Jehovap neriorsuutini eqqortit­tuaannarpai

1. Sooq Jehova tatigisin­naavarput? (Tussiaat 31:3-6)

SAATANIP silarsuaani ajortumi salluneq, salloqittaaneq peqquserlunnerlu nalingin­naapput. Kikkut tatigisin­naanerlugit nalunarsinnaavoq. Niuertut unammil­lertitik uukapaatit­tarpaat. Ussassaarisartut pisiassaq pillugu atuisutik salloqit­tartarpaat. Ilaasalu paasisimavaat ikinngutinnaamik neriorsuutaat naatsorsuutigisin­naanagit. Jehovali tatigil­luinnarsin­naavarput! ‘Guutiuvoq unneqqarissoq.’ (Tussiaat 31:3-6 atuakkit). Salluneq ajorpoq. Tamatigut ilumoortumik oqaluttarmat iliuusii oqaasiilu tamaasa upperil­luinnarsin­naavagut.

2. Allaaserisami matumani suut sammissavagut?

² Allaaserisami matumani sammeqqaas­savarput sooq Jehova tatigil­luinnarsin­naagipput. Aamma sammissavarput Jehovap Saatani silarsuaalu ajortoq qanoq suujunnaarsissagai kiisalu neriorsuutini eqqortin­niarlugit ullumikkut qanoq iliortoq. Qularnan­ngitsumik sammisassagut Jehova pillugu ilumoortut oqaluus­sissutiginis­saannut kajumin­nerulis­sutigis­savagut.

SOOQ JEHOVA TATIGIL­LUINNARSIN­NAAGIPPUT

3. Sooq Jehova tatigil­luinnarsin­naavarput?

³ Jehova Pinngor­titsisuummat tatigisin­naavarput. Qilammik, nunarsuarmik uumassusilinnillu tamanik Pinngor­titsisuuvoq. (Mos 1. 1:1; Tuss 36:10; Saqq 4:11) Aamma inuuinnar­niassagatta suna tamaat isumagaa. Assersuutigalugu silaannaq najuussorsin­naavarput imermillu imersin­naavugut. Suut tamaasa aqulluinnarpai aquttuaan­nassallugillu. Jehova Pinngor­titsiserput sunik tamanik ilisimas­suseqarlunilu killeqan­ngitsumik pissaaneqarmat inuunitsinni siulersor­tigisin­naavarput qularutiginagulu nuannerluin­nartumik siunissaqar­tikkaatigut.

4. Qanoq nalunngilarput Jehovap asagaatigut?

⁴ Jehova uagutsinnik asannit­tuummat tatigisin­naavarput. Jehovap inuit pinngortippai kissaatigigamiuk inuuneq nuannaarutigissagaat. Siunertani ima oqaatigaa: “Inunnik pinngor­titsisa immitsinnik assililluta uatsitut ittussanik!” (Mos 1. 1:26) Kiffaan­ngissuseqar­tilluta nammineq aalajangiisin­naatippaatigut. Nunarsuaq kusanarluinnartoq angerlarsimaf­fissarput pinngortippaa. (Tuss 115:16) Inuit siulliit nuannersumik suliassin­neqarput, tassa nunarsuaq paratiisin­ngortik­kiartuaassagaat. (Mos 1. 1:28; 2:15) Nunarsuarmi nerisassanik, naasunik uumasunillu assigiin­ngitsorpas­suarnik pilersitsivoq. Tamatuma ersersippaa Jehovap inuit naassaan­ngilluin­nartumik ilumoorluni asagai. – Tuss 103:17.

5. (a) Adami Evalu pikitsitsimmata Jehova sua? (b) Jehovap neriorsuutai suut eqquussimappat? (Ungalusaq “Guuti ilumoortumik oqaluttuaannartoq” takuuk).

⁵ Jehova neriorsuinermisut iliortuaannarmat tatigisin­naavarput. Jehovap nunarsuaq “soqanngitsus­sanngorlugu pinngor­tinngilaa, kisianni najugaqarfis­sanngor­tillugu”. (Es 45:18, 19) Adami Evalu pikitsitsigamik toqumik pillaatis­sinneqar­tariaqarput. Guutip siunertaa maangaan­narpasippoq. Jehovali neriorsuutiminik tamanik eqquutitsiuaannarpoq. (Es 46:10, 11) Angutinik arnanillu naapertuil­luartunik nunarsuup ulikkaar­nissaanik siunertaa allanngunngilaq. Taamaat­tuminguna Adamip Evallu meerartaar­nissaat akuerigaa. Adamip kinguaavi annaanniarlugit naassaan­ngitsumillu neriuuteqar­tinniarlugit ernituani utertitsis­sutissatut aallartippaa. – Joh 3:16.

JEHOVAP SIUNERTANI PIVIUSUN­NGORTIN­NIARLUGU ILIUUSERISIMASAI

6. Edenimi pikitsitsisoqareersoq Jehovap suna siulittuutigaa?

⁶ Guutimik pikitsitsinissamut Adamimik Evamillu ussiisoq tassaavoq “itsaq pulateriaarsuk Diaavulumik Saatanimillu taaneqartoq”.a (Saqq 12:9; Mos 1. 3:4, 5; Joh 8:44) Jehovap taanna siunissami piuneerus­saasussan­ngorlugu eqqartuuppaa. (Mos 1. 3:15) Tamannali pitinnagu inuppassuit Saatanimut ililiutissapput ajortumillu iliuuseqar­tarlutik. Allalli Jehovamut ilumoorfigin­nikkumaarput.

7. Kikkut Diaavulu malippaat, taakkulu qanoq pineqassappat?

⁷ Saatanimik Diaavulumik malinnittut tassaapput inngilit inuillu Jehovamut akerlilersuisut. Taakku Guutip siunertaa akiorlugulu akerlilersoramikku Saatanimut ililiupput. Guutilli piffissarititaa nalliuppat Saatani taassumalu ilii piuneerus­saassapput. – Dan 2:44; Rom 16:20.

8. 1914-imi Jiisusi sua? (Aamma assit takukkit).

⁸ Jehovap neriorsuineratut Saatani taassumunngalu ililius­simasut piuneerus­saanissaat sooq qularutigin­ngissin­naavarput? 1914-imi Saatani Diaavulu inngilipiluilu Jiisusip saassuppai nunarsuarmullu igillugit. (Saqq 12:7-9) Sorsunneq tamanna qilammi pigaluartoq nunarsuarmiittunut aamma sunniuteqarpoq. Biibilimi ima allassimavoq: “Ilissili nunarsuaq imarlu, Diaavulup piffissakinnini nalunagu kamaqaluni aqqarfigimmasi naakkinaqaasi.” (Saqq 12:12) 1914-imiilli Saatanip nunarsuarmi pisartut akuleruf­figilluinnarpai, kingunerisaanillu pissutsit ajorsigalut­tuinnarput. Ilumut nunarsuarmiittut ‘naakkinaannaqaat’! Ungasin­ngitsukkulli Jiisusi ‘ajugaal­luinnarumaarpoq’, Saatanilu taassuminngalu tapersersuisut piuneerus­saassapput. (Saqq 6:2) Jehovap aqqa Jiisusip illernarsisil­luinnassavaa. (Tuss 45:5-7) Inuit tamarmik paasissavaat Jehova Guutiusoq ilumoortumik oqaluttuaannartoq! – Ez 38:23.

Sorsunnersuaq siulleq: U.S. National Archives photo; qaartartoq: USAF photo; nappaalanersuaq: blvdone/stock.adobe.com; pikitsitsisut: inhauscreative/E+ via Getty Images

JEHOVAP ILUMOORTUMIK NUANNARINNITTUT IMMINUT QAAQQUAI

9. Kikkut Jehovap nalitsinni katersorpai?

⁹ Nalitsinni Jehovap ‘qilammi nunarsuarmilu suut tamaasa Kristusimi katersorpai’. (Ef 1:10) ‘Qilammiittut’ tassaapput Jehovap toqqagai tanitat Kristusip qilammi naalakkersueqatai. ‘Nunarsuarmiittut’ tassaapput inuit paratiisimi nunami naassaan­ngitsumik inuusussat. Jehovamut kiffartortut taakku tamarmik Saatanip salluliuutaanik qulaarisuupput, inunnillu ilumoortoq pillugu ilinniar­titseqataapput.

10. Jehovap inuit ilumoortoq pillugu paasisaqar­nissaannut qanoq ikiorpai? (Saqqummersitat 14:6, 7)

¹⁰ Jehovap inuit ilumoortumik nuannarinnittut naniumallugit kiffani nunarsuaq tamakkerlugu oqaluus­seqquai. Oqaluttuarisaanermilu aatsaat taama annertutigisumik oqaluus­sisoqarpoq. (Saqqummersitat 14:6, 7 atuakkit). Inuit nutaarsiassanik nuannersunik oqaluus­sisaraluartut aamma inngilit inunnik eqqortuliorusuttunik Jehovap ilagiis­sortaanut katersueqataapput. Oqaluussineq tamanna aqqutigalugu upperisarsiornerit eqqunngitsut tamarmik, Babylon­nersuarmik taaneqartut, Diaavulup ukiorpassuarni Jehova pillugu sallulior­nerminut atortagai qulaarneqartarput. (Saqq 18:2, 4) Ungasin­ngitsukkut upperisarsiornerit eqqunngitsut suujunnaarsin­neqassapput, Guutimillu ilumoortumik asannittut tamarmik taanna pisassarititaatut naalannarsisissavaat. – Saqq 17:16.

11. Qanoq paasisin­naavarput Jehovap kiffai ilumoortut kikkuunersut?

¹¹ Jehovap inuit assigiin­ngitsorpas­suarnik tunuliaqutallit nunarsuaq tamakkerlugu ilagiiminut aggiatippai. (Saqq 7:9, 10) “Nutaarsiassat nuannersut” tusaramikkit paasivaat ilumoortut ilinnialerlugit Jehovallu innuttaanut ilannguk­kusulerlutik. (Mak 13:10) Nalitsinni ersarippoq kikkut Jehovap iluarisaatut guutisiortut. Pruffiiti Malaki ima siulittuivoq: “Taava kingumut immikkoor­tissinnaan­ngussavarsi iluartoq iluanngitsumit, tassa Guutimik kiffartuussisoq kiffartuus­sisuunngitsumit.” (Mal 3:18) Pissusilersor­nermikkut oqaluus­sinermikkullu ersersippaat Guuti ilumoortoq guutisiorfigalugu.

12. Oqaluussineq aqqutigalugu Jehovap siunertaa qanoq ilaatigut naammas­sineqarpa?

¹² ‘Kunngeqarfik pillugu nutaarsiassat nuannersut’ oqaluus­sissutiginerisigut Jiisusip peqqussutaa naalapparput, taamaalior­nitsigullu siulittuummik eqquutitseqataalluta. (Mat 24:14; 28:18-20) Suliap kingunerisaanik inuit nunarsuaq tamakkerlugu Kristusimut ilinniar­titanngortarput Jehovamullu naassaan­ngitsussamut kiffartor­nissartik periarfis­saralugu. Jehovap siunertaanik naammas­sinneqataasin­naanerput uagutsinnut immikkut ataqqinaatitaavoq!

JEHOVA NERIORSUUTIMINIK EQQORTITSISOQ TATIGIUK

13. Saatanip kikkut ingammik malersugarai, aamma sooq?

¹³ Saatani Diaavulu kamattorujussuuvoq nalunnginnamiuk ‘piffissakilluni’. (Saqq 12:12, 13) Kristumiut tanitat Guutip kunngeqarfiani naalakkersueqataasussat, tassa “Guutip inassutaanik maleruaasut Jiisusilu pillugu ilisiman­nittutut nassuiaanissamik suliassaqartut”, ingammik malersugarai. (Saqq 12:17; 14:12) Taakkuninnga taakkualu suliaannik tapersersuisut aamma Saatanimit malersor­neqartarput.

14. Jehovap kiffai Saatanip saassuppagit susoqassava? (Aamma asseq takuuk).

¹⁴ Babylon­nersuup piuneerus­saanerata kingorna Saatanimut ililius­simasut Jehovap kiffaanik saassus­seriaraluassapput. Saassus­sinerli tamanna sorsunnermik Harmagedonnimik kinguneqassaaq. (Saqq 16:13, 14, 16) Jiisusip qilammilu sakkutoorpassuit Jehovap kiffai annaatissavaat Diaavulullu silarsuaata sinnikui piuneerul­luinnassavaat. (Saqq 19:19-21) Sallutuut, inuit ajortut peqquserluttullu tamaavimmik piuneerun­neqassapput. (Saqq 21:8) Guuti ilumoortoq naapertuil­luartorlu qutsissisin­neqassaaq.

15. Sooq upperil­luinnarsin­naavarput Jehovap neriorsuutai siunissami eqquukkumaartut? (Esaja 65:16, 17) (Aamma asseq takuuk).

¹⁵ Nunarsuarmi aatsaat taama avissaar­tuuffiusoqartigaaq. Jehovalli ikiuineratigut kiffai ataasius­suseqarput. Ilumoortumik nuannarinnittut ilaqutariis­sortaminut katersor­tinniarlugit Jehova massakkut iliuuseqarpoq. Jehovap kiffani taakkualu suliaat pillugit iliuusii kialluunniit akornusersin­naanngilai. (Esaja 65:16, 17 atuakkit). Siunissamut neriorsuutit eqquukkumaar­nissaat upperil­luinnarsin­naavarput. Apustilip Paulusip Romamiut 8:38, 39-mi allatai uppernikkut nakussatsis­sutigaagut, ima allassimammat: “Toqup, inuunerup, inngilit, naalakkersuisut, maanna pisut, pisussat, pissaanerit, qutsissut, atsissut pinngor­titalluunniit allat Guutip asannin­neranit, Kristusi Jiisusi Naalagarput aqqutigalugu ersersin­neqartumit, avissaar­tissinnaan­ngikkaatigut.”

16. Sooq uummatit tamakkerlugu Jehova tatigil­luinnarpiuk?

¹⁶ Pissutis­saqarluarluta Jehova, Guuti ilumoortoq, tatigil­luinnarparput. Pinngor­titsisorivarput. Qamannga pisumik asavaatigut. Inupparpassuit inuiannit assigiin­ngitsuneersut Jehovamik guutisiorusuttut amerliartorput. (Es 60:22; Zak 8:23) Nalunngilarput Jehovap siunertani eqquutitit­tuaannarai aamma ungasin­ngitsukkut Saatani suujunnaarsissagaa nunarsuaq taassuma salluliuutaanit aniguisil­luinnarlugu. Daavitut ima qinorusuppugut: “Unnersiutigineqarli Guuti Naalagaq … kisimi tupinnar­tuliortartoq. Unnersiutigineqarli aqqa naalannartoq naassaan­ngitsumik! Naalannas­susiata nunarsuaq tamakkissavaa.” – Tuss 72:18, 19.