Siunissamik qanoq ittumik meeqqatit kissaappigit?

MEEQQATIT tunissutitut, imaluunniit kingornussatut, erlinnartutut isigaagit? (Tussiaat 127:3) Imaluunniit taakkuninnga perorsaaneq aningaasartuutaannartut artornartutut iluanaarutissamik qulakkiivillugu isumalluarfigineqarsinnaanngitsutut isigaajuk? Meeqqanik perorsaaneq aningaasatigut iluanaarutissartaqanngilaq, akerlianilli meeqqat imminnut pilersorsinnaalernissaata tungaanut aningaasartuutaasarpoq. Soorlu kingornussamik nakkutiginninnermi pilersaarusiorluarnissaq pisariaqartoq, taamatut meeqqanik perorsaalluarniarnermi pilersaarusiorluarnissaq pisariaqarpoq.

Angajoqqaajulluartut meeqqamik inuunermi aallartilluartinnissaat kissaatigisarpaat. Silarsuarmi maani ajortunik avaanngunartunillu pisoqartaraluartoq angajoqqaat meeqqatik sernissorniarlugit iliuuseqarsinnaasorujussuupput. Werner Evalu, allaaserisami siullermi eqqartorneqartut, uterfigeriartigik.a

Angajoqqaat isumassuilluartut

Werner oqaluttuarpoq angajoqqaami pisut imminiiginnarnagit atuarfimmi pisartut assut soqutigisaraat. „Siunnersuutigisartagaat atoriaannaasut assut qujamasuutigaakka, aamma isumassuinerat tapersersuinerallu misigisarpara. Perorsaanerminni sukannersuupput, misigiuaannarpungali ikinngutigalugit.“ Evap atuarnini annikilliuutigilermagu sinissaaruttalerlunilu angajoqqaavisa, Franciscop Inezillu, piffissarujussuaq atortarpaat oqaloqatigalugu, eqqarsaatimigut anersaakkullu peqqisseqqinnissaanik ikiorniarlugu.

Francisco Inezilu meeqqatik sernissorniarlugit inersimasutullu inuunermut piareersarniarlugit qanoq iliortarsimappat? Meeqqat mikisunnguuneranniilli ulluinnarni sammisartakkaminnut ilaatittuaannarsimavaat. Qaaqqusaagaangamik meeqqatik ilagiuaannarsimavaat. Aammattaaq eqqortumik unnersuussisarnermikkut meeqqaminnut isumassuinermik ersersitsisarsimapput. Inez oqaluttuarpoq: „Illumi suliassanik, aningaasanik nakkutiginninnissamik namminnerlu atisaminnik isumaginninnissaannik ilitsersuuttarpavut. Aammattaaq sunngornissaminnik eqqarsaatiginninneranni kiisalu pisussaaffimminnik anersaakkullu soqutigisanik oqimaaqatigiissaariniarneranni ikiortarpavut.“

Angajoqqaat meeqqaminnik ilisarisimannilluarnissaat unnersuussisarnissaallu pingaartorujussuuvoq. Maanna immikkoortut pingasut angajoqqaat iluaqutigisinnaasaat sammissavavut: (1) Meeqqasi suliffimmik naleqquttumik qinersiniarneranni ikiorsigik; (2) atuarfimmi suliffigiligassaminnilu tatineqariataarsinnaanerminnik piareersimaffiginninnissaannik ikiorsigik; (3) anersaakkut pisariaqartitaminnik qanoq iliorlutik matussutissiisarnissaannik ilitsersuussigik.

Suliffimmik naleqquttumik qinersiniarneranni ikiorsigik

Suliffik aningaasatigut atukkanuinnaanngitsoq sunniuteqartarpoq, aammali piffissamik annertuumik tigusisarluni. Taamaattumik angajoqqaat meeqqaminnut ajunngitsussamik kissaateqartut meeqqat tamarmik immikkut soqutigisaat piginnaanerilu eqqarsaatigisariaqarpaat. Pisussaassutsiminik pingaartitsisup kialuunniit allanut nammakkersuutaanissani kissaatiginngimmagu angajoqqaat isumaliutigeqqissaartariaqarpaat meeqqatik imminnik ilaqutarilerumaakkaminnillu pilersuinissaannik qanoq iliorlutik ilinniartissanerlugit. Ernerpit panippilluunniit naammaginartumik inuuniarsinnaajumalluni ilinniagaqarnissaa pisariaqassava? Angajoqqaat isumassuilluartut meeqqatik pissutsinik pitsaasunik, soorlu suliumatussutsimik, ilinniarumassutsimik inunnillu allanik peqateqarluarsinnaanermik, ilinniartinniartuartariaqarpaat.

Arnaq Nicolemik atilik ima oqarpoq: „Angajoqqaama asaajartoraangamik ilagiuaannarpaannga. Siunnersorpaannga akissarsiama ilaanik angerlarsimaffimmi aningaasartuutinik matussutisseeqataasarsinnaasunga, sinnerilu nammineq atortassagikka toqqortarlugilluunniit. Taamaalillunga akisussaaffimmik misigillualerpunga kingorna inuuninni iluaqutigeqisannik.“

Qanoq ittumik suliffeqarnissaq Guutip oqaasiani, Biibilimi, ilitsersuussutigineqanngilaq, kisianni pitsaasunik najoqqutassiaqarpoq. Assersuutigalugu, apustili Paulus ima oqarpoq: ’Kinaluunniit suliumanngikkuni nerissanngilaq.’ Kristumiut Thessalonikamiittut aamma ima allaffigai: ’Ilasimi ileqqorlullutik saqisut suliaqarnatik piunngitsorsiortut tusarpavut. Taamaattulli inappavut oqaaqqissaarlugillu Naalakkatsinni Jesus Kristusimi, malunnarnaveersaarlutik suleqqullugit namminerisaminnillu nerisaqartaqqullugit.’ — 2 Tásalûníkamiut 3:10-12.

Inuunerli tassaannaanngilaq suliffittaarneq aningaasarsiornerlu. Angusaqarumatuut piffissap ingerlanerani qularnanngitsumik naammaginnikkunnaartarput paasillugulu ’anori tiguniarsaralugu’. (Nalunaajaasup oqaasii 1:14) Angajoqqaat meeqqatik ataqqisaalernissamik pisuunngornissamillu ilungersuutiginninnissamik kajumissaarnagit taarsiullugu apustili Johannesip oqaasiisa Guutimit isumassarsiarititaasut silatussusiannik takunnissinnaalernissaannik ikiortariaqarpaat: ’Silarsuarluunniit silarsuulluunniit pii asaqinasigik. Silarsuarmik asannittoq Ataatap asanninneranik ilumiugisaqanngilaq. Silarsuarmiittummi suut tamarmik, uinimmut pilerinartut isinullu pilerinartut usorsitsaarutillu inuunerup matuma pii, Ataatamit pinngillat, silarsuarmilli pipput. Silarsuarlu pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’ — 1 Juánase 2:15-17.

Misigissutsikkut pisariaqartitaat qanoq ililluni matussutissinneqarsinnaappat?

Angajoqqaat timersortartunik sungiusaasartut ilinniarfigisinnaavaat. Taakkua sungiusakkamik timikkut angusaqarnerunissaannaat eqqarsaatigisanngilaat, aammali ikiorniartarpaat eqqarsaatinik ajortunik akiuinissaannik taamaalillutik tarnikkut nukittuneruleqqullugit. Ilissi angajoqqaatut qanoq iliorlusi meeqqasi kajumissaarlugillu, ineriartortillugillu iliuuseqarusulersinniarsinnaavisigik?

Rogério 13-inik ukiulik assersuutigisinnaavarput. Timimigut allanngornerit kingunerisaannik qamuuna sakkortuumik eqqissisimanngikkaluarluni angajoqqaami isumaqatigiinngittarnerat soqutiginninnermillu ersersitsisannginnerat pissutigalugu misigissutsikkut tatineqarsimavoq. Inuusuttut taama misigisaqartut qanoq iliuuseqarfigineqarsinnaappat? Naak meeqqat isumakuluutinut sunniinernullu ajortunut tamakkiisumik sernissorneqarnissaat ajornaraluartoq angajoqqaatut pisussaaffik iperaannarneqartariaqanngilaq. Ingasattumik sernissornianngikkaluarlugit meeqqat paasinnittumik perorsarneqarsinnaapput, eqqaamasariaqarporlu meeqqat tamarmik immikkut inuttut pissuseqarmata. Inussiarnernermik asanninnermillu ersersitsisarnikkut meeqqat inuusuttullu toqqissisimasumik misiginissaannut annertuumik iliuuseqartoqarsinnaavoq. Aammattaaq tamanna imminut tatiginerannik ataqqinerannillu nukittorsaassaaq.

Illit nammineq angajoqqaatit misigissutsikkut pisariaqartitannik matussutissiinissamut qanorluunniit piginnaaneqartigisimagaluarpata piginnaanikitsigisimagaluarpataluunniit pingasut makku angajoqqaatut pisussaaffinnik naammassinninniarninni iluaqutigisinnaavatit: (1) Illit nammineq ajornartorsiutitit eqqarsaatiginermit meeqqavit ajornartorsiutaat annikippasikkaluit sumiginnarnaveersaakkit; (2) ineriartornartunik isumaqarluartunillu oqaloqatiginiartakkit; (3) meeqqatit ajornartorsiutinik aaqqiiniarnermut inunnillu allanik peqateqarnermut ajunngitsumik isiginnittaaseqalernissaannik ilinniartikkit.

Birgit inuusuttuaraanini pillugu ima oqaluttuarpoq: „Ilinniartariaqarsimavara inuit allat nammineq piumasatut allanngortinniarneqarsinnaanngitsut. Anaanama oqaaqqissaartarpaanga inuit allat pissutsinik uanga nuannarinngisannik nassaarfigigaangakkit iliuuserisinnaasara tassaasoq ilaarnaveersaarnissaat. Aammattaaq oqarfigisarpaanga pitsaanerpaasoq suli inuusutsillunga uanga nammineq ileqqunnik allanngortitsiniassaguma.“

Meeqqalli ilinniagaqarnissartik misigissutsikkullu pisariaqartitaminnik matussutissiinissartik kisiisaanngitsoq pisariaqartippaat. Imminut ima aperisoqarsinnaavoq: ’Angajoqqaatut pisussaaffiga akisussaaffittut Guutimeersutut isigaara?’ Taamaappat aamma meeqqat anersaakkut pisariaqartitaannik isumassortariaqarput.

Meeqqat anersaakkut pisariaqartitaannik matussutissiineq

Jesus qaqqami oqaluutsimini ima oqarsimavoq: „Pilluarput anersaakkut pisariaqartitaqarnerminnik miserratiginninngitsut.“ (Matîuse 5:3, NV) Anersaakkut pisariaqartitanik matussutissiineq sumik ilaqarpa? Angajoqqaat Jehova Guutimut uppernermik ersersitsisarnermikkut maligassiuilluarnerat meeqqanut assut iluaqutaasarpoq. Apustili Paulus ima allassimavoq: ’Kisianni uppersuseqarnani Guutimut iluaritinneq ajornaqaaq, Guutimut orniguttup upperisassarimmagu tassaasoq, ujarlersinilu akilerumaarai.’ (Eprîarit 11:6) Uppernerli piviusumik isumaqassappat Jehovamut qinusarneq pisariaqarpoq. (Rûmamiut 12:12) Angajoqqaat namminneq anersaakkut pisariaqartitaqarnerminnik miserratiginninngitsut Israelimi eqqartuussisup tusaamasap Samsonip ataataata iliorsimaneratut Guutimit siulersorneqarnissartik ujartortariaqarpaat. (Eqqartuussisut 13:8) Guuti ikioqqullutik qinnuigiinnarnagu aamma oqaasia, Biibili, unnersuunneqarfissatut saaffigisariaqarpaat. — 2 Timûtiuse 3:16, 17.b

Naak meeqqanik pitsaasumik peqqinnartumillu unnersuussineq, misigissutsikkut annertoqqusersuineq anersaakkullu ikiuineq annertuumik suliassartaqaraluartut meeqqanik perorsaaneq pisuunnguallannartunik misigisaqarfiusinnaasarpoq. Ataataq Brasiliamiu marlunnik meeralik ima oqarpoq: „Meeraqarnani inuuneq takorloorsinnaanngilluinnarpara. Nuannersorpassuaqarpoq taakkualu aveqatigisinnaasatsinnik.“ Meeqqat ingerlalluarnerannut nassuiaatitut anaanaasoq oqarpoq: „Ilagiuaannarpavut, ulluinnarnilu sammisartakkavut nuannersuutinniartarpavut. Pingaarnerpaamillu: Meeqqat qinnuttuaannarpavut.“

Priscillap ajornartorsiuteqaraangami angajoqqaami asanninnermik naammagittarnermillu ersersitsisarsimanerat eqqaamavaa. Taanna ima oqarpoq: „Ikinngutiginerpaasarisimavakka, sunillu tamanik ikiortarpaannga. Meeraaninni ’Jehovap tunissutaatut’ pineqartutut misigisimalluinnarpunga.“ (Tussiaat 127:3) Angajoqqaat ilarpassui meeqqatik ilagalugit Biibilimik kristumiullu atuagassiaataannik allanik atuaqqissaarnissamut piffissamik immikkoortitsisarput. Aamma ilissi taamaaliortarpisi? Qasukkarsimanartunik sammisaqarnermi Biibilimi oqaluttuanik najoqqutassianillu eqqartuisarnissigut meeqqasi siunissamut isumallualernissaannik ikiorsinnaavasi.

Meeqqat tamarmik toqqissisimalerpata

Naak ullumikkut meeqqat ilarpassuinut siunissaq siooranartutut isikkoqaraluartoq Guutip oqaasiani neriorsuutigineqarpoq nunarsuaq ungasinngitsukkut kikkunnut tamanut toqqissisimanartunngorumaartoq. Silarsuarmi nutaami Guutip neriorsuutigisaani angajoqqaat meeqqamik isumannaassusiat isumakuluutigisariaarutissavaat! (2 Pîtruse 3:13) Siulittuutip matuma eqquunnissaa takorlooriassagit: „Amaqqup najussavaa savaaraq, milakulaallu savaasaaraq aqupeqatigissavaa. Ussiup piaraa løvellu piaraa mangiaqatigiissapput, nukappiarannguullu paariumaarpai.“ (Jesaja 11:6) Anersaakkut toqqissisimaneq tassani eqqartorneqartoq ullumikkut Jehovamut kiffartortut akornanni assersuutaasumik atuutilereerpoq. Guutip asannittumik isumassuinera tamaani misigineqarsinnaavoq. Angajoqqaat Guutimik asannittut qularinngissinnaavaat Guutip paasigaatik aamma isumakuluutinik ajornartorsiutinillu nalaattakkaminnik aniguiniarnerminni ikiussagaatik. Pisariaqarporli Guutip oqaasianik atuaqqissaartarnissaat taassumalu naalagaaffianik tunaartarinninnissaat.

Maligassiuilluarnikkut meeqqatit aqqutikkut inuunermut naassaanngitsumut sammisukkut ingerlalernissaannik ikiukkit. Jehova Guuti qimaaffigisarukku illit meeqqatillu siunissaq ilimagisamit nuannernerujussuaq misigisinnaalissavarsi. Tussiaasiortutut ima oqartutut isumalluarsinnaalissaatit: ’[Jehova] qiimmattaatigiuk, taassuma tunisarumaarmatit uummativit kissaatigisaanik.’ — Tussiaat 37:4. (wE 15/7 98)

[Quppernerup ataani ilanngussat]