Jehova unnersiutigissaviuk?

„GUUTI, atit tusaamaneqarpoq; unnersiutigineqartarpoq nunarsuup isui angullugit.“ Korap erneri taamaalillutik siulittuummik tussiaasiorsimapput. (Tussiaat 48:11) Ullumikkut Jehovap nalunaajaasuisa millionilikkuutaat Guuti unnersiutigaat naalagaaffianillu nutaarsiassap nuannersup oqaluussissutigineratigut aqqa ilisimaneqalersittarlugu. Nunani qeqertanilu 232-ni oqaatsit assigiinngitsut 300-nit amerlanerusut atorlugit ’nunarsuup isui’ ilumut angusimavaat.

Suut inuit innuttaaqatigiinnik oqaatsinillu assigiinngitsunik tunuliaqutallit Jehovamik unnersiutiginnilernissaannut kajumissisittarpaat? Pingaartumik Guutip oqaasianik, Biibilimik, eqqorluartumik paasisaqarsimanerminnik qujamasuutiginninnertik kajumississutigisarpaat. Sallusuissutip Biibilimeersup upperisapalaanit ajoqersuutinillu inussiaatitsisunit aniguisissimavai. (Juánase 8:32) Sallusuissutip aamma Guutip pissusiinik tupinnartunik, soorlu asanninneranik, pissaaneranik, ilisimassusianik kiisalu naapertuilluassusianik nallittuineranillu imminnut naligiittunik pingaartitsilernissaannik ikiorsimavai. Guutip ernituaminik, Jesus Kristusimik, inuiaat pillugit utertitsissummik pilliuteqarsimanera paasigamikku inuit eqqortuliorusuttut Jehova unnersiutigerusulerlugulu kiffartorfigerusulersimavaat.

Biibilip atuagartaasa ilaat, sarĸúmersitat, naapertorlugit qilammiut ingioriillutik ima appissimapput: ’Jehova, Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’ (sarĸúmersitat 4:11) Unnersiutiginninneq taama ittoq pisussaasutut misiginerinnarmik pissuteqanngilaq. Tassaavorli Jehovamik ataqqinninneq.

Nutaarsiassaq nuannersoq nalunaajaatigalugu Guuti unnersiutigiuk

Jehova unnersiutigigaanni Jesus Kristus, Guutimik unnersiutiginnittut maligassaalluarnersaat, malinneqartarpoq. Taanna tamanit annermik Guutimik unnersiutiginnissimavoq. Jesusip tumai atuassagaanni Guutip naalagaaffianik nutaarsiassamik nuannersumik oqaluussinermut peqataasariaqarpoq. (Matîuse 4:17, 23; 24:14) Oqaluussineq tamanna tassaalersimavoq nunarsuaq tamakkerlugu Jehovamik unnersiutiginninneq annerpaaq.

Oqaluussineq tamanna pingaaruteqaqimmat Biibilimi annannissamut attuumassuteqarnera ersarissumik saqqummiunneqarpoq. Rûmamiunut agdlagkat 10:13-15-imi allassimavoq: ’Kinaluunniimmi Jehovap aqqanik torlorfiginnittoq annakkumaarpoq. Qanorli ilillutik upperfiginngisartik torlorfigissavaat? Qanorlu ilillutik tusaamanngisartik upperfigissavaat? Qanorlu ilillutik oqaluussisoqanngippat tusassappat? Qanorlu ilillutik aallartinneqanngikkunik oqaluussissappat? Soorlu allassimasoq: „Takusap ila takorannersusia: pisuinnarlutik aggerput ajunngitsut pillugit nutaarsiassanik nuannersunik tusarliisut!“’ (versi 15 Ny Verden-nutsigaq naapertorlugu.)

Siornaannaq Jehovap nalunaajaasuisa nalunaaquttap-akunneri 1 milliardit sinnerlugit oqaluussinermut atorsimavaat. Taamatullu Guutimik unnersiutiginninnerat kinguneqarluaqaaq! Inuit 314.000-t missaasa unnersiutiginneqatigilerpaat imermut morsutsitaanikkut kuisillutik Jehovamut tunniulluinnarlutik.

Taavami 1994-imi Kristusip toquneranik eqqaaniaanermut najuussimasut 12.288.917-it? Taakkua ilaasa 7.000.000-nit amerlanerusut suli nutaarsiassamik nuannersumik oqaluussisartutut Jehova unnersiutigilinngilaat. Pisimasumili pingaaruteqaqisumi tamatumani najuussimammata immaqa unnersiutiginnittartut millioninik arlalinnik amerlanerulersinnaassapput. Soqutiginnittut taakku Jehovamik unnersiutiginnileqqullugit qanoq ikiorneqarsinnaappat?

Ikiorneqarsinnaapput

Soqutiginnittut amerlasuut Jehova unnersiutigerusukkaluarpaat, misigalutilli piumasaqaatit naammassisinnaanagit. Taakkua tussiaasiortup oqaasii uku immaqa iluaqutigisinnaavaat: „Isikka qaqqat tungaannut aarlortippakka, sumit pissava annassutissara? Annassutissara pissaaq [Jehovamit], qilaap nunallu pinngortitsisaannit.“ (Tussiaat 121:1, 2) Qularnanngitsumik tussiaasiortup Jerusalemip qaqqaanut Jehovap naalaffiutaata nunamilu naalakkersuisunngortitaata inissisimaffiannut, isini aarlortissimavai. Tamatumuuna paasisinnaavarput Guuti unnersiutigissagutsigu Naalagaaffialu oqaluussissutigissagutsigu taamaallaat Jehovamit peqatigiissortaanillu ikiorneqarsinnaasugut. — Tussiaat 3:5; Daniel 6:10.

Ullumikkut Jehovamut kiffaarusuttut taassuma nunami peqatigiissortaanit asannittumik ikiorneqarnissartik ilimagisinnaavaat. Assersuutigalugu Jehovap nalunaajaasuisa inuit soqutiginnittut akeqanngitsumik Biibilimik atuaqqissaaqatigineqarnissamik neqeroorfigisarpaat. Ilinniartitaaneq tamanna tassaaginnanngilaq Biibilimi ajoqersuutinik tunngaviusuniinnaq ajoqersorneqarneq. Ilinniartoq ikiorneqartarpoq ilinniarsimasani Jehovallu peqatigiissortai taassuma atugai pingaartileqqullugit.

Taamaattumik nalunaajaasup atuaqqissaaqatigiinnermik aqutsisup atuaqqisaaqatimi isumamigut paasisaqarnissaannaajunngitsoq aammali uummamiugisaqalernissaa isumaginiartarpaa. Atuaqqissaaqatinilu takutinniassavaa Jehovap nunami siunertani naammassiniarlugu qanoq peqatigiissortani atortarai. Atuagassiaaraq Jehovap Nalunaajaasui — Ataasiussuseqarlutik Guutip peqqusaanik silarsuarmi tamarmi naammassinnittut videolu Jehovas Vidner og deres organisation (kalaallisuunngortitaanngitsoq) tamatumani iluaqutaasorujussuusarput.

Aammattaaq kristumiut ataatsimiinneri Jehovamik unnersiutiginnittussat ikiorneqarnissaannut pingaartorujussuupput. Biibilimik atuaqqissaartalerlaaq ataatsimiigiarnissaanut siusissukkut kajumissaarneqarsinnaavoq. Piffissap ingerlanerani paasiumaarpaa ilagiit ataatsimiinnerinut najuuttuaannarnissaq peqataasarnissarlu qanoq pingaaruteqartigisut. (Eprîarit 10:24, 25) Nakkutilliisut uppeqatitik Jehovamillu unnersiutiginnilersussat ikiorluarsinnaavaat ataatsimiinnerit anersaakkut ineriartornartut atoriaannaasunillu unnersuussinertallit piareersartarunikkik.

Meeqqat ikiortakkit Jehova unnersiutigeqqullugu

Ukiuni aggersuni nutaarsiassamik nuannersumik oqaluussisartunngorsinnaajumaartussat amerlasuut ilaat tassaapput meeqqat. Ingammik ataataasut Biibili tunngavigalugu akisussaaffigaat meeqqamik „Jehovap ileqqoreqqusai oqaaqqissaarutaalu malillugit perorsartuarnissaat“. (Evfisumiut 6:4, NV) Angajoqqaaminnit Guutimik mianerinnittunit ajoqersorneqarluaraangamik allaat meeqqat minnerusut Jehova unnersiutigerusulersinnaavaat.

Argentinami niviarsiarannguaq qaammatialuit ingerlaneranni arlaleriarluni ilagiinni utoqqaanertanut orniguttarsimavoq Naalagaaffimmik oqaluussissutiginnittartunngornissaminut ikioqqulluni qinnuigalugit. Piffissap ingerlanerani angajoqqaavisa utoqqaanertallu kuisimanngitsutut oqaluussisartunngornissaa akueraat. Matumiillu matumut Naalagaaffik pillugu tusarliussaq pitsaasumik saqqummiussinnaalereersimavaa. Niviarsiaraq taanna tallimaannarnik ukioqaraluarluni sulilu atuarsinnaanngikkaluarluni Biibilimi allassimaffiit assigiinngitsut sumiinneri nalunngilai. Allassimaffik nassaarereeraangamiuk pulaarfigisani qinnuigisarpaa atuaqqullugu, taavalu allassimaffik nassuiartarlugu.

Ersarippoq utoqqaanertat angajoqqaallu tamarmik Jehovamik unnersiutiginnilersussanik kajumissaarisarnermikkut ikiuisarnermikkullu angusaqarluarsinnaasut. — Ussatit 3:27.

Jehovamut soraajuitsumik attaveqarneq

Illit Jehovap nalunaajaasui sivisungaatsiartumik ilagisareersimavigit sulili oqaluussinermut peqataasalersimanak? Imminut ima apersoruit iluaqutaasinnaassaaq: ’Upperaara sallusuissut nanisimallugu Jehovalu tassaasoq Guuti ilumoortutuaq? Qularinngilara Guutip naalagaaffia tassaasoq inuiaat ajornartorsiutaannut aaqqiissutissatuaq? Eqqunngitsumik upperisarsiorneq silamiullu ileqqorisaat iliuutsillu Jehovap iluarinngisai tamaasa taamaatissimavakka? Guuti taassumalu piumasaqaatai naapertuilluartut ilumut asavakka? (Tussiaat 97:10) Apeqqutit tamakku angerfigisinnaagukkit taava suup Jehovamik unnersiutiginnilernissannut akornusersinnaassavaatit? — Naleqqiuguk apustilit suliáinik agdlagkat 8:36.

Jehovamik unnersiutiginninneq nutaarsiassamik nuannersumik oqaluussinerinnaanngilaq. Eqqortumik ilisimasaqalereersimaguit, ilumoortumik uppissuseqarlutit inuunerillu Guutip piumasaqaataanut naapertuuttunngorsarlugu taava Guutimut attaveqarnerit aalajaallisartariaqarpat. Qanoq ilillutit? Qinullutit Guutimut tunniulluinnartariaqarputit taavalu tamanna takutillugu imermut morsutsitaanikkut kuisillutit. Naassaanngitsumik inuunissat pineqarpoq. Taamaattumik maannakkut Jesusip unnersuussutaa manna maleruaruk: ’Isertarfikkut nerukitsukkut iserniaritsi, isertarfik nerutoqimmat aqqusinerlu sileqimmat aserorsimaffimmut sammisoq, tassuunalu ingerlasut amerlaqaat; isertarfilli nerukippoq, aqqusinerlu ameqaaq inuunartumut sammisoq, taassuminngalu nanisisut ikeqaat.’ — Matîuse 7:13, 14.

Aaqqissuussaaneq maanna atuuttoq ajunaarutaasumik naggatissaminut ingerlatillugu nangaassuteqarnissamut piffissaanngilaq. Jehovamut soraajuitsumik attaveqalernissannut iliuuseqarniarit. Aap, maannakkut apeqqut manna angerfigisariaqalerpat: Jehova unnersiutigissaviuk? (wE 15/3 1995)