Ataatsimeersuarnermut qaaqqusissut
1. Qaaqqusilluni immikkut suliniarneq qaqugu aallartissava?
1 Ilaquttatit ikinngutitilluunniit nalliuttorsiorpalaartumik nereqatiginissaat pilersaarutigigukku tamatumalu piareersarnera suliarujussuuppat akisullunilu qaaqqusissutinik agguaanerit nuannaarutigissavat. Taamatuttaaq ataatsimeersuarnissatsinni anersaakkut nerersuaqatigiinnissap piareersarnera suliarujussuuvoq. Ataatsimeersuarnerup sapaatit-akunneri pingasut sioqqullugit qaaqqusissutinik agguaanissatsinnik Jehovap immikkut pisinnaatitaaffilerpaatigut. Qaaqqusissutinik agguaanissatta qilanaarinissaanut suna iluaqutigisinnaavarput?
2. Suna immikkut suliniarnermi peqataalluarnissatsinnut kajumississutigissavarput?
2 Ataatsimeersuarnitsinni Jehovap ilitsersuussutaasa nakussatsinnartut uagutsinnut qanoq iluaqutaasarnerannik eqqarsaatiginninnerput immikkut suliniarnermi peqataalluarnissatsinnut kajumississutigissavarput. (Es 65:13, 14) Aamma eqqaamasariaqarparput ukiumoortumik suliniartarnerput angusaqarfiulluartarmat. (Ilanngussaq “Angusaqarfiusarpoq” takuuk). Qaaqqusatta ilaat aggissapput ilaat aggeratik. Najuuttut amerlassusaat apeqqutaatinnagit aallussilluarluta immikkut suliniarnermut peqataanerput Jehovamik unnersiutiginninnerussallunilu taassuma tukkortuuneranik ersersitsissaaq. — Tuss 145:3, 7; Saqq 22:17.
3. Qaaqqusissutit qanoq agguaanneqassappat?
3 Qaaqqusissutit qanoq agguaanneqarnissaat, soorlu angerlarsimasoqanngikkaangat allakkanut nakkartitsivimmut nakkartinneqartassanersut tamanulluunniit oqaluussinermi neqeroorutigineqartassanersut, utoqqaanertaqatigiinnit aalajangerneqassaaq. Sapaatip-akunnerata naanerani naleqquppat atuagassiat qaaqqusissutinut ilanngullugit neqeroorutigineqartassapput. Immikkut suliniarneq naammassippat aallussilluarluta peqataanerput Jehovallu anersaakkut nerersuartitsineranut inuit sapinngisamik amerlanerpaat najuunnerat nuannaarutigisinnaassavarput.