Ilinniagaqarnermut tunngatillugu silatusaartumik aalajangiigit

1-2. (a) Inuusuttut sumik aalajangiisariaqarpat? (b) Ilinniagaqarnermut suut ilaasin­naappat? (Takuuk “Nassuiaat”).

“INERSIMASUN­NGORUIT sunngorusuppit?” Inuusut­tuuguit ilimanarpoq taamatut aperineqar­tartutit. Piffissaq tamaat Jehovamut kiffartor­tunngoruit aalajangiil­luarnerpaassaatit. Aammali imminut pilersor­niarlutit aningaasarsior­tariaqarputit. (Tes 2. 3:10) Sutut sulissanerlutit eqqarsaatigisarunarpat.

² Inuusuttut ilarpassui – amerlanertigut angajoq­qaaminnit siunnersor­neqarlutik – aalajangerput meeqqat atuarfianni atuarun­naarunik ilinniagaqar­niarlutik.a Immaqa aamma illit tamanna eqqarsaatigivat. Taamaappat sumik ilinniassavit? Allaaserisami matumani sammissavagut Biibilimi najoqqutassiat ilinniagaqarnermut tunngatillugu silatusaartumik aalajangiinissannut iluaqutigisin­naasatit. Inuusuttut sammineqar­nerugaluartut kristumiut ilinniagaqarusuttut tamarmik allaaserisaq tamanna iluaqutigissavaat. Najoqqutassiat sammisassagut aamma angajoqqaat meeqqaminnik siunnersuinerminni iluaqutigissavaat.

ILINNIAGAQASSAVIT?

3. Sooq kristumiut ilaat ilinniagaqar­niarlutik aalajangerpat?

³ Nunat ilaanni inuit ilinniagaqaratik imminut pilersor­niarlutik aningaasarsiorsin­naapput. Nunani allani ilinniagaqarsimasut akissarsiarin­nerusarput imminullu pilersor­niarlutik akunnerpassuit sulisariaqarnatik. Taamaalilluni kristumiu Jehovamut kiffartornermi iliuuseqar­nerusin­naallunilu oqaluus­sinerusinnaavoq. Taamaattorli ilinniagaqarumallutik pilliuteqar­tariaqarput pingaarutilinnillu aalajangiisariaqarlutik.

4. Ilinniagaqarnermut tunngatillugu aalajangiineq kia akisussaaffigaa? (Takuuk quppernerup ataani ilanngussaq).

⁴ Biibilimi allassimavoq inuup ‘akisussaaffini nammineq nammassagaa’. (Gal 6:5, q.a.i.) Tassa kristumiu inersimasoq ilinniagaqas­sanerluni nammineq aalajanger­tariaqarpoq.b Angajoqqaat meeqqamik ilinniagaqar­nissaannut tunngatillugu aalajangiiniarneq akisussaaffigaat. (Ef 6:1) Taakkua siunnersuutaat iluaqutigalugu meeqqat inersimasun­ngorunik ilinniagaqarnermut tunngatillugu silatusaartumik aalajangiisin­naapput. – Uss 22:6.

5. Kristumiup ilinniagaqas­sanerluni qaqugukkut eqqarsaatigilissavaa, aamma sooq? (Aamma asseq takuuk).

⁵ Inuusuttut amerlanertigut suli meeqqat atuarfianni atuartuutillutik aalajanger­tariaqarput ilinniagaqas­sanerlutik. Inuusuttup aalajangiinissani sioqqutingaatsiarlugu tamanna pillugu angajoqqaani oqaloqatigigunigit soorunami silatusaar­nerussaaq. Taava periarfissanik misissuil­luarnissamut piffissaqarluassapput. Immaqa eqqumaf­figisin­naavaat fagit sorliit siunissami suliffimmi ilinniar­nermiluunniit inuusuttup iluaqutigisinnaagai. Inuusuttoq suli meeqqat atuarfianni atuartuutillugu aalajanger­tariaqarpat? Taamaat­tariaqan­ngillat. (Uss 21:5) Inuusuttut ilaat suniarnerlutik eqqarsaatiginerani aalajangersimapput suliffit­taarniarlutik pioneritullu kiffartuler­niarlutik. Tassa inuk qaquguk­kulluunniit ilinniagaqar­niarnerluni aalajangersinnaavoq.

6. Ilinniagaqarnermut tunngatillugu silatusaartumik aalajangiinissamut suut iluaqutigisin­naavagut?

⁶ Illit ilinniagaqarnermut tunngatillugu silatusaartumik aalajangiinissamut suut iluaqutigisin­naavigit? Pingaarnertut aalajangiil­luarnissannut Jehovamut ikioqqullutit qinugit. (Jaak 1:5) Aamma ima iliorsin­naavutit: Siullertut, sooq ilinniagaqarusun­nerlutit eqqarsaatigiuk. (Tuss 26:2) Aappaattut, ilinniagarerusutat misissoruk eqqarsaatigiullu ilinnut qanoq sunniuteqas­sanersoq. (Uss 14:15) Iliuuserisassat taakku marluk misissoriartigit.

SOOQ ILINNIAGAQARUSUN­NERLUTIT EQQARSAATIGIUK

7. Kristumiut ilinniagaqar­niarnerlutik aalajangiiniar­nerminni suna eqqarsaatigissavaat?

⁷ Ilinniagaqarusukkuit apeqqutip tamatuma eqqarsaatiginissaa pingaaruteqarpoq: ‘Sooq taanna ilinniagarerusuppara?’ Inuit amerlasuut nuannarisaminnik suliffeqarusukkamik imaluunniit aningaasarsiorluarusukkamik ilinniagaqarusuttarput. Pissutaasut taakku ajortuuppat? Taamaat­tariaqanngilaq. (Tim 1. 5:8) Kisianni Biibilimi allassimavoq aningaaserituujuneq aningaasallu kisiisa illersuutitut isiginerat navianartuusut. (Uss 23:4, 5; Tim 1. 6:8-10; Joh 1. 2:17) Pisuujunissaq ataqqisaanis­sarluunniit anguniagarigukkit pillualivis­sinnaan­ngilatit allaallu Jehovamit ungasil­lisinnaallutit.

8-9. (a) Ilinniagaqarneq kristumiunut qanoq pingaaruteqar­tigissava? (Matiusi 6:33) (b) Josefina, Morine aamma Iris qanoq ilinniarfigaagit?

⁸ Ilinniagaqarneq uagutsinnut qanoq pingaaruteqar­tigissava? Jehovamut kiffartornerput pingaar­nerpaavoq. (Mat 22:37, 38; Flp 3:8) Taamaattumik Jehova uummatit tamakkerlugu kiffartorfiginias­sagakku ilinniagaqarneq imminut pilersor­nissamut iluaqutissatut isigissavat. – Matiusi 6:33 atuaruk.

⁹ Inuusuttut ilaasa ilinniagaqarnermut eqqortumik isiginnit­taaseqar­nissamut suut iluaqutigaat? Josefina Chilemeersoq ima oqarpoq: “Jehovamut kiffartornermi piffissaqar­nerunissamut iluaqutaasumik suliffit­taarniassagama ilinniagaqarpunga. Anguniakkakka anersaakkut ittut pingaar­nerpaatippakka ilinniagaqar­nissara pingaar­nerpaatinnagu.” Qatanngut arnaq Morinemik atilik aalajangerpoq ukioq ataaseq nujalerisutut ilinniar­niarluni. Sooq? Ima oqarpoq: “Pisariaqar­titsiffiunerusumut nuukkusuppunga. Taamaattumik tamatuma angunissaanut iluaqutaasin­naasumik ilinniagaqarusuppunga. Ilinniagara naammas­sigakku ilikkakkakka iluaqutigalugit nujalerisutut sulilerpunga nuunnis­sannullu aningaasanik katersillunga. Kingusin­nerusukkut pisariaqar­titsiffiunerusumut nuukkama ilinniagaqarnera iluaqutigalugu tassani suliffit­taarsin­naalerpunga.” Iris kigutilerisutut sivisuumik ilinniartoq ima oqarpoq: “Ilinniagaqarneq iluaqutis­sartaqarpoq, pillualivis­sutaasin­naanngilarli. Jehova inuunitsinni salliuk­kutsigu taassuma pilluar­tissavaatigut pisariaqar­titatsinnillu tunissalluta.” Aap, Jehovamut ikinngutaanerput pingaar­nerpaatik­kutsigu ataavartumik pilluar­nissamik kinguneqartumik aalajangiisin­naassaagut.

ILINNIAGAQ ILINNUT QANOQ SUNNIUTEQAS­SANERSOQ EQQARSAATIGIUK

10. Ilinniagaqarnermut tunngatillugu aalajangiinermi najoqqutassiaq Mosesimik allakkat tallimaat 32:29-mi allaqqasoq qanoq maleruarsin­naavarput?

¹⁰ Imaassinnaavoq aalajangersimasumik ilinniagaqarusuttutit. Aammali iluaqutaassaaq allanik periarfis­saqarnersoq – tassa ilinniarusutannut assingusumik imaluunniit allaanerul­luinnartumik ilinniarsin­naanerlutit – eqqarsaatigigukku. (Uss 18:17) Nalitsinni ilinniarnermut tunngatillugu periarfis­sarpassuaqarpoq. Assersuutigalugu internetikkut ilinniar­toqarsinnaavoq. Aamma eqqarsaatigisinnaavat ilinniagaqan­ngikkaluarlutit imminut pilersorsin­naanerlutit. Assersuutigalugu Johanna Finlandimiu ilinniagaqarsiman­ngitsoq ima oqarpoq: “Meeqqat atuarfiat naammas­sigakku ullup ilaannaa sulisalerlungalu pioneritut kiffartulerpunga. Assigiin­ngitsunik suliffeqar­tarpunga, misigivungalu Jehovap pisariaqar­titannik isumassor­tuaannaraanga.” Eqqaamajulli qanorluunniit aalajangeraluaruit aalajangiinerit tamarmik ilaatigut nuannarisannik nuannarin­ngisannil­luunniit kinguneqarsinnaasut. Taamaattumik aalajangiiniarninni una eqqarsaatigiuk: ‘Sorleq kinguneqarluar­nerpaassava?’ (Mosesimik 5. 32:29 atuaruk; Kor 1. 10:23) Eqqarsaatigisassatit tamatumunnga tunngasut sammeriartigit.

11. Sooq eqqarsaatigis­savarput ilinniagaq qanoq piffissar­tornartiginersoq? (Aamma assit takukkit).

¹¹ Qanoq piffissar­tornartigiva? Sapaatip-akunneranut qanoq sivisutigisumik ilinniarfin­niittassavit, praktiker­tassavit ilinniak­kerisarlutil­luunniit? Anersaakkut sammisaqar­tarnissat illulerinermilu suleqataanissat piffissaqarfigis­savigit? (Flp 1:10) Ilinniarnerit pissutigalugu qasuallaaruit ataatsimiinnernut piareersarnissaq namminerlu Biibilimik misissuinissaq nukissaqarfigis­sanngiligit? Jeroz Indiameersoq qanoq misigisoq maluginiaruk. Ima oqarpoq: “Anersaakkut sammisassat aallunnissaat ajornakusoor­tippara. Ilaannikkut ataatsimiin­ngitsoor­tarpunga. Kingumut qiviarlunga paasivara ilinniagara piffissar­tornarpal­laarlunilu ilungersunarpal­laartoq.” Ilinniakkat allat piffissar­tornarpal­laanngillat. Ilaat ullup ilaannaanik sivisus­suseqarput ilinniak­keriner­taqarpal­laarnatillu. Assersuutigalugu Rabecap Mozambiquemeersup ilinniak­kamisut toqqakkani nuannaarutigivaa. Ima oqarpoq: “Ullormut akunnerit marluinnaat ilinniartarama pioneriusin­naavunga.”

12. Ilinniagaqarnermut tunngatillugu piffissap pitsaanerpaamik atornissaa qanoq qulakkeersin­naavarput? (Oqaluus­sisartup oqaasii 12:1)

¹² Qanoq sivisutigisumik ilinniassavit? Qaammatini ukiuniluunniit qassini ilinnias­sanerlutit eqqarsaatigiuk. Ilinniarusutannik ilinniaruit piffissat pitsaanerpaamik atussaviuk? (Ef 5:15-17) Taama ilinniagaqaruit suli inuusut­tuutillutit Jehova pitsaanerpaamik kiffartorfigisin­naassaviuk, immaqa piffissaq tamaat kiffartorlutit? (Oqaluus­sisartup oqaasii 12:1 atuaruk). Ilinniarusutannut assingusumik sivikin­nerusumik ilinniagaqarsinnaavit? Assersuutigalugu nunat ilaanni ilinniarnerit ilaat universitetimi ilinniarnermit sivikin­nerullutillu akikinnerupput. Mario Chilemeersoq ima oqarpoq: “Aalajangerpunga ukiuni marlunni ilinniar­niarlunga. Ilinniagaralu universitetimi ilinniarnermit akikinneruvoq. Sapaatip-akunneranut ulluni sisamaannarni ilinniartarama pioneriusin­naavunga.”

13. Ilinniar­tuutilluta sumi najugaqar­nerluta sooq eqqumaf­figissavarput?

¹³ Ilinniar­tuutillutit sumi najugaqassavit? Immaqa angerlarsimaf­figisannut qanittumi ilinniarfis­sarsisin­naavutit. Taavami illoqarfimmi allami ilinniarusukkuit? Imaluunniit ilinniarfimmi najugaqar­tariaqaruit? Eqqumaf­figissavat ilaquttatit qimallugit nuuttariaqaruit anersaakkut ulorianar­torsiulersin­naagavit, ingammik uppeqatigin­ngisannik najugaqateqar­tariaqaruit. (Uss 22:3; Kor 1. 15:33) Matias Mozambiquemeersoq ukiumi ataatsimi ilinniartuuvoq. Taamaaliorninili peqqissimis­sutigaa. Sooq? Ima oqarpoq: “Ilinniarfigisanni ukioq naallugu najugaqar­tariaqarpunga. Ullut tamaasa eqqunngitsulior­nissamut usserneqar­tarpunga. Siunnersuutigaara ilaquttat qimannagit ilinniar­toqarnissaa.” Qatanngut arnaq Ruslandimeersoq ima oqarpoq: “Ilinniarfigisanni kollegiamiluunniit najugaqarnanga angajoqqaakka najugaqatigiin­narakkit navianar­torsior­nangalu ussernar­torsiun­ngilanga.” Immaqa allaat angerlarsimaf­finniit internetikkut ilinniarsin­naavutit.

14. Lukkarsi 14:28-mi najoqqutassiaq ilinniagaqarnermut tunngatillugu qanoq iluaqutigisin­naaviuk?

¹⁴ Qanoq akeqassava? Nunat ilaanni ilinniakkat ilaat akisunngillat, imaluunniit pisortanit akilerneqartarput. Taamaappat sulinermut piginnaaneqalerumalluni aningaasarpassuit atornagit ilinniar­toqarsinnaavoq. Nunarpas­suarnili ilinniarnerit akisupput. Immaqa ilinniar­nissamut piukkun­narsarumalluni angerlarsimaffimmi ilinniar­titsisoqarnissaa akilerneqar­tariaqartarpoq. Ilinniartut ilaat ukiorpassuarni akiitsoqartarput. Adilsonip Mozambiquemeersup ilinniagaqarfiginiarlugu toqqakkani peqqissimis­sutigaa. Ima oqarpoq: “Ukiuni sisamani ilinniarpunga. Ilinniagara akilersor­niarlugu ilaquttakkalu inuussutissat pisariaqar­titagullu tunngaviusut allat amigaatigisarpagut.” Sumik ilinniagaqas­sanerlutit eqqarsaatigitillugu imminut ima aperigit: ‘Qanoq akisutigissava? Ilaqutariittut akissaqar­tipparput? Akikinnerusumik ilinniagaqarsin­naavunga?’ (Lukkarsi 14:28 atuaruk). ‘Akiitsoqalissaguma qanoq sivisutigisumik akilersuissaanga? Sulisaleruma imminut pilersuutigalunga akiitsukka akilersorsin­naassavakka?’ – Uss 22:7.

15. Sunngor­niarninnik aalajangiiniarninni suna aamma eqqarsaatigissaviuk?

¹⁵ Suliffit­taarnissamut sunik periarfis­saqarpa? Illit illoqarfigisanni nuuffigerusutan­niluunniit sunik sulisus­sarsior­toqarnersoq eqqarsaatigiuk. Ilinniarusutannik ilinniagaqaruit suliffit­taarsinnaavit? Ilinniarnerit ilaanni ilinniartut isumaliutersuutinut filosofiimullu tunngasunik ilinniar­tinneqar­taramik sulinissamut piginnaanerit pillugit pikkoris­sarneqarpiar­tanngillat. (Kol 2:8) Qatanngut arnaq Indiameersoq ima oqarpoq: “Piginnaanerit sulisitsisut piumasaqaataat ilinniakkanni ilikkarsiman­ngilakka. Taamaattumik ilinniagara suliffit­taarnissamut iluaqutigisiman­ngilara.” Ilinniarnerni allani piginnaaneq aalajangersimasoq ilikkar­neqarsin­naagaluartoq atorfis­saqartin­neqarpiar­tanngilaq. Assersuutigalugu Sublime Afrikami Qiterlermi Kunngiitsuuf­fimmeersoq silaannaris­saatinik iluarsaasutut ilinniarpoq. Oqarporli: “Amerlanerit taamaattunik nammineq iluarsaasarmata ilinniagara naammattumik akissarsiutigisin­naanngilara.”

16. Sooq ilinniarusutat naammas­sigukku qanoq ittumik suliassaqas­sanerlutit eqqarsaatigissaviuk?

¹⁶ Ilinniarusutannik ilinniagaqaruit qanoq ittumik suliassaqas­sanerlutit eqqarsaatigiuk. Suliassatit nuannaris­savigit? (Oqal 3:12, 13) Suliffik suleqatissallu qanormita issappat? Suliffik soqutigisat ulorianartutut ilisimaneqarpa? Tassanilu sulisut unammil­leqqajaasutut uippakajaar­titsisar­tutullu ilisimaneqarpat? Suliffiit taamaattut qanoq akissarsiaqar­titsisarpat? Imminut pilersor­niarlutit naammattumik akissarsiaqassavit? Suliffigiin­narumallugu pikkoris­saqattaar­tariaqassavit? Pingaar­nertullu, Jehovamut kiffartornerit salliut­tuarsin­naaviuk? (Oqal 12:13) Soorunami suliffigisin­naasatit amerlaval­laanngippata suliffit­taarniarninni narrutusin­naanngilatit. Ilinniar­nermulli tunngatillugu aalajangiinerit suliffit­taarniarninnut sunniuteqarluarsinnaavoq. Assersuutigalugu Tabithap Indiameersup qaammatini arfinilinni mersorneq ilinniarpaa. Ima oqarpoq: “Eqqarsarpunga mersortartutut suliguma pioneritut kiffartorsin­naallunga. Mersortartut suliassaqar­tuaannarput, nammineq aalajangersin­naavunga ullup qanoq ilinerani sulissanerlunga, mersortartullu atortui akisual­laanngillat.” Tabitha taamatut ilinniagaqarami imminut pilersorsin­naallunilu pioneritut kiffartorsinnaavoq.

17. (a) Kristumiu ilinniagaqarnermut tunngatillugu aalajangiil­luarnissamut iluaqutigisin­naasaminik qanoq paasissutis­sarsisinnaava? (b) Biibilimi najoqqutassiat suut aalajangiil­luarnissamut iluaqutigisin­naavigit? (Takuuk ungalusaq “Biibilimi najoqqutassiat aalajangiil­luarnissannut iluaqutigisin­naasatit”).

¹⁷ Ilinniagaqarnermut tunngatillugu eqqarsaatigisassat pingaarutillit sammereerpagut. Paasissutissat aalajangiil­luarnissamut iluaqutigisin­naasatit qanoq nanisin­naavigit? Ilinniarfigerusutat ornillugu nittartagaaluunniit alakkarlugu paasissutis­sarsisin­naavutit. Suliffit­taarerusutannut tunngatillugu sulisus­sarsiortut qanoq amerlatigisut misissoruk. Soqutigisannik ilinniagaqartut taamatul­luunniit sulisut oqaloqatigisin­naavatit. (Uss 13:10) Aperikkit: “Ilinniakkamut suliassamullu tunngatillugu qanoq nuannersor­taqarpa nuanniitsor­taqarpalu?” Aamma tamatumunnga tunngatillugu Jehovamut kiffartortunut siunnersoq­qusinnaavutit. (Uss 15:22) Suna siunnersuutigissavaat? Imaassinnaavoq suliassaq eqqarsaatigisimanngisat eqqaagaat.

18. Suna eqqaamas­savarput?

¹⁸ Sammeriik­katsitut ilinniagaqarneq nuannersor­taqarpoq nuanniitsor­taqarlunilu. Taamaattumik periarfissatit pillugit Jehovamut qinugit eqqarsaatigeq­qissaarlugillu. Imaassinnaavoq ilinniagaqaruit imminut pilersor­niarlutit naammattunik aningaasarsiorsin­naasutit, eqqaamajulli pillualivissaguit Jehova qanimut ikinngutigisariaqarit. (Tuss 16:9, 11) Jehovap innuttani ilinniagaqartut ilinniagaqan­ngitsullu isumassor­tuaannassavai. (Hebr 13:5) Taavami ilinniagaqar­niarlutit aalajangeruit? Ilinniar­tuutillutit Jehovamut qanimut attaveqarluar­tuarumallutit susinnaavit? Tamanna allaaserisami tulliuttumi sammissavarput.