Oktobarimi atuagassiat eqqumaffigikkit
1 Napasuliaq Alapernaarsuiffik aamma Iteritsi! nutaarsiassaq nuannersoq naassaanngitsoq pillugu tusarliussanik tuppallernartunik qiimmaallannartunillu imaqarput. Atuagassianik eqqumaffiginninnermut ilaavoq peqqissaartumik atuaqqissaarnissaannut piffissaqarfiginninneq isumaliutigisarlugulu oqaluussiffigisartakkami inunnut ilanngutassiat qanoq ililluni neqeroorutigisinnaanerlugit.
2 Siullermik ilanngutassiat atuagassiat saqqaanni saqqummiunneqartut iserfigilluartariaqarput. Amerlasuutigut saqqaani assiliartat pissutigalugit atuagassiat tigujumaneqartarput. Taava ilanngutassiat oqaluussiffigisartakkami soqutigineqassagunartut qinertariaqarput. Inuit oqaluuffigisartakkatsinniittut upperisarsiornermut aalajangersimasumik isumaqarpat? Suut pingaartinnerpaavaat? Tamakku eqqarsaatigalugit piareersartoqarsinnaavoq saqqummiussinissamullu sungiusartoqarsinnaalluni. Atuagassiat oktobarimoortut qanoq saqqummiunneqarsinnaanerannut siunnersuutissaqarpugut:
3 „Napasuliaq Alapernaarsuiffik“ 1. oktobarimoortoq saqqummiutissagukku inussiarnersumik aallarneeriarlutit ima nangissinnaavutit:
◼ „Inuit amerlanerit Biibili nalunngilaat, amerlasuulli oqartarput Biibili paasiuminnaannerarlugu, allallu oqartarlutik Biibili paasineqartussiaanngitsoq. Aammalu allat Biibili sammivissiummut inuunerup erngini malissualinni siulersuisinnaasumut assersuuttarpaat. Illit Biibili qanoq isigaajuk? [Pulaakkat akili.] Malugeriaruk ilanngutassiami uani, ’Biibili paasineqartussiaalluni allataq’-mi, qanoq allassimasoqartoq. [Atuaruk immikkoortortami ’Biibili paasiuminaappallaarpa?’-mi immikkoortoq kingulleq.] Upperaarput Biibili kikkunnilluunniit paasineqalersinnaasoq iluaqutaalersinnaallunilu. Qanoq ililluni tamanna pisinnaasoq atuagassiami tassani atuarsinnaavat.“ Imaluunniit oqarsinnaavutit:
◼ „Isumaqarpit Biibili ullumikkut inuusunut pingaaruteqartoq? [Pulaakkat akili.] Isuma una tusariassagit: [Ilanngutassiami siullermi immikkoortut sisamaat arriitsumik atuaruk unilaarlutillu.] Qanoq isumaqarfigaajuk? [Tusarnaaqqissaarit.] Atuagassiaq atuarniariuk paasiniarlugu sooq taama allassimasoqarnersoq, ilumoornersorlu nammineq nalilissavat.“
4 „Vagttårnet“ 15. oktobarimoortoq neqeroorutigigukku ima oqaannarsinnaavutit:
◼ „Aluu. Ullumikkununa inuit oqaloqatigigikka apeqqut immikkut ittoq pillugu, illillu isummat tusarusukkaluarpara. Tassa eqqarsaatigisimaviuk inuit toqugaangata qanoq pisoqartarnersoq? [Pulaakkat tusarnaaqqissaaruk.] Inuppassuit isumaqarput inuit tamarmik immikkut anersaaqartut imaluunniit tarneqartut toqugaanni inooqqittartumik. Soorlu isumaqarput toqusimasut inuusut qanoq iliornerinik malinnaasartut. Illit aamma taamatut isumaqarpit? [Pulaakkat oqaaseqarli.] Vagttårnet-imi ilanngutassiani naatsuni ukunani apeqqut tamanna sammineqarpoq. Atuagassiat atuarusukkukkit piniakkit. Takanna. Qanoq isumaqarfigineritit tusassallugu qilanaaraara.“
5 „Vågn op!“ 22. oktobarimoortoq atorukku imminut ilisariteriarlutit ima oqarsinnaavutit: „Aperilaarlakkit?“ imalu nangillutit:
◼ „Isumaqarpit nunarsuarmi sumi tamaani sorsunnerpassuit tusartakkavut upperisarsiornermik pissuteqartut? [Pulaakkat tusarnaaruk.] Vågn op!-imi ajoraluartumik taamaannerarneqarpoq, aammali ima apeqquteqarpoq: Upperisarsioqatigeeqarpa eqqissinermik ujartuisunik? Illit qanoq isumaqarpit? [Pulaakkat akili.] Atuagassiami akissutigineqartoq immaqa tupaallaatigissavat, atuarusukkukku pisinnaavat.“
◼ „Ujarikkaaku inuit upperisarsiortunik eqqissinissaq pillugu oqaluinnaratik iliuuseqartunik, upperisarsiortunik Jesusip asanninnissamik inassutaanik maleruaasunik, ujaarlerunnaarsimanngitsut. Isumaqarpit upperisarsiortunik taama ittunik nassaassaqartoq? [Pulaakkat akili.] Atuagassiami uani Vågn op!-imi tamanna soqutiginartumik sammineqarpoq. Atuagassiaq atuarusukkukku piniaruk. Takanna. Qanoq eqqarsalissutigissanerit tusassallugu qilanaaraara.“
6 Sapinngisat tamaat iliuuseqarit atuagassiat matuni tamani neqeroorutiginiarlugit, aamma Biibili oqaluuserissallugu ajornartuni imaluunniit ilinnut ilasseraanngitsunut. Torrutiinnarlugu nalunaajaanissamut periarfissaasinnaasut tamaasa eqqumaffigikkit. Aap, oktobarip qaammataa aamma atuagassianik agguaassinersuaqarfigitigu. (kmD 94/10 Vær bladbevidst i oktober)