Qanoq sorsunnerit atuukkun­naassasut

GUUTIP INUIT NAALAKKERSUISUUNERAT ATORUNNAARSISSAVAI

Sorsunneq Harmagedonnimik Biibilimi taaneqartoq atorlugu Guutip nunarsuarmi naalakkersuisut suujunnaarsissavai.a (Saqqummersitat 16:16) Taamanik­kussamut “nunarsuarmi tamarmi kunngit” katersuutissapput “Guutip Killeqan­ngitsumik Pissaanillip ullussarsuani sorsunnissamut”. (Saqqummersitat 16:14) Harmagedonni sorsunnerit kingullersarissavaat.

Guutip nunarsuarmi naalakkersuisut kunngeqarfimminik taarsissavai. Kunngeqarfillu tamanna qilammin­ngaanniit naalakkersuiumaarpoq suujunnaarsin­neqanngisaan­nassallunilu. (Danieli 2:44) Guutip ernini Jiisusi Kristusi tassani kunngiusussatut toqqarpaa. (Esaja 9:5, 6; Matiusi 28:18) Kunngeqarfikb tamanna tikiuteq­qullugu qinnutigisassagaat Jiisusip malinnitsini ilinniartippai. (Matiusi 6:9, 10) Jiisusip kunngiulluni nunarsuaq tamaat naalakkersuif­figiumaarpaa inuillu tamaasa ataasioqatigiilersillugit.

Inuit naalakkersuisuusut assiginagit Jiisusip oqartus­saassutsini namminis­sarsiorluni atussanngilaa. Naapertuil­luartuugami kinaassusersior­tuunanilu kialuunniit ammip qalipaataa, sumiuussuseq naggueqatigiis­sortaniluunniit pissutigalugu ajortumik pineqar­nissani annilaan­ngatigis­sanngilaa. (Esaja 11:3, 4) Aamma kialuunniit naapertuil­luartumik pineqar­nissani ilungersuutigisariaqas­sanngilaa. Jiisusimmi inuit ataasiakkaat tamaasa pilluar­nissaat isumagis­sammagu. “Annaatissavai piitsoq ikioqqulluni suaartartoq annikil­liortitarlu ikiortis­saaleqisoq. … Aniguisissavai qunutitaanermit nakuuserfigisaanermillu.” – Tussiaat 72:12-14.

Guutip kunngeqarfiata sakkut sorsunnermi atorneqartartut nungutissavai. (Mika 4:3) Aamma inuit eqqisseqatigiik­kusunngitsut toqqissiviil­liortitsisullu suujunnaarsissavai. (Tussiaat 37:9, 10) Angutit, arnat meeqqallu sumiikkaluarunil­luunniit toqqissisimassapput. – Ezekieli 34:28.

Guutip kunngeqarfiata naalakkersuinerani inuit pitsaal­luinnartumik inuussapput. Inuit sorsuutiler­nerannut pissutaasartut – soorlu piitsuuneq, kaattuaannarneq inissaaleqinerlu – peerneqassapput. Kikkut tamarmik naammattumik nerisas­saqarumaarput ilorrisimaar­nartumillu najugaqarfeqarumaarlutik. – Esaja 30:23; Esaja 65:21-23.

Guutip kunngeqarfiata naalakkersuinerani sorsunnerup kingunipilui peerneqassapput. Tassani ilaatigut pineqarput timikkut ajoquser­neqarnerit aamma sorsunnerni pisimasut amiilaarnartut pissutigalugit eqqarsar­taatsikkut misigis­sutsikkullu anniaatit. Allaat toqusimasut nunarsuarmi inuunermut makititaassapput. (Esaja 25:8; 26:19; 35:5, 6) Ilaqutariit najortigiileq­qissapput, sorsunnermilu misigisimasat kingunerlutsitsisartut eqqaamaneerutissapput. – Saqqummersitat 21:4.

GUUTIP AJORTI ATORUNNAARSISSAVAA

Guutip kunngeqarfiata naalakkersuinerani inuit ataasius­suseqarlutik Guuti ilumoortutuaq Jehova,c ‘Guuti asannittoq eqqissisitsisorlu’, guutisiorfigissavaat. (Korintimiunut 2. 13:11) Inuit eqqisseqatigiin­nissamik ilinniar­tinneqassapput. (Esaja 2:3, 4; 11:9) Guutip isumagissavaa inuit ilikkak­kaminnik maleruaasut tamarmik ajorteerullutik naammal­luinnar­tunngor­nissaat. – Romamiut 8:20, 21.

GUUTIP SAATANI ANERSAAPILUILLU SUUJUNNAARSISSAVAI

Guutip kunngeqarfiata sorsuttoqar­tarneranut pisuunerpaajusut, Saatani anersaapiluillu, suujunnaarsissavai. (Saqqummersitat 20:1-3, 10) Taakku ajortumik sunniisin­naajunnaas­sammata ‘eqqissineqangaarumaarpoq’. – Tussiaat 72:7.

Guutip sorsuttoqarun­naarsitsinissamik neriorsuutaa upperisinnaavat! Biibilimi ersersin­neqarpoq taamaalior­nissaminut kissaateqarlunilu pissaaneqartoq:

• Guuti sorsuttoqarun­naarsitsinissamut ilisimas­suseqarlunilu pissaaneqarpoq. (Jobi 9:4) Taassumunnga ajornar­toqanngilaq. – Jobi 42:2.

• Guutip inuit naalliuttut takullugit anniaatigisarpaa. (Mosesimik 1. 6:5, 6) Aamma ‘nakuusernermik nuannarisaqartoq uumigaa’. – Tussiaat 11:5.

• Guutip neriorsuutini eqqortit­tuaannarpai, sallusin­naanngilarlu. – Esaja 55:10, 11; Tittusi 1:2.