Kangiani Qiterlermi sorsunneq – Biibilimi qanoq allassimasoqarpa?

Silarsuaq tamakkerlugu inuppassuit USA-p, Israelip Iranillu akerleriinnerat pillugu ernumapput. Nunat allat sorsunnermut akuliun­neqassappat? Naalakkersuisut eqqissinermik pilersitsisin­naappat?

Biibilimi siulittuutinik ilisimannittut immaqa eqqarsaatigaat Kangiani Qiterlermi akerleriinneq tamanna sorsunnermut Harmageddonimut Biibilimi eqqaaneqartumut attuumas­suteqarnersoq.

Biibilimi qanoq allassimasoqarpa?

Naalakkersuisut Kangiani Qiterlermi sorsunneq unitsis­sinnaavaat?

Biibilimi ima allassimavoq: “Tatigeqinasigit naalagartat, inuit annaassisin­naanngitsut.” – Tussiaat 146:3.

Naalakkersuisut Kangiani Qiterlermi eqqissisitsisin­naanersut ilisiman­ngilarput. Biibilimili erseqqis­sarneqarpoq politikkikkut siuttut, naalakkersuisut inuillu allat ataavartumik eqqissisitsisin­naanngitsut. Guutip kisimi “nunarsuarmi tamarmi sorsunnerit soraarsik­kumaarpai”. – Tussiaat 46:10.

• Paasisaqar­nerorusukkuit atuaruk Napasuliaq Alapernaarsuiffik ima qulequtalik: “Qanoq sorsunnerit unitsin­neqassappat?”

Kangiani Qiterlermi sorsunneq Biibilimi siulittuummut eqquunnerua?

Biibilimi ima allassimavoq: “Sorsuttunik sorsuttullu pillugit nalunaarutinik tusartarumaarpusi. … Inuiaqatigiimmi inuiaqatigiinnik allanik saassus­sisassapput naalagaaffillu naalagaaffimmik allamik saassus­sisassalluni.” – Matiusi 24:6, 7.

‘Naggatissap nalaanut’ ilisarnaataasut ilagaat Kangiani Qiterlermi akerleriinneq. Aamma ilaatigut uppernarsar­neqarpoq ‘ullussani kingullerni’ inuusugut. (Matiusi 24:3; Timuutiusimut 2. 3:1) Nalitsinni sorsunnerit ersersippaat qanittukkut Guutip sorsunnerit inuillu ajornar­torsiutaat tamaasa piiassagai.

• Paasisaqar­nerorusukkuit atuaruk allaaserisaq: “‘Naggatissamut’, imaluunniit ‘ullunut kingullernut’, suna ilisarnaataava?”

Harmagedonni Kangiani Qiterlermi aallartissava?

Biibilimi ima allassimavoq: ‘Sumiiffimmut hebræerisut Harmagedonnimik taaneqar­tartumut katersorpaat.’ – Saqqummersitat 16:16.

Sorsunneq Harmagedonni tassaanngilaq inuit naalakkersuisuisa sorsunnerat Kangiani Qiterlermi aallartittoq. Tassaavorli nunarsuaq tamakkerlugu inuit naalakkersuisuisa Guutillu akornanni sorsunneq.

• Paasisaqar­nerorusukkuit atuaruk allaaserisaq: “Harmagedonimi sorsunneq suua?”

Ernuman­nginnissamut suna iluaqutigisin­naavarput?

Biibilimi ima allassimavoq: “Suulluunniit ernumas­sutigeqinasigit, pissutsinili qanorluunniit ittuni qinunikkut kimigiiser­nikkullu Guutimut ikioqqusarlusilu qujasassaasi.” – Filippimiut 4:6.

Jehovapa kissaatigaa qinunikkut saaffigis­sagitsinni. Guutip isumassoramisigut qinnutigut tusarnaassavai, aamma isumakuluutitta naammagalugit atornis­saannut ikiussavaatigut. (Petrusimit 1. 5:7) Ikiorniarluta paasitip­paatigut sooq sorsuttoqartoq, qanoq unitsin­neqassasut qanorlu anniaatit naalliuutillu atuukkun­naassasut. – Saqqummersitat 21:3, 4.

• Guutip uagutsinnik qanoq tuppallersaanera pillugu paasisaqarusukkuit atuaruk allaaserisaq: “Kan Bibelen give mig trøst?”