Kristumiutut qatanngutinnut aningaasanik taarsigassarsiniarsinnaavunga?

SIMONIP nukarlequtaa napparsimavoq nakorsaatinillu pisariaqartitsilluinnarluni. Simonili piitsuuvoq nakorsaatinullu akissaqarani. Qanoruna iliorniassava? Michael, kristumiutut qatanngutaasa ilaat, aningaasatigut atugarissaarneruvoq. Immaqa uffa taassuma aningaasanik taarsigassarsitikkumassagaa. Simonilli qamuuna nalunngilaa taarsigassarsissagaluaruni immaqa qaqugumulluunniit taarsersinnaanaviarnagit.a

Simonip saaffigimmani Michael nalornisoorpoq. Nalunngikkaluarpaa Simon aningaasanik atorfissaqartitsisoq, nalunnginnamiulli ilaquttami pilersorniarnerinnaanni ilungersortorujussuusartoq ilimaginngilaa utertissinnaassagai. Qanoq iliussava?

Nunat ilaanni inuit inuussutissarsiutertik ullormit ullormut annaariataarsinnaavaat nakorsaatinut aningaasartuutinik matussutaasinnaasunik aningaasaataarullutik sillimmaserneqaratillu. Immaqa bankimit aningaasanik taarsigassarsinissaq ajornarluinnarpoq akisuallaarluniluunniit. Ikinngummit aningaasanik atornissaq ajornartoorluinnarnermi aaqqiissutissatut ajornannginnerpaatut issinnaavoq. Allanulli atorniannginnermi arlalinnik pingaartunik eqqarsaatigeqqaagassaqarpoq.

Akissaa eqqarsaatigiuk

Biibili taarsigassarsisumut taarsigassarsisitsisumullu najoqqutassanik imaqarpoq. Tamakku maleruarnerisigut paatsoornerit ajuallannerillu amerlasuut pinngitsoortinneqarsinnaapput.

Biibilimi eqqaasinneqarpugut aningaasanik taarsigassarsinissamik apeqqut suusupageqqunagu. Apustili Paulus kristumiunut Romamiittunut ima allassimavoq: ’Pisassaqarfigitinnaveeritsi [imaluunniit: kimulluunniit sumilluunniit akiitsoqarnaveeritsi], asaqatigiinnermik kisianni; aapparminimmi [inoqamminimmi] asannittup inatsisit naammassivai.’ (Rûmamiut 13:8) Tassa pitsaanerpaassaaq kristumiut allanut taamaallaat asanninnermik akiitsoqarpata. Taamaattumik siullerpaamik imminut aperisariaqarpugut aningaasanik taarsigassarsiniarnissaq pisariaqavinnersoq.

Taarsigassarsiniarnissaq pisariaqavippat akiitsoqarnerup kingunissai eqqarsaatigissallugit silatusaarnerussaaq. Jesus Kristusip ajoqersukkani oqaaqqissaarsimavai pingaarutilinnik aalajangiissagaanni eqqarsarluaqqaarlunilu pilersaarusioqqaartariaqartoq. Ima aperisimavai: ’Kinami ilarsi qaqiffiliorumaguni ingikkallassannginnerpa akissaa naatsorsorlugu, inernissaanut atortussat piginerini.’ (Lúkarse 14:28) Najoqqutassaq tamanna aamma malinneqarsinnaavoq qatanngummut aningaasanik taarsigassarsiniarniaraanni. Aningaasanik taarsigassarsinerup akissaanik naatsorsuinermut ilaavoq qaqugu qanorlu ililluni utertillugit akilersorsinnaanissaannik naatsorsuineq.

Aningaasanik allanut taarsigassarsisitsisoq pisinnaatitaaffeqarpoq paasissallugu qanoq ililluni qaqugulu utertillugit akilerneqassasut. Pissutsit isumaliutigeqqissaaraanni taarsigassarsisitsisoq apeqqutinut tamakkununnga toqqaannartumik akineqarsinnaassaaq. Piffissap sivisuallaanngitsup iluani aningaasat taarsersinnaallugit naatsorsuutigineqarsinnaava? Soorunami ima oqarnissaq ajornannginnerpaavoq: „Pisinnaaleriaruma ingerlaannaq taarsissavakka. Nalunngilat tatigisinnaallunga.“ Akisussaassuseqarnerusumilli pisariaqannginnerpugut? Aap, aningaasat taarsernissaat aallaqqaataanilli aalajangiusimasariaqarparput. Taamaaliornissarput Jehovap piumasaraa. „Guutiitsoq taarsigassarsisarpoq taarsiinngisaannarlunili,“ Tussiaat 37:21-mi allassimavoq.

Taarsigassarsiat, imaluunniit atukkat, qanoq ililluni qaqugulu taarsernissaata naatsorsorneratigut immitsinnut eqqaasissaagut taarsigassarsineq annertuumik pisussaaffiliisoq. Tamatuma qularnanngitsumik pisariaqanngitsumik akiitsoqalernissatsinnik kissaateqarunnaarsissavaatigut. Akiitsoqalinnginnerlu iluaqutaavoq. Ussatit 22:7-imi ima mianersoqqussuteqarpoq: „Taarsigassarsialik taarsigassarsisitsisumut inussiaataalersarpoq.“ Taarsigassarsialik taarsigassarsisitsisorlu anersaakkut qatanngutigiikkaluartik imminnut attaveqatigiinnerat taarsigassarsinermit arlaatigut sunnerneqarsinnaavoq. Allaat sumiiffit ilaanni taarsigassarsisimaneq eqqarsaatigalugu paatsooqatigiinnerit ilagiinni eqqissinermut akornusersuutaasimapput.

Sooq taarsigassarsiniarnerluni nassuiartariaqarpoq

Taarsigassarsisitsisoq pisinnaatitaavoq paasissallugu taarsigassarsisup aningaasat sumut atussanerai. Aamma allanut taarsigassaqarpa? Taamaappat tamanna eqqumaffigisariaqarpaa, taarsigassarsiaminimmi taarsiisinnaaneranut tamanna sunniuteqassammat.

Niuerneq eqqarsaatigalugu taarsigassarsinerup ajornartoornermilu taarsigassarsinerup immikkoortinnissaat pingaartorujussuuvoq. Kristumiu niuernikkut sapiisernermut atugassaminik taarsigassarsinissamut Biibilimik tunngaveqartumik pisussaaffeqanngilaq, qularnanngitsumilli qatanngut nammineq pisuussutiginngisaminik nerisassanut, atisanut nakorsamullu akissaarussimasoq ikiorumassavaa. Tamatumani ammasumik unneqqarissumillu attaveqatigiinneq paatsooqatigiinnernik pinngitsoortitsisinnaavoq. — Evfisumiut 4:25.

Allaganngoruk

Paatsooqatigiinnerit pinngitsoortikkumagaanni isumaqatigiissutigisimasat allaganngorlugit suliarisariaqarput. Taamaanngippat annikitsualuit puiorneqartoorsinnaapput. Taarsigassarsiat annertussusiat taarserneqarnissaatalu piffissaa isumaqatigiissummi allanneqartariaqarput. Taarsigassarsisitsisoq taarsigassarsisorlu tamarmik isumaqatigiissummut atsiortariaqarput, tamarmillu immikkut kopiianik tigumiaqartariaqarput. Biibili naapertussagaanni aningaasatigut isumaqatigiissutit allaganngortariaqarput. Jerusalem Babylonimiunit aserorneqanngitsiartoq Jehovap Jeremias ilisimatissimavaa qanigisami ilaannit nunaminermik pisissasoq. Periaaseq tamatumani atorneqartoq ilinniarfigisinnaavarput.

„Anatotimilu narsaat Hanamelimit pisiaraara aningaasanillu akissaanik uuttuiffigalugu, sekelinik sølviusunik 17-inik,“ Jeremias allappoq. „Pisiarineranullu uppernarsaat allappara naqissuserlugulu, ilisimannittussallu qaaqqullugit aningaasat uuttuummut uuttorpakka. Taava pisiarineranut uppernarsaat tiguara marluinngorlugu allagaq aappaa naqissusigaq aappaalu matuneqanngitsoq, tunniuppakkalu Barukimut Neriap erneranut Masejap erngutaanut, Hanamel akkama ernera ilisimannittuusullu uppernarsaammik atsiuisut Judakkullu illussaarsuup silarliani paarsisut inaanni najuuttut tamaasa najuisillugit.“ (Jeremia 32:9-12) Tamanna taarsigassarsinermut pinnani pisinermut tunngagaluarluni niueqatigiinnermut tunngasutigut erseqqissunik paatsoorneqarsinnaanngitsunillu isumaqatigiissuteqarnissap pingaaruteqassusianik takutitsivoq. — Takuuk Vagttårnet, 1. septembari 1973-imoortoq, qupperneq 406-407.

Ajornartorsiutinik pilersoqaraluarpat kristumiut Jesusip unnersuussutaa Matîuse 18:15-17-imiittoq naapertorlugu aaqqiiniartariaqarput. Utoqqaanertaq tamakkunatigut allanik ikiuisarsimasoq ima oqarpoq: „Tamatigorluinnangajak allaganngorlugu isumaqatigiissusiortoqartarsimanngilaq. Tamatuma kingunerisaanik erseqqissumik paasinartanngilaq taarsigassarsiat qanoq ililluni akilerneqassanersut. Allaganngorlugu isumatigiissusiorneq tatiginninnginnermut ersiutaanngilaq, asanninnermulli ersiutaalluni.“

Isumaqatigiissuteqaraanni sapinngisaq tamaat eqqortinniartariaqarpoq. ’Oqaasersi imaakkili: aap aap, naagga naagga; ilaliussat ajortumit pipput,’ Jesus taama oqarsimavoq. (Matîuse 5:37) Ajornartorsiutip siumut naatsorsuutiginngisatta taarsigassarsiatsinnik piffissaq eqqorlugu taarsiinissatsinnik akornuserpatigut atukkiisoq tamatuminnga paasitikkasuartariaqarparput. Taava immaqa piffissami sivisunerusumi annikinnerusukkuutaarlugu akiliisarnissarput akuerisinnaassavaa.

Akornutissalli nalaatsornikkut pisut akisussaaffitsinnik iperaanissatsinnut patsisiginiarsinnaanngilavut. Jehovamik mianerinnittup oqaatsini sapinngisannguaminik eqqortinniartariaqarpai. (Tussiaat 15:4) Akiitsutsinnik taarsiinissarput kristumiutut pisussaaffigaarput, pisussaaffillu tamanna eqqortinniarlugu pilliuteqarnissatsinnut piumassuseqartariaqarpugut, aamma pissutsit naatsorsuutigisatsitut ingerlanngikkaluarpataluunniit.

Aningaasanik atukkiinissat mianersuuguk

Soorunami taarsigassarsisup kisimiunngitsoq pissutsit eqqarsaatigeqqissaaqqaartariaqarpai. Aamma qatanngutip atorniarfigineqartup akissat naatsorsortariaqarpai. Aningaasanik taarsigassarsisitsinnginnermi pissutsit piviusorsiortumik eqqarsaatigeqqissaaqqaartariaqarput. Biibilimi ima mianersoqqussuteqarpoq: „Assammikkut eqillutik uppernarsaallutik akiitsugalinnut qularnaveeqqusiisunut ilaaniaqinak.“ — Ussatit 22:26.

Qatanngummik aningaasanik taarsigassarsisitsiniarluni aalajanginnginnermi taarsigassarsiniartoq taarsigassarsiaminik taarsiisinnaajunnaaraluarpat qanoq kinguneqarsinnaanera eqqarsaatigisariaqarpoq. Taama pisoqassagaluarpat ilinnut aningaasatigut ajornartorsiutaalissava? Qatanngut ajunnginnerpaamilluunniit siunertaqaraluartoq pissutsit allanngorsinnaapput naatsorsuutigisaalu uniuussinnaallutik. Jâko 4:14-imi ima mianersoqquneqarpugut: ’Ilissi aqagussamik siuneqanngitsusi; inuunersimi qanoq ippa? Pujoruna sivikitsumik ersersinnarluni aanngariartortoq.’ — Naleqqiuguk Nalunaajaasup oqaasii 9:11.

Taarsigassarsisup tusaamaneqarnera eqqarsaatigissallugu silatusaarnerussaaq, ingammik niuernikkut taarsigassarsineq eqqarsaatigalugu. Unneqqarissutut tatigisassaasutullu ilisimaneqarpa, imaluunniit niueqatigiinneq eqqarsaatigalugu silatusaanngitsuua? Ilagiinniittunut allanut aningaasanik atorniakulava? Oqaatsit uku eqqaamassallugit silatusaarnerussaaq: „Nakutikkuminartup upperisarpai oqaaserineqartut tamaasa, silatuulli alloriarnini sianigeqqissaartarpai.“ — Ussatit 14:15.

Ilaannikkut allaat aningaasanik taarsigassarsineq taarsigassarsisumut pitsaasuuneq ajorpoq. Immaqa taarsigassarsineq taassumunnga nammakkersuutinngortarpoq nuannaarutissaanik arsaarisoq. Kissaatigaarput qatannguterput uagutsinnut ’inussiaatinngussasoq’? Immaqa aningaasanik taarsigassarsinera taannalu attaveqatigiinnitsinnik sunniissaaq taarsiisinnaajunnaaraluarpallu isumakulunnermik peqqusiileqinermillu nassataqassalluni.

Pisariaqavippat immaqa aningaasanik atukkiinissamut taarsiullugu tunissuteqarnissarput eqqarsaatigisinnaassavarput, immaqa annertoorsuunngikkaluamik. Biibilimi kajumissaarneqarpugut qatanngutitsinnik ajornartoortunik naakkinninnissatsinnik. „Iluartoq tunisisarpoq erligisaqarnani,’ tussiaasiortoq taama allassimavoq. (Tussiaat 37:21) Qatanngutitsinnik pisariaqartitsisunik sapinngisatsinnik ikiuinissatsinnut asanninnerup killittariaqarpaatigut. — Jâko 2:15, 16.

Iliuutsitit eqqarsaatigilluakkit

Taarsigassarsineq isumaqatigiinngissutaaleriataarsinnaavoq. Taamaattumik taarsigassarsineq aaqqiissutissatut ajornanngitsutut isiginagu aaqqiissutissatut kingullerpaatut isigisariaqarparput. Oqaatigineqareersutut taarsigassarsisoq taarsigassarsisitsisumut unneqqarittariaqarpoq, allaganngorlugulu nalunaaruteqartariaqarpoq qanoq ililluni qaqugulu taarsigassarsiani taarsissanerlugit. Ajornartoorluinnarneq pineqarpat immaqa aningaasanik tunissuteqarneq pitsaanerussaaq.

Michaelip Simon qinnuteqarnerigaluatut aningaasanik atukkinngilaa. Tamatumunngali taarsiullugu aningaasanik ikinnerusunik tunivaa. Simonip aningaasanik tunineqarnini qujamasuutigeqaa, taamaalillunimi meeqqami nakorsaatissaanut akissaqalerpoq. Michaelillu qatanngutinut asanninnini iliuutsimigut ersersissinnaagamiuk nuannaarutigaa. (Ussatit 14:21; apustilit suliait 20:35) Michaelip Simonillu marluullutik qilanaareqaat Guutip naalagaaffiata naalakkersuinerani Kristusip ’piitsumik ikioqqulluni suaartartumik annaassinissaa’ imalu oqartoqartarunnaarnissaa: „Napparsimavunga.“ (Tussiaat 72:12; Jesaja 33:24) Tamanna pitinnagu allatut ajornartumik qatanngummut aningaasanik taarsigassarsiniartariaqalersorissagaluarutta iliuuseriligarput eqqarsaatigeqqissaaqqaartariaqarparput. (wE 15/11 98)

[Quppernerup ataani ilanngussaq]

[Qupp. 25-mi assiliartaq]

Allaganngorlugu isumaqatigiissusiorneq tatiginninnginnermut ersiutaanngilaq, asanninnermulli ersiutaalluni