qularun­naarsip­paatigut isumakkeerfigisimalluta ajortuliagullu inuunitta sinnerani eqqaaqqin­niarnagit.

⁹ Kunngi Daavi eqqarsaatigiuk. Allasiorlunilu toqutsigaluartoq Jehovap isumakkeerfigaa kingornatigullu peqqusersuitsuusumik taavaa. (Sam 2. 11:3, 4, 14, 15; 12:13; Kng 1. 9:4, 5) Jehovap Daavi eqqarsaatigigaangamiuk ajortuliai pinnagit aalajaannerali eqqarsaatigisarpaa. Taamatuttaaq allamik isumataaraangatta Jehovap asannilluni isumakkeerfigisarpaatigut minguitsumillu nalunngeqatigin­nissuteqarluta kiffartor­niassagatta ikiortarluta. Ilerasut­tuarutta Esajap allagai qanoq tuppallersaatigisin­naavagut?

10. Esaja 38:17-imi Jehovap qanoq neriorsorpaatigut?

¹⁰ Esaja 38:17 atuaruk. Oqaatsit ‘ajortuliakka tamarsuisa illit tununnut nallorsuullugit piiarpatit’ ima aamma nutserneqarsin­naapput: “Ajortuliakka tamaasa illit isinniit nigortippatit.” Uani ajortuliortup allamik isumataartup ajortuliai Jehovap tunuminut igikkai allaatigineqarpoq. Ajortuliat isigeqqin­nianngilai, imaluunniit eqqarsaatigeq­qinnianngilai. Qinerlerfissiaq naapertorlugu aamma ima isumaqarsinnaavoq: “[Ajortuliakka] pisiman­ngisaan­nartutut naatsorsuuppatit.”b Tassa ajortuliagut Jehovap isumakkeeraangamigit ajortuliarisimasatsitut naatsorsuunneq ajorpai. Jehovap isumakkeerfigigaangamitigut ajortuliarisimasagut unnerluun­niarluta pillaqqin­niarlutaluunniit qaqileq­qinnavianngilai. Ajortuliagut nunguterluin­nartarpai. Neriorsuivoq ajortuliagut eqqaaqqin­niarnagit. (Es 43:25) Tuppaller­nangaarami, ilaa? Eqqartuus­sisuunerpaap, Jehovap, ajortuliagut eqqaaqqin­ngisaan­nassammagit taava sooq uagut eqqaamallugit uteqqiaf­figissavagut?

11. Ingasattumik ajortuliorsimagaluartugut Jehovap suna isiginiar­nerusarpaa? (Aamma asseq takuuk).

¹¹ Ajortuliarisimasagut ilerasuutigiuarutsigit Jehovap asannilluni neriorsuinera eqqaamasariaqarparput. Isumakkeerfigin­nilluin­nartarpoq. Ajortuliarisimasagut pillugit kanngusuutigineq ajorpaatigut, inuillu naammal­luinnan­ngitsut assigalugit puttarsineq ajorpoq. (Es 57:16) Inuttut qanoq ittuusimanerput Jehovamut pingaaruteqanngilaq, maannakkulli inuttut qanoq ittuunerput siunissamilu qanoq ittuujumaarnerput pingaaruteqar­neruvoq. (Es 55:7) Guuti asannillunilu isumakkeerfigin­nikkumasoq kiffartuullugu ilaa nuanneq? Taamaattumik Jehovap asanningaarnera eqqaamatigu ajortuliarisimagullu maanna pilluar­nitsinnut naassaan­ngitsus­samullu pilluar­nissatsinnut akornutaateqinatigit.

ASASAMIK TOQUSOORAANGATTA

12. Asasamik toqusoorutta qanoq misigisin­naavugut?

¹² Asasatsinnik toqusooraangatta aliasungaarsin­naavugut sivisuumillu tamanna anniaatigalugu. Ilaannikkut immaqa eqqarsarsin­naavugut sooq asasatta toqunera Jehovap akuerineraa. Qatanngutip Michaelip angajoqqaani ikuallat­toornermi annaavai. Ima oqarpoq: “Uummatikkut sequtaavippunga, angajoqqaama toqunissaat akuerimmagu Jehova kaamaateqaara. Nalunngilara toqunerannut pisuunngitsoq, toqunerannulli pinngitsoor­titsinngilaq.” Immaqa aamma illit taamatut misigivutit. Taamatut aliasuuteqarnermi Jehovap qanoq tuppallersarlutalu neriuuteqar­tippaatigut?

13. Esaja 25:8-mi Jehovap qanoq neriorsorpaatigut?

¹³ Esaja 25:8 atuaruk. Jehova neriorsuivoq ‘toqu nungutin­neqassasoq piujunnaarsivillugu’. Takorlooruk toqusoqar­tarunnaartoq! Asasannik toqukkut annaasaqarlutit aliasun­ngisaan­nassaatit. (Es 35:10) Asasavit toqusimasup ilerrata ujarattaanik aliasullutit ujaasisarun­naassaatit. Paarlattuanik asasavit inuulluni peqqillunilu najortuarnissaa neriuutigaat. Neriorsuut tamanna piviusuuvoq, taamatummi neriorsuummik piviusun­ngortitsinnaasoq tassaavoq Jehova Guuti. – Saqq 21:4, 5.

14. Toqusunit makititaanissaq eqqarsaatigigaangakku qanoq misigisarpit? (Esaja 26:19) (Aamma asseq takuuk).

¹⁴ Esaja 26:19 atuaruk. Jehovap toqu piujunnaarsiviin­narnagu asasagut toqusimasut inuulerseq­qissavai. Taakku pillugit ima oqarpoq: “Timaat makissapput.” Tamanna aamma ima nutserneqarsinnaavoq: “Timit pigisakka makissapput.” Tassa imaappoq Jehovap taakku nammineq akisussaaf­figigai. Eqqaamavai. Nammineq piffissani eqqorluin­narlugu toqusunit makitissavai. Nunap panertup ullaaralaakkut isugutammit uummaaris­siteqqit­tarneqar­neratulli inuunerup pilerfiata, Jehovap, asasagut toqukkut annaasimasagut sinippaartut itertissavai. Inuunermut tikilluaq­qoqqinnissai nuannaarutaassaqaaq, ilaa? – Mak 5:42.

15. Aliasun­nitsinni makititaanissamik neriorsuut qanoq tuppallersaatigisarparput?

¹⁵ Guutip toqusunik makititsinissaa upperigaluarlutigu asasatsinnik toqusooraangatta aliasungaarsin­naavugut. Nalunngilarpulli Jehovap asasagut puigorsiman­ngikkai, tamannalu tuppallersaatigingaarsin­naavarput. Taamatut neriuuteqarneq Michaelimut, siusinnerusukkut eqqaasatsinnut, tuppallersaataasimavoq. Ima oqarpoq: “Esaja 26:19-imi allassimasut iluaqutigalugit paasivara Jehovap angajoqqaakka asagai. Eqqaamavai, eqqaamajuas­savaalu toqusunit makititsileruni piffissarititami nalliun­nissaata tungaanut. Tamannalu tuppallersaatigalugulu nukittoqutigaara.” Qanortoq aamma uagut asasatta toqusimasut ilageqqiler­nissaanut neriorsuut eqqarsaatigisartigu, taamaaliorutta aliasun­nitsinni tupallersaatigisin­naagatsigu.

16. Pisuni erloqinartuni allassimaffik suna illit tuppallersaatigaajuk?

¹⁶ Atukkagut allanngoriasaaraangata, ilerasup­pallaaraangatta aamma aliasuk­kaangatta Esajap allagaani versit ilaat tuppallersaatigisin­naasagut sammivagut. Qujamasuutigeqaarput Jehovap Oqaatsini iluaqutigalugu tuppallersar­tarmatigut! (Tuss 94:19) Illit erloqinartumik nalaataqaraangavit allassimaffik suna aalajangersimasoq tuppallersaatigisarpiuk? Puiunngin­niassagakku allassinnaavat, atuartar­niassagakkulu saqqumisumut ilisinnaavat. Ataatatta qilammiusup asannittup, Jehovap, oqaasiinit qanortoq tuppallersar­neqarit.