Guutip naalagaaffianik oqaluussissutiginninnermit nutaarsiassat

Akerliusoq sallusuissummik ilinniarpoq

LIBERIAMI naalagaaffiup inuisa imminnut sorsuunnerat nutaarsiassaqarfinnit eqqartugaasimaqaaq. Inuit tuusintilippassuit toqutaasimapput, sulilu amerlanerusut qimaatitaasimallutik. Naalliuutaasimaqaaq, taamaakkaluartorli inuit ilumoorusuttut suli sallusuissut ilassisarpaat, soorlu misigisap allaatigineqartup tulliuttup takutikkaa:

James qulinilli ukioqarluni atuarfimmi lutherikkut oqaluffeqarfiannit ingerlanneqartumi atuartuusimavoq. Oqaluffiup atuagassiaataani aaqqissuisunngoramili atorfini tunngavigalugu allaaserisanik Jehovap Nalunaajaasuinut akerliuniutinik ilanngussaqartarsimavoq, naak nalunaajaasunik naapitsisimanngisaannaraluarluni.

Piffissap ingerlanerani aaqqissuisutut atorfini qimappaa iluatsilluartumillu unnuisarfimmik piginnittunngorluni. Ullut ilaanni unnuisarfiup saaffiginnittarfianiitilluni qatanngutinik arnanik marlunnik atisarissaartunik pulaarneqarpoq. Atisarissaartuunerat takugamiuk iseqquai. Pulaarnermilli siunertaa nassuiareermassuk oqarpoq: „Oqaloqatiginissassinnut piffissaqanngilanga.” Oqaluussisartut atuagassianik Napasuliaq Alapernaasuiffik-mik Iteritsi!-millu pisartagaqalernissamik neqeroorfigaat — qimagutipallanniassammatalu akuersivoq. Ukiup ataatsip angerlanerani atuagassiat najugaanut takkuttarput, ammarnagilli puussiamut ikiinnartarpai.

Nunamili inuit imminnut sorsuunnerat sakkortusiartuinnarmat Jamesip puussiaq aningaasanik allanillu nalilinnik immerpaa saassunneqalernermik pasitsanniariaruni qimaaniassagami. Ullaat ilaanni illuata tunuani matup eqqannguani qaartartoq qaarpoq, quarsaaqqaqaluni puussiaq tigoriarlugu tuaviinnaq aniguiniarluni qimaavoq. Inuinnaat tuusintilippassuit qimaasut Jamesip ilannguffigai, aammalu taakkunatulli aqqusinermut assiaqutit aqqusaartariaqarpai, tamakkunanilu inuinnaat pigisaannik arsaariarlugit pisuussuteqanngitsut toqunneqaanartarsimapput.

Misissuiffimmi siullermi James apersorneqallatsiarpoq puussiaataalu ammaqquneqarluni. Qiviaramiullu takusani upperinngikkaluarpai. Annilaarutigeqisaminik paasivaa puussiaatini nalilinnik imalik tigusimanagu. Uisakajaarnermini puussiaq Napasuliaq Alapernaarsuiffik-nik Iteritsi!-nillu ammarneqanngitsunik imalik paarlaallugu tigusimavaa. Sakkutuup atuagassiat takugamigit allagartaannilu atia najugaalu allassimasut atuarlugit, oqarfigaa: „Jehovamut nalunaajaasuuvutit. Ilissi malersunngilassi. Nalunngilarput ilissi salluneq ajortusi.” Sakkutuup atuagassiat ilaannik puussiamit tiguseriarluni James oqarfigaa ingerlaqqissinnaasoq.

Misissuisarfinni qulingiluani taama pisoqartarpoq, misissuisuutitat tamarmik James Jehovamut nalunaajaasuusoraat, ajoqusernagulu ingerlaqqitsittarpaat. Maanna Jamesip qujamasuutigeqaa pigisani tigusimannginnamigit. Takoriikkani naapertorlugit qularinngivippaa sakkutuut toqussimassaqaluaraanni pigisani piniarlugit.

Misissuisarfiit kingullersaat siooragineqarnersaallu tikikkamiuk, annilaarutigeqisaminik misissuisarfiup eqqaani sumi tamaani toqungasut takuai. Siooraammingaarnermini Jehova aqqa atorlugu torlorfigaa. Qinnummini Guuti neriorsorpaa toqutaanissamit aniguisissinnaappani inuunermi sinnera kiffartuukkumallugu.

Jamesip puussiaatini sakkutuumut takutippaa, kingumullu oqartoqaqqippoq: „Ilissi malersunngilassi.” Saaffigalugu oqarfigaat: „Qatanngutivit ilaat angut qattornup ilaani atsinnerusumi najugaqarpoq. Orninniaruk uninngavigalugulu”. Taamaalinerani Jamesip Jehovap nalunaajaasui allatorluinnaq isumaqarfigilerpai. Qatanngut angut ornikkasuarpaa, atuagarlu pâratîsime nuname nâgssáungitsumik inûsínauvutita atorlugu biibilimik atuaqqissaarneq aallartinneqarpoq.

Ullut marlussuit qaangiuttut saassussisoqarnera pillugu sumiiffimminit qimaasariaqarpoq. Tamatumuuna James najugaqarfiunngitsumut qimaavoq — atuagaq pâratîsime nuname nâgssáungitsumik inûsínauvutit tigulluarsimallugu allamik nassataqarani. Qaammatit aqqanillit oqaluussisartunut attaveqanngilaq, piffissamilu tamatumani tallimariarluni atuagaq naallugu atuarpaa. Illoqarfimmullu utersinnaanngorami nalunaajaasunit Biibilimik atuaqqissaaqatigineqartarnini ingerlatiinnarpaa siumukarasuarlunilu. Piffissaq sivikitsoq ingerlareersoq kuisippoq, maannakkullu aalajaalluni anersaakkut qatanngutini kiffartoqatigai. (wE 1/11 98)

[Quppernerup ataani ilanngussaq]