Simonii mianersorfigiuk

SIMON Samariamiu inuiaqatigiinni inooqataaffigisamini assut ataqqisaasimavoq. Ukiuni hundredelinni siullerni inuusimavoq, angakkuersaartarneralu tupigusuutigingaaramikku inuit taanna pillugu ima oqartarsimapput: ’Tassaana Guutip pissaanera Angisuumik taaneqartoq.’ — apustilit suliait 8:9-11.

Simonili kristumiutut kuisinnermi kingorna nassuerpoq pissaanermik nammineq pigisimasaminit annerungaartumik nassaassaqartoq. Pissaaneq tamanna tassaavoq Jesusip apustiliminut tunniuttagaa, taakkuninnga anersaap illernartup tupinnartuliorsinnaatitsineranik allanut ingerlatitseqqissinnaalersitsisoq. Tamanna Simonip tupigusuutigingaaramiuk apustilit neqeroorfigigaluarsimavai aningaasanik tuniumallugit imalu oqarluni: ’Uangattaaq pissaanermik tamatuminnga tunisinga, kinaluunniit assannik patigara anersaamik illernartumik pigisaqaleqqullugu.’ — apustilit suliait 8:13-19.

Apustilip Peterip Simon sukannersumik naveersimavaa ima oqarluni: ’Aningaasaatitit ilagalutit aserortussaaqilit, Guutip tunissutaa aningaasanik pisiarisinnaasorigakku. Pissaqarnatillu agguutisiassaqanngilatit oqaatsip tamatuma ilaanik, uummatit Guutip saani peqqusersuinngimmat.’ — apustilit suliait 8:20, 21.

Oqaaseq „simonii“, nassuiarneqarluni tassaanerarneqarsimasoq „oqaluffeqarfinni atorfinnik qaffatsitsinernillu niuerutiginninnermik ajortuliaq“, pisimasumik Biibilimi oqaluttuarineqartumik tamatuminnga aallaaveqarpoq. New Catholic Encyclopedia-mi nassuerutigineqartutut „mattuffiit, palasit alliunerusut, biskoppeqarfik, aap allaat paaveqarfik, ingammik ukiut hundredellit qulingiluassaannit aqqanilissaannut, simoniimik ulikkaarsimapput“. The Encyclopædia Britannica-p qulingiluassaanik naqiteqqissutaani (1878) ima allassimasoqarpoq: „Oqaluttuarisaanerup ingerlanerani paavimik qinersisarsimanerit misissoraanni qularutissaajunnaartarpoq simoniimit sunnersimaneqanngitsumik paavimik qinersisoqarsimanngisaannartoq. Paavimik qinersinermut atatillugu simonii amerlasuutigut mamianarnerpaamik, kannguttaannerpaamik quleqannginnerpaamillu pisarsimavoq.“

Kristumiut ilumoortut simonii mianersorfigisariaqarpaat. Assersuutigalugu, ilaasa annerusunik immikkut pisinnaatitaaffiliisinnaasut nersualaarniaannavittarpaat tuniorarniaannavittarlugilluunniit. Akerlianillu taamatut immikkut pisinnaatitaaffiliisinnaasut immaqa kusanartunik tunisisinnaasunik, immaqalu taamaaliorniartorujussuarnik, nakerisarsioqqajaasarput. Eqqaaneqartuni taakkunani marlunni simonii pineqarpoq, taamaaliornerlu Biibilimi erseqqissumik assuarineqarpoq. Peterip Simon ima kajumissaarsimavaa: ’Taamaattumik allamik isumataarniarit ajorsutsit tamanna tunullugu, Jehovalu qinnuiguuk uummappit isumaliulerneranik isumakkeerfigeqquniaraluarlutit. Malugaakkimmi sungarnitsoornartorsuarmut pisimasutit iluaannernillu nimersimasutit.’ — apustilit suliait 8:22, 23.

Qujanartumik Simonip kissaatigisami eqqunngissusia paasivaa, ilungersorlunilu apustilit ima qinnuigalugit: ’Ilissi Jehova qinnuigisiuk pillunga, sumilluunniit tamakkua oqaatigisassi ilaannik uannut nalliuttoqaqqunagu.’ (apustilit suliait 8:24) Kristumiut ilumoortut oqaluttuami tamatumani ilinniutissaq pingaartoq eqqumaffigaat simoneeqqajaanerit suulluunniit ingalassimaniarsaralugit. (wE 15/11 98)