Jaakup siulittuutai qanoq ilinniarfigisin­naagigut – immikkoortoq 1

1-2. Jaaku toqunngitsiar­nermini sua, aamma sooq? (Aamma asseq takuuk).

JAAKUP ilaquttani ilagalugit Kaanaanimiit Egypteniliar­neraniit ukiut 17-it ingerlareersimapput. (Mos 1. 47:28) Egyptenimi ernini Juuserfi toqusorisimagaluakkani takoqqikkamiuk nuannaarutigingaarpaa. Kiisami ilaqutariillutik ataatsimooq­qilerput. Maannali Jaakup malugisinnaavaa toqunissani qanillisoq. Taamaat­tumillu ernini ilaqutariittut ataatsimiinnermut pingaarutilimmut katersorpai. – Mos 1. 49:28.

² Taamani nalinginnaavoq ilaqutariinni ittuusup toqunngin­nermini ilaquttami katersor­nissaat qanorlu iliornis­saannik ilitsersor­nissaat. Aamma ataatsimiinnermi tamatumani peerutereeruni kina ilaqutariinni ittuussanersoq toqqartarpaa.

3. Mosesimik allakkat siulliit 49:1, 2-miillu suna paasisin­naavarput?

³ Mosesimik 1. 49:1, 2 atuakkit. Jaakukkut ilaqutariittut ataatsimiinnerat nalingin­naasuunngilaq. Jaakumi pruffiitiuvoq. Jehovamillu isumassarsisin­neqarluni kinguaaminut pingaaruteqarluin­nartussanik siunissami pisussanik siulittuisin­neqarpoq.

4. Allaaserisami matumani suna sammissavarput? (Aamma ungalusaq “Jaakup ilaqutai” takuuk).

⁴ Allaaserisami matumani Jaaku ernermi ilaat sisamat – Ruubeni, Simmiuut, Levi Juudalu – pillugit qanoq siulittuinersoq sammissavarput, allaaserisamilu tulliuttumi ernermi sinneri arfineq-pingasut pillugit qanoq siulittuinersoq sammissallutigu. Soorlu paasissagipput, Jaakup oqaasii erneranuin­naanatik aammali taakkua kinguaas­saannut tunngas­suteqarput, taakkulu tassaalerumaarput inuiaqatigiit Israali. Inuiaqatigiit taakkua oqaluttuarisaanerat misissus­savarput paasiniarlugu Jaakup siulittuutaasa eqquunneri qanoq eqqoqqis­saartiginersut. Jaakullu oqaasii iluaqutigalugit paasisin­naavarput Jehova qanoq ilaatigut nuannaar­tissinnaaneripput.

RUUBENI

5. Ruubenip immikkut pisinnaatitaaf­feqaler­nissani suna immaqa naatsorsuutigaa?

⁵ Jaaku Ruubenimut ima oqaaseqaq­qaarpoq: “Illit tassa angajul­liliara.” (Mos 1. 49:3) Ruubenip angajul­lersatut naatsorsuutigisimas­sagunarpaa qatanngutiminit marloriaammik kingornus­saqarnerus­salluni. Aamma naatsorsuutigisimas­sagunarpaa ataatami toqunerata kingorna ilaqutariinni ittunngorumaarluni, ittuussuserlu taanna ernermi ingerlateq­qikkumaaraat naatsorsuutigalugu.

6. Sooq Ruubenip angajul­liussutsini annaavaa? (Mosesimik 1. 49:3, 4)

⁶ Ruubenilli angajul­liussutsini annaavaa. (Nal 1. 5:1) Sooq? Siusinnerusukkut ataatami nuliaasa ilaat, Bilha, innaassimagamiuk. Taanna Jaakup nulianut asangaagaanut, Raakilimut, toqoreersimasumut kiffaasimavoq. (Mos 1. 35:19, 22) Ruubenillu Lea, Jaakumut nuliaasoq alla, anaanagivaa. Imaassinnaavoq Ruubenip Bilha pileritsaas­simagamiuk innaakkaa. Imaassin­naavorluunniit Jaakup Bilha Leamit asaneruleqinammagu taamaaliortoq. Qanorluunniit pissutis­saqaraluarpat iliuusaa Jehovap ataataatalu isaani ajorluinnarpoq. – Mosesimik 1. 49:3, 4 atuakkit.

7. Ruubeni kinguaavilu qanoq pineqarpat? (Aamma ungalusaq “Jaakup siulittuutai” takuuk).

⁷ Jaaku Ruubenimut ima oqarpoq: “Salliutitaaninnik arsaarneqassaatit.” Oqaasiilu eqquupput. Biibilimi allassimasoqanngilaq Ruubenip kinguaavisa ilaasa kunngin­ngornerannik, palasin­ngornerannik pruffiitin­ngorneran­nilluunniit. Jaakulli ernini alanngilaa, Ruubenikkullu Israalimi naggueqatigiin­ngorput. (Jos 12:6) Ruubenip allatigut ajunngitsumik pissuseqarluni ersersitsisimavoq. Allassimasoqan­ngilarlu atoqatigiinnikkut eqqunngitsulioq­qissimaneranik. – Mos 1. 37:20-22; 42:37.

8. Ruubenimut pisimasoq qanoq ilinniarfigisin­naavarput?

⁸ Suna ilikkarparput? Imminut aqunnissaq atoqatigiin­nikkullu eqqunngitsuliun­nginnissap aalajangiusimanissaa sulissutigisariaqarpagut. Ajortulior­nissamut ussernar­torsiulerutta unikaal­lattariaqarpugut eqqarsaatigalugulu iliuusissagut Jehovamut, ilaquttatsinnut allanullu qanoq sunniuteqarsin­naanersut. Aamma eqqaamas­savarput ‘siaruar­tikkagut katersorumaarigut’. (Gal 6:7) Ruubenimulli pisimasup aamma eqqaasip­paatigut Jehovap nallittuisuuneranik. Aalajangiinerlunnitta kingunipiluinut Jehovap illersorneq ajoraluarluta peqqissimigutta eqqortuliorlutalu isumakkeerfigis­savaatigut pilluaq­qullutalu.

SIMMIUUT LEVILU

9. Sooq Jaakup Simmiuut Levilu avoqqaarai? (Mosesimik 1. 49:5-7)

⁹ Mosesimik 1. 49:5-7 atuakkit. Jaakup Simmiuut Levilu tulliullugit oqaluuppai. Oqaatsimigut ersersippaa taakku iluarin­ngilluin­narlugit. Ukiorpaaluit tamatuma siorna Jaakup pania, Dina, Kaanaanimiumit Siikemmimik atilimmit pinngitsaalineqarsimavoq. Soorunami tamanna pissutigalugu Jaakup erneri tamarmik kamarujus­suarsimapput. Siikemmi illoqarfim­mioqataalu uukapaasiaralugit oqarfigaat imminnut kipineqar­tippata eqqisseqatigiumaarlugit. Angutillu akuersillutik kipitipput. Sulili anniaruttortut Simmiuup Levillu “panatik tiguaat, akornuser­neqaratillu illoqarfimmut iserlutik angutit tamaasa toqorarpaat”. – Mos 1. 34:25-29.

10. Simmiuut Levilu pillugit siulittuut qanoq eqquuppa? (Aamma ungalusaq “Jaakup siulittuutai” takuuk).

¹⁰ Jaakup ernermi taama sakkortutigisumik peqqarniitsuliorsimanerat pakatsis­sutigisorujussuuaa. Siulittuutigaa kinguaavi Israalimi siammar­titerneqarumaartut. Ukiullu 200-t sinnerlugit tamatuma kingorna Israalikkut nunamut neriorsuutigisamut isermata oqaasii eqquupput. Simmiuukkut ataatsimoortumik nunamik pissarsin­ngillat, nunali pissarsiaat Juudakkut nunagisaan­niittuuvoq. (Jos 19:1) Levikkullu illoqarfiit 48-t pissarsiaat Israalimi siammar­titersimapput. – Jos 21:41.

11. Simmiuukkut Levikkullu qanoq ajunngitsuliorpat?

¹¹ Naggueqatigiissortat Simmiuukkut Levikkullu siuaasami kukkussutaat ilaanngilaat. Levikkut guutisiorneq ilumoortoq illersor­niarlugu iliuuseqangaarput. Moorsisi inatsisit Jehovameersut piniarlugit qaqqami Siinaajimiitillugu Israalikkut amerlasuut nersuteeraasaliartik guutisiorfigilerpaat. Levikkulli taamaaliun­ngillat, Moorsisilu qaqqamit ammukarmat guutipilus­siortunik piiaaqataapput. (Mos 2. 32:26-29) Jehovap Levikkut immikkut ittumik suliassippai, tassa taakkua ilaat palasitut kiffartor­tunngor­tillugit. (Mos 2. 40:12-15; Mos 4. 3:11, 12) Kingusin­nerusukkut nunamut neriorsuutigisamut isileramik Simmiuukkut Juudakkut sorsoqatigaat Jehovap piumasaa naammas­siumallugu. – Eqq 1:3, 17.

12. Simmiuup Levillu iliuusaat qanoq ilinniutigisin­naavarput?

¹² Suna ilikkarparput? Kamannermit aqunneqan­ngisaannarit. Illit ajortumik pineqarsimaguit asasalluunniit ajortumik pineqarsimappat kamannerit pissusis­samisuuginnarpoq. (Tuss 4:5) Eqqaamas­savarpulli kamassimajuarnerput tamatumalu oqaatsikkut iliuutsikkullu ersersinnera Jehovap iluarin­ngikkaa. (Jaak 1:20) Uppeqatitsinnit uppeqatigin­ngisamil­luunniit naapertuil­luanngitsumik pineqarutta pingaaruteqarpoq Jehovap iluarisaatut qisuariar­nissarput. Taamaalioruttami allanut ajoqutaasin­naasunik oqaaseqarnatalu iliuuseqar­navianngilagut. (Rom 12:17, 19; Pet 1. 3:9) Ilinniarfigisin­naasarput alla tassaavoq angajoqqaatta maligas­siuinerlun­nerattut iliortariaqan­ngitsugut. Angajoqqaatit Jehovap iluarin­ngisaanik iliuuseqar­tarpata isumaqalis­sanngilatit allaanerusumik iliornissannut periarfis­saqarnak Jehovamil­luunniit pilluaq­quneqarsinnaanak. Eqqortulior­niarninni Jehovap ikiussaq­qaarpaatit.

JUUDA

13. Sooq Juudap annilaan­ngatigisimasinnaavaa ataataminit qanoq oqarfigineqas­sanerluni?

¹³ Maanna Juuda ataataminit saaffigineqalerpoq. Angajuni pillugit Jaakup siulittuutai tusareerlugit immaqa Juuda annilaangavoq. Namminermi aamma kukkorujus­suarsimagami. Illoqarfimmik Siikemmimik ujajaaf­figinneqataasimavoq. (Mos 1. 34:27) Aamma qatanngutigiillutik nukartik Juuserfi inussiatut tunisimavaat, ataatartillu Jaaku salloqit­tarpaat isumaqar­niassammat Juuserfi toqusimasoq. (Mos 1. 37:31-33) Kingusin­nerusukkut ukuani, Tamaari, innaappaa taannaasoq nalullugu, atortit­tartuusorigamiummi. – Mos 1. 38:15-18.

14. Jaaku Juudamut qanoq oqarpa, Juudalu qanoq ajunngitsuliorsimava? (Mosesimik 1. 49:8, 9)

¹⁴ Jaaku ajunngitsuinnarnik Juudamut oqaaseqarpoq, Jehovamillu isumassarsisin­neqarluni Juuda kinguaavilu pillugit pissanganartumik siulittuivoq. (Mosesimik 1. 49:8, 9 atuakkit). Juudap takutis­simavaa ataatami inuttut qanoq misigis­suseqarnera pingaar­tingaarlugu. Aamma nukkani Biinia asangaarlugu takutis­simavaa, allaat taanna taarserlugu inussiaatin­ngorusulluni. – Mos 1. 44:18, 30-34.

15. Jaakup Juuda pillugu siulittuutaa qanoq eqquuppa?

¹⁵ Juuda qatanngutiminut siulersuisun­ngorumaartoq Jaakup siulittuutigaa, Siulittuulli aatsaat ukiorpassuit qaangiummata eqquuppoq. Ukiut 200-t missaat tamatuma kingorna Israalikkut Egyptenimiit aniguereersut inoqajuitsuk­koorlutik nunamut neriorsuutigisamukar­neranni Juudakkut siulliullutik ingerlapput. (Mos 4. 10:14) Ukiorpassuillu qaangiutereersut nuna neriorsuutigisaq tiguarniaramikku Juudakkut siulersor­taallutik sorsukkiartorput. (Eqq 1:1, 2) Kunngerpassuillu Juudakkun­neersut Daavi siullersaraat. Juudali pillugu siulittuut suli allatigut eqquukkumaarpoq.

16. Mosesimik allakkat siulliit 49:10-mi siulittuut qanoq eqquuppa? (Aamma ungalusaq “Jaakup siulittuutai” takuuk).

¹⁶ Jaakup siulittuutaanit erserpoq inunnut naassaan­ngitsumik naalakkersuisussaq Juudap kinguaarissagaa. (Mosesimik 1. 49:10 aamma quppernerup ataani ilanngussaq atuakkit). Kunngi taanna tassaavoq Jiisusi Kristusi, Jaakup Shilomik, imaluunniit naalagaasussamik, taasaa. Kingusin­nerusukkut Jiisusi pillugu inngili ima oqarpoq: “Siuaasami Daavip issiavis­saarsuanik Jehovamit Guutimit tunineqassaaq.” (Luk 1:32, 33) Jiisusi aamma ima taaneqarpoq: “Løveq naggueqatigiinnit Juudakkun­neersoq.” – Saqq 5:5.

17. Allanut isiginnit­taatsitsinnut tunngatillugu Jehova qanoq ilaarsin­naavarput?

¹⁷ Suna ilikkarparput? Juuda ingasattumik ajortuliorsimagaluarluni Jehovamit pilluaq­quneqangaarpoq. Juudap qatanngutaasa tamanna tupigusuutigisimanerpaat? Kukkussutaanik eqqarsaatigin­nippallaarsimanerpat? Naluarput, nalunngilarpulli Jehovap naleqartitai tassaasut Juudap ajunngitsortai. Jehova qanoq ilaarsin­naavarput? Uppeqatitta ilaat pingaarutilimmik suliassin­neqarpat imaassinnaavoq paasiuminaatsikkipput taassumalu kukkussutai isiginiar­neruler­toorsin­naallugit. Eqqaamas­savarpulli pissusii nuannersut Jehovap naleqar­timmagit. Jehovap kiffami ajunngitsortaat isiginiar­nerusarpai. Uaguttaaq taamaalior­niartuarta!

18. Juudakkut qanoq ilaarsin­naavagut?

¹⁸ Juuda pillugu siulittuummit ilinniutigisin­naasarput alla tassaavoq naammagit­tartuusariaqarneq. Jehovap neriorsuutini eqqortit­tuaannarpai, imaassin­naavorli eqquutsitsinera utaqqisariaqaripput ilimagisatsin­nilluunniit allaanerusumik eqquutsitsisoq. Juudap kinguaavi ingerlaannaq Jehovap innuttaanik siulersuilin­ngillat. Aalajaal­lutilli tapersersor­tuarpaat Jehovap siulersuisussatut toqqarnikuusai – ilaatigut Moorsisi Levikkuusoq, Josva Efraimikkuusoq kunngilu Sauli Biiniakkuusoq. Uaguttaaq Jehovap nalitsinni innuttaminut siulersuisussatut toqqagai aalajaalluta tapersersor­tuartigit. – Hebr 6:12.

19. Jaakup siulittuutaanit Jehova pillugu suna ilikkarparput?

¹⁹ Jaakup ernermi ilaat sisamat pillugit siulittuutai qanoq ilinniarfigaagut? Ersarippoq inuit pingaartitaat Jehovap pingaar­titarin­ngikkai. (Sam 1. 16:7) Jehova naammagit­tartuullunilu isumakkeerfigin­nikkumavoq. Eqqunngitsuliorneq isiginngitsuusaarneq ajoraluarlugu kiffami naammal­luinnar­tuunissaat naatsorsuutiginngilaa. Allaat ingasattumik ajortuliorsimasut peqqissimil­lutillu allannguippata pilluaq­qusarpai. Allaaserisami tulliuttumi Jaaku ernermi sinnerinut arfineq-pingasunut qanoq oqarnersoq sammissavarput.