‘Anersaakkut pisariaqar­titatit eqqumaf­figiuakkit’

1. Tunngaviusut suut inuit pisariaqar­tippaat? (Matiusi 5:3)

JEHOVAP tunngaviusunik pisariaqar­titaqar­tilluta pinngor­tippaatigut. Assersuutigalugu nerisassat atisallu pisariaqar­tippagut angerlarsimaf­feqartariaqarlutalu. Taakkua arlaannik amigaateqarneq ajoqutigisin­naavarput. Timikkut pisariaqartitat taakkua saniatigut Jehovap aamma anersaakkut pisariaqar­titaqar­tilluta pinngor­tippaatigut. (Matiusi 5:3 atuaruk). Pilluavis­sagutta paasisariaqarparput anersaakkut siulersor­neqartariaqarluta Jehovalu tatigiuar­tariaqarlugu.

2. ‘Anersaakkut pisariaqar­titaqarnermik eqqumaf­figinninneq’ qanoq assersuusiorluni nassuiar­neqarsinnaava?

² ‘Anersaakkut pisariaqar­titaqarnermik eqqumaf­figinninneq’ qanoq paasisariaqarpa? Grækerisut oqaatsit nutsiin­navillugit isumaqarput ‘anersaakkut ittunik qinnuuloorneq’. Qanoq taamaat­toqarsin­naagami? Assersuuteqariarta. Takorlooruk aqqusinermi qinnuuloortartoq alittor­nikunik atisalik. Nerisakittarami timikkut sanngiippoq. Angerlarsimaf­feqannginnami ulloq unnuarlu silamiittarpoq. Isikkulummat inuit qanillinaveersaar­tarpaat. Nalunngilaa atugaris­saarnerussaguni ikiorneqar­tariaqarluni. Tamatumunnga assingusumik anersaakkut pisariaqar­titaqar­nerminik eqqumaf­figinnittoq – anersaakkut ittunik qinnuuloortartoq – aamma ikiorneqar­tariaqarpoq. Taamaattumik Jehovap asasaminut pilersitai anersaakkut ittut sapinngisamik iluaqutigiumallugit ilungersorpoq.

3. Allaaserisami matumani suut sammissavagut?

³ Allaaserisami matumani sammeqqaas­savarput arnaq Fønikiamiu Jiisusimut ikioqqulluni kimigiisertoq qanoq ilinniarfigisin­naagipput. Oqaluttuami tamatumani erseqqis­sarneqarpoq pissuserineqartussat pingasut suut anersaakkut pisariaqar­titaqar­nerminnik eqqumaf­figinnittut ineriar­tortittariaqaraat. Taavalu sammissavarput apustilit Petrusi Paulusilu kunngilu Daavi anersaakkut ittunik pingaar­titsisut qanoq ilinniarfigisin­naagigut.

ARNAQ IKIOQQULLUNI KIMIGIISERTOQ QANOQ ILINNIARFIGISIN­NAAGIPPUT

4. Arnap Fønikiamiup Jiisusi soqquaa?

⁴ Arnap Fønikiamiup Jiisusi ornippaa. Pania “anersaapiloqarami assut naalliuppoq”. (Mat 15:21-28) Arnap Jiisusi seeqqum­merfigalugu ikioqqulluni kimigiiserfigaa. Arnaq taanna maluginiar­nartunik pissuseqarpoq. Taakkua ilaat sammeriartigit.

5. Arnaq Fønikiamiu pingasutigut qanoq maligas­saalluarpa, Jiisusilu qanoq qisuariarpa? (Aamma asseq takuuk).

⁵ Arnaq Fønikiamiu maniguuttuuvoq. Sooq taama oqarsin­naavugut? Jiisusip assersuusiamini qimminnguamut juutiun­ngitsut angerlarsimaf­fimminni uumasuutigisar­tagaannut assersuummani arnap taassuma ajuallaatiginngilaa. Jiisusip illit taamatut oqarfigis­sagaluarpatit qanoq qisuarias­sagaluarpit? Ajuallallutit qimagus­simassagaluarpit? Arnaq Fønikiamiu maniguut­tuugami taamaaliunngilaq. Paarlattuanik ikioqqulluni Jiisusi kimigiiserfigiuarpaa. Suna kajumis­sissutigaa? Jiisusimut uppernini. Allaat Jiisusip maluginiaramiuk qanoq upperluar­tigisoq ikiornissaanut killitsis­sutigaa. “Savat tammarsimasut inuiaqatigiinnut Israalikkunnut ilaasut” kisiisa pillugit aallartitaaneraraluarluni aalajangerpoq arnap juutiun­ngitsup taassuma pania anersaapiloqarun­naarsin­niarlugu.

6. Arnaq Fønikiamiu qanoq ilinniarfigisin­naavarput?

⁶ Anersaakkut pisariaqar­titagut eqqumaf­figiniarlugit assingusunik pissuseqar­tariaqarpugut. Maniguut­tuusariaqarpugut, Guutimullu nikallujuilluta ikioqqujuar­tariaqarpugut. Jiisusi Kristusi upperil­luinnar­tariaqarparput taassumalu malinnitsiminut siulersuisutut toqqagai tatigalugit. (Mat 24:45-47) Jehovap Jiisusillu inuit maniguuttut, qinujuartut upperluartullu ikiussavai siulersorlugillu. (Aamma takukkit Jaaku 1:5-7). Maanna sammeriartigu Jehovap nerisassanik, atisanik inigisanillu anersaakkut ittunik qanoq isumagisaraatigut. Taakku iluaqutigiumallugit susariaqartugut paasiumallugu sammissavagut apustilit Petrusi Paulusilu kiisalu kunngi Daavi.

PETRUSI ILAARUK – ANERSAAKKUT NERILLUARTARIT

7. Petrusi Jiisusimit soqquneqarpa, aammali qanoq iliortariaqarpa? Nassuiaagit. (Hebræerit 5:14–6:1)

⁷ Apustilip Petrusip maligassiaa eqqarsaatigiuk. Juutit Jiisusip Missiarsiuneranik upperinnittut siulliit ilagaat. Upperaa Jiisusip ‘oqaasii naassaan­ngitsumik inuussutaasut’. (Joh 6:66-68) Jiisusip qilalian­nginnermini Petrusi oqarfigaa: “Savaaraatikka nerlersukkit.” (Joh 21:17) Petrusi peqquneqar­nermisut aalajaalluni iliorpoq Jehovamillu isumassarsisitaalluni allakkat marluk Biibilimut ilanngutitin­neqartut allallugit. Petrusili aamma nammineq anersaakkut nerisariaqarpoq. Assersuutigalugu Paulusip allassimasai misissoq­qissaartarpai. Petrusip nassuerutigaa Paulusip ‘allaatigisaasa ilaat paasiuminaatsuusut’. (Pet 2. 3:15, 16) Petrusili tunniutiin­nanngilaq. Upperaa Jehovap ikiuineratigut Paulusip allagaani ‘nerisassat tamuasarissat nerisin­naallugit’, tassa paasisin­naallugillu maleruarsin­naallugit. – Hebræerit 5:14–6:1 atuakkit.

8. Petrusi Jehovamit nutaamik ilitsersor­neqarami qanoq qisuariarpa?

⁸ Jehova upperil­luinnaramiuk ilitsersuineratut Petrusi iliorpoq. Assersuutigalugu Petrusi Jorpamiitillugu takorluukkami inngilip uumasut Moorsisip inatsisai naapertorlugit nereqqusaan­ngitsut nereqquai. Ilitsersuut tamanna juutinut tupannarpoq. Taamaattumik Petrusi oqarpoq: “Naalagaq, naamerluinnaq, tassami nereqqusaan­ngitsumik minguttuumillu nerisiman­ngisaan­narpunga.” Inngilili ima oqarpoq: “Guutip minguersagai nereqqusaan­ngitsutut oqaatigisarun­naakkit.” (ApS 10:9-15) Petrusip isummani allanngortippaa. Qanoq tamanna nalunngilarput? Tamatuma kinguninngua angutit pingasut juutiun­ngitsumit Korniiliusimit aallartitaasut takkupput Petrusilu naalakkaminnut qaaqqullugu. Juutiun­ngitsut minguttuutut juutinit isigineqar­tarmata Petrusi juutiun­ngitsup illuanut iserneq ajorpoq. (ApS 10:28, 29) Petrusilli Jehovap ilitsersuutaa nutaaq paasigamiuk ingerlaannaq akueraa. (Uss 4:18) Korniiliusi inoqutaalu oqaluus­siffigai, takugamiullu uppertun­ngortut, anersaamit illernartumit taninneqartut imermullu morsutsin­neqartut nuannaarutigaa. – ApS 10:44-48.

9. Paasiuminaas­sinnaasunik misissuinerput marlutsigut qanoq iluaqutigisin­naavarput?

⁹ Petrusitut Guutip oqaasianik atuaqqis­saartariaqarpugut. Amerlanertigut tunngaviusunik misissuisarpugut. Aammali paasiuminaas­sinnaasunik misissuisar­nissamut kajumis­suseqar­tariaqarpugut. Atuaqqis­saarnissamut piffissamik immikkoor­titsisariaqarpugut, paasiuminaatsitagullu paasiumallugit ilungersor­tariaqarpugut. Taamaaliornerput marlutsigut iluaqutigis­savarput: Siullertut, Jehova pillugu ilikkakkagut taassuminnga ataqqin­ninnerulis­sutigalugillu asannin­nerulis­sutigis­savagut. Aappaattullu, Ataatarput qilammiusoq pillugu tupinnangaartumik nutaamik ilikkagaqaraangatta allanut oqaluus­sinissamut kajumin­neruler­tarpugut. (Rom 11:33; Saqq 4:11) Petrusi aamma allamik ilinniarfigisin­naavarput: Guutip oqaasianik paasinnit­taatsitsinnik allannguisoqaraangat eqqarsar­taatsikkut iliuutsikkullu allannguipal­lattariaqarpugut. Aatsaat anersaakkut nerilluar­tarutta Jehova kiffartorfigil­luarsin­naavarput.

PAULUSI ILAARUK – KINAASSUSEQ NUTAAQ ATIUK

10. Jehova nuannaar­tikkumallugu susariaqarpugut? (Kolossimiut 3:8-10)

¹⁰ Jehova nuannaar­tikkumallugu iluarisaanik pissuseqar­tariaqarpugut. Apustili Paulusi allappoq ‘kinaassusitoqaq piissagipput kinaassuserlu nutaaq atissallugu’. (Kolossimiut 3:8-10 atuakkit). Guutilli iluarisaanik pissuseqalernissaq ilungersunarsin­naasarpoq. Paulusi qanoq misigisoq eqqarsaatigiuk. Inuusun­nerminiilli Guuti nuannaar­tikkumallugu tamaviaaraluarluni taassuma piumasaa pillugu eqqoqqis­saartumik ilisimasaqanngilaq. (Gal 1:14; Flp 3:4, 5) Makitasuujullunilu Kristusip ilinniar­titsissutigisai nalugamigit ‘soqqusaatsuusimavoq’ nuanniitsunillu pissuseqarluni. – Tim 1. 1:13.

11. Sanngiissut suna Paulusip akiortariaqarpaa? Nassuiaagit.

¹¹ Paulusi kristumiun­ngunngik­kallarami kamajasuuvoq. Apustilit Suliaanni oqaluttuarineqarpoq Kristusip ilinniartitai toqukkusukkai. (ApS 9:1) Kristumiun­ngorami kamaqqajaasarun­naarnissani sulissutigaa. (Ef 4:22, 31) Taamaattorli Paulusi Barnabalu ‘assortuutileramik kamaatilerput’. (ApS 15:37-39) Pisumi tamatumani Guutip iluarin­ngisaanik pissuseqarpoq. Paulusilli kinaassuseq nutaaq atiniarlugu ‘timini tilluar­tuarpaa’ – tassa sanngiissutini akiortuarpai. – Kor 1. 9:27.

12. Paulusip kinaassutsimigut allannguinissamut suna iluaqutigaa?

¹² Paulusi maniguut­tuugami kinaassutsimigut allannguisinnaavoq. (Flp 4:13) Petrusitut Paulusip Jehova tatigalugu ‘nukik Guutip tunniuttagaa’ iluaqutigaa. (Pet 1. 4:11) Paulusili ilaannikkut kukkusarami nikallungasarpoq. Taamatulli misigigaangami imminut pilluni Jehovap iliuuserisai tamaasa qujamasuutigalugillu eqqarsaatigisarpai. Tamannalu nukittus­sutigalugu sapinngisamik allannguiniar­tuartarpoq. – Rom 7:21-25.

13. Paulusi qanoq ilaarsin­naavarput?

¹³ Qanorluunniit sivisutigisumik Jehovamut kiffartorsimagaluarutta tamatta Paulusi ilaarlugu kinaassusitoqaq peerniarlugu kinaassuserlu nutaaq atiniarlugu sapinngisamik iliuuseqar­tuartariaqarpugut. Kukkusimagaangatta – soorlu kamassimagaangatta inussiar­niitsumil­luunniit oqalussimagaangatta – eqqarsas­sanngilagut allannguisin­naanata. Eqqarsar­taatsitta iliuutsittalu allanngor­tinnissaat sulissutigiuar­tariaqarparput. (Rom 12:1, 2; Ef 4:24) Pingaarutilik una eqqaamas­savarput: Timikkut atisagut uagutsinnut tulluarsarlugit allanngor­tissinnaavagut. Kinaassuserli nutaaq atiniagarput allanngor­tissinnaan­ngilarput. Uagummi Jehovap najoqqutas­siaanut ‘tulluarsar­tariaqarpugut’ – tassa Guutip piumasaqaatai eqqortin­niarlugit allannguisariaqarpugut.

DAAVI ILAARUK – JEHOVAP INIGISAA ANERSAAKKUT ITTOQ ILLERSUUTIGIUK

14-15. Jehovap inigisamini anersaakkut ittumiittut qanoq illersortarpai? (Tussiaat 27:5) (Aamma asseq takuuk).

¹⁴ Pilluavis­sagutta nerisassat atisallu anersaakkut ittut saniatigut aamma Jehovap inigisaa anersaakkut ittoq illersuutaasoq pisariaqar­tipparput. Suua, aamma qanoq iluaqutigisin­naavarput?

¹⁵ Jehovap inigisaa anersaakkut ittoq illersuutigisin­naasarput kunngip Daavip eqqaavaa. (Tussiaat 27:5 atuaruk). Jehovap innuttani uppernikkut ajoqusiisin­naasunut tamanut illersorpai. Qanoq taamaaliortarpa? Neriorsuivoq sakkoq uagutsinnut sakkuaatissatut atorneqartoq sunaluunniit iluatsin­navianngitsoq. (Tuss 34:8; Es 54:17) Saatanip iliisalu pissaaneqangaaraluarlutik ataavartumik ajoqusersin­naanngilaatigut. Allaat toqutaagaluarutta Jehovap makitis­savaatigut. (Kor 1. 15:55-57; Saqq 21:3, 4) Aamma sumilluunniit isumakuluuteqaraluarutta Jehovap guutisior­tuarsin­naaqqulluta ikiussavaatigut. (Uss 12:25; Mat 6:27-29) Ataatatta qilammiusup asannittup anersaakkut ilaqutariis­suaqartip­paatigut utoqqaaner­tanillu uagutsinnik paarsisunik tunilluta. (Es 32:1, 2) Ataatsimiik­kaangatta eqqaasin­neqartarpugut Jehovap assigiin­ngitsutigut qanoq illersor­taraatigut. – Hebr 10:24, 25.

16. Jehovap Daavi qanoq illersorpaa?

¹⁶ Daavi Jehovamut naalakkaangami silatusaartumik aalajangiinis­saminut ikiorneqartarpoq. Taamatut Jehovap illersortarpaa. (Aamma takukkit Ussatit 5:1, 2). Kisianni Guutip najoqqutas­siaanik unioqqutitsigaangami Daavip iliuutsimi kingunipilui misigisarpai. (Sam 2. 12:9, 10) Pisuni allani naalliuppoq allanit ajortumik pineqarami. Taama pisoqar­tillugu susarpa? Daavi Jehovamut qamannga pisumik qinusarpoq, Jehovallu tuppallersartarpaa asaneqartutut paarineqar­tutullu misigitillugu. – Tuss 23:1-6.

17. Daavi qanoq ilaarsin­naavarput?

¹⁷ Aalajangigas­saqaraangatta Daavi ilaarlugu Jehovamit siunnersor­tissinnaavugut siunnersuutaalu maleruarlugit. Eqqaamas­savarput siunnersuutaanik maleruaan­ngikkutta aalajangiinerlunnitta kingunipiluinut illersor­navianngik­kaatigut. (Gal 6:7, 8) Nammineq pisuussuteqarnata naalliuk­kaangatta Jehovamut qamannga pisumik qinusarsin­naavugut taassuma uummaterput isumarpullu paarissagai upperalugu. – Flp 4:6, 7.

ANERSAAKKUT PISARIAQAR­TITATIT EQQUMAF­FIGIUAKKIT

18. Sooq anersaakkut pisariaqar­titagut eqqumaf­figisariaqarpagut, aamma qanoq taamaaliorsin­naavugut? (Aamma assit takukkit).

¹⁸ 2026-mi ukiumut allassimaffik imaappoq: “Pilluarput anersaakkut pisariaqar­titaqar­nerminnik eqqumaf­figinnittut.” Jiisusip oqaasii taakku aatsaat taama pingaaruteqartigaat. Sooq? Inuppassuit isumaqarput Guuti siulersuineralu pisariaqar­tinnagit. Amerlasuut allat Guuti upperigaluarlugu namminneq isumartik malillugu guutisiortarput. Sulilu allat inuit siulersueriaasiat tatigineruaat. Kisianni pilluan­ngillat. Taakkuninnga sunnertin­naveersaar­niarluta susinnaavugut? Jehovap pilersitaanik anersaakkut ittunik nerilluar­tariaqarpugut, kinaassuseq nutaaq atisariaqarparput Jehovallu inigisaa anersaakkut ittoq illersuutigisariaqarlugu.