Guutip naalagaaffia salliutiguk — unnersiutiginnissutinik pilliuteqartarnikkut
1 Naalagaaffimmik salliutitsisut Jehovamik taassumalu naalagaaffianik oqaluussissutiginninnissartik eqqarsaatigiuaannarpaat. (Tuss. 145:11 — 13) Taassuma aqqanik pilluaqusinissamut nutaarsiassamillu nuannersumik eqqartuinissamut ullut tamaasa periarfissaqartarpoq. (Tuss. 96:2) Tussiaasiortup Jehovamik unnersiutiginninnini nuannaarutigisimavaa ima oqarluni: „Illit nersortuassavatsigit aqqit qujassutigalugu naassaanngitsumut.“ (Tussiaat 44:9) Taassumatut misigigutta Naalagaaffimmik oqaluussissutiginninnermut aalajangersimasumik peqataajuaannarumassaagut.
2 Piffissaq qanoq annertutigisoq oqaluussinermut atortassagipput Jehovap aalajangersimanngilaa, kajumissaarpaatigulli ’soraarata’ unnersiutigissagitsinni. (Epr. 13:15) Pissutsit atukkavut naapertorlugit sapaatit-akunnerini tamani piffissamik Jehovamik unnersiutiginninnermut atuinissarput anguniagarisariaqarparput. Taamaaliortalereersimasut immaqa piffissartik aaqqissuussinnaavaat ilaannikkut, imaluunniit aalajangersimasumik, ikiorti-pioneeritut kiffartorsinnaajumallutik. Ikiorti-pioneeriusinnaasarsimasullu immaqa nalinginnaasumik pioneerinngorsinnaassapput.
3 Pissutsit atukkavut qanorluunniit ikkaluarpata immitsinnut aperisariaqarpugut annerusumik unnersiutiginnissutinik pilliuteqarsinnaanerluta. Suliniarluarneq pingaartitsinerup kingunerisarpaa. Pingaartitsineq Guutip oqaasianik atuaqqissaartarnermit pilerfeqarpoq. Pingaartitsinitta suliatsigut ersersinnissaanik ataatsimiinnerni kajumissisinneqartarpugut. Oqaluussisartunik suliniarluartunik allanik ataatsimooqateqartarnitta ’ajunngitsuliornermut kajumississutigisinnaavarput’. (Epr. 10:24) Ilagiit aqqutigalugit aaqqissuussat tamakkiisumik atorniartarutsigik pilliutivut unnersiutiginnissutaasut immaqa annertusisissinnaavavut.
4 Pruffiiti arnaq Anna Jehovamut kiffartornermi maligassiuilluarsimavoq. Naak 84-inik ukioqaraluarluni ’naalaffik qimanneq ajorsimavaa ullukkullu unnuakkullu . . . Guuti kiffartuullugu’. (Lúk. 2:37) Ilagiit suliniutaannut tamakkiisumik uummateqarluni suleqataanermigut annertuumik nalerisimaarutissaqartarsimavoq. Taassuma aalajaalluni kiffartorsimaneranik Biibilimi oqaluttuaq ullumikkut uagutsinnut assut kajumissinarpoq.
5 Paulus oqarsimavoq ’sanngisuut sanngiitsut qajannassusiisigut kamagissagaat’. (Rûm. 15:1) Qularnanngitsumik ilagiinni ilaaffigisanniittoqarpoq inussiarnersumik ikiuininnik kajumissaarininnillu iluaqutiginnissinnaasunik. Oqaluussiartoqatigiinnissamik isumaqatigiissut tassarpiaasinnaavoq pisariaqartinneqartoq. Immaqa oqaluussisartut ilaat biiliunneqarnissaminik oqaluussiartoqatissiminilluunniit pisariaqartitsivoq. Allat immaqa sapiissuseerussimapput Naalagaaffimmullu ilungersuussissutsiminnik uummarsaaqqittumik kajumissinartumik annertoqqusersuisussamik amigaateqarlutik. Tamatumani immaqa illit iliuuseqarsinnaavutit! (1 Tás. 5:14) Pisariaqartitsineq naapertorlugu ’iluartut ajorsaataannik isumaginninnissamut’ piumassuseqarnikkut Jehovamik unnersiutiginninnerpit annertusisinnissaanik qamuuna kissaateqarnerit ersissaaq. — Rûm. 12:13.
6 Jehovap uagutsinnut iliuuserisimasai iliuuseriumaagassaalu tamaasa taagussallugit ajornarluinnarpoq, pilluaqqussutaanullu tamakkununnga akisinnaanngilarput. Kisianni unnersiutiginnaavarput unnersiutigisariaqarlugulu. Aap, „anerneqartut tamarmik [Jehova] erinalimmik unnersiugissavaat!“ — Tuss. 150:6. (kmD 94/10 Søg først Guds rige . . .)