Nikallunganinni Jehovap ikiorsin­naavaatit

1-2. Apustili Paulusi ilaannikkut qanoq misigisarpa, aamma sooq tamanna uagutsinnut tuppallernarpa? (Romamiut 7:21-24)

APUSTILI Paulusi eqqaagaangakku inuttut qanoq ittuunersoq eqqarsaatigisarpiuk? Oqaluus­sisartoq sapiitsoq, ilinniar­titsillaqqissoq imaluunniit Biibilimik allaqataasoq eqiasuitsoq? Ilumut taamaappoq. Aammali uagutsitulli ilaannikkut annilaangasarlunilu nikallungasarpoq.

² Romamiut 7:21-24 atuakkit. Paulusip Romamiunut allakkamini misigis­sutsimi ilaat allaatigai. Taakku misigis­sutsitsinnut assingupput. Paulusi kristumiuuvoq aalajaatsoq Guutimut naalakkusuttoq, kisianni naammal­luinnan­ngitsuugami Guutip piumasaatut iliornissani ilaannikkut ilungersunar­tittarpaa. Tamatuma saniatigut ajortuliarisimasani aliasuutigisarpai inuunermilu nikallor­nartumik aaqqinneqarsin­naanngitsumik ajornar­torsiuteqarluni.

3. Allaaserisami matumani suut sammissavagut? (Aamma “Nassuiaat” takuuk).

³ Paulusi nikallungasaraluarluni misigis­sutsinit nuanniitsunit aqunneqarneq ajorpoq.a Allaaserisami matumani apeqqutit uku sammissavagut: Paulusip suut nikallungas­sutigai? Nikallungajun­naarnis­saminut suut iluaqutigai? Nikallunganitsinni qanoq iliorsin­naavugut?

PAULUSIP NIKALLUNGAS­SUTIGISAI

4. Paulusip suut nikallungas­sutigai?

⁴ Iliuuserisimasai nuanniitsut. Paulusi, aamma Saulusimik taaneqartoq, kristumiun­ngunngin­nermini iliuuseqarsimavoq kingusin­nerusukkut peqqissimis­sutigisaminik. Assersuutigalugu Steffaanusi ujaqqanik milloor­neqarluni toqutaammat Saulusip takuaa iluaralugulu. (ApS 7:58; 8:1) Aamma kristumiut peqqarniitsumik malersorpai. – ApS 8:3; 26:9-11.

5. Paulusip iliuuserisimasani nuanniitsut qanoq sunnerneqaatigai?

⁵ Paulusip ajortuliarisimasani nikallungas­sutigai. Malersuisutut iliuuserisimasani ukiut ingerlaneranni naalliuutigisarunarpai. Assersuutigalugu ukiumi 55-imi Korintimiunut allakkamini siullerni ima allappoq: “[Guutip] ilagiivi malersorakkit apustilisut taaneqar­nissamut ajukkuppunga.” (Kor 1. 15:9) Ukiut tallimat qaangiuttut ‘illernartut tamarmik minnersarisaattut’ imminut taavoq. (Ef 3:8) Timuutiusimullu allappoq ‘Guutimik mitaatil­liisuusimalluni, malersuisuusimalluni soqqusaatsuusimallunilu’. (Tim 1. 1:13) Ilagiinnut tikeraaraangami malersukkani taakkualuunniit ilaqutaat naapikkaangamigit qanoq misigisarsimassasoq takorloorsin­naaviuk?

6. Paulusip suna aamma nikallungas­sutigisimasinnaavaa? (Aamma quppernerup ataani ilanngussaq takuuk).

⁶ Anniaatai. Paulusi allappoq ‘anniaateqarluni’. (Kor 2. 12:7) Sunaanersoq eqqaanngilaa. Timikkut misigis­sutsikkul­luunniit anniaataasinnaavoq, imaluunniit isumakuluutaasinnaavoq alla.b

7. Paulusip naammal­luinnan­ngissutini qanoq misigis­sutsikkut sunnerneqaatigai? (Romamiut 7:18, 19)

⁷ Naammal­luinnan­ngissutai. Paulusip naammal­luinnan­ngissutini akiugarai. (Romamiut 7:18, 19 atuakkit). Eqqortuliorusuk­kaluarluni naammal­luinnan­ngitsuugami taamaaliun­ngitsoortarpoq. Nassuerutigaa ajunngitsuliorusuk­kaluarluni pileris­susipiluni akiortuarlugit. (Kor 1. 9:27) Takorlooruk allannguinissani ilungersuutigigaluarlugu pissusipalaaq takkoqqik­kaangat qanoq pakatsinar­tigisoq!

PAULUSIP NIKALLUNGAJUN­NAARNIS­SAMINUT ILUAQUTIGISAI

8. Paulusip allagai naapertorlugit naammal­luinnan­ngissutimi akiornissaanut suut iluaqutigai?

⁸ Paulusip allagaanit erserpoq eqqarsaatigeq­qissaartaraa kristumiut pileris­susipiluit ajortulioq­qajaanerlu Guutip anersaavata ikiuineratigut qanoq akiorsin­naagaat. (Rom 8:13; Gal 5:16, 17) Pileris­susipiluit suut Jehovap iluarin­ngikkai Paulusip eqqaakulasarpai. (Gal 5:19-21, 26) Qularnan­ngitsumik Paulusip sanngiissutini eqqarsaatigisarpai. Allakkat Illernartut misissor­nerisigut paasisimassavaa sutigut allannguisariaqarluni qanorlu taamaaliorsin­naalluni. Taamaattumik nalunngilarput Paulusip kristumioqatini siunnersoramigit siunnersuinermisut nammineq iliortoq.

9-10. Paulusip nikallungagaangami suut iluaqutigisarpai? (Efesossimiut 1:7) (Aamma asseq takuuk).

⁹ Paulusi ilaannikkut nikallungasaraluarluni isumalluar­nartumik isiginnit­taaseqar­tuarpoq. Assersuutigalugu angalaqatimi nalunaarutai nuannersut tusaramigit nuannaaqaaq. (Kor 2. 7:6, 7) Uppeqatiminik ikinnguteqarnini qiimmaal­laatigaa. (Tim 2. 1:4) Aamma nalunngilaa Jehovap iluarigaani. Aap, ‘minguitsumik nalunngeqatigin­nissuteqarluni’ kiffartorsin­naanini nuannaarutigaa. (Tim 2. 1:3) Allaat Romami parnaarus­saaqqatilluni uppeqatini kajumis­saarpai ‘Naalagaq nuannaarutigeq­qullugu’. (Flp 4:4) Paulusip allagai atuaraangatsigit maluginiarsin­naavarput ajornar­torsiutini kukkussutinilu eqqarsaatigival­laarneq ajorai. Nikallungagaangami nuannersut isumalluar­nartullu eqqarsaatiginerusarpai.

¹⁰ Paulusip aamma utertitsis­sutitut akiliut isumalluar­tuarnis­saminut iluaqutigaa. Upperaa Jehovamit asaneqarluni utertitsissullu nammineq iluaqutigisin­naallugu. (Gal 2:20; Efesossimiut 1:7 atuaruk). Taamaattumik Jiisusip pilliutaa tunngavigalugu Jehovamit isumakkeerfigineqarsimanini qularinngilaa. (Rom 7:24, 25) Nuanniitsunik akiugaqaraluarluni nuannaarluni Guutimut kiffartor­tuarsinnaavoq. – Hebr 9:12-14.

11. Sooq Paulusip maligassiaa uagutsinnut qiimmaal­lannarpa?

¹¹ Paulusitut misigisin­naavugut eqqarsar­taatsitsigut, oqaatsitsigut Jehovallu iluarisaatut iliuuseqar­tuarniarluta sulissuteqar­tuartariaqarluta. ‘Inukuluusutut’ misigisin­naavugut. Qatanngut arnaq 26-nik ukiulik Elizamik atilikc inuttut akiukkani pillugit ima oqarpoq: “Paulusip atugai eqqarsaatigigaangakkit qiimmaal­laatigisarpakka misigigama taamatut akiugaqartuni kisimiinnanga. Aamma Jehovap kiffami qanoq akiugaqarneri ilisimaarigai eqqaasitsis­sutaavoq.” Taavami nikallungagaluarluta Guutimut kiffartornermi isumalluar­tuarumalluta Paulusi ilaarlugu qanoq iliorsin­naavugut?

NIKALLUNGANITSINNI SUSINNAASUGUT

12. Nikallungajun­naarniarluta qanoq iliuuseqarsin­naavugut?

¹² Anersaakkut ittunik sammisaqar­tarnerit ileqquliuguk. Anersaakkut ittunik sammisaqar­tarutta ajunngitsut eqqarsaatiginerusarsin­naavagut. Taamatut ileqquliussineq peqqissuunitsinnut iluaqutaasunik iliuuseqar­tarnermut assersuun­neqarsinnaavoq. Peqqinnartunik nerigaangatta, timigis­saraangatta sinilluaraangattalu ilorrisimaar­tarpugut. Taamatuttaaq Guutip oqaasia atuaraangatsigu, ataatsimiinnernut piareersarlutalu najuukkaangatta akissuteqaraangattalu oqaluus­sinermullu peqataalluta ilorrisimaar­tarpugut. Ineriar­tornartunik sammisaqar­tarnerput nikallungajun­naarnissamut iluaqutigisin­naavarput. – Rom 12:11, 12.

13-14. Kristumiut aalajaatsut anersaakkut sammisaqar­tarnermik ileqqulius­sisimanertik qanoq iluaqutigaat?

¹³ John 39-nik ukioqarluni perulun­nartumik kræfteqalertoq eqqarsaatigiuk. Aallaqqaammut annilaangallunilu nikallorpoq. Eqqarsaatigaa sooq taama inuusutsigaluni nappaateqaler­nerluni. Nappaateqalermat ernera pingasuinnarnik ukioqarpoq. Johnip suna nikallor­naveeqqutigaa? Ima oqarpoq: “Qasungaaraluarlunga ilaqutariittut anersaakkut sammisaqar­tarnissarput isumagisarpara. Ataatsimiinnerit tamaasa najuuffigisarpagut, sapaatip-akunneri tamaasa oqaluus­seqataasarpugut ilaqutariittullu Biibilimik misissueqatigiit­tarluta – ajornakusooraluaraangal­luunniit.” Tamanna kingumut eqqarsaatigalugu John ima nangippoq: “Tupaqqarujus­suaqqaarpugut. Misigaarpulli Jehovap nakussatsitsinera asanninneralu qanoq tuppaller­nartigisut. Jehovap aamma illit nakussatsis­savaatit soorlu uanga nakussatsis­simagaanga.”

¹⁴ Eliza eqqaariigarput ima oqarpoq: “Kristumiut ilagiivinut ataatsimiigiaraangama namminerlu atuaqqis­saaraangama eqqaasin­neqartarpunga Jehovap qinnutikka akisarai asagaangalu. Tamannalu pilluaatigeqaara.” Nolanip Afrikami nakkutilliisup angalasartup oqaluttuaraa nulianilu, Diane, suut iluaqutigisar­nerlugit: “Nikallungagaluarluta anersaakkut ittunik sammisaqar­tuartarpugut. Taava Jehovap tamatigut nuannaar­nissarput isumagisarpaa. Eqqaamaniar­tarparput Jehovap ikiorumaaraatigut ajunngisaarfigalutalu, naluarput qanoq, nalunngiin­narparpulli taamaaliorumaartoq.”

15. Nikallungagaangatta suut iliuuserisin­naavagut? Assersuuteqarit.

¹⁵ Nikallungaan­nalerutta allanik iliuuseqarsin­naavugut. Ima assersuuteqariarta: Qitikkut anniaruit ullut tamaasa pisuttuartarneq naammanngilaq. Iliuuseqar­nerusariaqarputit. Sukutserpiakkut anniarnerlutit paasiniassavat allaallu nakorsiarlutit. Taamatuttaaq sooq nikallungaan­nalersimanerluta paasiniarumallugu Biibili atuagas­siaatigullu misissus­savagut allaallu uppeqaterput anersaakkut inersimal­luartoq oqaloqatigalugu. Aamma siunnersuuteqarpoq iluaqutaasin­naasunik allanik.

16. Nikallunganermut pissutaasut paasinis­saannut suut iluaqutigisin­naavagut? (Tussiaat 139:1-4, 23, 24)

¹⁶ Sunarpiaq pisariaqar­tinnerlugu paasiniaaniarlutit Jehova qinnuigisinnaavat. Kunngip Daavip ilisimavaa Jehovap ilisarisimal­luaraani. Taamaattumik Daavi Jehovamut qinulluni sunarpiaq pissutigalugu nikallunganerluni paasiniaaf­figeqquvoq. (Tussiaat 139:1-4, 23, 24 atuakkit). Aamma illit sooq nikallunganerlutit qanorlu qaangersin­naanerit paasiumallugu Jehovamut ikioqqusin­naavutit. Apeqqutit soorlu uku eqqarsaatigisin­naavatit: ‘Sunarpiaruna pillugu isumakuluuteqartunga? Nikallorninnut suna aallarniutaava? Eqqarsaatit nikallornartut eqqarsaatigiuaan­nalertarpakka, imaluunniit eqqarsaatit nuannersut eqqarsaatiginiapal­lattarpakka?’

17. Nuannersunik eqqarsaateqar­nissannut nammineq misissuininni suut iluaqutigisin­naavigit? (Aamma asseq takuuk).

¹⁷ Biibilimik misissuininni pisariaqar­titarpiatit misissortakkit. Jehovap pissusiinik qiimmas­saatigisin­naasannik misissuineq iluaqutigisarsinnaavat. Assersuutigalugu apustilip Paulusip utertitsissut Jehovallu isumakkeerfigin­nittuunera eqqarsaatigeq­qissaaraangamigit iluaqutigingaartarpai. Aamma illit taamaaliorsin­naavutit. Jehovap Nalunaajaasuisa ujarliutaat, Biibili inuuninni iluaqutigiuk imaluunniit misissueq­qissaarut alla iluaqutigalugu Guutip naakkin­nittuunera, isumakkeerfigin­nittuunera ilumoorfigin­nillunilu asanninnera misissorsin­naavatit. Allassimaffiit innersuus­sutigineqartut quppertarukkit eqqarsaatigeq­qissaarsinnaavat Jehova qanoq ilaarsin­naaneripput pitsaaneruler­nissatsinnullu siunnersuutai qanoq iluaqutigisin­naagigut. Allaaserisat Biibililersaarutitsinni iluaqutigisimasatit allattukkit. Allattukkallu atuaqqin­niassagakku ersarissumut iliuk, atuagassiallu allattuk­kanniittut nikallungaleraangavit misissortakkit. Illit atukkatit naapertorlugit maleruar­niartakkit. – Flp 4:8.

18. Uppeqatitta misissuinerminni sammisat suut iluaqutigisarpaat?

¹⁸ Eliza eqqaariigarput Juubi Biibilimi eqqaaneqartoq pillugu misissuivoq. Ima oqarpoq: “Juubip nalaatai ilisarnarput. Misilin­neqaqat­taarluni nikallungangaar­nermini Jehova neriuffigiuarpaa allaat nalugaluarlugu sooq ajornar­torsior­nerluni.” (Jobi 42:1-6) Diane eqqaariigarput ima oqarpoq: “Jehovap pissusii pillugit Biibililersaarutitsinni uigalu misissueq­qissaarpugut. Jehovap marriukkatut ilusilersormatigut qujamasuutigeqaarput. Immitsinni pakatsis­sutigisagut isiginiar­nerunagit eqqarsaatiginerusarparput inuttut pitsaaneruler­niassagatta Jehovap qanoq ilusilersor­neraatigut. Tamanna Jehovamut qanimut attaveqalis­sutigaarput.” – Es 64:7.

JEHOVAP IKIORLUTALU AJUNNGISAARFIGIS­SAVAATIGUT

19. Ilaannikkut qanoq misigisarpugut, sunali qularis­sanngilarput?

¹⁹ Anersaakkut ittunik sammisaqar­tarnermik ileqqulius­sigaluarluta uagutsinnullu tulluarsakkanik misissueq­qissaar­taraluarluta ullut ilaanni nikallungasarsin­naavugut. Taamaattorli Jehovap ikiuineratigut nikallunganaveersaarsin­naavugut. Qularutigin­ngissin­naavarput minguitsumik nalunngeqatigin­nissuteqarlutalu Jehovamik ikinnguteqarluarnerput ulluni amerlanerni nuannaarutigis­sallutigu.

20. Suna aalajangiusimaviuk?

²⁰ Inooriaaserisimasatsinni pisimasut nuanniitsut kukkussutigul­luunniit uniffiginagit inuuneq nuannaarutigisigu. Nikallunganitsinni Jehovap ikiuineratigut eqqissisimasin­naavugut. (Tuss 143:10) Paratiisimi pilluarluta inuunissarput qilanaareqaarput. Taamanik­kussamut ullut tamaasa nikallunganata itertalissaagut Guuterput asannittoq Jehova nuannaarluta kiffartorfigalugu!