Nutaarsiassaq nuannersoq kajumillutit oqaluussissutigiuk
1 ’Kajungeqaanga takujumallusi. . . . Taamaammat uanga kajumikkaluarpunga ilissinnuttaaq . . . iivangkiiliu oqaluutigiumallugu.’ Paulusip qatanngutiminut Romamiittunut allakkani taamatut aallartissimavai. Sooq Paulusip ilungersorluni tikeraarusuppai? Oqarpoq: ’Ilissinnissaaq inerititaqarumallunga . . . Iivangkiiliumi ittoorutiginngilara Guutimit pissaataammat uppertut tamarmik annassutissaat.’ — Rûm. 1:11-16.
2 Paulus utoqqaanertat Efesusimeersut oqaloqatigigamigit aamma kajuminneq taama ittoq ersersissimavaa. Ima oqarfigai: ’Ilisimavusi ullormit Asiamut tikiuteqqaarfinnit . . . nipangiussaqanngitsunga, tamaasali ilissinnut oqaatigigikka ajoqersorlusilu inuit tutsaani [illumiillu illumut, NV] juutinullu griikerinullu’. (ap. sul. 20:18-21) Sumiluunniit oqaluussiffigisartakkamini Paulusip annannissamik tusagassap nuannersup siaruarternissaa Guutillu naalagaaffiata inerititaanik katersuinissaq soqutigisimavaa. Taassuma isumaa ilaartariaqarparput.
3 Imminut ima aperisinnaavugut: ’Uangattaaq najugaqarfinni tusagassap nuannersup oqaluussissutiginissaa ilungersuutigaara? Oqaluussinermut suliassaq suliassaannartut isigaara, imaluunniit kajumillunga amerlasuut tusagassamik nuannersumik oqaluttuukkusuppakka? Qinunikkut periarfissakka eqqarsaatigeqqissaarsimavakka? Oqaluussiffigisartakkap periarfissarisai misilissimavakka, soorlu illumiit illumut angalaarneq, aqqusinermi oqaluussineq, suliffinni oqaluussineq, oqarasuaatikkut oqaluussineq torrutiinnarlugulu oqaluussineq?’
4 Kajumilluarlutit apriilimi immikkut suliniuteqarnermi peqataagit: Oqaluussinitta annertusinissaanut apriili naleqqulluartuuvoq. Nalunaaquttap-akunneri piumasaqaataasut annikillisinneqarsimammata amerlasuut ikiorti-pioneeriunissaminnut periarfissaqarluarsinnaapput. Immaqa illit apriilimi maajimilu ikiorti-pioneeriunissannut periarfissaqarputit. Immaqaluunniit nalunaaquttap-akunneri piumasaqaataasut annikillisinneqarsimammata pioneerinngornissannut qinnuteqarsinnaavutit. Ilagiinni oqaluussisartutut nalunaaquttap-akunneri amerlanerulaartut atorsinnaavigit, taamaalillutit pioneeriunissaminnut periarfissallit allat tapersersorlugit? Taamaalillutit Jehovap uummataa nuannaartissavat.
5 Paulusitut tamatta oqaluussinitsinni kajumissuseqartariaqarpugut. Sapinngisarput tamaat iliuuseqarutta nuannaarnermik kinguneqassaaq. Paulusip kiffartuussinermini illernartumi nuannaarneq nassaarisimavaa. Maligassiuilluarnera ilaartariaqarparput. — Rûm. 11:13; 1 Kor. 4:16.