Jaakup siulittuutai qanoq ilinniarfigisin­naagigut – immikkoortoq 2

1. Allaaserisami matumani suna sammissavarput?

JAAKUP ernerisa ataatartik utoqqalisimasoq ataatsimoorlutik tusarnaaq­qissaarpaat. Allaaserisap siuliani Ruubeni, Simmiuut, Levi Juudalu pillugit Jaakup siulittuutai sammivagut. Siulittuutit taakku pissanganarluin­nartuupput, tusarnaartullu tupigusuutigisimassavaat. Taamaattumik Jaakup ernerisa arfineq-pingasut kingulliit qanoq oqarfigineqar­nissartik pissangagisimassavaat. Allaaserisami matumani sammissavarput Zeebulonni, Issakaari, Dani, Gaadi, Aasari, Naftali, Juuserfi Biinialu pillugit Jaakup siulittuutai qanoq ilinniarfigisin­naanerigut.a

ZEEBULONNI

2. Jaakup Zeebulonni qanoq pilluaqquaa, oqaasiilu qanoq eqquuppat? (Mosesimik 1. 49:13) (Aamma ungalusaq takuuk).

² Mosesimik 1. 49:13 atuaruk. Jaaku siulittuivoq Zeebulonnip kinguaavi nunap neriorsuutigisap avannaata tungaaniittumi immap qanittuaniilerumaartut. Ukiut 200-t sinnerlugit tamatuma kingorna Zeebulonnikkut nuna kingornussartik pigilerpaat. Sineris­samiinngik­kaluarluni Immap Akullersuup Galiliiallu Tasersuata akornan­niippoq. Moorsisi ima siulittuivoq: “Tipaatsuttarit, Zebuloni, aallartaraangavit.” (Mos 5. 33:18) Oqaatsini taakkunani immaqa pineqarpoq Zeebulonnikkut najugaqarfianni niuernermut periarfis­saqarluarumaartoq immamut qanimmata. Sunaluunniit pineqaraluarpat Zeebulonnikkut nuannaar­nissaminnut pissutis­saqarluarput.

3. Naammagin­ninnissamut suna iluaqutigis­savarput?

³ Suna ilikkarparput? Sumiluunniit najugaqaraluarutta pissutsillu atukkagut qanorluunniit ikkaluarpata nuannaarutis­saqartuaan­narpugut. Nuannaar­tuassaguttali naammaginninneq ilikkar­tariaqarparput. (Tuss 16:6; 24:5) Piginngisagut pigerusullugit eqqarsaatigiin­narutsigit nikallungalersin­naavugut, uffa nuannersunik peqareerluta. Taamaattumik inuunermi ajunngitsut sapinngisannik eqqarsaatiginiarsarisakkit. – Gal 6:4.

ISSAKAARI

4. Jaaku Issakaarimut qanoq oqarpa, oqaasiilu qanoq eqquuppat? (Mosesimik 1. 49:14, 15) (Aamma ungalusaq takuuk).

⁴ Mosesimik 1. 49:14, 15 atuakkit. Jaakup Issakaari nersualaarpaa eqiasuin­nerarlugu siutituumullu saaneqqortuumut assersuullugu, siutitooq oqimaatsunik nammataqarsin­naasarpoq. Jaaku aamma siulittuivoq Issakaarikkut nunaminertamik alianaatsumik piumaartut. Oqaasiilu eqquupput, Issakaarikkummi nuna kingornussaat kuussuup Jordanip eqqaaniittoq naggoril­luinnarmat. (Jos 19:22) Nunaatertik inerititaqarluar­niassammat suleruloor­tarsimassapput. Aammali allat ikiorniarlugit iliuuseqangaartarput. (Kng 1. 4:7, 17) Assersuutigalugu Israalikkut sorsunneranni akiuuteqataapput. Soorlu eqqartuussisoq Baarakki pruffiitilu arnaq Debora akiuunnissamut Israalikkunnik katersor­titsimmata Issakaarikkut kajumillutik sassarput. – Eqq 5:15.

5. Issakaarikkut qanoq ilaarsin­naavagut, aamma sooq taamaaliussaagut?

⁵ Suna ilikkarparput? Jehovap eqiasuilluta taassumunnga kiffartornerput nuannaarutigingaarpaa, soorlu Issakaarikkut eqiasuinnerat nuannaarutigingaaraa. (Oqal 2:24) Assersuutigalugu qatanngutit angutit ilagiinnik isumassuil­luartut naleqar­tingaarpai. (Tim 1. 3:1) Soorunami qatanngutit angutit taakku sakkulersorlutik sorsunnavian­ngillat, Guutilli innuttai anersaakkut ulorianartunut illersorumallugit akiuuttarput. (Kor 1. 5:1, 5; Juud 17-23) Aamma ataatsimiinnernut eqiasuillutik piareersartarput aamma qiimmaal­lannartunik ilagiinnullu ineriar­tuutaasunik oqalugiar­tarlutik. – Tim 1. 5:17.

DANI

6. Danikkut qanoq akisussaaf­filerneqarpat? (Mosesimik 1. 49:17, 18) (Aamma ungalusaq takuuk).

⁶ Mosesimik 1. 49:17, 18 atuakkit. Jaakup Dani pulateriaarsummut imminit anginerusunik – soorlu hestimik hestersumillu – saassus­sisartumut assersuuppaa. Danikkut sapiitsuupput Israalikkullu akeraasa saassus­sinissaannut piareersimasarlutik. Israalikkut nunamut neriorsuutigisamukarmata Danikkut “tunorlersaallutik” ingerlasaramik inuiaqatiminnik illersuisarput. (Mos 4. 10:25) Tamanna Israalikkunnit allanit maluginiar­neqanngik­kaluartoq akisussaaffik taanna pingaaruteqangaarpoq.

7. Jehovamut kiffartor­nitsinni suliassagut pillugit suut eqqaamas­savagut?

⁷ Suna ilikkarparput? Allanit maluginiar­neqarnak Jehovamut kiffartornermi suliaqar­nikuuit? Immaqa ataatsimiit­tarfitsinnik eqqiaaqataanikuuvutit, aserfal­latsaaliuinermi ikiuussimavutit, ataatsimeersuarnermi nammineq kajumis­sutsinnik ikiuussimavutit allanil­luunniit suliaqarsimallutit. Taamaaliorsimaguit nersualaagas­saavutit! Eqqaamajuaruk Jehova pillugu iliuutsitit taassumannga maluginiar­neqarlutillu naleqar­tinneqangaartut. Jehovap ingammik nuannaarutigisarpaa taassumunnga asanninnerit kajumis­sissutigalugu – inunnit allanit nersorneqarnissat pinnagu – kiffartuuk­kaangakku. – Mat 6:1-4.

GAADI

8. Sooq Gaadikkut nunaataat Israalikkut akeraannit saassun­neqariaannaava? (Mosesimik 1. 49:19) (Aamma ungalusaq takuuk).

⁸ Mosesimik 1. 49:19 atuaruk. Jaaku siulittuivoq Gaadi piiaasunit saassun­neqarumaartoq. Ukiut 200-t sinnerlugit tamatuma kingorna Gaadip kinguaavi kuussuup Jordanip kangiani Israalikkut akeraasa qanittuaniittumik nunassipput. Nunap inissisimanera pissutigalugu akeqqanit saassun­neqariaannaavoq. Nersutaateqarfis­saqqissuummalli tassani najugaqarusupput. (Mos 4. 32:1, 5) Ersarippoq Gaadikkut sapiitsuusimasut. Pingaar­nerusumillu nunap piiaasunut illersor­nissaanut Jehovamit ikiorneqar­nissartik upperaat. Allaat sakkutuujutitik aallartippaat naggueqatigiit allat nunap neriorsuutigisap Jordanip kitaaniittup tiguarnissaani ikiorniarlugit. (Mos 4. 32:16-19) Angutit peqanngin­neranni arnat meeqqallu Jehovamit illersor­neqarumaartut upperil­luinnarpaat. Sapiitsuunertillu allanillu ikiuerusunnertik pillugit Jehovamit pilluaq­quneqarput. – Jos 22:1-4.

9. Jehovamik tatigin­ninnerput inuunitsinnut qanoq sunniuteqarpa?

⁹ Suna ilikkarparput? Uagut aamma ajornar­torsiuteqar­tarpugut. Taamaattumik Jehova kiffartorfigiuas­sagutsigu tatiginissaa pingaaruteqangaarpoq. (Tuss 37:3) Uppeqaterpassuatta sanaartornermi peqataajumallutik, pisariaqar­titsiffiunerusumut nuunniarlutik allanil­luunniit akisussaaf­feqarnermi pilliuteqarnikkut Jehovamik tatigin­ninnertik ersersit­tarpaat. Taamaalior­nissaminnut piareersimapput ilimagil­luinnaramikku Jehovamit ikiorneqarumaarlutik. – Tuss 23:1.

AASARI

10. Aasarikkut sunngillat, tamannalu Jehovamut kiffartor­nerannut qanoq sunniuteqarpa? (Mosesimik 1. 49:20) (Aamma ungalusaq takuuk).

¹⁰ Mosesimik 1. 49:20 atuaruk. Jaakup siulittuutigaa Aasarip kinguaavi pisuunngorumaartut, tamannalu eqquuppoq. Aasarikkut Israalimi nuna naggorin­nerpaat ilaat pigilerpaat. (Mos 5. 33:24) Immap Akullersuup killinganiipput Fønikiamilu illoqarfik niuerniarfiusoq pisuujusoq, Siidonni, aamma nunaataan­niippoq. Aasarikkulli ajoraluartumik Kaanaanikkut tassaniittut qimaatis­simanngilaat. (Eqq 1:31, 32) Kaanaanikkunnit ajortumik sunnerneqarlutik pigisalerituun­ngorunarput. Taamaat­tumillu Jehovap piumasaatut iliornissartik kajumis­suseqarfigival­laarunnaarpaat. Assersuutigalugu Baarakkip Israalikkut Kaanaanikkunnut sorsoqqummagit Aasarikkut iliuuseqan­ngillat. Taamaattumik “Megiddop kuuisa eqqaanni” Israalikkut Jehovamit tupinnar­tuliornikkut ajugaatin­neqarnerat misigin­ngilaat. (Eqq 5:19-21) Aasarikkut kanngusus­simassapput Baarakkip Deborallu ajugaanersiutaat tusaramikku, tassanimi ilaatigut ima erinarsorput: Aasari “sineris­samiiginnarpoq”. – Eqq 5:17.

11. Sooq aningaasat inuunermi pingaar­nerpaatis­sanngilagut?

¹¹ Suna ilikkarparput? Jehova pitsaanerpaamik tunerusupparput. Taamaattumik aningaasanik pigisanillu inuunerminni pingaar­nerpaatitsisartut assigerusun­ngilagut. (Uss 18:11) Aningaasanut oqimaaqatigiissumik isiginnit­taaseqar­nissarput sulissutigiuas­savarput. (Oqal 7:12; Hebr 13:5) Pisariaqar­tinngisatta pissarsiarinissaa piffissaajaatigerusun­ngilarput tamatumunngalu nukigut atorusunnagit. Jehovamulli kiffartornerput pingaar­nerpaatit­tarparput nalunngin­natsigu nuannerluin­nartumik siunissaqar­tikkaatigut kissaatigisagullu tamaasa eqqortik­kumaarai. – Tuss 4:9.

NAFTALI

12. Naftali pillugu Jaakup siulittuutaa qanoq eqquussimagunarpa? (Mosesimik 1. 49:21) (Aamma ungalusaq takuuk).

¹² Mosesimik 1. 49:21, tastamantitoĸaĸ 1961-imi naqitigaq, atuaruk.b Jaaku oqarpoq Naftali ‘tusaruminartunik oqaaseqartoq’. Tamatumani Jiisusip nunarsuarmiik­kallarami oqaloriaasia pineqarsinnaavoq. Jiisusip ilinniar­titsillaq­qissuunini tusaamaneqaatigaa, taassumalu ‘illoqarfigisaatut’ taaneqartoq, Kapernaat, Naftalikkut nunaataan­niippoq. (Mat 4:13; 9:1; Joh 7:46) Iisaaja siulittuivoq Jiisusi Zeebulon­nikkunnut Naftalik­kunnullu tassaalerumaartoq “qaamasorsuaq”. (Es 8:23–9:1) Aap, Jiisusi ilinniar­titseriaatsini pissutigalugu tassaavoq “qaamaneq ilumoortoq inunnut tamalaanut qaammaq­qutaasoq”. – Joh 1:9.

13. Jehovamut nuannaarutaasumik qanoq oqaloriaaseqarsin­naavugut?

¹³ Suna ilikkarparput? Inunnut allanut oqaatsigut oqaloriaaserpullu Jehovap soqutigaa. ‘Tusaruminartumik’ Jehovamullu nuannaarutaasumik qanoq oqaloriaaseqarsin­naavugut? Imaanngilaq oqalloris­suusariaqartugut. Pingaar­nerpaatut, ilumoortumik oqaluttariaqarpugut. (Tuss 15:1, 2) Nersualaarin­nittarutta isornar­torsiuinatalu allanut ineriar­tuutaasumik oqaluttarsin­naavugut. (Ef 4:29) Aamma anguniagarisin­naavarput inoqatitsinnik oqaloqateqar­nissamut pikkorin­neruler­nissarput, taamaalilluta Guuterput Jehova pillugu oqaluttuar­nissamut periarfis­saqaler­niassagatta.

JUUSERFI

14. Juuserfi pillugu siulittuut qanoq eqquuppa? (Mosesimik 1. 49:22, 26) (Aamma ungalusaq takuuk).

¹⁴ Mosesimik 1. 49:22, 26 atuakkit. Juuserfi tassaavoq Jaakup nuliatalu asangaagaata, Raakilip, angajul­liliaat. Jaakup Juuserfi, ‘qatanngutiminit immikkoor­titaasoq’ (tastamantitoĸaĸ), tulluusimaarutigisimassaqaa! Jaaku orpittut ippoq erneralu Juuserfi orpimmi avalequtitut illuni. Jaakup siulittuutaata ersersippaa Juuserfi marloriaammik kingornus­saqarumaartoq, tamanna nalingin­naasumik angajul­liunerup pisaraluarpaa. Ruubenilli, Leap angajul­liliaata, angajul­liussutsini annaavaa. (Mos 1. 48:5, 6; Nal 1. 5:1, 2) Siulittuut eqquuppoq Juuserfip erneri marluk, Efraimi Mannarsilu, naggueqatigiin­ngormata nunamilu neriorsuutigisami tamarmik immikkut nunassin­neqarlutik. – Mos 1. 49:25; Jos 14:4.

15. Juuserfip eqqunngitsumik pineqarnini qanoq qisuariarfigaa?

¹⁵ Jaakup aamma eqqaavaa ‘pisissaartut [Juuserfi] kamassaaraluaraat piseriar­tarlugu saassut­tarlugulu’. (Mos 1. 49:23) Tassani qatanngutai assersuutaasumik oqaatigineqarput, taakkuami Juuserfi sinngagisimavaat eqqunngitsumillu pineqar­neranut pisuullutik. Taamaak­kaluartoq Juuserfip qatanngutini Jehovaluunniit narrutsaf­figinngilai. Jaaku oqarpoq Juuserfip ‘pisissia qajannaatsoq assaalu taliilu aalassareqisut’. (Mos 1. 49:24) Juuserfip qatanngutiminut akiniaanani asannit­tuliornermigut nallittuinermigullu taakkua akerliunerat pisissimik pisillugulusooq peerpaa. Juuserfip misilin­neqarnermini tamani Jehova tatigil­luinnarpaa, qatanngutinilu isumakkeerfigiin­narnagit aamma isumagil­luarpai. (Mos 1. 47:11, 12) Juuserfip aqqusaakkani ilinniarfigalugit inuttut pitsaanerulerpoq. (Tuss 105:17-19) Taamaattumik Jehovamit immikkut ittorluinnarmik atorneqarsinnaavoq.

16. Misilin­neqaraangatta Juuserfi qanoq ilaarsin­naavarput?

¹⁶ Suna ilikkarparput? Misilin­neqaraangatta uppeqatitsinniit Jehovamiillu ungasil­linngin­nissarput aalajangiusimasariaqarparput. Eqqaamajuk Jehovap misilin­neqartarnigut uagutsinnik perorsaatis­siissutigisin­naasarai. (Hebr 12:7) Assersuutigalugu pissuserineqartussat ajunngitsut, soorlu nallittuinerup isumakkeerfigin­ninnerullu ineriar­tortittuar­nissaannut ikiorsin­naavaatigut. (Hebr 12:11) Pinertusaarutta Jehovap akissarsisis­savaatigut, soorlu Juuserfimut taamaaliortoq.

BIINIA

17. Biinia pillugu siulittuut qanoq eqquuppa? (Mosesimik 1. 49:27) (Aamma ungalusaq takuuk).

¹⁷ Mosesimik 1. 49:27 atuaruk. Jaakup siulittuutigaa Biiniakkut amaqqutut illutik sorsullaq­qissuujumaartut. (Eqq 20:15, 16; Nal 1. 12:2) “Ullaakkut” Israalikkut kunngeqalermata kunngi siulleq tassaavoq Sauli, Biiniak­kunneersoq. Sauli sorsuttartuuvoq sapiitsoq filisterinullu akiuunnerni siuttuusarluni. (Sam 1. 9:15-17, 21) Ukiorpassuit qaangiummata “unnukkut” dronningip Esterip kunngimullu tullersortip Mordokajip – marluullutik Biiniak­kunneersuusut – Israalikkut Persiamiunit nungutitaanis­saraluannit annaappaat. – Est 2:5-7; 8:3; 10:3.

18. Uagut Biiniak­kutulli qanoq ilumoorfigin­nissinnaavugut?

¹⁸ Suna ilikkarparput? Biiniakkut tulluusimaarutigisimassavaat Israalimi kunngi siulleq naggueqatigigamikku. Kingusin­nerusukkulli Jehovap Daavi kunngitut toqqarpaa kunngius­suserlu Juudakkunnut ingerlateq­qillugu. Naggataatigut Biiniakkut aaqqissuussaq nutaaq tamanna tapersersulerpaat. (Sam 2. 3:17-19) Ukiorpaaluit tamatuma kingorna naggueqatigiissortat allat pikitsitsimmata Biiniakkut Juudakkunnik Jehovallu kunngitut toqqagaanik ilumoorfiginnipput. (Kng 1. 11:31, 32; 12:19, 21) Uagut Jehovamik ilumoorfigin­ninnerput takutis­sinnaavarput taassuma innuttaminut siulersuisussatut toqqagaasa tapersersor­nerisigut. – Tes 1. 5:12.

19. Jaakup toqunngin­nermini siulittuutai uagutsinnut qanoq iluaqutaasin­naappat?

¹⁹ Jaakup toqunngin­nermini siulittuutai iluaqutigisin­naavagut. Siulittuutit taakku qanoq eqquunnersut misissorluaratsigit upperinerulerparput Jehovap siulittuutini eqquutitit­tuaannarai. Jaakullu erneri qanoq pilluaq­quneqarnersut sammigatsigu paasilluar­nerulerparput Jehova nuannaar­tikkumallugu qanoq iliorsin­naalluta.