Jehovap inuusun­ninniit ilinniar­tippaanga

Ingerlaq­qitsinnangali pisut aallaqqaataaniit oqaluttuarilaarlakka. Calgarymi Canadamiittumi sorsunnersuup kingulliup nalaani inunngorpunga. 1940-kkut naalerneranni pioneri inuusuttoq Donald Fraser matutsigut kasuttorpoq, Biibilimillu misissuinissamik neqeroorutaa anaanama akueraa. Anaanama Biibilimik misissuinini nuannareqaa, peqqiil­liorninili pissutigalugu ataatsimiinnernut peqataarpiar­tanngilaq. Taamaak­kaluartoq 1950-imi imermut morsutsitaavoq. Alianaqisumilli ukiut marlungajaat qaangiuttut toqukkut qimaguppoq. Ataataga taamanikkut Nalunaajaasuunngilaq, kisianni qatanngutip ilisinermi oqalugiarnissaa akueraa.

Anaanama ilisaaneraniit ullualuit qaangiummata qatanngutip arnap tanitap utoqqaap Alicemik atillip ilagiit ataatsimiin­nerannut qaaqquaanga. Anaanaga uumagallarmat pisinnaatilluni ataatsimiigiaraangat ilagisarakku nalunngilaanga. Ataataga aperaara ataatsimiigiarsin­naanerlunga. Angerpoq, qatanngullu anaanama ilisaanerani oqalugiarsimasoq qutsavigerusukkamiuk aalajangerpoq “ataasiaan­narluni” ataatsimiigiaqataaniarluni. Unnuk taanna Teokratiimik Ilinniarfimmi oqaluus­sinermullu tunngasunik ataatsimiinnermi saqqummiun­neqartut ataatama nuannareqai. Ataatagami oqalugiartarneq pillugu pikkoris­sarnikuuvoq, ataatsimiin­nermilu oqalugiaatit pitsaasut nuannareqai. Aalajangerpoq sapaatit-akunneri tamaasa ataatsimeeqataasar­niarluni. Piffissap ingerlanerani ilagiit ataatsimiin­nerinut tamanut peqataasalerpoq.

Taamanikkut ataatsimiinnermik nakkutilliisup ataatsimiinnerit aallarnerlugit qatanngutit Teokratiimik Ilinniarfimmut ilanngus­simasut atii taagortarpai, qatanngutillu atitik taaneqaraangata oqartarput “maaniippunga”. Unnuit ilaanni aperivunga uangattaaq atera ilagiit ataatsimiin­neranni tulliuttumi taaneqarsin­naanersoq. Ataatsimiinnermik nakkutilliisup nersualaarpaanga, tamatumali qanoq isumaqar­neranik paasinnin­nersunga aperinngilaanga.

Nalulluin­narpara Teokratiimik Ilinniarfimmi oqalugiar­talernissannut akuersillunga – atimami taaneqarnissaa kissaatigiin­narpara! Sapaatip-akunnerani tulliuttumi atera taaneqarmat tulluusimaaqalunga akivunga “maaniippunga”. Ataatsimeereeratta qatanngutinit nersualaar­tivissorpunga. Sapaatit-akunneri arlallit qaangiummata oqalugiar­nissannut allagartaq, allaaserisap matuma aallaqqaataani eqqaasara, tiguara.

Annilaaqaanga! Taamanikkut ilinniartut sivikin­nerpaamik minutsini arfinilinni sivisunerpaamillu arfineq-pingasuni oqalugiartarput. Ullumik­kutulli Biibilimik atuffas­siinnarneq ajorput. Oqalugiaatissama piareersarnerani ataatama ikiorpaanga 20-riarlugulu sungiusar­tillunga. Oqalugiareerama nakkutil­liisumit siunnersor­tippunga iluaqutigeqisannik. Ukiut ingerlanerini Jehovap ataataga, qatanngutit pikkorissut peqatigiis­sortanilu aqqutigalugit ilinniar­tippaanga.

ILINNIAR­TINNEQAR­TUARPUNGA

Oqaluus­sisalerama Alicep, siusinnerusukkut eqqaasama, ilinniar­tippaanga. Taamanikkut kajumis­saarneqar­tarpugut oqaluus­siffigisarput allassimaffinnik pingasunik atuffat­tassagipput atuakkamillu neqeroorfigalugu. Kasuttorfigisatsinnik oqaloqateqar­nissamut tullinnguuk­kaangama Alicep ilisariteriarluta aallarneeriarlunilu aperisarpaanga allassimaffik siulleq atuarsin­naaneriga. Atuareeraangamalu oqaloqatigiinneq nangittarpara allassimaffiillu aappaat pingajuallu atuariarlugit atuagassiamik neqeroor­tarlunga. Kingusin­nerusukkut uanga nammineq aallarniinissara ilikkarpara. Ataatama 1954 naalersoq imermut morsutsitaanermi kingorna oqaluus­sinissannut ilinniar­tittalerpaanga. Kisimi perorsaasutut Jehovamik asannin­nissamik sapinngisaminik ilinniar­tippaanga. Anersaakkut sammisassat pingaar­tittorujussuuai. Ataatsimiinnerni peqataajuaan­nartussaalluta sapaatillu-akunnerisa naanerini oqaluus­sisartus­saalluta naluneq ajorpara.

Meeqqat atuarfianni atuarnera allatulli ippoq, ukiunili aqqaneq-marlunni atuarninni ilikkagarpas­suaqarpunga kingusin­nerusukkut iluaqutigeqisannik. Assersuutigalugu kisitsineq tuluttullu oqaasilerineq imaallaat ilikkarluarpakka. Tuluttut oqaluttualior­nermillu ilinniar­titaasarsimanikka maanna Aaqqissuisoqarfimmi sulininni iluaqutigeqaakka.

Nipilersornermik nuannarisaqarnera pillugu aperineqak­kajuppunga. Angajoqqaakka nipilersornermik nuannarisaqaqaat. Arfineq-marlunnik ukioqarlunga pattannissaq sivikitsumik ilinnialeraluarpara, ilinniar­titsisumali pikkoripal­laarsorin­nginnaminga ataataga siunnersorpaa ilinniar­tarunnaas­sasunga. Taama isumaqarnera paasisin­naavara, taamanikkummi ilinniarusus­suseqarpal­laanngilanga.

Qaammatialuit qaangiummata ataatama ilinniar­titsisussannik allamik nassaas­suppaanga. Taamaalillunga pattannermik erinarsor­nermillu ilinniar­titaavunga iluatsil­luartumik. Meeraallunga erinagis­suuvunga erinarsul­laqqinneq­qusaannernilu arlalinni ajugaasarlunga. Nipilersornermik ilinniarninnut siunertaraara piffissaq tamaat kiffartorninni nipilersornermik ilinniar­titsisutut imminut pilersorsin­naanissara. Ilinniarnerali sivitsoriar­tortillugu paasilerpara piffissarujussuaq nipilersornermik ilinniar­nissamut misilitsin­nernullu piareersaanermut atortar­tussaallugu. Taamaattumik taamatut anguniagaqarun­naarlunga 1963-imi pionerin­ngorpunga.

PIONERIUNERUP PILLUARNARTUI

Ukioq ataaseq pionerioreerlunga Kapuskasingimut Ontariomiittumut specialpioneritut aallartitaavunga. Kiffartoqatiga Daniel Skinner uanniit marloriaammik angajulliuvoq. Taassuma ilagiit aaqqissuus­saanerat pillugu sorpassuarnik ilinniar­tippaanga. 20-nik ukioqarlunga ilagiinni kiffartornermut ataatsimiititaliami kiffartor­tussanngor­tinneqarama ilikkagas­sarpassuaqarpunga. Peqatigiis­sortatta qatanngutinik inuusuttunik ilinniar­titsisarnera nuannaarutigeqaara. Qatanngutit inuusuttut sukataarunik inuusuk­kaluarlutik Jehovamit atorneqarluarsin­naapput!

Kapuskasingimi inuuneq unamminar­toqartarpoq. Ukiukkut 44-nik ississin­naasarpoq “kiannerulaaraangamilu” 33-nik issittarluni. Danielilu amerlanertigut pisuinnaq oqaluus­sisarpugut. Kiffartorninni nuannersorpassuit ilaattut naapippara qatanngut Linda Cole, kingorna Linda Splane-ninngortoq.

Linda oqaluus­sinermik nuannarisaqaqaaq pulaaqqit­tagarpas­suaqarlunilu. Tukkortuuvoq, kissalaar­tuulluni ammasuullunilu. Anaanaa, Goldie, qatanngutaavoq aalajaatsoq. Ataataa, Allen, aallaqqaammut Jehovap Nalunaajaasuinut akerliuvoq. Allen akerlilersuigaluartoq Goldiep Linda, aqqaluaalu, John aamma Gordon, ataatsimiigiaqatigisarpai oqaluus­sinissaannillu ilinniar­tillugit. Goldie, Linda, John aamma Gordon tamarmik pioneritut kiffartor­nikuupput. Ukiorpassuit qaangiummata Allen Jehovamik Nalunaajaasun­ngorpoq ilungersorlunilu ilagiinnik kiffartuus­sisarluni.

1965-imi Canadami Betelimi Naalagaaffimmut Kiffartornermik Ilinniarfimmi pikkoris­sarnissamut qaaqqusaavunga. Ilinniarnerlu qaammammik ataatsimik sivisus­suseqarpoq. Ilinniarfim­miinninni kajumis­saarneqarpunga Gileadimi ilinniar­nissamut qinnuteqaammik immersueq­qullunga. Ajukkukkama oqaluus­sisartutut aallartitatut kiffartor­nissara eqqarsaatiginikuun­ngisaan­narpara, qinnuteqaalli immersorpara. Klassit 42-ssaannut peqataanissannut akuerisaavunga. Gileadimi ilinniar­titsisutta akuttun­ngitsumik nalilersuif­figisarpaatigut. Aallaqqaammulli kajumis­saarpaannga peqatigiis­sortagut pillugit sukumiisumik paasiniaaq­qullunga. Taamanikkut 21-innarnik ukioqarama siunnersuutitsialaavoq.

Gileadimi nuannareqisannik ilaatigut pikkoris­sarfigaarput radiukkut, tv-kkut aviisitigullu tusagas­siuutinut attaveqarneq. Sunaaffa taamatut pikkoris­sarnera siunissami iluaqutigingaalerumaarlugu. Oqaluttuariumaarpara.

SENEGALIMUT

Ilinniarnitta naammas­sineraniit ullualuit qaangiuttut aallartitatut kiffartoqatigalu, Michael Höhle, Afrikami Senegalimut kiffartoriar­torluta aallarpugut. Taamanikkut Senegalimi oqaluus­sisartut 100-t missaan­niipput.

Tikinninniit ukioq ataaserluunniit qaangiutin­ngitsoq aperineqarpunga immikkoor­tortaqarfitsinni sapaatip-akunneranut ataasiarlunga sulisarsin­naanersunga. Immikkoor­tortaqarfik oqaluus­sisartutut aallartitat ineqarfianni ineeqqamiippoq angival­laanngitsumi. Taamaak­kaluartoq immikkoor­tortaqarfimmi nakkutilliisup, Emmanuel Paterakisip, eqqaasippaanga immikkoor­tortaqarfik Jehovap peqatigiis­sortaanut nunami tassani sinniisuusoq. Taamaalluni qatanngut Paterakis aalajangerpoq oqaluus­sisartunut aallartitanut tamanut qiimmas­saataasunik allagaqas­sasugut. Taamanikkut allakkianik imaalial­laannaq kopeerisoqarneq ajormat allakkat ataasiak­kaarlugit skrivemaskiinamik allattarpagut. Tamanna suliarujussuuvoq kukkunaveersaaq­qissaar­tariaqarlutalu!

Unnuk taanna angerlarlunga aningajalersunga qatanngutip Paterakisip allakkap puussaa uannut tunniuppaa. Oqarpoq: “David, immikkoor­tortaqarfimmiit allagarsias­saqarputit.” Kingusin­nerusukkut allakkap puussaa ammarakku paasivara allakkat allassimasakka iluaniittut! Taamatut pisoqarnerani Guutip peqatigiis­sortaanik ataqqin­ninnissara ilikkarpara, immikkoor­tortaqarfiup qanoq angitiginera mikitigineraluunniit apeqqutaatinnagu.

Ilagiinni ikinngutitaar­torpunga arfinin­ngornerit unnuini akuttun­ngitsumik katerisimaaqatigisar­takkannik. Nuannisar­taqaagut! Ullumikkut suli attaveqatigiit­tarpugut. Franskisut oqaatsit Senegalimi pisortatigoortumik atorneqar­tarmata ilinniar­nikuuakka, kingusin­nerusukkullu nunarsuaq tamakkerlugu immikkoor­tortaqarfinnut tikeraar­tarninni atortarlugit.

1968-imi Lindalu pissiariilerpugut. Senegalimi piffissarput tamaat kiffartor­niassagatta ullup ilaannaani suliffigisin­naasannik sivisuumik ujarlerpunga. Kisianni sulisitsisut nunaqavissunik salliutitsisar­nissaat naatsorsuutigineqarmat iluatsitsin­ngilanga. Taava Canadamut uterama katippugut aappariittullu illoqarfeeqqamut Quebecip killeqarfiata qanittuaniittumut Edmundstonimut New Brunswickimiittumut specialpioneritut kiffartoriar­tortinneqarluta.

NEW BRUNSWICKIMI QUEBECIMILU KIFFARTORNERPUT

Tikitatsinni oqaluus­sisartoqanngilaq aamma amerlan­ngitsuinnaat Biibilimik misissuisarput. Katuullit upperisaat inuit inuunerinut sunniuteqaqaaq. Illut tamangajammik ima allagar­taliisimapput: “Jehovap Nalunaajaasui naaggaarpagut!” Ullumikkut taamatut allagartallit ataqqillugit qaangiin­nartarpagut, taamanikkulli illut tamakker­tarpagut. Katuullit peqatigiiffiat sapaatit-akunneri tamaasa illoqarfiup aviisiatigut ilanngus­sisarpoq ima allannilimmik: “Jehovap Nalunaajaasui malersortigit.” Malersugassat sisamaan­naapput – tassa Victor aamma Velda Norberg kiisalu Linda uangalu – taamaattumik naluneqanngilaq uagut pigaatigut!

Ilagiinnik nakkutilliisup angalasartup tikeraaq­qaarnera puiunngisaan­nassavara. Sapaatip-akunnera najoreerluta oqarpoq: “Maaniin­nissinni iliuusis­satuarsi tassaagunarpoq inuit Nalunaajaasut pillugit isummius­sereertar­nerannik annikil­lisaanissaq.” Tamanna taamanik­kumiilli anguniagarilerparput, iluatsipporlu. Jehovamik Nalunaajaasut maniguuttut Katuullillu Oqaluffiani palasit makitasuut assigiin­ngissutaat inuit takusin­naajartuaarpaat. Ullumikkut illoqarfimmi tassani ilagiin­nguaqarpoq.

Ukiup ataatsip missaa illoqarfimmi tassani avinngarusimasumeereerluta Quebecip illoqarfiani ilagiis­suarnut kiffartoriar­toqqusaavugut. Tassani qatanngutit tukkortut qaammatini arfinilinni nuanneqisuni kiffartoqatigereerlugit nakkutil­liisutut angalasartutut kiffartorsin­naanerlunga aperineqarpunga.

Ukiuni 14-ini tulliuttuni nunap immikkoortuani Quebecimi ilageeqatigiinnik kiffartuus­sivugut. Pissanganaqaaq! Quebecimi oqaluussineq kinguneqarluarpoq, aamma ilagiinni tikitatsinni ilaqutariit tamarmiullutik imermut morsutsitaanis­saminnik sulissutiginnittut akuttun­ngitsumik siumortarpagut!

QATANNGUTIT ILUNGERSORTUT EQQAAMAVAGUT

Qatanngutit Canadami nunap immikkoortuani franskisut oqaaseqarfiusumi najugallit asajuminaqaat. Ilakkuminar­tuupput, qiimasuullutik sukataal­laqqissuul­lutillu. Ilaat Nalunaajaasun­ngorniar­nerminni ilaquttaminnit sakkortuumik akerlilersor­neqartarput. Qatanngutit ukiukitsut ilaat angajoq­qaaminnit uppinngitsunit ima qinigas­sinneqartarput: “Jehovap Nalunaajaasuinik atuaqqis­saaqateqar­tarunnaan­ngikkuit nuuttariaqassaatit!” Akerlilersor­neqaraluarlutik amerlanersaat Jehovamut aalajaat­tuarput. Jehovap tulluus­simaarutigisimassaqai!

Aamma pionerit specialpionerillu Quebecimi kiffartortut eqqaarusuppakka. Amerlanersaat Canadami nunap immikkoortuinit allaneersuupput. Franskisut oqaatsit ilinniar­tariaqaan­narnagit aamma inuit, katuullit upperisaannit sunnerneqarsimaqisut, eqqarsar­taasiat ilinniar­tariaqar­tarpaat.

Specialpionerit avinngarus­simasumiittunut oqaluus­sisartoqarfiun­ngitsunut oqaluus­siartor­titaakkajuttarput. Tikitaminni inuit Jehovap Nalunaajaasuinik nuannarisaqan­nginnerat pissutigalugu inissaqar­niarnertik ullullu ilaannaa suliffis­saqarniarnertik ajornar­torsiutigisarpaat. Inigisaminnut akissaqarumallutik allaat aappariit arlaliullutik najugaqatigiit­tariaqartarput. Pionerit tunniusimal­luartut taakku ilungersuallutik sulisarput. Biibilimik ilinniar­titaqaleraangamik ilinniar­titartik pimoorus­silluin­narlutik ikiortarpaat. Maanna Quebecimi oqaluus­sisartorpas­suaqarmat avataaniit ikiorteqarnissaq pisariaqarun­naarnikuummat pionerit eqqartukkama ilarpassui pisariaqar­titsiffiunerusunut oqaluus­siartor­nikuupput.

Ilageeqatigiinni angalasartutut kiffartor­nitsinni inuusut­tuaqqat arfinin­ngornikkut ullaap tungaani oqaluus­seqatigisarpagut. Taamaalilluta unamminartitaat suunersut paasisarparput. Inuusut­tuaqqat taakkua ilaat maanna nunani allani aallartitatut imaluunniit allanik akisussaaf­feqarlutik kiffartorput.

Taamanikkut angalasar­nitsinni aningaasar­tuutigut ilagiit ilaasa matussusersin­naasanngim­matigit ilaannikkut qaammat naangajaleraangat aningaasaataarut­tarpugut. Taamaat­toqartillugu Jehova tatigil­luinnar­tarparput, taassumami ikiortariaqarnerput kisimi nalunngilaa. Ilaginnaan­nanngisaan­narpaatigullu. Qanorluunniit ikkaluaraangat ilagiit allat ornillugit angalasin­naajuaan­nartarpugut.

QATANNGUTINIT ALLANIT ILINNIAR­TINNEQARNERA

Quebecimiin­nitsinni radiukkut, fjernsynikkut aviisitigullu nalunaajaanissamut periarfis­sarpassuaqartarpoq, taamaattumik Gileadimi tusagas­siuutinut attaveqarneq pillugu pikkoris­sarsimanera iluaqutigivis­sorpara. Ilagiinnik nakkutilliisoq angalasartoq, Léonce Crépeault, tusagas­siuutinik attaveqarnermik pikkorif­feqarluartoq akuttun­ngitsumik suleqatigisarpara. Tusagas­siortut nuimasut oqaloqatigigaangamigit qanoq ilisimasaqar­tiginini nittarsaannagu ima oqartarpoq: “Maaneeqatigalu tusagas­siuutitigut oqaaseqar­tarnermik ilisimasakitsuararsuuvugut. Kisianni peqatigiis­sortatta Jehovap Nalunaajaasuisa ataatsimeersuar­nissaat pillugu avammut nalunaaruteqarsin­naanersugut aperisimavaatigut. Ikiuussin­naaguit qujanas­sagaluaqaaq.” Maniguulluni saaffigin­nittarnera pissutigalugu tusagas­siuuteqarfiit amerlasuut ikiuukkusulertarput.

Kingusin­nerusukkut immikkoor­tortaqarfik aalajangerpoq eqqartuus­sissuserisutta ilaat, qatanngut Glen How, tusagas­siuutitigut sammisassani akiuminaatsuni suleqatigisassagiga. Tamatumani Gileadimi pikkoris­sarsimanera Léoncemillu suleqateqarsimanera iluaqutigil­luarpakka. Qatanngummik Howimik suleqateqarneq immikkut pisinnaatitaaffiuvoq. Peqatigiis­sortatsinnik inatsisitigut illersuigaangami qunusuil­luinnartarpoq, pingaar­nertulli Jehovamik asanningaarpoq.

1985-imi ilageeqatigiinni angalasartutut Canadap kitaani ataatama angerlarsimaffiata qanigisaaniittumi kiffartor­tussanngorpugut, taamaalillutalu ataataga isumassorsin­naanngorparput. Qaammatit pingasut qaangiummata toqukkut qimaguppoq. 1989 tikillugu tamaani kiffartorpugut. Taava tupaallaatigeqisatsinnik USA-mi Betelimi kiffartorsin­naanersugut aperineqarpugut. Ukiut 19-it ilageeqatigiinni angalasartutut kiffartoreerluta taamatut kiffartornerput unitsit­tussanngorparput. Ukiut taakkua ingerlanerini qatannguterpassuit tukkortut illusim­mavigisarsimavagut nereqatigisarsimal­lugillu. Taakku qujamasuf­figingaarpagut!

USA-MI BETELIMI KIFFARTULERPUGUT

Brooklynimut tikikkatta Kiffartornermik Nakkutil­liisoqarfimmi kiffartulerpunga. Tassani ilinniar­tinneqarnera qujamasuutigiuassavara. Paasissutissat tamaasa peqqaarlugit inerniliisar­nissara ilikkakkama ilagaat. Taava 1998-imi Aaqqissuisoqarfimmi kiffartulerpunga tassanilu suli ilikkagaqar­tuarlunga. Qatanngummik John Barrimik, Aaqqissuisoqarnermut Ataatsimiititaliami ataqatigiis­saarisuusumik, ukiuni arlalinni suleqateqarneq immikkut pisinnaatitaaf­figaara. Ilinniar­titsinera peqatigisarneralu pingaar­tittuas­savakka. Qatanngut taanna kristumiuul­luartuuvoq.

Qatanngutinik maniguuttunik Aaqqissuisoqarfimmi suleqateqarnera pilluaq­qussutaangaarpoq. Qinunikkut Jehovamut ikioqqujuartarput, nalunngilaallu Jehovap anersaaminik ikiuineratiguinnaq suliartik naammas­sisinnaallugu.

Lindalu nunani 110-ni qatanngutigut aalajaatsut tikeraarsin­naasimagatsigit immikkut pisinnaatitaaf­figaarput. Oqaluus­sisartut aallartitat, Immikkoor­tortaqarfiup Ataatsimiititaliaanut ilaasortat allallu piffissartik tamaat kiffartortut asanninnerat nammineerluta misigaarput. Aamma nunani assigiin­ngitsuni oqaluus­sisartut sorsuffiusumi najugaqaraluarlutik, aningaasaqarnikkut ajornar­torsioraluarlutik malersugaagaluarlutillu piumassuseqarluarlutik aalajaal­lutillu kiffartornerat takullugu nuannertaqaaq. Qanorli Jehovap asatigai!

Ukiut ingerlanerini suliassiis­sutigineqartunik naammas­sinninniaaninni Lindamit ikiorluar­neqarpunga. Inunnik asannit­tuugami ikiuinissani nuannareqaa. Aamma oqaloqatigin­nillaqqissuuvoq. Inuppassuit Jehovamik asannin­nissaannut unittoorsimasullu uternis­saannut ikiornikuuai. Linda ilumut Jehovamit tunissutaavoq! Utoqqaliar­tortilluta qatanngutit inuusuttut assigiin­ngitsorpas­suartigut ikiuuttarnerat qujamasuutigeqaarput. – Mak 10:29, 30.

Ukiut 80-it kingumut qiviaraangakkit qujamasut­taqaanga. Tussiaasiortoq ima allattoq isumaqatigaara: “Guuti, inuusun­ninnilli ajoqersorparma, tupinnar­tuliatillu oqaluttuariuarpakka.” (Tuss 71:17) Inuutillunga taamaalior­tuarusuppunga.